JULAU, 25 Mei – Ngatur pengerami sebedau Gawai ukai semina nyadi pelasar ngagai komuniti begempuru sereta beperindang, tang mega ngenegapka semengat ‘Segulai Sejalai’ sereta ngerami penyelai budaya ti nyadi identiti rayat Sarawak, ku Kaban Kunsil Nengeri (ADUN) Meluan, Datuk Rolland Duat Jubin.
Nitihku iya, pengerami ke diatur keterubah ari Raban Indu Parti Demokratik Progresif (PDP) N48 Meluan nya nerima timbal ke chukup meransang enggau penatai semak 1,000 iku temuai ari mayuh bengkah kandang menua ke datai bebala mayuh ngerichahka agi pengerami nya sebedau pengerami Gawai Dayak.
Ku iya, ngatur program ke baka nya mandangka penyerakup komuniti pupu bansa di kandang menua Meluan kelimpah ngerapitka kaul pangan diri dalam komuniti.
Iya mansutka jaku tu beserimbai enggau pengawa ngatur Pengerami Makai Lemai Mantar Gawai 2026 ke diatur Wanita PDP N48 Meluan ke udah diatur ba Kompleks Lumba enggau Main Julau, malam tadi.
Sepemanjai pengerami nya, bala temuai mega diperindang enggau bemacham pengawa mandangka budaya nyengkaum pengawa mandangka bertaboh raban ari Mujok, ngajat, pengawa belagu enggau chabut tikit benasit ti nambahka pengagit pengerami lemai nya.
Pengerami nya mega dirichah enggau penatai Menteri ba Opis Premier Sarawak, Datuk Penguang Manggil begulai enggau bini iya, Datin Monica sereta raban iya ari Marudi.
Sama bisi datai iya nya Paulus Dandee Banyang enggau Brian Fung ti nyadi Sekretari Politik ngagai Premier Sarawak, Minggu Jampong nyadi Pemesai Pelilih Julau, Lau Chi Sing nyadi Sekretari Kaunsil Pelilih Meradong enggau Julau sereta bala temuai bukai ke dikangau.
Rolland mega ngenataika pengaga ati ngagai Indu PDP N48 Meluan laban udah mujur ngatur pengawa nya lalu ngarapka program baka tu ulih dipajakka jemah ila dikena ngenegapka penyerakup komuniti sereta ngetanka pesaka asal komuniti Dayak di Sarawak. – RBI
