Vanessa Serawa Anak Suel teulihka pemujur ti ngemegah lebuh iya dipadu nyadi Kumang Sarawak 2026 beserimbai enggau Pengerami Gawai Dayak Sarawak 2026 ti diatur ba Bazar Gawai Dayak enggau Festival Etnokultural, Hari Empat nyin tadi.
Bela dipadahka nyadi pemenang iya nya Shalinie Agnes Ali Lulong ti dipadu nyadi Lulong Sarawak 2026, seraya Patrisia Syivia Sibat nerima gelar Selinggar Matahari Sarawak 2026.
Nengah randau khas enggau Ruai Berita Iban, Vanessa madahka pemenang nya nembuka penyulut iya pengudah sebedau tu bulih gelar champian Pekit Kumang Iban Bagi Menua Miri 2026 beserimbai enggau Pengerami Gawai Dayak Bagi Menua Miri 2026.
Nitih ku iya, ba pekit Bagi Menua Miri, iya mujur mai pulai perais mata duit RM5,000 kelimpah ari nerima sekulasip beungkus RM20,000 dipelanja Kolej Antarabansa Fajar dikena ngaku penau enggau penyulut iya.
Ungkup pemenang ba renggat nengeri 2026, Vanessa madahka diri nerima perais mata duit RM15,000, trofi, selampai, jumpang enggau baucher farmasi.
Vanessa ke ada di Miri sereta datai ari ruang bilik Iban ari Mukah madah, sukung ari diri sebilik nyadi batang pengering sepemanjai pengawa nyediaka diri napi pekit nya.
Ngenang pasal pemujur iya menang dua gelar bejurut, iya nerangka pemenang nya nyadi peneleba ti amat bisi reti sereta ngemegahka ati.
“Menang gelar beturut-turut berasai asaika mimpi, lalu ati aku chukup gaga enggau terima kasih.
“Pejalai tu enda kala muntang, tang tiap pengawa, pemar, enggau malam ti enda ulih tinduk nyadi berega maya aku bediri dia mai nama aku enggau budaya aku enggau temegah ati,” ku iya madah ngagai Ruai Berita Iban.
Iya mega meri besai terima kasih ngagai sida sebilik, bala bakih, pemelanja, pengatur, tukang penganta enggau semua penyukung ti seruran meri sukung enggau sampi sepemanjai pejalai iya dalam pekit nya.
Kenu ku Vanessa, gelar ke diulih iya ukai semina pemujur diri empu aja, tang lebih agi nyadi tanggungpengawa terus negi sereta ngetanka pesaka budaya komuniti Dayak kelebih agi budaya Iban, enggau penuh pengerindu sereta temegah ati. -RBI
