KUCHING, 25 Mei — Sarawak meseti terus ngetanka budaya penyerakup, bebatak asur sereta bebasaka pangan diri ti nyadi pelasar pengelantang pupu bansa enggau jalai pengarap di nengeri tu, pia ku Sapit Premier Sarawak, Datuk Amar Douglas Uggah Embas.
Ku iya, pemaik enggau penegap ke diasaika rayat kemaya hari tu asil ari semengat pemereti ati enggau kerejasama rat ke udah lama dikemeranka dalam komuniti Sarawak.
“Kitai chukup betuah laban rayat Sarawak diau dalam pemaik enggau pengelantang taja pan begulai ari bemacham pupu bansa enggau jalai pengarap. Rega tu berega amat lalu meseti terus ditanka begulai,” ku iya.
Iya madah munyi nya lebuh ngulu Pengerami Makai Lemai Vaisakhi 2026 ke diatur Gerempung Kuil Sikh Sarawak di Kuching, malam kemari.
Kenu ku iya, budaya bebasaka pangan diri sereta meretika pangan diri meseti terus ditegapka dikena nentuka rebak dudi terus ngasaika pengidup ti likun sereta lantang.
Berebak enggau nya, iya mega meri besai terima kasih ngagai Unit Hal Ehwal Jalai Pengarap Bukai (UNIFOR) laban ejensi nya seruran bebendar nyukung aktiviti jalai pengarap enggau main asal pupu bansa di Sarawak.
Uggah, menteri ti megai tanggungpengawa ba UNIFOR madah, chara perintah Sarawak ti inklusif nengah UNIFOR mandangka komitmen perintah nentuka semua jalai pengarap terus diberi perati ti adil sereta sama bela.
Pengerami nya diatur dalam suasana ke penuh enggau pemanah ati sereta diias enggau mayuh macham pengawa mandangka budaya ari komuniti Sikh nyengkaum main Bhangra enggau palu Dhol.
Sama bisi datai Sapit Premier Sarawak, Datuk Amar Prof. Dr. Sim Kui Hian begulai enggau bini iya Datin Amar Enn Ong Siok Ean serta Direktor UNIFOR, Dato Georgina Apphia Ngau. — RBI
