SIBU, 19 Jun – Mensia mayuh ditesau ngitau menira Sarawak ba begunan perintah, premis dagang, sekula enggau rumah dikena ngerichahka agi Pengerami Ngintu Hari Sarawak 2026 ti deka diatur di Sibu kena 20 ngagai 22 Julai tu.
Menteri ti megai tanggungpengawa Pengerami Hari Sarawak 2026, Dato Sri Lee Kim Shin madah, pengerami sekali tu dikearapka richah enggau penatai bala ketuai nengeri kelimpah bemacham program ti ngaul penyereta komuniti.
Nitihku iya, Tuai Pemegai Menua (TYT) Negeri Sarawak, Tun Pehin Sri Dr Wan Junaidi Tuanku Jaafar begulai enggau Toh Puan Datuk Patinggi Fauziah Mohd Sanusi diperambu deka ngulu pengerami nya.
Ku iya nambah, Premier Sarawak, Datuk Patinggi Tan Sri Abang Johari Tun Openg mega disadang datai ngerichahka agi pengerami nya.
Ku Lee, bisi tujuh batang pengerami udah diperambu ungkup pengerami nya nyengkaum Karnival Bejual, Pengerami Terima Kasih ari Jalai Pengarap Bukai, Zumba, Pejalai Penyerakup, sesi Townhall, Gempuru Hari Sarawak enggau Konsert Rayat.
Ku iya nambah, entara pengerami ke disadang nyadi fokus iya nya Pejalai Penyerakup ke deka diatur kena 22 Julai di Dataran Tun Tuanku Bujang enggau tagit penyereta 10,000 iku.
“Dikena nentuka pengawa ngatur enggau lanchar, komiti mit udah ditumbuhka lalu aum mega diatur sehari tu dikena meresa palan sereta ngatur pengawa nyediaka diri ti patut,” ku iya ba aum pengarang berita Pengerami Ngintu Hari Sarawak 2026 ditu, sehari tu tadi.
Iya mega madahka Gempuru enggau Konsert Rayat Hari Sarawak deka dirichah enggau pemerindang ari artis tebilang ari menua tu, enggau nya dikearap ulih matak penatai temuai ari serata nengeri. – RBI
#ruaiberitaiban#newsiban#beritaiban
Rindu | Titih | Kunsika
