KUCHING, 22 April — Sapit Menteri Pengerai Mensia Mayuh, Pengawa Berumah enggau Perintah Lokal, Datuk Dr Penguang Manggil ke nyadi Chairman Komiti Pengatur Pengerami Gawai Dayak Sarawak 2026 udah nyadi chairman Aum Komiti Pengatur Pengerami Gawai Dayak Renggat Sarawak Bil.2/2026 ti diatur ba Bilik Aum Besai, Wisma Bapa Malaysia, Kuching, ditu kemari.

Aum nya bela digulu Datuk Majang Renggi, Datuk Jefferson Jamit, Datuk Gerald Rentap Jabu, kelimpah bala ketuai opis, pemesai perintah enggau pengari gerempung ukai dikuasa perintah (NGO) ke nyadi kaban Komiti Pengatur pengerami nya.

Dalam aum nya, bemacham pekara dikerandau enggau komprehensif nyengkaum koordinasyen program, sukut logistik, pengelikun, promosyen enggau ngaul komuniti dikena nentuka tetiap program ti udah diperambu ulih dipejalaika enggau lanchar sereta teratur.

Pemerat mega diberi ngagai kerejasama strategik entara ejensi perintah enggau raban dalam ngenegapka pengawa meri servis sepemanjai pengerami nya.

Entara haribulan beguna ti udah dipesetuju ungkup Pengerami Gawai Dayak Sarawak 2026 iya nya baka tu: Bazar Gawai Dayak & Festival Etnobudaya ti deka diatur di Bandar Baru Permyjaya, Miri berengkah ari 1 ngagai 24 Mei 2026.

Program Niti Daun di Tebing Sungai Kuching kena 20 Jun 2026 enggau Pengerami Makai Lemai Gawai Dayak Sarawak ba Palan Konvensyen Borneo Kuching (BCCK) kena 21 Jun 2026.

Kenu ku Datuk Dr Penguang, komitmen ti tegap ari semua piak beguna amat dalam nentuka pengelanchar bejalaika tetiap program, kelimpah ari nentuka pengerami taun tu ulih diatur enggau lebih teratur, inklusif sereta meri empas tinggi.

Iya nyemetak madahka tetiap komiti ti ngaul diri meseti bejalaika tanggungpengawa ti proaktif sereta efektif dikena nyapai juluk organisasyen.

Ku iya nambah, Pengerami Gawai Dayak ukai semina nyadi pengerami budaya ke besai reti ngagai komuniti Dayak, tang mega nyadi pelasar ke berat dalam ngenegapka penyerakup, ngetanka pesaka asal enggau ngelakuka penyelai budaya Sarawak ngagai temuai dalam enggau menua luar.

Berindik enggau nya, semua piak dipinta terus ngangkatka tikas nyikap diri sereta ngenegapka koordinasyen dikena nentuka Pengerami Gawai Dayak Sarawak 2026 ulih dipejalaika enggau mujur sereta meri pemaik ti komprehensif ngagai rayat enggau selampur nengeri Sarawak. — RBI

TANJUNG MANIS, 22 April — Pengerami Neresa Kampung Pelajar Khas (KMDPK) MSS Renggat Nengeri Sarawak Ke-5 2026 nerima sambut ti enda disadang lebuh iya mujur matak penyereta 25 buah Opis Pelajar Pelilih (PPD) ari serata nengeri.

Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh, madahka penyampau penyereta mega ngerikod penambah ke nyata enggau penambah lebih 300 iku enti dibanding enggau taun ke udah.

“Program baka tu ukai semina meri awak ngagai penyereta mantaika penau diri dalam bidang lumba enggau main, tang mega ulih nambahka pengangkun diri sereta ngerapitka kaul entara komuniti, raban pendidik enggau ejensi ti bekaul,” ku iya ke mega Kaban Kunsil Nengeri (ADUN) Kuala Rajang.

Iya madah munyi nya ba Pengerami Bejadi sereta Nangguh KMDPK nya ba Sekula Sekondari Belawai, sehari tu tadi.

