SPAOH, 25 Mei — Opis Parit enggau Entali Ai (JPS) Bagi Menua Betong begulai enggau Palan Servis DUN N.37 Bukit Saban kena Hari Dua tu tadi udah ngatur Program Nyerahka Taba Projek Transformasyen Menua Pesisir (RTP) 2026 di Kebun Cina, Spaoh.
Projek tu mungkur pengawa ngangkatmanah jalai enggau sistem parit ba kandang kebun buah dikena ngemanahka perengka guna infrastruktur menua pesisir sereta ngenegapka sistem parit ungkup pengelantang enggau pengelikun peranak menua nya.
Projek tu deka dipejalaika kunteriktor ti udah dipaduka nitihka skop kereja enggau spesifikasyen ti udah ditetapka.
Nitihka penerang ti dikunsi ba laman Facebook Sapit Premier Sarawak, Datuk Amar Douglas Uggah Embas, pengawa bejalaika projek RTP dikearap bejalai enggau lanchar nitihka timpuh ti udah ditetapka sereta meri pemaik ti enda ngetu ngagai komuniti menua nya.
Iya mega nyemetak madahka projek baka tu entara inisiatif perintah Sarawak dalam ngemanahka pemansang infrastruktur menua pesisir enggau chara berenggat sereta fokus, setipak enggau agenda pemansang nengeri. – RBI
