BETONG,14 Mei — Sebuah rumah panjai di Rumah Nanga Ajau, ditu napi sekejap pengirau lebuh genset menara telekomunikasyen angus abis ba penusah angus tengahari tu tadi.

Taja pia, ba penusah ke nyadi urung pukul 1.22 lemai nya, nadai sebarang bakal tauka bebadi nyawa diripotka ngaul peranak ba kandang menua nya.

Pengari Palan Gerakan Opis Bomba enggau Penyah Penusah (PGO) Sarawak madah, sida nerima kangau ngenyit bekaul enggau penusah nya sebedau seraban raban ari Balai Bomba enggau Penyah Penusah (BBP) Betong dianjung ngagai endur nya.

Raban bomba betuaika Komander Operasyen, Pemesai Kanan Bomba (PBK) Nickson Asean Akui datai ba palan penusah nyadi urung pukul 1.44 lemai pengudah bejalai urung 20 kilometer ari balai nya.

Nitihka penerang ari PGO Sarawak, lebuh datai ba endur nya, ditemu struktur genset nya udah angus 100 peratus angus.

“Operasyen madamka api dipejalaika ngena hos bantu tumu enggau ai ari tangki pam injin bomba nyentukka api abis padam.”

“Sepenyampau tujuh iku raban enggau Fire Rescue Tender (FRT) bisi enggau dalam operasyen dikena nentuka api enda nyerarai,” ku iya nengah siti penerang sehari tu.

Raban bomba nguna timpuh urung tujuh minit nentuka api ke agi tinggal dipadamka abis lalu kandang endur nya likun sebedau ngetuka operasyen urung pukul 1.57 lemai.

Kebuah ke bendar penusah angus nyadi enggau penyampau pengerugi ke ditapi agi dipansik raban forensik bomba JBPM. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 14 Mei — Sepenyampau 50 Ketuai Komuniti enggau Ketuai Raban Bansa (KMKK) ari sitak N49 Ngemah bisi nemuai basa ngagai opis Sapit Premier Sarawak, Datuk Amar Douglas Uggah Embas beserimbai enggau hari keempat Aum Keterubah Penggal Kelima Dewan Undangan Nengeri (DUN) Sarawak, ditu sehari tu tadi.

Raban tu betuaika Pemancha Charlie begulai enggau Penghulu Pree sereta disempulang Kaban Kunsil Nengeri (ADUN) Ngemah Anyi Jana.

Penemuai nya ngembuan tuju deka meri kelala ngagai KMKK senentang pejalai aum DUN Sarawak kelimpah ari ngerapitka kaul entara ketuai komuniti enggau ketuai perintah nengeri.

Nyerumba penemuai nya, raban nya mega diberi awak betukar penemu bekaul enggau pemansang menua pesisir sereta agenda pemansang ke diatu sereta deka dipejalaika ba sitak Ngemah.

Penemuai nya mega mandangka komitmen perintah nengeri ti terus ngerapitka kaul enggau ketuai renggat baruh nentuka aspirasyen pemansang ulih dikenataika enggau efektif ngagai rayat ba renggat komuniti.

Sama bisi datai Sekretari Politik ba Opis Premier Sarawak Puan Roseline Mapong — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Pusat Khidmat Masyarakat ADUN N.49 Ngemah

KUCHING, 14 Mei – Kaban Kunsil Nengeri (ADUN) sitak N.59 Tamin, Ir. Christopher Gira Sambang mantaika sukung penuh ngagai jaku Tuai Pemegai Menua (TYT) Negeri Sarawak beserimbai enggau pengawa bejadika Aum Kunsil Nengeri (DUN) Sarawak Ke-19.

Lebuh bejuraika Mosyen Terima Kasih ngagai TYT Tun Pehin Sri Dr.Haji Wan Junaidi Tuanku Jaafar ba Aum Dewan Undangan Nengeri Sarawak sehari tu, iya nerangka jaku nya komprehensif, bisi visyen sereta ngayanka kuing Sarawak ke nyata nuju taun 2030 enggau jemah ila.

Nitih ku iya, taja pan dunya diatu betapi enggau geopolitik ti enda tentu, ekonomi global ti enda tegap, rentayan bekal tejanggal enggau ubah teknologi ti jampat, Sarawak mengkang tegap sereta tan asil ari ketuai ti tegap sereta polisi pemansang timpuh panjai ti terang.

Ku iya, ari baruh iring Premier, Sarawak diatu majak dikelala nyadi pelilih menua ti ngembuan visyen ungkup ekonomi jemah ila enggau penegap politik ti tegap.