Ba pemansang kebukai, iya madahka Perintah Sarawak udah ngungkupka belanja sepenyampau RM15 juta ungkup pengawa ngaga stadium mini di Tanjung Manis.

“Tu nyadi siti singkang dikena ngenegapka agi pemansang aktiviti lumba enggau main sereta pelajar di kandang menua nya.

“Palan nya ila dikearapka ulih muka mayuh agi peluang ngagai peranak menua tu ngaul diri dalam aktiviti lumba enggau main enggau chara ke lebih diperambu sereta terus dipejalaika,” ku iya.

Nitih ku iya, projek nya dipejalaika ari baruh Ejensi Pemansang Rajang Delta (RADDA) ke nyadi sebagi ari pengawa perintah ngemanahka perengka guna infrastruktur lumba enggau main di menua pesisir.

“Pengawa tu mega dipeda ulih nyungkak pemansang sosio-ekonomi kandang menua, setipak enggau agenda pemansang pelilih menua ti lebih inklusif,” ku iya nandu. -RBI

SEBUYAU, 22 April – Program Sains, Teknologi, Injinir enggau Matematik (STEM) 2026 patut dikerembaika agi dudi hari ila ngambika ulih ngaul mayuh agi sekula di Pelilih Sebuyau, ku Menteri Perengka Guna enggau Telekomunikasyen, Dato Sri Julaihi Narawi ngansak.

STEM Catalysts 2026 sebedau tu udah dipejalaika di Kota Samarahan, Simunjan enggau Betong, lalu enggau nya nyadika penerus pengawa ngenegapka pelajar STEM di serata selatan Sarawak.

“Sebuyau bisi 19 buah sekula primari enggau sebuah sekula sekondari.Aku ngarapka semua nembiak ulih dibai begulai jemah ila ngambika program tu lebih besai reti sereta meri empas ke besai agi,” ku iya nambah.

Julaihi madah munyi nya ba pengawa ngelancharka program nya ti nyadi ba Sekula Primari (SJK) Chung Hua Sebuyau.

Ku iya, program baka tu terus nyadi pelasar ke beguna dalam ngenegapka penau biak menua pesisir nengah penerang tumu ngagai bidang STEM.

Iya mega ngemeratka pemesai guna numbuhka pelasar pelajar STEM kenyau ari renggat sekula primari ngambika ulih ngadaka rebak ti bepengelandik jemah ila.

Nitih ku iya, pengawa ngenegapka pengerindu ngagai STEM ba nembiak menua pesisir beguna amat dikena nyikap diri napi pemar ekonomi digital.

“Aku pechaya program tu engkeman endar, kelebih agi ungkup nembiak menua pesisir.

“Nengah chara nerenakka pengerindu tumu ba STEM, iya nyadi pengepun ngagai sida ngaul diri dalam bidang tu ba tikas ke tinggi agi jemah ila,” ku iya.

Program ke diatur Opis Menteri Pelajar, Inovasyen enggau Pemansang Bakat Sarawak nengah kerejasama Sarawak Skills enggau Universiti Teknologi Sarawak ngaul 13 buah sekula ti disereta lebih 260 iku nembiak.

Iya ngembuan tuju deka ngerapitka seraka akses ngagai pelajar STEM di menua pesisir nengah chara belajar praktikal, pengawa pemandang teknologi enggau demonstrasyen interaktif.

Sama bisi datai iya nya Loh Boon Piaw enggau Ismail Suhai, ngarika Opis Pelajar Pelilih Simunjan. -RBI

KATIBAS, 22 April — Projek ‘Smart Rural Carbon Monitoring’ (SRCM) Katibas bisi potensial nyadi inisiatif pemungkal di Sarawak enggau Malaysia ba pengawa ngenegapka pengawa ngintu kampung enggau meruan nengah pengawa ngena teknologi moden, kelebih agi di menua pesisir.

