MIRI, 4 Mei – Siku lelaki peranak menua tu ngaga ulah kasar lalu ngemediska siku pemesai polis lebuh nguji ngelarika diri ari pengawa meresa maya operasyen nitihka atur ba Jalai Miri Bypass, tumu pagi kemari.
Penusah nya nyadi urung pukul 2.00 pagi, ti mungkur siku saspek lelaki beumur 24 taun enggau siku nembiak indu beumur 16 taun ke ditan Raban Pansik enggau Penerit Adat Trafik (BSPT) Indu Opis Polis Pelilih (IPD) Miri.
Nitihka ripot, lebuh pemesai polis nya nguji bejalaika pengawa meresa dua iku saspek enggau mutosikal ke ditepan seduai iya, lelaki ke bekaul nya ngaga ulah kasar lalu nguji ngelarika diri.
Pengawa nya ngujungka siku pemesai polis bakal mimit sereta pedis tubuh sebedau dibai berubat ba Sepital Miri pengudah operasyen tembu.
Pengawa meresa enggau silik mega tetemuka sereta ngerampas sebuah mutosikal ke udah diubah, kunchi mutosikal enggau telefon binching enggi saspek lelaki ke ngundan video enda menuku.
Berindik ari nya, peminta riman udah digaga ngagai saspek kena 4 Mei tu tadi dikena mantu pansik ari baruh Seksyen 353 Kanun Keseksaan ketegal ngena kuasa jenayah ngenakutka pengereja pengawa perintah bejalaika pengawa iya, pia mega Seksyen 292 Kanun Keseksaan ketegal ngembuan kereban kamah.
Polis mega bisi ngangauka saksi mensia mayuh ke bisi ba palan penusah nyadi ngambika ulih mantu mansik.
Mensia mayuh ke bisi penerang bekaul enggau aktiviti gang jalai alun dipinta nyalur ngagai IPD Miri nengah lumur 085-432533 tauka ngagai sebarang balai polis ke besemak. -RBI
#ruaiberitaiban#newsiban#beritaiban
Rindu | Titih | Kunsika
