SIBU, 4 Mei — Loji Ai Sungai Sadit di Sibu terus beoperasyen enggau konsisten dalam nentuka bekal ai beresi ti entap ngagai peranak ke diau ngelingi, enggau kapasiti pemansut 5 juta liter sehari (MLD) ti meri penguntung ngagai urung 1,850 ruang bilik.

Menteri Perengka Guna enggau Telekomunikasyen Sarawak, Dato Sri Julaihi Narawi madah, loji nya ke udah dipenyadika kena 13 Mei 2025, diatu bejalaika pengawa enggau manah sereta bejalaika tanggungpengawa beguna nyadi sukung ngagai sistem bekal ai ke bisi diatu ari Loji Meresi Ai Salim, Sibu.

Nitih ku iya, pengawa bejalaika projek tu sebagi ari pengawa Perintah Gabungan Parti Sarawak (GPS) ti enda ngetu dalam pengawa ngenegapka infrastruktur bekal ai nengeri tu, kelebih agi dikena nangkup peminta penguna ti majak nambah sereta ngurangka tekan ngagai loji besai.

“Penemuai kereja ti diulang tu mandangka Loji Ai Sungai Sadit terus bejalaika operasyen enggau manah sereta meri empas positif ngagai peranak menua nya kenyau berengkah beoperasyen,” ku iya nengah penerang berita sehari tu.

Iya nyemetak madahka Perintah GPS Sarawak tetap komited nentuka rayat nyengkaum di menua pesisir ngasaika bekal ai beresi ti tan, meruan sereta bekualiti tinggi.

“Pengawa ngemanahka sistem bekal ai deka terus dipejalai berenggat ungkup pengelantang rayat Sarawak,” ku iya nambah — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 4 Mei — Direktor Kereja Raya Sarawak, Datu Dr Cassidy anak Morris meri basa kepenudi ngagai niang James anak Joshua Guang rambau penemuai penyinu ati di Kuching sehari tu tadi.

Penatai iya kelai meri terima kasih enggau basa enggau pemeri niang James anak Joshua Guang ti kala nyadi Rakan Strategik Media Sosial ngagai Opis Kereja Raya Sarawak.

“Niang meri mayuh bantu dalam ngenegapka pengawa ngenataika penerang enggau komunikasyen JKR Sarawak ngagai komuniti enggau lebih efektif,” ku iya.

Opis Kereja Raya Sarawak dalam penerang iya mantaika penyinu ati ngagai semua kaban belayan niang ketegal pemidang siku orang ti chukup komited, bebendar sereta mayuh mantu pengawa komunikasyen strategik opis nya.

“Jasa enggau pemeri niang deka seruran dikeingat sereta dikerinduka piak kami enggau semua pengereja pengawa Opis Kereja Raya Sarawak,” ku penerang nya.

Berebak enggau nya, JKR Sarawak mega besampi ngambika sida niang sebilik diberi pengering, pengeliat ati enggau pengelantang napi maya ti ngenyinuka ati tu.

Cassidu mega ngarika raban JKR Sarawak ngenataika penyinu ati ari ngagi sida niang sebilik. -RBI

#ruaiberitaiban#newsiban#beritaiban

Rindu | Titih | Kunsika

MANCHESTER, 4 Mei — Rayat Sarawak di United Kingdom mantaika sukung enggau pengandal sida ngagai pengawa perintah nengeri ngemujurka tagit nempa Sarawak nyadi nengeri maju manggai ba taun 2030 nengah pelin PCDS 2030.

Kaban Kunsil Nengeri (ADUN) Tamin, Ir Christopher Gira Sambang madah, timbal positif nya dikenataika ba Program Lan Berambeh Anak Sarawak 2026 ke diatur ba Manchester, England, ti disereta urung 250 iku nembiak enggau peranak Sarawak ke diau di menua tu.

Ku Gira, program tu dipunka enggau sesi townhall muak ke pagi sebedau disambung enggau pengawa makai lemai, lalu enggau nya nyadi pelasar beguna dalam ngerapitka kaul entara perintah Sarawak enggau komuniti asal di menua luar.

“Program tu mega muka ruang ngagai perintah bekunsi polisi enggau tuju ungkup pemansang nengeri tu terus,” ku Gira.

Program tu bela digulu Premier Sarawak, Datuk Patinggi Tan Sri Dr Abang Johari Tun Openg, Sapit Menteri Besai, Datuk Amar Fadillah Yusof Sapit Premier Sarawak, Datuk Amar Prof Sim Kui Hian; Menteri Kereja Raya, Dato Sri Alexander Nanta Linggi, sereta bala pemesai ke bukai.

