SPAOH, 5 Mei — Pengeransing ngenegapka ekonomi komuniti menua pesisir terus nyadi pemerat ba sitak DUN Bukit Saban nengah bemacham inisiatif pemansang ti meri empas tinggi ti dipejalaika dikena ngangkatka tikas pengidup rayat selampur.
Sapit Premier Sarawak, Datuk Amar Douglas Uggah Embas ke mega Kaban Kunsil Nengeri (ADUN) Bukit Saban madah, chara ke dipejalaika nya nyengkaum ngenegapka rentayan rega sektor betanam betupi kelimpah ari mansik peluang ekonomi baru ke ulih mansutka penatai pemisi ke meruan ungkup peranak menua nya.
Nitihku iya, dalam timpuh dua taun ke udah, lebih 50,000 iku anak manuk udah disadung ngagai genturung pendiau rumah panjai enggau genturung pendiau ke nyadi pengeran ngenegapka pun penatai pemisi ruang bilik, kelimpah ari inisiatif ngerembaika pengawa makit produk jelu tupi ke diatu benung diperundingka enggau Cold Storage.
“Kelimpah ari nya, pengawa ngemansangka Agropark ti mungkur pemesai lebih 700 ekar ngena teknologi betanam betupi moden mega bisi diperambu.
Pengawa ngaga padang bilun sereta mega palan ngumpul enggau proses mega dikearapka ulih ngenegapka pengulih ngelakuka produk menua tu ngagai makit luar enggau antarabansa,” ku iya.
Iya madah munyi nya lebuh bejaku ba Pengerami Makai Lemai Mantar Gawai Dayak 2026 ke diatur Gerempung Tuai Rumah (GTR) Pelilih Mit Spaoh ke nyadi ba Balai Mensia Mayuh Spaoh, ditu, kena Hari Minggu tu tadi.
Berebak enggau nya, Uggah mantaika pengandal ngagai raban pekebun ba DUN Bukit Saban ngembuan potensial ngasilka lada menua tu ti bekualiti tinggi ti ulih besemekih ba renggat global enti sida terus diberi sukung ari sukut teknologi, makit enggau infrastruktur.
Iya mega madahka sektor dagang temuai deka terus ditegapka nengah perambu ngaga replika kuta bujang berani di Bukit Sadok ti dikearapka ulih nyadi pematak baru, lalu enggau nya muka peluang ekonomi ngagai komuniti nengah pengawa ngasilka kraf menua tu enggau aktiviti dagang temuai bepelasarka budaya.
Kelimpah ari nya, pengawa ngaul raban nembiak dalam main asal Iban ditegapka agi nengah pengawa numbuhka Kelab Main Asal ti nyadi pengeransing ngetan sereta negika pesaka asal.
Nitihku iya, Perintah Sarawak tetap komited meri sukung ti komprehensif nyengkaum program ngemanahka rumah, ngangkatmanah infrastruktur menua pesisir enggau subsidi ngagai sektor betanam betupi dikena ngangkatka pengelantang pendiau rayat manggai ba taun 2030.
Ngenang pasal pemar ungkus pengidup ti majak niki ketegal faktor global, iya madahka perintah ti betuaika YAB Datuk Patinggi Tan Sri Abang Johari Tun Openg mega udah meri kelala inisiatif bantu nengah Sumbangan Keperluan Asas Sarawak (SKAS), kelimpah ari bejalaika pengawa ngurangka 50 peratus ba suwa orang dagang enggau diskaun 25 peratus bil karan dikena ngelempung tating pengidup rayat. — RBI
#Beritalban | Ruai Berita Iban
Rinduka | Titihka | Kunsika
