LAWAS, 19 Mac — Aum Besai Tiga Taun Parti Demokratik Progresif (PDP) Bagi Menua N.81 Ba’ Kelalan diatur enggau mujur dalam gaya ti lantang, lanchar enggau penyerakup ba Hotel Sri Malaysia, Lawas, ditu kemari.

Nitihka penerang, semua pangku pengawa nyadi ketuai ungkup Komiti Besai Bagi Menua, Orang Indu enggau Nembiak dipilih enggau nadai belaban, lalu enggau nya mandangka sukung tegap kaban ngagai ketuai parti enggau penegap organisasyen ba renggat bagi menua.

Rintai ketuai baru ke dipilih betuaika Baru Bian nyadi Chairman Bagi Menua, disaup PS Sam Laya nyadi Sapit Chairman.

Berebak enggau nya, Puan Evelyn Dawat dipadu nyadi Chairperson bagi Orang Indu enggau Dr Timothy Padan Dawat nyadi Chairman Nembiak.

Penerang nya mega ngenataika pengaga ati ngagai semua ketuai ti udah diberi pengandal, enggau pengarap ketuai nya deka terus ngenegapka penyerakup parti sereta bebendar matak pemansang enggau pengelantang rayat di Ba’ Kelalan.

“Pengawa bepilih ke nadai diperebut tu terang ngayanka pengandal enggau penyerakup bala kaban dalam nentuka penerus pengawa nyadi ketuai ti entap sereta efektif,” ku penerang nya.

Aum nya mega nyadi pelasar beguna dalam ngelangkar kuing parti ba renggat Bagi Menua, setipak enggau agenda pemansang ti meruan sereta inklusif Sarawak.

SELANGAU, 19 Mac — Raban Pengelikun Mensia Mayuh Malaysia (APM) Pelilih Selangau udah meri timbal enggau lengkas ngagai penusah bebadi ba jalai alun ti nyadi besemak enggau kandang jematan layang Sekolah Menengah Kebangsaan (SMK) Ulu Balingian, ditu kemari.

Nitihka penerang, Palan Kawalan Operasyen Pelilih Menua Selangau bisi nerima kangau ngenyit bekaul enggau penusah ti ngaul treler lori enggau sebuah kerita Toyota Camry.

Tim APM Selangau ke dianjung ngelawa endur nya tetemuka tim Opis Bomba enggau Penyah Penusah Malaysia (JBPM) udah bisi ba palan penusah ke nyadi sereta benung ngintu mansa.

Seiku mansa lelaki beumur 69 taun diripotka bisi pedis ba rusuk kiba.

Mansa diberi perubat keterubah ngena chara ‘Rapid Body Survey’ sebedau dianjung ngagai Klinik Pengerai Sungai Tepus ngambika diperubat enggau silik agi.

Dua iku mansa ke bukai dalam penusah nya diripotka semina bakal mimit lalu dibai mensia mayuh ngagai klinik besemak ngambika diperubat.

Berindik enggau nya, mensia mayuh diingat ngambika seruran ngasika atur jalai alun sereta nambahka tikas bejejaga maya deriba dikena nyeliahka penusah ke enda dikeingin nyadi.

Berebak enggau nya, APM Selangau madahka mensia mayuh tau betanya ngagai talipaun sida ba lumur 084-891285 ti beoperasyen 24 jam nyema bisi sebarang penusah ngenyit nyadi. — RBI

MIRI, 19 Mac – Semilan buah rumah ukai tetap udah angus lengis ba penusah ke nyadi di Kampung Pasir, Simpang 4 Lutong, tumu pagi tadi.

Palan Operasyen, Opis Pengerara Api enggau Penyah Penusah Malaysia (JBPM) Sarawak nerima kangau ngenyit urung pukul 4:06 pagi sebedau Raban Timbal Operasyen (PKO) ari BBP Lutong, nengah bantu Balai Lopeng enggau Balai Miri Sentral, berumban ngesah ngagai endur ke bepalan urung 7 kilometer ari stesyen nya.