Ngenang silik, Gira nyemetak madahka program baka tu besai amat reti dalam nentuka kaul entara Sarawak enggau peranak menua luar terus tegap, setipak enggau aspirasyen nempa Sarawak ti meruan sereta inklusif jemah ila. -RBI

#ruaiberitaiban#newsiban#beritaiban

Rindu | Titih | Kunsika

MANCHESTER, 4 Mei — Sarawak nagit pemansang ekonomi ti meruan nengah pengawa ngenegapka inovasyen enggau ngenegapka kaul dunya nyadi batang tuju strategi dudi hari, ku Premier Sarawak, Datuk Patinggi Tan Sri Abang Johari Tun Openg.

Bejaku ba pengerami makai lemai gala beserimbai enggau Lan Berambeh Anak Sarawak UK Edisyen, iya nyemetak madahka penegap ekonomi nengeri tu enda ulih agi bepanggai ba pengeraja asal ti mimit baka minyak enggau gis.

Kelimpah ari nya, nitih ku iya, Sarawak begunaka ngalih ngagai model ekonomi bepelasarka penemu enggau inovasyen dikena nentuka daya pengetan enggau terus mansang dalam timpuh ke panjai.

Pengawa nya diatur beserimbai enggau penemuai kereja rasmi empat hari iya ke United Kingdom enggau Ireland, kelimpah ari nyadi pelasar begulai enggau bala nembiak sereta peranak Sarawak ke diau di menua luar.

Berebak enggau nya, Abang Johari madahka perintah Sarawak ari baruh pegai Gabungan Parti Sarawak udah bejalaika mayuh bengkah inisiatif dikena ngenegapka pemansang modal mensia, nyengkaum bejalaika program Pelajar Tinggi Pechuma Sarawak (FTES).

Iya mega ngemeratka pemesai guna ngatur belanja bejimat nengah pengawa numbuhka Sarawak Sovereign Wealth Fund (SSWF) nyadi rizab strategik ungkup nengeri jemah ila.

Nitih ku iya, naka taun siti nyin kemari, wang turu nya udah manggai RM8.6 bilion lalu deka dijaga pengelama 20 taun nyadika jamin penegap ekonomi Sarawak dalam timpuh ke panjai.

“Enti kitai ngembuan kuasa runding ti tegap sereta landik ngatur pekara wang, jemah ila Sarawak deka terus likun taja pan ekonomi dunya enda tentu,” ku iya.

Kelimpah ari nya, iya mega ngemeratka pemerat ngerembaika jaringan antarabansa nengah penambah penyambung global, nyengkaum perambu numbuhka serikat penerebai bilun enggi nengeri, AirBorneo, sereta mega ngenegapka infrastruktur strategik baka Palan Penyangkai Kapal Bintulu.

Pengawa nya ku iya nerang, beguna amat dalam ngengkahka Sarawak nyadi hab strategik ti nyambung jalai dagang entara Timur enggau Barat, kelebih agi dalam konteks penumbuh ekonomi ASEAN enggau transisyen nuju teknologi gadung.

Dalam pemansang ke sama, iya mega ngemeratka potensial besai Sarawak ba pengawa ngasilka kuasa gadung baka metanol gadung ti dikearapka nyadi minyak jemah ila ungkup industri kapal global.

“Enggau endur ke strategik sereta transisyen ngagai teknologi gadung, Sarawak bisi potensial nyadi pemain besai dalam ekonomi baru pelilih menua,” ku iya nambah.

Sama bisi datai Sapit Menteri Besai Datuk Amar Fadillah Yusof; Sapit Premier Sarawak Datuk Amar Sim Kui Hian; Menteri Kereja Raya Datuk Sri Alexander Nanta Linggi; Pesuruhjaya Tinggi Malaysia ngagai United Kingdom enggau Ireland Utara Datuk Zakri Jaafar; Sekretari Perintah Nengeri Sarawak Datuk Amar Mohamad Abu Bakar Marzuki; pia mega Sapit Menteri ba Opis Premier Sarawak Datuk Sharifah Hasidah, Sapit Menteri Utiliti enggau Telekomunikasyen Sarawak Datuk Ibrahim Baki, Kaban Kunsil Nengeri (ADUN) Tamin Ir Christopher Gira Sambang, Ketuai Sekretari Politik ngagai Premier Sarawak Dato Fazzrudin Abdul Rahman enggau ketuai ejensi ti bekaul — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Sarawakku

Komitmen tinggi enggau penyikar pentadbiran Komiti Pemansang enggau Pengelikun Genturung Pendiau (JKKK) Penyulau majak nyadi lebuh bemacham inisiatif pemansang mujur dikeamatka, lalu enggau nya meri empas terus ngagai pengelantang peranak menua nya.

