LUNDU, 19 Jun – Siku orang tuai ditemu lesi ba tebing Sungai Batang Kayan tengah hari tu tadi.

Seraban bomba ari Balai Bomba enggau Penyah Penusah (BBP) Lundu berumban ngesah ngagai palan nya pengudah nerima kangau ari mensia mayuh bekaul enggau tetemuka tubuh tudah ba tebing sungai urung pukul 12.50 tengah hari.

PDRM udah nya minta bantu ari JBPM bejalaika pengawa ngangkat tubuh tubuh ari tebing sungai.

“Penerang keterubah ke diulih ngentaska tudah dikelala enggau nama Lipi Jain, siku orang tuai ke beumur urung 70 taun,” ku iya nerang.

Tubuh tudah udah nya dierahka ngagai PDRM ngambika atur nangkanka nya dipejalaika.

Operasyen nya tembu urung pukul 2.30 lemai sebedau bomba mulaika diri ngagai stesyen nya. -RBI

#ruaiberitaiban#newsiban#beritaiban

Rindu | Titih | Kunsika

SERIAN, 19 Jun – Sepenyampau 35 buah gerempung komuniti, rumah sembiang enggau gerempung ba sitak Parlimen P.199 Serian nerima agih belanja penyampau RM350,000 ari Projek Mit Menua Pesisir (MRP) dikena nyukung pengawa bejalaika mayuh macham program enggau aktiviti ti meri pemaik ngagai komuniti menua nya.

Kaban Parlimen Serian, Dato Sri Richard Riot Jaem madah, agih belanja nya disua nengah Pengerami Nyuaka Chek Pemeri Khas Geran MRP/Outrant (OG) Renggat 5/2026 ke diatur ba Bilik Aum Leort Cottage, Kampung Pichin, Serian pagi tadi.

Nitih ku iya, bantu renggat kelima ungkup taun 2026 ngembuan tuju ngenegapka agi pangku pengawa gerempung komuniti dalam bejalaika bemacham aktiviti pengelantang pendiau, pelajar, pemansang nembiak enggau lumba enggau main, kelimpah ari mantu ngenataika servis ti meri empas positif ngagai komuniti.

“Atur tu dikearapka ulih mantu gerempung enggau raban ti bisi kaul bejalaika program enggau aktiviti sida enggau lebih efektif ungkup pengelantang komuniti setempat,” ku iya.

Pengerami nya mega digulu Norlizawati Sabi ti nyadi pengari Opis Residen Bagi Menua Serian, PgR Mustazamaah Bohari ti ngarika Opis RELA Pelilih Serian, Gabriel John ngarika Opis Tanah enggau Survei Serian enggau Effec Anak Valentine ari Opis Betanam Betupi Pelilih Serian.

Program tu entara pengawa ti seruran dipejalaika perintah dikena nentuka gerempung komuniti, rumah sembiang enggau gerempung komuniti di menua pesisir nerima sukung ti patut dikena bejalaika aktiviti ti meri pangka ngagai pemansang rama enggau pengelantang rayat. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 19 Jun – Perintah Sarawak deka bejalaika Operasyen Menih Remang (OPA) pengelama tiga hari berengkah sehari tu nyentuk 21 Jun nyadi atur proaktif dikena nentuka penegap tikas ai ba tekat ai strategik, lalu enggau nya nyamin penerus bekal kuasa karan dalam ngatur pengeraja asal ai nengeri enggau meruan.

Nitihka Chairman Komiti Mutarka Penusah Ngenyit Sarawak (JBNS), Datuk Amar Douglas Uggah Embas, operasyen nya dipejalaika enggau kerejasama Ejensi Mutarka Penusah Ngenyit Menua (NADMA), Opis Meteorologi Malaysia (MET), Soldadu Langit Diraja Malaysia (TUDM) enggau sekeda ejensi ke bekaul enggau tuju nambahka potensial penumbuh ujan ba kandang endur nampung ai enggau palan ke ditagit ke udah dikelala.