Raban bomba datai ba palan nya urung pukul 4:15 pagi lalu mujur ngerara api urung pukul 4:53 pagi, sebedau operasyen tembu abis urung pukul 7:45 pagi.

Komander Operasyen PBK II Edwin Siba madah, penusah angus nya mungkur semilan buah rumah ke alai enam buah rumah nya diuan lalu tiga buah agi nadai diuan orang. Tiap buah rumah dipelabaka urung 30 x 100 kaki persegi pemesai.

“Taja pan penusah angus nya nganguska semua struktur rumah nya, tang nadai penusah bebadi nyawa tauka bakal diripot nyadi,” ku iya.

Sepenyampau 37 iku peranak ari enam buah rumah dituntung penusah nya.

Entara ketuai ruang bilik ke bisi kaul ba penusah tu iya nya Albert Banjang (5 iku diri sebilik), Bob Anak Kendau (6 iku diri sebilik), Mathew Anak Enteri, (6 iku diri sebilik), Admend Anak Chol (7 iku diri sebilik), Francis Xavier Anak Paim (6 iku diri sebilik) enggau Merina Anak Geraji (7 iku diri sebilik).

Ba operasyen ngerara api, raban bomba ngena dua tali hos pemanjai 300 kaki enggau empat iti ‘munchung’ dikena nagang api.

Pun ai dikena madamka api nya diulih ari paip bomba nengah chara ‘relay pumping’ enggau sambung hos urung 600 kaki dikena nentuka bekal ai chukup.

Operasyen nya mega betapi enggau sekeda pemar nyengkaum gaya kandang endur ke sekut ti ngasuh jentera pedis mindah sereta endur pun penatai ai ke jauh ari endur penusah nya nyadi.

Sama bisi datai ba palan nya pengari sitak Senadin, Wilfred Mac, Tuai BBP Lutong PBT II Henry Jugah, PGKB II Rafie bin Sapar enggau PPgB Alif bin Nasif.

Sepenyampau 24 iku raban bomba ngaul diri dalam operasyen tu lalu sama bisi mantu ba endur nya lima iku raban Polis Diraja Malaysia (PDRM).

Pun penusah nyadi enggau penyampau pengerugi agi benung dipansik piak bekuasa. – RBI

MUKAH, 19 Mac – Tiga iku lelaki peranak menua tu udah ditan dalam dua pengawa datai ngenyit di kandang menua Selangau ti dipejalaika Polis DiRaja Malaysia (PDRM) nengah Ops Besepadu Nagang Jenayah ti dipejalaika kena 18 Mac tu tadi.

Ketuai Polis Pelilih Mukah, DSP Muhamad Rizal bin Alias, nengah penerang berita madahka pengawa ngenyit keterubah dipejalaika urung pukul 7.00 pagi ba sebuah rumah di Jalai Mukah-Selangau.

Maya operasyen nya, dua iku lelaki ke beumur 43 enggau 45 taun mujur ditan.

Asil ari pengawa meresa nadai tetemuka sebarang barang ke enda entas, tang kedua-dua saspek ke gawa nyadi deriba lori udah dibai ngagai IPD Mukah ngambika atur ke silik agi dipejalaika.

Peresa ai kemi tetemuka kedua-dua saspek positif dadah bansa amphetamine enggau methamphetamine.

Siku ari seduai iya mega ditemu ngembuan rikod ngembuan dadah ngelama tu. Saspek ke beumur 45 taun didawa ba Kort Majistret Mukah, lalu siku agi dilepas nengah jamin polis nganti haribulan didawa.

Berebak enggau nya, pengawa datai ngenyit kedua kali mega dipejalaika urung pukul 10.00 pagi ba kandang endur ladang sawit Sungai Sepiring.

Ba pengawa ngerap tu, siku lelaki beumur 19 taun mujur ditan pengudah nguji ngelarika diri.

Pengawa meresa ke silik agi tetemuka dua bungkus plastik senayau ngundan leka kristal ke dipelabaka methamphetamine enggau pemerat kasar dipelabaka 1.36 gram.