Projek Ngemanahka Jematan Titi Nyadi Kedap Ekonomi

Projek ngemanahka jematan Titi enggau ari baruh Projek Transformasyen Menua Pesisir (RTP) nyadi pengangkat besai ngagai aktiviti ekonomi komuniti, kelebih agi ungkup orang berikan enggau pekebun mit di Kampung Penyulau.

Nitihka penerang ari JKKK Penyulau ngagai Ruai Berita Iban, struktur baru tu nganti jematan kayu lama ke udah lebih 30 taun sereta udah runtuh, lalu enggau nya meri risiko pengelikun ngagai peranak.

Peminta projek nya udah dikenataika ngagai Opis Pelilih Kanowit enggau Opis ADUN N.50 Machan ba taun 2023 nengah keretas kereja ke chukup sereta profesional.

Projek tu udah dikemendar dalam taun 2024 enggau dipejalaika Opis Kaunsil Pelilih Kanowit (KDC) ngena kayu ke dibeli bekualiti tinggi, sebedau tembu penuh dalam taun ke sama lalu dipenyadika Kaban Kunsil Nengeri (ADUN) Allan Siden Gramong kena 13 September 2025.

Atur Ketuai Bepelasarka Literasyen Digital Nyadi Penyungkak

Pemujur tu nitihka penerang ke sama, dipejalai ketegal pengeransing ngatur projek enggau nguasa teknologi digital ba raban ketuai JKKK.

Sekretari JKKK bejalaika tanggungpengawa ti beguna dalam ngatur dokumentasyen projek ngena chara digital, nyengkaum nyendiaka keretas perambu, pelin endur enggau ripot gambar nitihka standard ejensi perintah.

Kelimpah ari nya, iya mega nyadi ketuai operasyen ba palan nengah chara matau kediri empu atur bejalaika pengawa fizikal dikena nentuka kualiti projek nya dijamin.

“Pengelandik ngatur projek enggau sistematik sereta bepelasarka teknologi beguna amat dikena nentuka tetiap peminta pemansang nerima perati enggau pemendar ke patut,” ku JKKK Penyulau.

Kerejasama JKKK Ngasilka Bemacham Pemujur

Kenyau ari taun 2022, kerejasama rat semua kaban JKKK Penyulau udah ngasilka bemacham pemujur bukai ti meri pemaik ti komprehensif ngagai komuniti.

Nitihku JKKK Penyulau, entara inisiatif iya nya ngenegapka pengawa merintah enggau daya idup ba rumah panjai nengah pengawa ngulihka kereban opis enggau bejalaika aktiviti besaup ngelikunka rampa menua.

Kelimpah ari nya, Program Sejati MADANI mega dipejalai nengah projek nupi ikan ai tabar ngena sistem RAS (tangki HDPE) ti diatur kompeni ari sukut teknikal enggau nadai ngaul kunteriktor luar.

Ba pemansang ke bekaul, projek ngangkatmanah kuasa karan ari baruh RTP ti ngaul 23 buah rumah diatu benung dipejalaika lalu dipelaba tembu dalam bulan Ogos 2026.

Inspirasyen Pemansang Menua Pesisir

Sechara penuh, pemujur JKKK Penyulau mandangka pemesai guna integriti pentadbiran, pengelandik ngatur projek enggau nguasa literasyen digital nyadi pematak besai pemansang menua pesisir.

“Sukung komuniti ke tegap sereta penyikar ngatur pengawa nyadi pekara kunsi dikena nentuka tetiap projek ke diperambu ulih dipejalaika enggau mujur,” ku JKKK Penyulau. -RBI

#ruaiberitaiban#newsiban#beritaiban

Rindu | Titih | Kunsika

Photo — Jkkk Penyulau Kanowit

MIRI, 4 Mei — Pengawa jampat raban Opis Bomba enggau Penyah Penusah Malaysia (JBPM) ari Balai Bomba enggau Penyah Penusah (BBP) Sentral Miri mujur ngerara api ti ngaul sebuah lori pemerat 1.5 tan ba penusah ke nyadi ba Lot 54, Jalan Jee Foh Utama 5, ditu sehari tu tadi.

Nitihka ripot rasmi, kangau ngenyit bekaul enggau penusah nya diterima urung pukul 11.05 pagi sebedau raban bomba dianjung ngagai endur nya.

Injin keterubah datai urung pukul 11.13 pagi, urung lapan kilometer ari stesyen nya.