Ba jaku iya mega nyemetak madahka Strategi Pemansang Pengudah COVID-19 2030 (PCDS 2030) ukai semina dokumen polisi aja, tang nyadi pelin besai dikena ngubah Sarawak nyadi pelilih menua ke maju, meruan sereta bepenatai pemisi tinggi.

Ku iya, Sarawak diatu benung nyingkang ari ekonomi bepelasarka penatai ngagai ekonomi nguna teknologi enggau penemu nengah pemansang ekonomi digital, pemintar tiru (AI), aeroangkasa, kuasa hidrogen, kuasa tau dikena baru enggau pemansang modal mensia ti bepengelandik tinggi.

Nyadi siku injinir, iya meda transformasyen nya siti singkang besai nuju nempa Sarawak ngembuan ekonomi beteknologi tinggi ti ulih besemekih ba renggat entarabansa. -RBI

#ruaiberitaiban#newsiban#beritaiban

KUCHING, 14 Mei – Pemerat perintah ngemansangka industri aeroangkasa enggau teknologi maju ti dipechaya iya ulih nempa Sarawak nyadi hub digital enggau aeroangkasa Borneo enggau ASEAN jemah ila nyadi siti singkang ke besai, ku Kaban Kunsil Nengeri (ADUN) Tamin Ir Christopher Gira Sambang.

Ku iya nerang, pengawa perintah ngenegapka sektor kuasa gadung baka tekat kuasa karan, ekonomi hidrogen, kuasa solar enggau teknologi kurang karbon nyadi singkang strategik dikena narit puku ti bekualiti tinggi ke Sarawak.

“Ari sukut pelajar enggau pemansang modal mensia, aku nyukung penuh pengawa perintah ngenegapka pelajar STEM, TVET enggau teknologi maju, nyengkaum bejalaika Skim Pelajar Tinggi Perchuma Sarawak berengkah taun 2026.

“Bantu baka laptop, baucher bup, elawin idup enggau pemansang sekula antarabansa ari Yayasan Sarawak nyadi puku timpuh panjai ungkup pengidup nembiak rebak baru Sarawak jemah ila,” ku iya.

Gira madah munyi nya lebuh meri terima kasih ngagai mosyen ari TYT Tun Pehin Sri Dr.Haji Wan Junaidi Tuanku Jaafar ba Aum Dewan Undangan Nengeri Sarawak sehari tu.

Tandu Gira, nembiak rebak baru kemaya hari di Sarawak ukai agi semina deka nyadi penguna teknologi aja, tang deka nyadi penempa teknologi ke ulih besemekih ba renggat global nyadi injinir, saintis data, pakar AI, profesyenal aeroangkasa enggau orang dagang digital.

Lebuh nyimpul jurai iya, Gira nyemetak madahka Sarawak ngembuan semua pelasar ke beguna ngambi ulih mansutka diri nyadi siti ari pelilih menua ke pemadu progresif sereta dipebasa di pelilih menua tu nengah penegap politik, pengeraja asal, ketuai ke bisi visi enggau rayat ke beserakup.

Iya mega ngena awak nya meri Selamat Hari Gawai Dayak 2026 ngagai selampur komuniti Dayak di Sarawak.

“Gayu Guru, Gerai Nyamai, Lantang Senang Nguan Menua,” ku iya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 14 Mei — Dewan Undangan Negeri (DUN) Sarawak sehari tu udah ngemendarka Rang Undang-Undang Perbekalan Tambahan (2025) 2026 enggau Rang Undang-Undang Perbekalan Tambahan (2026) 2026 ba hari keempat Aum Keterubah Penggal Kelima DUN Sarawak.

Kededua RUU nya dibantaika Sapit Premier Sarawak Datuk Amar Douglas Uggah Embas, ti mega Menteri Wang enggau Ekonomi Baru II, sebedau senutuk sepenemu dikemendarka kaban dewan pengudah bacha ketiga kali.

RUU nya ngembuan tuju deka nampung belanja operasyen enggau pemansang nengeri tambah dikena nentuka pengawa bejalaika projek pemansang, bantu mensia mayuh enggau utai ke diguna mayuh bengkah opis menteri enggau opis di serata Sarawak ulih terus lanchar sereta efektif.

Ungkup RUU Perbekalan Tambahan (2025) 2026, belanja pengatur tambah sepenyampau RM167.81 juta diguna dikena melanja mayuh macham servis ti enda diungkupka tauka enda chukup dalam Bajet 2025.