Saspek ke nadai kereja ditemu positif dadah ba peresa ai kemi. Kes tu dipansik nitihka Seksyen 12(2) enggau Seksyen 15(1)(a) Akta Dadah Berbahaya 1952.

Saspek udah didawa ba Kort Majistret Mukah lalu kes tu deka disebut baru kena 8 Jun 2026.

Berebak enggau nya, IPD Mukah ngemeratka komitmen sida terus dalam pengawa ngelaban pengawa salah guna dadah lalu nesau mensia mayuh ngenataika penerang bekaul enggau pengawa baka nya nengah talipaun 084-871222 tauka sebarang balai polis ke besemak. – RBI

PUTRAJAYA, Mac 18 – Perintah ngetanka rega sabsidi minyak RON95 iya nya RM1.99 seliter nengah program BUDI95, taja pan rega minyak mata global diatu ngelui US$100 setong berindik ari penyarut geopolitik di Asia Barat.

Berebak enggau nya, rega minyak RON97 udah disemelaka ngagai RM4.55 seliter dibandingka enggau RM3.85 sebedau tu, lalu diesel di Semenanjung udah niki ngagai RM4.72 seliter.

Taja pia, rega diesel di Sabah, Sarawak enggau Labuan mengkang RM2.15 seliter.

Nitihka penerang Opis Menteri Pekara Wang, perintah udah milih enda mindahka penuh rega minyak niki ngagai rayat, tang nganti nya terus enggau chara subsidi ditagit dikena nyaga ungkus pengidup.

Nengah pengawa bejalaika BUDI95, orang ke patut terus ngasaika rega RON95 iya nya RM1.99 seliter, seraya lebih 400,000 perengka pengangkut dalam sektor pengangkut mensia mayuh enggau logistik mega dijaga nengah sistem nyaga subsidi.

Perintah mega nanggung tating subsidi ngelui RM3 bilion sebulan dikena nentuka penegap rega minyak sereta nyeliah empas ngenyit ba rega barang enggau servis.

Kelimpah ari nya, pengawa matau enggau neritka atur deka ditambahka dikena nagang aktiviti nipu enggau ngemai barang chara belalai meraka garis entara menua, kelebih agi berindik ari bida rega minyak enggau menua sepiak.

Atur tu dikena nentuka rayat ulih ngintu musin pengerami enggau lebih teratur, seraya ngetanka penegap ekonomi menua dalam gaya makit minyak global ti enda tentu. -RBI

BINTULU, 18 Mac —Kaunsil Industri Getah Sarawak (SARIB) udah ngambi singkang strategik ngambi alih Stesyen Pemansik Institut Pemansik Getah Malaysia ari baruh Kaunsil Getah Malaysia ti bepalan di Similajau, Bintulu, nyadi pengeran ngenegapka pemansang industri getah nengeri tu.

Pekara tu dibantai pengudah aum ti bechairmanka Menteri Industri Pemakai, Komoditi enggau Pemansang Kandang Menua Sarawak, Dato Sri Dr.Stephen Rundi Utom, pagi tadi.

Pengawa ngulihka tu mungkur pemesai urung 490 hektar ba KM70, Jalai Bintulu–Miri ti ngembuan potensial besai dikemansang nyadi hab besai ungkup transformasyen industri getah Sarawak, kelebih agi dalam meri kuasa ngagai komuniti pekebun mit ba Wilayah Tengah enggau Utara.

Pengerami nya bela digulu raban Kaunsil Direktor SARIB, nyengkaum Datuk Gerald Rentap Jabu ke nyadi Sapit Chairman SARIB, Ir Christopher Gira Anak Sambang enggau Azizul Annuar, begulai enggau pengari ejensi enggau opis menteri ke bekaul.

Ba pengerami ke sama, pengawa nyuaka kunchi simbolik nya udah dipenyadika pengari Kaunsil Getah Malaysia, Tuan Haji Ismail Bin Haji Ibrahim, kelai pengawa nyerah rasmi pengatur stesyen nya ngagai SARIB.