Komander operasyen nya madah, lebuh datai ba endur nya, ditemu sebuah lori 1.5 tan udah angus abis ba mua.

Taja pia, siku pekereja ba endur nya mujur madamka api keterubah ngena perengka pengerara api sebedau penatai raban bomba.

“Pansik keterubah tetemuka penusah angus nya nadai ngaul sebarang penusah bebadi nyawa.

Raban bomba udah nya bejalaika operasyen madamka api ngena arus hos bantu tunggal nyentukka api ulih dijaga enggau penuh,” ku penerang nya.

Penusah angus nya mujur dijaga urung pukul 11.17 pagi lalu operasyen tembu enggau penuh urung pukul 11.32 pagi pengudah raban nya nentuka nadai risiko angus nyadi baru.

Operasyen nya mungkur pengering siti injin Tender Penyelamat Bomba (FRT), siti unit Servis Penyelamat Perubat Ngenyit (EMRS) sereta dibantu empat iku raban polis.

Semua raban enggau injin pulai ngagai stesyen pukul 12.00 tengahari. Nadai penusah bakal tauka bebadi nyawa diripotka nyadi ba penusah nya.

Kebuah penusah angus nyadi enggau penyampau pengerugi agi benung dipansik piak bekuasa. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BBP Miri Sentral

KIDURONG, 4 Mei — Balai Bomba enggau Penyah Penusah (BBP) Kidurong udah bejalaika Pengawa Bebaris enggau Macha Pesan Khas beserimbai enggau Pengerami Hari Bomba Sedunya 2026 ti diatur pukul 8.00 pagi tu tadi.

Pengerami nya dipunka enggau pengawa belagu lagu rasmi iya nya lagu Negaraku, Ibu Pertiwiku enggau Siap Sedia Setiap Masa ti mandangka semengat talukka menua, disiplin enggau komitmen tinggi Opis Bomba enggau Penyah Penusah Malaysia bejalaika tanggungpengawa sida.

Pengawa bebaris sehari pagi tu tadi betuaika PBT II Rary Anak Binjie sereta digulu semua raban Balai Bomba enggau Penyah Penusah (BBP) Kidurong.

Bacha pesan khas nya dikenataika beserimbai enggau pengerami ngintu Hari Bomba Sedunya 2026.

Program tu diatur dikena ngenegapka semengat begulai, nambahka pengeransing gawa sereta beterima kasih ngagai pangku pengawa enggau pengorbanan raban bomba dalam nentuka pengelikun nyawa enggau reta tengkira komuniti seruran dijaga.

Pengerami nya diatur enggau teratur, bisi disiplin sereta mandangka profesionalisme tinggi semua pengereja pengawa BBP Kidurong. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BBP Kidurong

TELANG USAN, 4 Mei – Palan Kawalan Operasyen (PKOD) Pelilih Telang Usan udah nerima kangau ngenyit ari mensia mayuh bekaul enggau penusah aksiden ba jalai alun ti ngaul sebuah kerita ba kandang menua Simpang Long Laput, Long Lama, ditu kemari.

Ku penerang nya, Skuad Delta dianjung ngagai palan penusah nyadi enggau pengering empat (4) iku raban, betuaika Pbt (PA) Chong Siew Yin, ari penyauh operasyen urung 1 kilometer ari palan penusah nyadi.

Lebuh datai ba endur nya, raban nya tetemuka penusah aksiden ti mungkur sebuah ti dideriba siku enggau dua iku anak iya, ti udah belantak enggau sebuah lori sawit ba kandang endur besemak enggau simpang jalai nya.

Operasyen nyelamat nya dipejalaika nengah chara bersepadu begulai enggau Raban Pengelikun Mensia Mayuh Malaysia (APM), Opis Bomba enggau Penyah Penusah Malaysia (JBPM) enggau Polis Diraja Malaysia (PDRM).

Dua (2) iku selamat lalu dianjung ngagai Sepital Miri nengah ambulans ngambika diperubat enggau silik agi

Siku (1) iku dientaska midang ba palan penusah nyadi ari pemesai Opis Menteri Pengerai Malaysia (KKM) Long Lama.

Tubuh udah nya diserah ngagai Polis Diraja Malaysia (PDRM) ngambika atur enggau pansik silik agi dipejalaika.

Pengudah operasyen nya tembu, Skuad Delta mindah baru ngagai PKOD Telang Usan. — RBI

SERI KEMBANGAN, 4 Mei — Menteri Dagang Temuai, Seni enggau Main Asal (MOTAC) Dato Sri Tiong King Sing madah, pelasar baka Pasar Budaya Borneo bejalaika tanggungpengawa ti beguna amat dalam ngenegapka penyerakup komuniti nengah pengawa ngemeratka budaya enggau pesaka pupu bansa di menua tu.