Entara kandang endur ke bisi kaul iya nya Tekat Ai Bakun, Tekat Ai Murum, Tekat Ai Batang Ai, Tekat Ai Bengoh, Tekat Ai Matang, Simunjan, Gerugu enggau Tekat Ai Kelalong.

Nitihka penerang ari JPBS, operasyen nya sebagi ari atur intervensyen gaya hari ti diperambu dikena mantu nyaga tikas ai tekat ai ba tikas ti optimum, ngurangka risiko suntuk ai sereta ngenegapka penyikap nengeri tu napi ubah gaya hari enggau fenomena gaya hari ekstrim.

Operasyen nya deka dipejalaika ngena bilun ke terebai ba peninggi urung 5,000 ngagai 9,000 kaki ba kandang endur ke tau nyadi ujan.

Perengka higroskopik baka garam gred industri deka diseraraka ngagai sistem remang ti engkeman dikena meransang penumbuh ujan.

Dikena nentuka pemanah enggau pengelikun operasyen, pengawa matau gaya hari enggau analisis atmosfera deka dipejalaika enggau terus sebedau, maya enggau pengudah operasyen.

Ku Uggah engawa bejalaika operasyen nya mandangka komitmen Perintah Sarawak ti seruran bejalaika pengawa nentuka pengelikun enggau penerus entali ai nengeri tu dikena nyukung guna pemansut kuasa, bekal ai enggau pengelantang pendiau rayat.

“Perintah Sarawak deka terus ngenegapka pengawa nyikap diri enggau atur mitigasi dalam napi pemar ubah gaya hari ti majak enda tentu.

“Pengawa bejalaika operasyen nanam awan tu entara chara proaktif ti dipejalaika nengah kerejasama strategik mayuh bengkah ejensi ungkup pemaik rayat enggau pemansang pelilih menua Sarawak,” ku iya.

Ku iya, operasyen menih awan selalu iya dipejalaika bepelasarka guna teknikal enggau perati ti spesifik baka maya sebun dikena nambahka ujan sereta ngangkatka kualiti angin, tauka lebuh tikas ai tekat ai enggau entali ai besai ba tikas ti baruh ti tau ngeruga bekal ai enggau pemansut kuasa.

Ku iya nerang, pengawa bejalaika operasyen nya enda ulih digaga sepeneka ati laban nya bepanggai ba pansik meteorologi, gaya remang enggau pemisi sistem remang ti engkeman dikena nentuka pemanah enggau pengelikun operasyen nya.

Ejensi ti ngaul diri dalam operasyen nya nyengkaum NADMA, Opis Sapit Premier Sarawak, Sapit Sekretari Perintah (Pentadbiran) Sarawak, MET Malaysia, Kaunsil Penerebai Awam Malaysia (CAAM), TUDM, Opis Menteri Kuasa enggau Telekomunikasyen Sarawak (MUT), Unit Pengelikun enggau Penerit Adat Sarawak UPSM Malaysia Berhad, Sarawak Water Sdn Bhd enggau Unit Komunikasyen Mensia Mayuh Sarawak (UKAS).

Nengah chara bepelasarka teknologi enggau kerejasama strategik entara mayuh bengkah ejensi, Perintah Sarawak tetap komited ngenegapka pengawa ngatur pengeraja asal ai enggau meruan sereta ngangkatka penyikap nengeri dalam napi pemar ubah gaya hari ti majak kompleks. – RBI

#ruaiberitaiban#newsiban#beritaiban

Rindu | Titih | Kunsika

MUKAH, 19 Jun — Polis Diraja Malaysia (PDRM) Pelilih Mukah udah nangkap dua iku lelaki peranak menua tu dalam operasyen nagang penyalah bersepadu ti dipejalaika ba Empang Jalai (SJR) di Jalai Pan Borneo Sibu–Bintulu, Selangau, ditu kemari.

