SIBU, 4 Mei — Projek ngaga Loji Ai Rantau Panjang ditu diatu benung dipejalaika lalu diatu udah nyapai penyulut fizikal 33.0 peratus, enggau kapasiti pemansut dipelaba manggai 5 juta liter sehari (MLD) enti udah tembu penuh.
Projek tu entara inisiatif Perintah Sarawak dalam ngenegapka sistem bekal ai nengeri tu, kelebih agi dikena nyukung guna ti majak nambah ba kandang menua Sibu.
Menteri Perengka Guna enggau Telekomunikasyen (MUT) Sarawak, Dato Sri Julaihi Narawi madah, loji nya dikemansangka ngena sistem meresi ai akut lalu befungsyen nyadi loji sukung ngagai Loji Meresi Ai Salim Sibu.
Nitihku iya, projek nya digaga ngena ungkus belanja RM5.0 juta ngena agih belanja Perintah Sarawak enggau penuh.
“Pengawa bejalaika projek tu mandangka komitmen Perintah Sarawak ti terus nentuka sistem bekal ai ti lebih tegap, tan sereta chukup ungkup guna rayat,” ku iya.
Iya mega madah, enti udah tembu ila, Loji Ai Rantau Panjang deka nambahka kapasiti sistem bekal ai ke bisi diatu sereta ngenegapka penerus pengawa ngagihka ai beresi ngagai peranak menua nya.
Penemuai kereja ngagai palan projek nya mega mandangka pengawa matau opis menteri ti seruran dipejalaika dikena nentuka pengawa bejalaika projek bejalai nitihka timpuh ti udah ditetapka sereta nyapai standard kualiti ti udah ditetapka. — RBI
#Beritalban | Ruai Berita Iban
Rinduka | Titihka | Kunsika