Kaban Kunsil Nengeri (ADUN) Katibas, Lidam Assan madah, projek nya ngempung teknologi maju baka satelit, dron, Light Detection and Ranging (LiDAR) enggau pemintar tiru (AI) ngambika pengawa matau karbon kampung ulih dipejalaika enggau komprehensif, betul sereta enda ngetu.

Nitih ku iya, pengawa bejalaika inisiatif tu setipak enggau aspirasyen Strategi Pemansang Pasca COVID-19 2030 (PCDS 2030) ti ngemeratka pemansang ti meruan sereta transisyen nuju ekonomi gadung nyadi batang pengerembai pemansang nengeri.

“Projek tu ukai semina nyukung pengawa ngintu enggau nyaga rampa menua, tang mega muka peluang ekonomi baru nengah pengawa ngasilka kredit karbon, narit puku bepelasarka Rampa Menua, Sosial enggau Tadbir Urus (ESG), kelimpah ari ngemanahka pengawa ngena lebih 20,000 hektar Tanah Adat Bansa Asal (NCR) Native ti enda ngaul pengawa nebang kampung,” ku iya nengah sebengkah penerang sehari tu.

Ku iya nambah, chara bepelasarka teknologi tu dipelaba ulih nambahka pemanah pengawa ngatur pengeraja asal, kelimpah ari meri nilai tambah ngagai komuniti lokal nengah pengawa ngaul diri dalam ekonomi karbon ti majak ngerembai ba renggat global.

Projek CRSM Pematau Karbon Menua Pesisir Pintar Katibas dikearapka ulih nyadi model rujukan dalam pengawa nyemelaka pemansang ekonomi enggau pengelantang rampa menua, lalu enggau nya ngenegapka komitmen Sarawak nuju jemah ila ti kurang karbon sereta tan. — RBI

BETONG, 22 April — Siku baya ditemu tepekul dalam bubu ikan enggi siku peranak ba kandang menua Sungai Pasa, tumu pagi tadi, ti ngasuh peranak menua nya irau ati.

Penusah nya diperatika orang ke ngempu bubu nya sebedau Raban Penyaga Pengelikun Mensia Mayuh Malaysia (APM) Pelilih Betong ditelefon urung pukul 8.21 pagi minta bantu.

Berindik ari nya, lima iku raban APM dianjung ngagai endur penusah nya nyadi ngambika bejalaika operasyen nangkap jelu nya.

Lebuh datai ba endur nya, tim APM tetemuka siku baya baya tepekul ba bubu ikan lalu enda ulih ngelarika diri.

Bala raban ke bejalaika pengawa udah nya nyendiaka perengka nyengkaum tali berikan dikena nentuka proses nangkap ulih dipejalaika enggau likun sereta ulih dijaga.

Baya baya ke ngembuan pemesai urung lima kaki pemanjai enggau pemerat 15 kilogram nya mujur ditangkap ngena teknik nyintak.

Sepemanjai operasyen nya dipejalaika, reptilia nya ditemu enda agresif sereta nadai meri sebarang keruga ngagai raban ke bejalaika pengawa.

Pengudah mujur ditangkap, baya nya dibai ngagai Palan Kawalan Operasi Pelilih Menua Betong ngambika dipejalaika enggau silik agi sebedau dilepaska pulai ngagai endur asal iya diau.

APM ngelalau mensia mayuh ngambika seruran bejejaga sereta lengkas ngeripot ngagai opis bekuasa nyema betemu enggau jelu siga ti tau mai penusah, kelebih agi ba kandang endur ke besemak enggau sungai sereta genturung pendiau. — RBI

MIRI, 22 April – Balai Bomba enggau Penyah Penusah (BBP) Lutong nerima pemeri dua unit tinso dikena ngenegapka penyikap enggau pengulih operasyen bejalaika pengawa nyelamat.

Pemeri nya mungkur siti unit Stihl MS 382 enggau siti unit Stihl MS 162, ti dikenataika Sapit Menteri Dagang Temuai, Seni enggau Main Asal ti mega Kaban Parlimen P.219 Miri, Chiew Choon Man.