Pengawa ngulihka tu muka cherita baru dalam pemansang industri getah nengeri tu lebuh stesyen nya deka digaga nyadi palan bersepadu ti nyengkaum pentadbiran pelilih menua, latih enggau pengerembai, pansik enggau pemansang (R&D), sereta pengawa ngasilka paung getah ti bekualiti.

Entara batang perambu iya nya ngaga stesyen tu nyadi palan pentadbiran ungkup Wilayah Tengah ti mungkur kandang menua Bintulu, Miri, Limbang enggau Lawas, kelimpah ari nyadi palan latih ngadaka pengereja pengawa ti landik dalam bidang agronomi moden enggau mekanisasyen ladang.

Kelimpah ari nya, iya mega nyadi palan inkubasyen orang dagang dikena ngenegapka pengawa ngasilka produk bepelasarka getah hiliran enggau agro-pemakai, seraya nagit ngasilka nyentuk 500,000 paung getah bekualiti ninting taun.

Ari sukut empas ekonomi, inisiatif tu dikearapka ulih mansutka penatai pemisi nyentuk RM9 juta setaun sereta muka peluang kereja ti ngaul 25 ngagai 50 staf pengatur pengawa enggau urung 65 pengereja pengawa bepengelandik.

Berebak enggau nya, potensial pemansang agrodagang temuai mega udah dikelala nengah chara beambi ulih ari penyelai rampa menua asal ba kandang menua nya, ti bepalan ba jalai strategik entara Bintulu enggau Miri.

Perintah Sarawak nengah SARIB mega udah ngungkupka puku keterubah urung RM5.23 juta ungkup tuju pemansang enggau operasyen, nyadi komitmen dikena nentuka industri getah nengeri tu terus kompetitif sereta meruan.

Inisiatif tu mega seriris enggau pengawa perintah nengeri ti deka ngerapitka servis ngagai pekebun mit sereta optimumka guna tanah dikena nambahka produktiviti enggau penatai pemisi komuniti menua pesisir.

Sama bisi datai Sekretari Tetap Opis Menteri Industri Pemakai, Komoditi enggau Pemansang Wilayah Sarawak Datu Sirai Anak Daha, Direktor Unit Perambu Ekonomi Sarawak (SARIB) Ir. Ts. Awang Mohammad Fadillah Bin Awang Redzuan (SARIB) enggau Sekretari Pekara Wang Nengeri (SARIB) Noor Rasyidah Abdullah. — RBI

BETONG, 18 Mac — Projek Jalai Pesisir Sarawak ari baruh Pakej A5 ti mungkur kandang menua ari Jematan Batang Saribas 2 ngagai Simpang Roban diatu udah ngerikod penyulut fizikal 61.81 peratus.

Sapit Premier Sarawak, Datuk Amar Douglas Uggah Embas madah, projek ke ngembuan pemanjai urung 29.5 kilometer nya dipelaba tembu penuh ba suku keterubah taun 2027, lalu ari nya ulih ngemanahka rentayan penyambung jalai sereta nyungkak pemansang ekonomi di Bagi Menua Betong.

“Perintah Sarawak komited nentuka projek tu dipejalaika nitihka timpuh ke udah ditetapka.

“Penyulut ke diatu mandangka pemansang ke positif taja betapi enggau bemacham pemar teknikal ba renggat baruh,” ku iya lebuh Pengerami Pra-Ngelanchar Jematan Sungai Krian sehari tu tadi.

Iya ke mega Menteri Infrastruktur enggau Pemansang Palan Penyangkai Kapal Sarawak nerangka, skop kereja ungkup Pakej A5 nyengkaum ngaga jalai baru berengkah pengudah Jematan Batang Saribas di Kuala Saribas niki ngagai Simpang Roban ti nyambung ngagai Jalai Besai Pan Borneo.

“Entara komponen besai projek tu nyengkaum kereja meresi palan, nyendiaka jalai sementara, ngali tanah enggau batu, ngaga struktur penagang konkrit enggau kereja stabilisasyen lereng.

Bela dipejalaika iya nya pengawa ngaga sistem parit ti komprehensif baka parit, parit tisi jalai, parit lintas enggau struktur parit ke bukai dikena nentuka alir ai efisyen sereta ngurangka risiko ampuh bah,” ku iya nerang.