Kelimpah ari nya, agih belanja tambah pemansang sepenyampau RM26.09 juta mega dikemendar ti mungkur 51 sub-aktiviti enggau 73 pechah aktiviti.

Kenu ku Uggah, agih belanja tambah nya beguna dikena nentuka penerus pengawa bejalaika projek pemansang enggau meri servis ngagai rayat enda tekeruga.

Berebak enggau nya, RUU Perbekalan Tambahan Rang (2026) 2026 ngaul anggar tambah keterubah belanja biasa sepenyampau RM1.32 bilion.

Ku iya, entara agih belanja ke pemadu besai iya nya RM188 juta ngagai Opis Menteri Utiliti enggau Telekomunikasyen ungkup pengawa bejalaika diskaun 25 peratus ba bil elekterik ungkup penguna domestik di Sarawak.

“Atur tu dikena mantu rayat napi penambah ungkus pengidup berindik ari penyarut di Timur Tengah,” ku iya lebuh mantaika RUU nya ba Dewan Undangan Negeri Sarawak sehari tu.

Berebak enggau nya, sepenyampau RM20 juta udah diungkupka ngagai Opis Menteri Nembiak, Lumba enggau Pemansang Orang Dagang dikena nyendiaka diri nyereta kontinjen Sarawak ba Lumba enggau Main SUKMA XXI Selangor 2026.

Perintah Sarawak mega udah ngungkupka RM90 juta ngagai Opis ba Opis Premier Sarawak, nyengkaum ungkup tuju nyerenih baru elawin Ketuai Kaum enggau Komiti Pemansang enggau Pengelikun Genturung Pendiau (JKKK).

Kelimpah ari nya, tambah RM391 juta ungkup belanja pemansang ba taun 2026 mega dikemendarka ngaul pengawa bejalaika projek rayat, bantu rama, ngemanahka infrastruktur mensia mayuh enggau projek bekal ai ba sekeda kandang menua di serata Sarawak.

Pemendar kededua RUU nya mandangka komitmen Perintah Sarawak ti terus ngenegapka agenda pemansang nengeri, ngangkatka pengelantang pendiau rayat sereta nentuka pengawa mutarka pemar ungkus pengidup terus ditegapka. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 14 Mei – Kaban Kunsil Nengeri (ADUN) Meluan, Datuk Rolland Duat Jubin madahka mayuh sekula seranta ba kandang menua Meluan ti begunaka agih belanja lengkas ngambika diangkatmanah.

Beduduk enggau nya, iya minta perintah beratika enggau berat pekara tu ungkup pengelantang raban nembiak enggau raban ba sekula kelebih agi ngaul beberapa buah sekula ba sitak Meluan.

“Tu mungkur tujuh buah sekula primari iya nya Sekula Kebangsaan (SK) Nanga Ju, SK Tapang Punggu, SK Nanga Merurun, SK Nanga Ensiring, SK Nanga Kelangas, SK Ulu Entaih enggau SK Nanga Maong.”

“Sekula tu begunaka pengawa ngaga blok kelas baru dikena nangkup peminta nembiak, kelimpah ari nyendiaka kuarters pengajar ke lantang sereta likun agi kelimpah ari perengka guna makmal sains enggau bilik komputer ke amat diguna.

“Kitai enda ulih ngelakka nembiak di menua pesisir tinggal ari arus moden lalu pemansang modal mensia meseti bepun enggau rampa sekula ti kondusif,” ku iya nyemetak.

Iya madah munyi nya nengah mosyen meri terima kasih ngagai jaku Tuai Pemegai Menua (TYT) Negeri Sarawak, Tun Pehin Sri Dr Wan Junaidi Tuanku Jaafar, ba Aum Keterubah Penggal Kelima Dewan Undangan Nengeri (DUN) Sarawak Ke-19, ditu, sehari tu.

Ngenang pekara bukai, Rolland mega madahka sitak Meluan bisi penau nyadi model pemansang betanam betupi moden di Sarawak.

Terang iya, tu kelebih agi ba pengawa ngenegapka lalu ngemodenka pengawa orang bekebun lada sereta ngemansangka produk utai tanam berega tinggi ti chakah diberi kelala perintah.

Tandu Rolland, kandang menua Meluan mega nyadi pemansut besai lada, sawit kebun mit, sayur enggau utai tanam pemakai.

Kenu ku iya, ketegal potensial tu, Meluan begunaka perati khas ari baruh Langgur Pemansang Malaysia Lumpar Ke-13 (RMK13).

“Entara nya, pengawa ngemansangka tanah Hak Adat Bumiputera (NCR) dalam kluster ungkup utai tanam pemakai berega tinggi bepelasarka konsep ladang rayat.