Pengawa nyerahka pemeri nya udah diatur ba Bilik Aum BBP Lutong kena sehari tu tadi, lalu dipenyadika Pemesai Tugas Khas ungkup Parlimen P.219 Miri, Christopher Jemat ak Amie ti ngarika Kaban Parlimen Miri.

Sama bisi datai Pemesai Pentadbiran Parlimen Miri, Mellyvienita Usun enggau Sekretari Opis Parlimen Miri, Hazfyra Zalisha binti Hir Azlan.

Ketuai Balai Bomba enggau Penyah Penusah Lutong, PBT II Henry ak Jugah, dalam jaku iya, meri pengaga ati ngagai pemeri ti dikumbai iya amat besai reti dalam mantu ngangkatka pemanah operasyen, kelebih agi ba gaya penusah ngenyit ti ngaul pengawa nebang enggau nyelamat.

Nitih ku iya, penambah perengka tu deka meri empas ke manah ngagai tikas penyikap raban dalam napi bemacham penusah ke nyadi ba kandang endur operasyen.

Sekeda raban BBP Lutong mega bisi ngulu ba pengerami nya nyengkaum PB Mikeson bin Mitter enggau PBB Manuel Tarang Musa. -RBI

KUCHING, 22 April — Adabi Consumer Industries Sdn. Bhd. udah ngatur penemuai rasmi ngagai Kaunsil Lada Malaysia (MPB) kena 14 ngagai 15 April 2026 tu tadi dikena mansik potensial kerejasama strategik dalam ngenegapka pemansang industri lada menua tu sechara penuh.

Penemuai nya betuju nambahka pemereti ati ngagai kesemua rentayan rega industri lada, mungkur aspek betanam komersial, proses asil ari renggat ladang nyentuk kilang, kelimpah ari chara analisis penentu kualiti ti dipejalaika ba Makmal Kawalan Kualiti MPB.

Rambau penemuai nya, sesi Latih Jurulatih (TOT) begulai enggau pemesai pemansik MPB mega bisi diatur dikena meri kelala ngagai asil pansik pemadu baru enggau inovasyen bekaul enggau produk bepelasarka lada.

Inisiatif tu dipeda nyadi pelasar ke beguna dalam nyukung pengawa mindahka penemu enggau teknologi ngagai industri, kelebih agi dalam ngenegapka pemansang produk ke bisi nilai tambah sereta kompetitif.

Dikena nembuka pemereti praktikal nya, raban nya mega dibai nemuai ngagai sebuah ladang lada di Kampung Kerait, Serian beratika baru chara nanam, milih lada ti udah mansau sereta ngena teknologi proses moden baka ‘pepper thresher’ enggau ‘spiral separator’.

Penemuai tu dikearapka ulih ngenegapka agi rentayan kerejasama strategik entara MPB enggau industri, kelebih agi Adabi ti udah lama nyadi penguna produk lada menua tu.

Pengawa tu dipechaya ulih meri pangka ngagai pengawa ngenegapka rentayan rega industri lada menua tu enggau meruan, lalu enggau nya ulih nambahka daya besemekih Malaysia ba renggat dunya. — RBI

MIRI, 22 April — Pengawa nyediaka diri ungkup Bazaar Gawai Dayak & Festival Etnobudaya 2026 diatu benung dipejalai enggau ngemeratka pengawa nyediaka palan, masang langkau, nusun perengka enggau peminta logistik dikena nentuka pengelanchar pengerami nya.

Pengerami ke diatur beserimbai enggau Pengerami Gawai Dayak Sarawak 2026 diperambu deka berengkah 1 Mei ngagai 24 Mei 2026 ba Bandar Baru Permyjaya, sepiak kandang Bank Rakyat.

Pengawa tu dikearapka nyadi siti ari pematak besai di Bagi Menua Miri enggau bemacham aktiviti ti ngerinduka ati nyengkaum bejualka produk menua tu, pemakai asal, pengawa mandangka main asal enggau pemandang etnik ti mantaika penyelai pesaka asal komuniti Dayak di Sarawak.

