MUKAH, 24 Mei — Dua iku pekereja ladang sawit nyengkaum siku peranak menua luar ditan pengudah dipelaba bisi kaul enggau aktiviti salah guna dadah ba sebuah kompeni ladang sawit ditu tumu pagi tadi.
Ketuai Polis Pelilih Mukah nya madah, dua iku lelaki nya udah ditan raban penyaga pengelikun kompeni nya sebedau diserah ngagai polis ngambika atur ke bukai dipejalaika.
Nitihka penerang iya, saspek keterubah iya nya siku lelaki peranak menua luar beumur 46 taun lalu saspek kedua peranak menua tu beumur 21 taun lalu sama gawa nyadi kuli ba ladang sawit nya.
“Asil peresa tetemuka kedua-dua saspek dalam gaya ‘khayal’ sereta dipelaba makai dadah sebedau peresa tisih ai kemi dipejalaika Unit Bagi Tasat Jenayah Narkotik IPD Mukah urung pukul 1 pagi.
“Asil peresa nya tetemuka kedua-dua saspek ditemu positif Amphetamine enggau Methamphetamine,” ku iya nengah siti penerang sehari tu.
Ku iya, kes dipansik ari baruh Seksyen 15(1)(a) Akta Dadah Berbahaya 1952 ketegal salah guna dadah.
Enti ditemu salah, sida tau diukum jil nyentuk dua taun tauka ukum mata duit enda ngelui ari RM5,000 kelimpah ari pengawa matau dalam timpuh enda ngelui ari tiga taun.
Kedua-dua saspek diatu benung ditan ba lokap Balai Polis Mukah dikena mantu tasat ke silik agi.
Berebak enggau nya, raban polis ngemeratka komitmen sida terus ngelaban aktiviti salah guna dadah di pelilih tu lalu ngelalau mensia mayuh ngenataika penerang bekaul enggau aktiviti dadah nengah Talian Hotline IPD Mukah ba lumur 084-871222 tauka ba balai polis ke besemak. – RBI