Nitihka penerang Kepala Polis Pelilih Mukah, DSP Muhamad Rizal Bin Alias dua iku saspek ke beumur 32 enggau 48 taun nya ditangkap urung pukul 11.00 pagi pengudah ditemu dalam gaya ti irau maya pengawa meresa dua buah entukar bebida ti dipejalaika raban operasyen.

Asil peresa saspek keterubah tetemuka tiub lutsinsr ti terang ngundan gumpal kristal ti dipelabaka Methamphetamine (syabu) enggau pemerat kasar dipelabaka 0.15 gram.

Taja pia, pengawa meresa saspek kedua nadai tetemuka sebarang barang jenayah.

Taja pia, peresa ai kemi ti dipejalaika ba kededua saspek tetemuka seduai iya positif Amphetamine enggau Methamphetamine.

Saspek keterubah ke gawa nyadi kuli diatu diriman pengelama empat hari nyentuk 23 Jun 2026 dikena mantu pansik, lalu saspek kedua mega udah dilepaska enggau jamin polis nganti proses bedawa.

Kes dipansik ari baruh Seksyen 12(2) Akta Dadah Berbahaya 1952 enggau Seksyen 15(1) Akta Dadah Berbahaya 1952 ungkup saspek keterubah, lalu saspek kedua dipansik ari baruh Seksyen 15(1)(a) akta ke sama.

Kepala Polis Pelilih Mukah nya nyemetak madahka IPD Mukah deka terus komited bejalaika operasyen neritka atur sereta ngelaban aktiviti salah guna dadah di pelilih tu.

Mensia mayuh ke bisi penerang bekaul enggau aktiviti salah guna dadah mega diperansang ngenataika penerang ngagai IPD Mukah nengah lumur 084-871222 tauka sebarang balai polis ke besemak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Photo — Polis Pelilih Mukah

KANOWIT, 19 Jun — Pengawa nyerahka palan projek ari baruh Program Transformasyen Menua Pesisir (RTP) ungkup sitak N.50 Machan udah dipejalaika ti ngaul kerejasama entara Palan Servis Rayat PBB Pampang Machan enggau Opis Parit enggau Entali Ai (DID).

Sesi nyerahka pengawa nya diatur ungkup kunteriktor ke udah dipadu dikena ngepunka pengawa bejalaika projek ke udah dikemendarka sebedau tu.

Entara projek ke bisi disengkaum iya nya ngaga baru Jeti Pendam Nanga Lipus enggau ngaga baru Jeti Rumah Joseph, Menalun.

Nitihka penerang ari Palan Servis Rayat PBB N.50 Machan, pengawa bejalaika projek tu dikearap ulih bejalai enggau lanchar nitihka timpuh ke udah ditetapka sereta meri penguntung terus ngagai peranak menua nya, kelebih agi ba pengawa ngemanahka perengka guna pemun enggau akses komunikasyen di menua pesisir.

Projek RTP tu entara inisiatif perintah ti seruran dipejalaika dalam meri kuasa ngagai pemansang menua pesisir sereta nentuka pengelantang pendiau rayat terus dijaga nengah pengawa nyendiaka infrastruktur ti manah agi sereta sistematik. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MIRI, 19 Jun — Raban Penyaga Mensia Mayuh Malaysia (APM) Miri mujur bejalaika operasyen Kes Nangkap Ular (KMU) pengudah nerima kangau ngenyit bekaul enggau penatai siku ular sawa batik ba kandang endur genturung pendiau di Miri, kena Hari Minggu tu tadi.

Skuad Bravo ti betuaika Pbt. (PA) Alisa binti Ali enggau pengering empat (04) iku raban udah digerakka ngagai endur penusah nyadi lebuh nerima penerang nya.

Lebuh datai ba endur nya, raban operasyen betemu enggau siku orang ke ngaga sebana lelaki beumur 35 taun ti ngeripotka bisi ular sawa batik belalai ba baruh sangkar mayau ba endur iya diau.

