SIBU, 4 Mei — Projek Bekal Ai Kanowit Renggat 2 diatu udah nyapai penyulut 99.5 peratus lalu diatu benung chakah dipejalaika ba renggat Testing & Commissioning (T&C).
Projek ti meri empas tinggi tu nyadi siti ari batang inisiatif dalam ngenegapka sistem bekal ai di kandang menua Sibu enggau kandang ngelingi iya, ti ngaul batang skop kereja iya nya masang paip ai bemacham pemesai sepemanjai 55 kilometer ari Loji Meresi Ai Salim ngagai kandang menua Kanowit.
Iya mega nyengkaum pengawa nyambung sistem paip ngagai rangkaian ke udah bisi di Sibu Jaya dikena nentuka penerus enggau penegap bekal.
Kelimpah ari nya, projek tu mega ngaul pengawa ngaga stesyen pam booster di Durin enggau kapasiti 1.5 juta liter sehari (1.5 MLD), pia mega ngaga tangki tikas tinggi di Bukong Jagol enggau kapasiti 3.5 juta liter (3.5 ML).
Pengawa bejalaika projek tu dikearap ulih meri empas ke besai dalam nambahka penyikar pengawa ngagih enggau tekanan bekal ai, kelebih agi ba Pelilih Kanowit, Nibong Tada, Durin, Machan, Sibu Jaya enggau kandang menua ngelingi ke bukai.
Sechara keseluruhan, projek tu sebagi ari pengawa Perintah Sarawak ti seruran dipejalaika dikena ngenegapka infrastruktur bekal ai dikena napi guna rayat sereta nyukung penumbuh pemansang sosio-ekonomi kandang menua.
Menteri Perengka Guna enggau Telekomunikasyen (MUT) Sarawak, YB Dato Sri Haji Julaihi bin Haji Narawi, ngemeratka komitmen perintah nengeri nentuka semua projek bekal ai dipejalai nitihka timpuh sereta meri penguntung terus ngagai rayat ba kandang endur ti bekaul.
Projek tu dikearapka ulih nambahka tikas akses bekal ai enggau chara ti lebih entap, tan sereta meruan ungkup timpuh panjai. — RBI
#Beritalban | Ruai Berita Iban
Rinduka | Titihka | Kunsika
