MIRI, 5 Mei — Pengerami Gawai Dayak ukai semina nyadi pengerami ngetau aja, tang nyadi kelai pesaka budaya, adat enggau identiti komuniti Dayak ti majak ditampung ari setiap rebak, ku Sapit Premier Sarawak Datuk Amar Douglas Uggah Embas.
Ku iya, seriris enggau pengawa ngetanka main asal, dua batang pengerami benung diatur di Miri taun tu iya nya Bazaar Gawai Dayak enggau Festival Etnokultural nyadi pelasar ngenegapka budaya enggau ngadaka ekonomi komuniti.
Nitih ku iya, konsep “etnokultural” mai reti ti besai ti mungkur chara pengidup, nilai, sejarah enggau identiti komuniti ti patut dijaga.
“Elemen baka main ngajat, ukir Orang Ulu, tenun asal enggau pemakai etnik ukai semina pesaka asal aja, tang diatu dipeda nyadi aset strategik nengeri tu.
“Budaya ukai agi dipeda nyadi utai ke dipandangka, tang nyadi injin ekonomi enggau temegah ati ba renggat dunya,” ku iya.
Ku iya nambah, pengawa ngatur bazar nya ngayanka baka ni budaya ulih dipandangka seraya ngangkatka tikas ekonomi rayat sereta muka peluang ngagai nembiak rebak baru ngemeranka pengawa dagang.
Ngenang Bazar Gawai, Uggah madahka kenyau ditumbuhka ba taun 2015, Bazar Gawai Dayak udah mandangka pemujur ti meransang enggau asil jual manggai RM1.3 juta ba taun 2025 ti mungkur 190 bansal. Taun tu tagit udah ditambah ngagai RM1.8 juta.
Dalam pengawa deka nyapai juluk nya, iya nesau orang dagang beambi ulih ari inovasyen teknologi nyengkaum makit digital, “live commerce” enggau pengawa nusui cherita kreatif dikena mantaika penyelai pesaka asal bansa Dayak.
Kelimpah ari nya, aspek mungkus produk mega patut dikemanahka agi dikena nambahka rega komersial enggau daya bepekit ba makit antarabansa.
Iya mega ngemeratka pangku pengawa gerempung baka Kaunsil Kraf Sarawak enggau Kraftangan Malaysia dalam mantu orang dagang asil pengelandik jari nengah program pemansang industri, latih enggau promosyen ngagai renggat global.
Sepemanjai pengerami nya, sepenyampau 12 bengkah program main asal bisi diatur ti mungkur penyereta ari serata menua Sarawak, nyengkaum pekit nebah sape, ngajat, kuntau, gendang pampat enggau pengawa milih Kumang enggau Keling.
“Aktiviti tu ukai semina nyadi pelasar mantaika penau, tang mega ulih nyadi medium pelajar budaya ngagai nembiak rebak baru,” ku iya.
Kelimpah ari Miri, pengerami nya mega diteruska di Kuching enggau pengawa bejalai bebala mayuh sereta makai lemai nyadi pengerami pengerami renggat nengeri nya.
Berebak enggau nya, iya ngenataika pengaga ati ngagai Premier Sarawak, Datuk Patinggi Tan Sri Dr Abang Abdul Rahman Johari Abang Openg ti udah ngemendarka agih belanja RM2 juta dikena ngemujurka pengerami nya, lalu enggau nya mandangka komitmen perintah nengeri dalam negika budaya pupu bansa di Sarawak.
Iya mega minta rayat terus meri sukung ngagai ketuai perintah nengeri dikena nentuka pemansang belama sereta pengelantang rayat. -RBI
#ruaiberitaiban#newsiban#beritaiban
Rindu | Titih | Kunsika