Ku Uggah nambah, projek tu mega ngaul pengawa ngaga simpang besai, jematan meraka parit, pelakin jalai ngena asfalt lengkap enggau bau sereta perabot jalai.

Aspek ngatur rampa menua mega diberi perati nengah pengawa bejalaika Pelin Ngatur Rampa Menua (EMP), matau sereta nagang pengerusak enggau mendap sepemanjai timpuh ngaga.

Pelin Pengatur Trafik mega udah disedia nyengkaum tim pengatur trafik enggau perengkaguna jalai sementara dikena nentuka pengelikun penguna jalai alun seruran dijamin.

“Perintah ngarapka projek tu ulih meri penguntung ke besai ngagai rayat, kelebih agi ba pengawa ngemanahka aksesibiliti, ngurangka timpuh pejalai sereta meransang penumbuh sosio-ekonomi di menua pesisir Sarawak,” ku iya.

Pengawa muka Jematan Sungai Krian ke beungkus RM112,499,580.09 dipadahka nyadi momen ke besejarah ngagai peranak menua pesisir Bagi Menua Betong ke sebedau tu bepanggai ba servis feri.

“Pengawa ngena jematan tu ukai semina deka ngemuntangka pemindah ninting hari, tang mega dikearap ulih meri empas positif ngagai pemansang sosio-ekonomi kandang menua nya,” tambah Uggah.

Pengerami nya mega digulu Kaban Parlimen Betong Dato Dr Richard Rapu, Kaban Parlimen Batang Lupar Mohamad Shafizan Haji Kepli, Senator Pele Peter Tinggom, Kaban Kunsil Nengeri (ADUN) Kalaka Mohamad Bin Duri, ADUN Krian Friday Anak Belik, ADUN Beting Maro Dato Haji Razaili Haji Gapor, Sekretari ngagai YAB Premier Sarawak Puan Roseline Mapong Sabai, Sekretari Mendam MIPD Datu Chiew Chee Jau, Residen Betong Datu Richard Michael Abunawas, Direktor Kereja Raya Sarawak Datu Dr Cassidy Morris sereta mega ketuai opis, ketuai raban bansa enggau ketuai komuniti kandang menua. — RBI

SAMARAHAN, 18 Mac — Perintah Sarawak terus ngenegapka tikas nyikap diri napi penusah ngenyit nengah perambu ngaga ‘Satelit Warehouse’ endur nyimpan aset kritikal di nengeri tu.

Berindik enggau nya, pengawa ngabas palan nya udah diatur pagi tadi ba Stor Nyimpan Barang, Opis Kereja Raya (JKR) Bagi Menua Samarahan dikena beratika pematut palan ke diperambu endur ngaga projek nya.

Penemuai nya betuaika Sekretari Mendam Perintah Menua Sarawak, YBhg. Datu Felicia Tan Ya Hua, enggau penyereta pengari ari mayuh bengkah ejensi bekaul nyengkaum Unit Pengelikun enggau Penerit Adat Sarawak (UKPS), Opis Residen Bagi Menua Samarahan, Opis Pelilih Kota Samarahan, JKR Sarawak, Opis Tanah enggau Survei Bagi Menua Samarahan enggau Sarawak Energy Berhad (SEB).

Nitihka penerang, penemuai nya ngembuan tuju beratika pematut palan nya sereta ngelala guna infrastruktur dikena nentuka pengawa ngatur enggau nyimpan aset penusah ngenyit ulih dipejalaika enggau lebih sistematik, efisyen sereta likun.

Perambu ngaga ‘Satelit Warehouse’ nya dipeda nyadi singkang strategik enggau proaktif dalam ngenegapka pengulih mutarka penusah ngenyit Sarawak, kelebih agi dalam nentuka aset kritikal ulih dikoordinasyen sereta diagih enggau jampat agi sereta ngasi maya situasyen penusah ngenyit nyadi.