Nitih ku iya, Pasar Budaya Borneo ukai semina nyadi palan aktiviti ekonomi aja, tang mega beguna nyadi ruang negapka kaul rama ti meri kelala sereta nerenakka pemereti ati ba budaya komuniti Sabah enggau Sarawak ba peranak Malaysia.

“Palan baka tu nyadi jematan ti nyambung komuniti ari bemacham penatai.Nya muka ruang ngagai identiti, pesaka enggau main asal terus idup sereta dikunsi,” ku iya.

Iya ke mega Kaban Parlimen Bintulu madah munyi nya lebuh ngulu Pengerami Makai Lemai Mantar Gawai enggau Kaamatan 2026 begulai enggau komuniti Gerempung Pasar Budaya Borneo Seri Kembangan, malam ensanus.

Iya nyemetak madahka pengeraja budaya komuniti Sabah enggau Sarawak ti mungkur pemakai asal, asil pengelandik jari enggau adat meseti terus dijaga ngambika enda lenyau dibai jeman.

“Enda ngira dini endur kitai, pesaka tu meseti diterus ngambika rebak dudi agi ulih ngelala sereta angkunka iya,” ku iya.

Berebak enggau nya, iya mega ngingatka komuniti ngambika seruran ngatur bida penemu enggau tuai runding sereta bebasa ngambika ulih ngetanka pengelantang bansa.

“Enti bisi bida penemu, perundingka enggau manah.Menua kitai digaga atas penyelai lalu penegap nya semina ulih ditan enti kitai terus bebasaka pangan diri,” ku iya.

Tiong mega muji inisiatif komuniti baka Pasar Budaya Borneo ti ukai semina ngetanka pesaka asal, tang mega meri penguntung ekonomi ngagai orang dagang mit enggau pemekuh pemerindang di menua tu.

Iya ngarapka pengawa ke baka tu deka terus ditegapka agi dikena muka mayuh agi peluang ngagai komuniti lokal, lalu ari nya ulih ngenegapka kaul rama dalam komuniti.

“Semangat bebasaka pangan diri, ngemeratka budaya diri empu sereta meretika budaya orang bukai nyadi pelasar pengelantang ti meruan,” ku iya nambah.

Pengerami nya diatur enggau richah enggau penyereta komuniti Borneo ke diau di Semenanjung, lalu enggau nya ngayanka semengat beserakup enggau begulai dalam penyelai budaya Malaysia. -RBI

PAKAN, 4 Mei – Pengeransing nempa penerus ba pengawa nyadi ketuai nembiak terus ditegapka lebuh 33 iku penyereta udah nyereta Woksop Penegap Organisasyen Nembiak Pelilih Pakan ke diatur ba Dewan Masuarakat Pakan, apin lama ke udah.

Program ke diatur Kelab Belia Pekan Pakan begulai enggau Opis Nembiak enggau Lumba Bagi Menua Sarikei mega nerima sukung ari All Party Parlimentry Group Malaysia (APPGM) enggau pelanja ari Yayasan Hasanah.

Woksop tu ngembuan tuju deka ngelatih ketuai ke bisi potensial nganti enggau penerang ngagai penemu ngatur organisasyen, lalu enggau nya nentuka penerus nyadi ketuai nembiak ba pelilih tu mengkang relevan sereta kompetitif.

Sepemanjai program nya, bala penyereta dibantai enggau tiga batang modul ti dikenataika Pegawai Opis Nembiak enggau Lumba Bagi Menua Sarikei, Mohd Johari Abdullah, ti ngemeratka sukut nyadi ketuai, ngatur organisasyen enggau pemansang personaliti nembiak.

Pengerami nangguhka woksyop nya dipenyadika Kaban Parlimen Julua, Datuk Larry Sng Wee Shien ti mantaika pengarap ngambika program baka tu ulih terus ngadaka rebak ketuai biak ti bekualiti sereta bisi visi.

Berebak enggau nya, Opis Nembiak enggau Lumba Bagi Menua Sarikei meri besai terima kasih ngagai Kelab Belia Pekan Pakan ti udah meri kerejasama rat ngemujurka program nya, setipak enggau komitmen ti seruran dipejalaika dikena ngenegapka pemansang nembiak di pelilih Sarikei.

Program tu dipeda nyadi pelasar ke beguna dalam nempa rintai chalun nyadi ketuai ke bepenau megai tanggungpengawa sereta ngiring gerempung nembiak jemah ila. -RBI