“Kelimpah ari nya, Palan Ngumpul, Proses enggau Mungkus (CPPC), taman betanam betupi presisi enggau Agropark sereta mega pemansang jalai kebun tambah,” ku iya.

Nerang silik, iya madah, pekebun mit ba sitak nya endang orang ke bagas gawa, ngembuan tanah enggau semengat tinggi, tang begunaka sukung puku baka geran enggau skim mikrokredit, infrastruktur enggau jamin makit.

Ku iya, enti pekara tu ulih dipejalaika, Meluan ulih nyadi bakul pemakai batang kandang menua adap tengah Sarawak.

Berindik enggau nya, Rolland mega ngelalau perintah meri perati nyambung grid kuasa karan ngagai rumah panjai ba kandang menua iya.

Entara rumah panjai ke bisi kaul iya nya Rh Thersa, Batu 15 Jalai KJD, Rh Lumbok, Labuh, Rh Engkiau, Serau, Rh Steven Janggut, enggau Lantang, Rh Buking Imang, Tanjung Nibong Ulu Kapup Entabai, Rh Dudom Usit, Ulu Kakup enggau Rh Manggie Naong, Ulu Kakup.

“Enti diperatika enggau terit, tu ukai agi pengingin ti mewah, tang utai ti diguna pemun lalu dikearapka projek-projek nya deka dikemeratka enggau lengkas,” ku iya ba jurai. -RBI

Gambar ngau info asal Suara Sarawak

#ruaiberitaiban#newsiban#beritaiban

KAPIT, 14 Mei — Pekit Ninting Taun Lumba enggau Main 2026 di Sekula Primari (SK) Kampong Baru Kapit ukai semina nyadi gelanggang pekit aja, tang mega nyadi pelasar beguna dikena nyerungkai penau baru ti bisi potensial mai basa ngagai Sarawak enggau menua jemah ila ba lumba enggau main.

Pekara tu dikemeratka Datuk Alvin Runggah Jimbun ke mega Pegawai Tugas Khas (PTK) ngagai Menteri Kereja Raya Dato Sri Alexander Nanta Linggi lebuh ti ngarika Kaban Parlimen Kapit bejadika pekit nya sehari tu.

Kenu ku iya, ukai enda ulih bisi hari ila atlit besai deka ada ari Kapit ke ulih nitihka singkang ikon lumba enggau main Sarawak baka Dato Pandelela Rinong, Bonnie Bunyau Gustin enggau Watson Nyambek.

Ku iya, semengat, disiplin enggau pengaga ati ti dipandangka bala nembiak sepemanjai pekit nya nyata ngayanka lumba enggau main bejalaika tanggungpengawa besai dalam nempa pengeregas tubuh, pengeliat ati runding, semengat besemekih enggau pengandal diri kenyau ari umur agi biak.

Ba pengerami ke sama, iya mega bisi madahka pemeri penyampau RM10,000 ari Nanta ngagai Gerempung Apai Indai enggau Pengajar (PIBG) sekula nya nyadika sukung terus ngagai pemansang pelajar enggau aktiviti kokurikulum di kandang menua Kapit.

Iya mega meri besai terima kasih ngagai piak sekula, PIBG, bala pengajar, apai indai enggau semua komiti bejalaika program lalu ngemujurka program nya enggau lanchar sereta teratur.

Ku iya, pengawa ti terus bebendar dalam pemansang lumba enggau main ba renggat sekula dipechaya ulih ngadaka mayuh agi atlit biak ari Kapit ti ngembuan penau mai basa ngagai Sarawak enggau Malaysia ba renggat ke tinggi agi jemah ila. -RBI

#ruaiberitaiban#newsiban#beritaiban

Rindu | Titih | Kunsika

SIBU, 14 Mei — Raban pengatur Queen of Borneo 2026, Sarawak Documentary diatu benung muka pengawa ngiga penyereta beserimbai enggau pengawa ngatur Malam Gawai Ngiling Bidai 2026 ti deka ngempuruka raban indu ti bepenau sereta bisi pengelandik ari serata Pulau Borneo.

Pekit ke beprestij nya deka diatur di Kuching lalu bisi dibagi dalam dua kategori besai iya nya Miss Queen of Borneo 2026 enggau Ms Queen of Borneo 2026, enggau penyereta tebuka ngagai orang indu ke beumur 18 ngagai 50 taun enda ngira etnik, bansa enggau asal penatai.

