PAKAN, 4 Mei – Program Komuniti MyIS 2026 dipechaya ulih ngelangkar chara mutarka penanggul inovatif ti lebih betul, inklusif sereta meri empas tinggi, lalu enggau nya mai penguntung ti meruan ngagai komuniti menua pesisir di Sarawak.
Chairman Kaunsil Industri Kayu Ramu Malaysia (MTIB), Datuk Larry Sng Wei Shien, madahka chara ngaul komuniti nyadi pelasar ti beguna dalam nentuka tetiap inisiatif pemansang amat nangkup guna kandang menua.
Nitih ku iya, kerejasama rat entara komuniti, ejensi perintah enggau institusyen pemansik ulih ngenyampatka pemindah teknologi lokal sereta ngenegapka ekosistem inovasyen rama ba renggat baruh.
Iya madah munyi nya lebuh bejadika Sesi Program Komuniti MyIS 2026 enggau Meri Kelala Produk Inovasyen Asil Pengelandik Jari Komuniti (Zon Sarawak) ke diatur ba Tuai Rumah Eman, Nanga Nasau, ditu, kemari.
Berebak enggau nya, sesi jurai ti dipejalaika Yayasan Inovasyen Malaysia (YIM) mujur ngempuruka urung 30 iku tuai rumah ari serata Pelilih Menua Pakan ngulihka timbal pasal isu enggau pemar ke ditapi komuniti.
Deligit YIM betuaika Ketuai Pemesai Eksekutif iya, Dr.Sharmila Mohamed Salleh, begulai enggau pemesai kanan sereta tim penyanding penemu ti nyadi fasilitator dalam ngelala isu kunsi sereta merambu chara mutarka penanggul ti engkeman.
Entara isu ke dikelala iya nya bekal ai beresi, kelebih agi maya musin kemarau, ngatur pengawa muai uras, nadai lampu jalai di menua pesisir, sistem parit ke enda efektif sereta begunaka pengawa ngemanahka sektor betanam betupi.
Kelimpah ari nya, komuniti mega mantaika pengerindu deka ngangkatka pengelandik ngaga sabun sereta ngerembaika makit produk menua tu nyadi pun penatai pemisi baru.
Berebak enggau nya, komuniti menua nya mega meri kelala produk asil pengelandik jari Sarawak ti inovatif ti ngempung pesaka asal enggau chara kreatif moden, nyengkaum ngena kereban asal baka rutan, buluh enggau serat utai tumbuh ti ngayanka identiti budaya bemacham pupu raban bansa di nengeri tu.
Nerang silik agi, iya madahka sekeda pengawa nangkanka nya deka dipejalaika nyengkaum ngenataika perambu ngagai piak ke bekaul bekaul enggau isu infrastruktur, bejalaika kus ngangkatka pengelandik nengah RDC Sibu kelimpah nyerungkai konsep palan ngumpul produk komuniti dikena ngangkatka rentayan rega.
Tim perunding mega deka nyendiaka ripot penuh pasal asil sesi jurai ti deka dibantai ngambika ulih dipejalaika enggau silik agi.
Ba program nya, Larry bisi nyuaka bantu projek sepenyampau RM39,500 ti diterima JKKK Rh Eman, JKKK Rh Agas, JKKK Rh Jimbai enggau Biro Indu Rh Eman. -RBI
#ruaiberitaiban#newsiban#beritaiban
Rindu | Titih | Kunsika