Asil ari penemuai tu dikearapka ulih nyukung perambu ke lebih bestruktur, lalu enggau nya ulih nambahka tikas nyikap diri enggau efisyen nimbal penusah ngenyit ba renggat nengeri. — RBI

KINABATANGAN, 18 Mac — Siku lelaki ke diripotka lenyau pengudah ditagup baya maya nyala undang ditemu dalam gaya ke enda manah gamal ulih raban penyidi enggau penyelamat (SAR) di Sungai Kampung Segaliud ditu kena Hari Enam.

Tubuh niang Mohd Rayyan Abdullah, 28, ditemu melepung pukul 9.55 pagi, urung 500 meter ari endur iya diripotka lenyau.

Ketuai Balai Bomba enggau Penyah Penusah (BBP) Kinabatangan, Hairi Otuh madah, tudah ditemu ba hari kedua operasyen SAR dipejalaika.

“Operasyen sehari tu berengkah pukul 9.15 pagi enggau kerejasama ejensi penyelamat ke bukai enggau peranak genturung pendiau nya sebedau tudah ditemu ba tebing sungai ulih raban bomba.

“Gaya tudaj enda menyana agi enggau kededua kaki enggau lengan dipelabaka putus,” ku iya lebuh ditelefon Sinar Harian kena Hari Tiga tu tadi.

Nitihku iya, tudah udah nya dibai ke darat ngena juli sebedau diserah ngagai polis ngambika atur nangkanka nya dipejalaika.

“Operasyen nya tembu enggau penuh urung pukul 10.30 pagi,” ku iya.

Sebedau nya, tudah diripotka nyala undang ba sungai begulai enggau apai iya sebedau ditagup baya lalu lenyau ari peda mata.

Ba penusah nya, apai iya meda anak iya ditagup jelu reptilia nya sebedau minta bantu ari raban penyelamat.

Sumber, photo — Sinar Harian

MULU, 18 Mac – Perintah Sarawak udah ngaga pemutus ngambi jalai kayu balak di serata nengeri ngambika kereja ngemanah enggau ngangkatmanah ulih dipejalaika enggau meruan agi ungkup pengelantang enggau pengelikun rayat, kelebih agi di menua pesisir.

Kaban Kunsil Nengeri (ADUN) sitak N.78 Mulu ke mega Sapit Menteri ba Opis Premier Sarawak (Buruh, Imigresen enggau Pemantau Projek), Datuk Gerawat Gala madah, sebedau tu jalai nya diempu kompeni batang enggau pengawa ngintu ke mimit.

Ku iya nerang, singkang ngambi alih tu beguna amat laban mayuh kandang menua pesisir bepanggai ba jalai ke disebut nya dikena ngelawa sekula, klinik, pasar enggau palan pentadbiran.

Iya madah munyi nya lebuh nampung aum iya enggau EXCO Parti Pesaka Bumiputera Bersatu (PBB) Pampang Banga/Peluan, Pampang N.78 Mulu berandauka bemacham pekara bekaul enggau pemansang kandang menua sereta ngenegapka parti ba renggat baruh.

Rambau randau nya mega, iya bekunsika tuju ketuai parti sereta mega perambu perintah dikena nentuka pemansang terus dipejalaika ba kandang menua Mulu, kelebih agi ngaul genturung pendiau di Banga/Peluan.

Kenu ku iya, pangku pengawa nyadi ketuai ba renggat pampang beguna amat dalam nentuka sada enggau peneka rayat ulih dikenataika enggau terus ngagai perintah.

Dalam pemansang ke sama, iya madahka Sapit Premier Sarawak, Datuk Amar Douglas Uggah Embas diperambu deka nemuai ngagai Long Banga bejadika Jematan Sungai Balui, ti dikearap ulih meri pemaik ke besai ngagai peranak menua nya ari sukut perengka guna komunikasyen enggau pemansang kandang menua.

Gerawat mega meri besai terima kasih ngagai semua EXCO PBB Pampang Banga/Peluan ketegal komitmen enggau kerejasama ti enda ngetu dalam pengawa ngenegapka parti sereta nentuka pemansang terus dikembuan rayat ba kandang menua N.78 Mulu. – RBI