Nitihku Sarawak Documentary ke nyadi pengatur, pekit tu ukai semina pelasar pekit pemajik gamal aja, tang mega nyadi panggau dikena ngerami penyelai budaya, pesaka enggau identiti komuniti Borneo.

“Program tu meri awak ngagai orang indu Borneo mantaika pengangkun diri, penau enggau semengat sida dalam negika budaya enggau main asal bemacham bansa di pelilih menua tu,” ku iya.

Penyereta dibuka ngagai indu dara, udah belaki enggau indai tunggal ti bisi ati deka nyadi sebagi ari pengawa budaya ti beprestij beserimbai enggau pengerami Gawai 2026.

Sida ke bisi ati tau ngerejista diri nengah Google Form ke disediaka pengatur tauka betanya nengah chara ba WhatsApp https://docs.google.com/…/1FAIpQLSezwURCx…/viewform… -RBI

#ruaiberitaiban#newsiban#beritaiban

Rindu | Titih | Kunsika

PUTRAJAYA, 14 Mei — Sapit Menteri Besai, Dato Sri Fadillah Yusof nyemetak madahka pengawa ngatur sungai menua patut ngalih ngagai chara ti lebih proaktif, bepelasarka pengawa nagang sereta disukung teknologi moden dikena mutarka isu kualiti ai sungai ti majak enda manah enggau lebih efektif.

Nitih ku iya, atur nya ngemeratka pengawa nagang pengamah, ngangkatka kualiti ai sungai sereta ngenegapka pengawa ngatur pengeraja ai menua, enggau tetiap perambu begunaka diperatika ari sukut pemisi, pemanah enggau empas ari pengawa bejalaika iya.

“Batang fokus taun tu iya nya bejalaika pengawa.Tetiap perambu enggau inisiatif begunaka pengawa ti dititihka enggau pengawa ti terang, timpuh ti terit sereta akauntabiliti ti spesifik ari raban ti bejalaika pengawa.

“Pekara ti dikemerat ukai agi nambahka perambu, tang nentuka tetiap pemutus ti dipesetuju ulih dipejalaika enggau manah sereta ngasilka empas ti ulih dipeda,” ku iya.

Iya madah munyi nya lebuh bechairmanka Aum Komiti Khas Mutarka Penusah Kualiti Ai Sungai Menua (JKKAS) Lumur ba Dewan Baiduri, Menara PETRA, ditu sehari tu tadi.

Ku Fadillah, chara reaktif enda chukup agi laban risiko pengamah patut dikelala sereta diputarka tumu sebedau iya ngeruga kualiti enggau bekal ai ngagai rayat.

Iya mega ngemeratka pengawa ngena teknologi baka sistem matau maya nyata, telemetri enggau Internet of Things (IoT) patut dikerembaika ngambika pengawa intervensyen ulih dipejalaika enggau jampat sereta efektif agi.

Nitih ku iya, dunya diatu nyingkang nuju pengawa ngatur sungai bepelasarka daya pengetan iklim, teknologi pintar enggau pengawa tadbir urus ti begempung, nya alai menua tu begunaka pengawa ngatur sungai terus relevan, responsif sereta tan.

Iya nandu baru madahka sungai enda ulih agi dipeda semina nyadi parit ai aja, tang nyadi aset menua strategik ti nyukung bekal ai, pengelikun pemakai, biodiversiti, pemansang ekonomi enggau pengelantang rayat.

Berindik enggau nya, iya nesau semua piak nyengkaum Perintah Besai, Perintah Nengeri enggau Opis Perintah Lokal (PBT) ngenegapka komitmen enggau tanggungpengawa dalam ngatur pengeraja ai menua dikena nentuka rayat ngasaika sungai ti beresi sereta bekal ai ti likun agi. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 14 Mei – Opis Kereja Raya (JKR) Sarawak nyangkal tuduh enggau gambar viral ti bekaul enggau gaya struktur Jematan Batang Lupar I.

Nitihku Direktor JKR Sarawak, Datu Dr Cassidy Morris madahka gambar ti dikerembaika ba media rama nya enda betul sereta enda ngayanka gaya enggau langkar projek ke bendar.

“Pengawa ngaga Jematan Batang Lupar l agi dipejalaika nitihka pengawa matau teknikal ti terit sereta nitihka standard pengelikun enggau injiniring ti udah ditetapka,” ku iya.

Mensia mayuh dilalau anang ngerembaika penerang ti enda dientas ti tau ngasuh saru penemu sereta ngirauka ati mensia mayuh — RBI

#ruaiberitaiban#newsiban#beritaiban

Rindu | Titih | Kunsika