Mensia mayuh dilalau datai ngerichahka pengerami tu seraya mega beterima kasih ngagai penyelai budaya enggau main asal ti dibantaika sepemanjai pengawa nya.

“Berebak enggau nya, jaku puji diberi ngagai Datuk Dr. Penguang Manggil ke udah bebendar mai pengawa ngatur pengerami renggat nengeri tu ngagai Bandaraya Miri, ti dikearap ulih meri empas positif ngagai sektor dagang temuai enggau ekonomi menua tu” ku penerang nya. — RBI

Dalam dunya ti jampat mansang, kitai suah diajar nguji utai ti besai ke ngemai pemujur, pengaya, pengangkun.

Taja pia, kitai jarang dikingatka pengidup tu kebendar iya digaga ari utai ti mit ti dikereja kitai ninting hari.

Kitai kiruh merambu utai ke jemah ila nyentukka kitai enda ingat deka beterima kasih ke utai ke diatu.

Kebendar iya, dia meh reti pengidup ti bendar. Tuchum ti diberi kitai, jaku ti manah ti disebut kitai, tauka penyabar ti dipilih kitai lebuh diuji, semua nya engka dipeda mit, tang nya meri empas ti besai ngagai diri empu enggau orang bukai.

Ajar pengidup ti pemadu beguna kebendar iya ukai pasal ni naka penyauh kitai bejalai, tang baka ni kitai ngemai diri.

Bisi orang mujur datai ba tikas ke pemadu atas, tang lenyau nilai mensia.

Bisi mega sida ke idup senang, tang ati sida penuh enggau pemaik sereta berekat. Nyadi, sukat pengidup ukai semina pengulih aja, tang mega pengelurus ati.

Kitai mega suah takut enda mujur. Kebendar iya, pemuntan ukai pengujung, tang pengajar ti pemadu lurus.

Iya ngajar kitai pasal pengelemi, nempa pengeliat ati, sereta muka jalai nuju penemu ti dalam. Enti nadai labuh, kitai enda belajar angkat kering agi.

Dalam pejalai tu, anang enda ingat beterima kasih. Ukai semina lebuh semua utai bejalai enggau manah, tang mega lebuh kitai diuji.

Laban di belakang pekara nya, bisi ajar ti nempa kitai nyadi orang ti lebih tuai runding sereta meretika reti pengidup.

Pengujung iya, pengidup ukai bekaul enggau sapa ke pemadu jampat tauka pemadu besai. Tang pasal sapa ke pemadu ulih nempa dalam pemanah ati, ke pemadu kering dalam penyabar, sereta ke pemadu ikhlas meri.

Enti seharitu berasai tusah, ingat nuan enda ibuh jauh. Semina siti singkang mit ke mua, enggau niat ti manah. Laban ari nya, pejalai ti besai berengkah. -RBI

SIBU, 22 April – Raban ari Opis Pengerara Api enggau Penyah Penusah Malaysia (JBPM) mujur nagang sereta madamka penusah babas angus ke nyadi ba Jalai Kemuyang, ditu, kemari.

Nitihka ripot operasyen, penusah nya ngaul penusah babas angus ba tisi jalai enggau pemesai dipelabaka urung 30 x 30 meter persegi.

Operasyen nya betuaika PBK I Terrance anak Jimbun nyadi Komander Operasyen begulai enggau enam iku raban ari Balai Bomba enggau Penyah Penusah (BBP) Sibu Jaya.

Lebuh datai ba endur nya, tim bomba bejalaika pengawa ‘size-up’ sebedau berengkah enggau operasyen madam ngena arus hos bantu tunggal ari pam jentera bomba.

Api mujur dipadamka enggau penuh enggau nadai sebarang bakal tauka pengerusak reta tengkira diripotka.

Pengudah nentuka gaya nya likun bendar, tim operasyen pulai baru ngagai BBP Sibu Jaya.

Operasyen nya diketuka pengudah api ulih dilara enggau penuh. -RBI