Betindak tekala nya nitihka penerang ke diterima, raban ke bejalaika pengawa bejalaika pengawa beratika enggau meresa keterubah ba endur nya dikena nentuka gaya ke likun sebedau operasyen nangkap ular dipejalaika.

Asil ari pengawa ti jampat sereta bejimat, siku ular sawa batik ti dipelabaka pemanjai tiga (3) meter mujur ditangkap ngena teknik nyepit enggau nadai sebarang penusah ti enda manah nyadi.

Pengudah operasyen tembu sereta kandang endur nya dientas likun, Skuad Bravo udah nya mulaika diri ngagai PKOD Miri.

APM ngelalau mensia mayuh ngambika seruran bejejaga, kelebih agi ba kandang endur enggau semak tauka kampung, lalu lengkas betanya ngagai penusah ngenyit MERS 999 enti sema betapi enggau situasyen ti ngaul jelu bisa tauka tau mai penusah.

APM tetap komited nentuka pengelikun komuniti nengah pengawa ti jampat, efisyen sereta profesional ba tetiap operasyen penusah ngenyit. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 19 Jun — Opis Bomba enggau Penyah Penusah Malaysia (JBPM) Sarawak nerima kangau ngenyit bekaul enggau penusah bebadi ba jalai alun ti mungkur sebuah entukar ti tepawah ba kandang endur Lampu Isyarat Simpang Jalai Hollis, urung pukul 11.07 malam kemari.

Seraban ari Balai Bomba enggau Penyah Penusah (BBP) Sri Aman udah dianjung ngelawa palan penusah ke nyadi lalu datai dalam timpuh ke pandak, urung dua kilometer penyauh ari balai nya.

Lebuh datai ba endur nya, raban nya tetemuka sebuah kerita Honda HR-V tepawah kediri sebedau labuh ngagai parit.

Pansik keterubah tetemuka siku mansa lelaki besai tuai ba penuduk deriba lalu enda sedarka diri.

Tim operasyen terus bejalaika pengawa nyelamat ngena perengka khas baka papan tulang belakang enggau tali webbing dikena mansutka mansa ari entukar.

Nangkan ke nya, mansa udah nya disuaka ngagai tim Opis Menteri Pengerai Malaysia (KKM) enggau Unit EMRS ngambika diperubat enggau silik agi.

Pengawa ngidupka nengah ‘resusitasi kardiopulmonari’ (CPR) disediaka raban pengerai ba endur nya.

Taja pia, mansa dientaska bebadi nyawa ba palan penusah nyadi ulih pemesai perubat ke bejalaika pengawa.

Tudah udah nya diserah ngagai Polis DiRaja Malaysia (PDRM) ngambika atur enggau pansik silik agi dipejalaika. Mansa dikelala siku lelaki beumur 28 taun.

Operasyen nya mega ngaul raban Polis DiRaja Malaysia (PDRM) enggau Opis Menteri Pengerai Malaysia (KKM) ti meri bantu ba palan penusah nyadi.

Operasyen nya tembu dijaga pukul 12.30 tengah malam lalu semua raban pulai ngagai stesyen enggau selamat.

JBPM Sarawak ngelalau mensia mayuh ngambika seruran bejimat maya deriba, kelebih agi maya malam hari enggau ba simpang jalai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SPAOH, 19 Jun — Kaunsil Pelilih Betong (MDB) ke nyadi ejensi bejalaika pengawa begulai enggau Palan Servis ADUN N.37 Bukit Saban ngatur sesi nyerahka palan Projek Transformasyen Menua Pesisir (RTP) 2026 rumah panjai Tuai Rumah Lawrence Baraw, Lingit, Anyut, Spaoh.

Projek tu mungkur pengawa ngangkatmanah jalai tama ngagai pendam dikena ngangkatka perengka guna penyambung jalai, pengelikun enggau pengelantang peranak menua nya, kelebih agi ba pengawa besehari-sehari enggau utai ke diguna komuniti.

