BAU, 19 Jun — Enam iku lelaki ke beumur entara 23 ngagai 41 taun ditan pengudah dipelaba bisi kaul enggau pengawa salah guna dadah maya operasyen ke dipejalaika ngelingi Kampung Sibuluh enggau Kampung Bobak Singgai, ditu, pagi tadi.
Ketuai Polis Pelilih Bau, P/Supt Mohd Haide A. Rahman madah, operasyen ke berengkah urung pukul 10.30 pagi nya dipejalaika raban ari Bagi Pansik Jenayah Narkotik begulai enggau raban Indu Opis Polis Pelilih Bau (IPD) Balai Polis BPKK Pelilih Mit (IPD).
Nitihku iya, asil peresa nisih ai kemi keterubah tetemuka semua saspek ke ditan positif dadah.
“Semua individu ke bekaul udah ditan lalu benung dipansik ari baruh Seksyen 15(1)(a) Akta Dadah Berbahaya 1952 ketegal salah guna dadah,” ku iya nengah penerang media sehari tu.
Berindik enggau nya, iya nyemetak madahka Polis DiRaja Malaysia (PDRM) deka terus chakah agi bejalaika pengawa ngelaban penyalah makai dadah lalu enda belembut enggau sebarang piak ke bisi kaul enggau aktiviti nya.
Mensia mayuh ke bisi penerang bekaul enggau pengawa salah guna tauka bedagangka dadah dipinta ngenataika penerang ngagai Talian Hotline Opis Siasatan Jenayah Narkotik (JSJN) Bukit Aman ba lumur 012-208 7222 tauka Talian Hotline JSJN IPK Sarawak ba lumur 017-592 9211 ungkup mantu raban polis ngelaban salah guna dadah di nengeri tu. – RBI
#ruaiberitaiban#newsiban#beritaiban
Rindu | Titih. | Kunsika
