SRI AMAN, 25 Mei — Raban Penyaga Pengelikun Mensia Mayuh Malaysia (APM) Pelilih Sri Aman mujur bejalaika operasyen nangkap siku ular sawa batik ke ditemu ba premis Tabung Haji Sri Aman pagi tadi.
Nitihka penerang APM Pelilih Sri Aman, sida nerima kangau ngenyit bekaul enggau Kes Nangkap Ular (KMU) urung pukul 8.41 pagi sebedau ngerapitka empat iku raban enggau sebuah JMC Light Rapid Vehicle (LRV) ngagai endur penusah nya nyadi.
Lebuh datai ba endur nya, raban operasyen tetemuka siku ular sawa batik urung dua meter pemanjai ba paip sinki premis nya.
Orang ke ngaga sebana nya ngeripotka reptilia nya ditemu lebuh iya benung meresi parit sebedau terus ngaga kaul enggau APM minta bantu.
Bala raban ke bejalaika pengawa udah nya mujur nangkap ular nya ngena teknik nyepit enggau nyintak enggau likun sereta chara ke dikuasa enggau nadai meri sebarang risiko ngagai mensia mayuh.
Operasyen bejalai enggau lanchar nadai sebarang penusah ke enda manah nyadi lalu raban nya mulaika diri ngagai Palan Kawalan Operasyen Pelilih Menua (PKOD) pengudah nembuka pengawa sida.
APM Pelilih Sri Aman mega ngelalau mensia mayuh ngambika seruran bejimat sereta lengkas betanya ngagai piak bekuasa nyema betapi enggau situasyen bekaul enggau jelu bisa tauka jelu siga dikena nentuka pengelikun semua piak. — RBI