Maya sesi nyerahka palan nya, bala kunteriktor ke udah dipadu diberi penerang pasal skop pengawa bejalaika projek.

Sida mega diingat nentuka tetiap kereja dipejalai nitihka spesifikasyen teknikal, standard kualiti enggau tusun kereja ti udah ditetapka dikena nentuka pengelanchar bejalaika projek.

Pengawa bejalaika projek tu nyadi sebagi ari pengawa perintah ti seruran dipejalaika dikena ngenegapka pemansang infrastruktur menua pesisir sereta ngangkatka pengelantang pendiau rayat ba kandang rumah panjai enggau ngelingi nya.

Nitihka penerang ti dikunsi nengah ‘Facebook’ rasmi Kaban Kunsil Nengeri (ADUN) Bukit Saban, projek tu mandangka komitmen ti seruran dipejalai dikena nentuka guna asas peranak menua pesisir terus dikemerat sereta dipejalaika berenggat. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

MERADONG, 18 Jun – Pengeransing nerenakka gaya pengidup bepengerai ba raban polis majak ditegapka nengah pengawa ngatur Program Gaya Pengidup Bepengerai (Zumba) ke diatur PERKEP IPD Meradong ke nyadi ba Dewan Mayuhguna IPD Meradong, sehari tu.

Program tu ngembuan tuju deka nerenakka pengawa idup bepengerai, ngerapitka kaul pangan diri sereta nimbal kangau ketuai ngambika aktiviti pengerai tubuh terus nyadi budaya ba raban tim.

Bisi 64 iku pemesai IPD Meradong ti mungkur Pemesai Kanan Polis (PKP), Pemesai Polis Muda (PRP) enggau Pengereja Pengawa Perintah (KTA) nyereta program nya begulai enggau 27 iku kaban PERKEP.

Aktiviti zumba dipejalaika Team Bee Gym Zumba enggau mayuh macham isi eksesais nyengkaum sesi ‘ngangatka isi’, kardio enggau mayuh agi aktiviti dalam nentuka penyereta bulih penguntung pengerai tubuh ti komprehensif.

Program tu mega nyadi pelasar dikena ngenegapka semengat kerejasama enggau begulai entara penyereta nengah pengawa ngaul diri enggau chakah sepemanjai aktiviti nya.

Ungkup selampur, program tu bejalai enggau lanchar sereta nerima timbal ti chukup meransang lebuh semua penyereta mandangka komitmen enggau pengeransing ti tinggi dalam ngemujurka aktiviti nya. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 18 Jun — Universiti Malaysia Sarawak (UNIMAS)) ngelaluka chalun peranak asal Sarawak ti bisi pengelandik minta masuk ngagai program Ijazah Sarjana Muda Sesi Akademik 2026/2027.

Peminta tu dibuka ngagai graduet STPM tauka pemegai Diploma ke sebaka enggau pengelandik ke bedau nerima sebarang tawaran masuk ngagai Palan Pelajar Tinggi Awam (IPTA).

UNIMAS mega ngemeratka chalun ari ruang bilik ke ngembuan penatai pemisi RM4,850 ke baruh, setipak enggau pengawa ngerembaika akses ngagai pelajar tinggi ngagai raban ke ditagit ke patut.

Peminta mesti digaga nengah chara online nengah sistem Nroll_Ugrad UNIMAS nitihka atur ke diberi:

Haribulan minta: 22 Jun 2026 ngagai 17 Ogos 2026

Jam muka: Berengkah ari pukul 12.00 tengahari.

Pautan peminta https://oas.aa.unimas.my/

Chalun dilalau nentuka semua penerang enggau dokumen sukung disediaka enggau penuh sebedau nganjung peminta dikena nyeliahka sebarang penanggul maya proses penilaian.

UNIMAS ngemeratka semina peminta ti nitihka pinta ti udah ditetapka aja deka diperatika ungkup proses ke nangkanka nya. -RBI

#ruaiberitaiban#newsiban#beritaiban

Rindu | Titih | Kunsika