MIRI, 19 Jun — Perintah Sarawak udah ngemendarka agih belanja dikena ngemanahka jalai alun enggau jematan ti nuju ngagai Kampung Apau Nyaring, lalu enggau nya meri pengelantang ngagai peranak ke udah lama betapi enggau pemar ketegal infrastruktur ti balat rusak.
Kaban Kunsil Nengeri (ADUN) Telang Usan, Dato Dennis Ngau madah, pemendar nya sebengkah pemansang ti beguna asil ari aum enggau pengawa ti enda ngetu begulai enggau ejensi ti bekaul mutarka isu jalai alun ba kandang menua Ulu Tinjar.
Nitih ku iya, jalai alun enggau jematan ke balat rusak udah nyadi lebih tiga taun kenyau ari aktiviti nebang kayu ba kandang menua nya abis, lalu meri empas ke besai ngagai pengidup besehari-sehari peranak menua nya.
Ku iya, dalam timpuh nya beberapa situasyen ngenyit udah nyadi nyengkaum pengawa nganjung bantu pemakai ngena bilun engkabang enggau mindah seiku nembiak ngagai SMK Marudi ngambi peresa ketegal akses jalai ti mar.
Taja pan bemacham intervensyen dipejalaika enggau ejensi perintah, iya ngaku pemar agi mengkang laban jalai nebang kayu ke suba urung 37 kilometer pemanjai nya bepalan ba kandang menua dalam ke jauh sereta tusah dilawa.
Berindik enggau nya, taja pan jalai nya deka diambi sereta diintu Perintah Sarawak nengah Malaysian Road Records Information System (MARRIS) tang iya nyemetak madahka chara mutarka enggau lengkas agi diguna dikena nentuka pengelantang pengidup peranak menua nya nyengkaum atur sementara sebedau kereja ngangkatmanah penuh dipejalaika.
Berebak enggau nya, iya mega meri besai terima kasih ngagai Residen Bagi Menua Miri, Galong Luang enggau semua piak ti bekaul ketegal komitmen enggau kerejasama mantu mutarka isu nya ungkup pengelantang peranak menua nya.
Perintah Sarawak disadang deka berengkah ngaga kereja ngemanahka nya dalam timpuh ke semak dikena nentuka akses jalai ngagai kandang endur nya ulih dipulaika baru enggau chara berenggat. — RBI
#Beritalban | Ruai Berita Iban
Rinduka | Titihka | Kunsika
