BINTULU, 15 Mei — Penyedar senentang sukut pengelikun ari penusah angus majak ditegapka lebuh Balai Bomba enggau Penyah Penusah (BBP) Kidurong ngatur program randau mindah ari begunan enggau demonstrasyen ngena perengka pengerara api ba premis Corewell, sehari tu.

Program ke diatur ari pukul 9.00 pagi nyentuk 11.00 pagi nya ngaul 22 iku penyereta ti mungkur 17 iku lelaki enggau lima iku indu.

Entara batang isi program nya iya nya randau mindah dalam begunan, penerang pengelikun penusah angus enggau latih praktikal ngena perengka pengerara api dikena nyendiaka diri napi penusah ngenyit.

Nengah sesi meri penerang nya, bala penyereta dipadahka enggau kebuah penusah angus nyadi, chara nagang tumu sereta pengawa ke patut dipejalaika enti sema penusah angus nyadi ba palan endur gawa tauka ba kandang endur ke ngelingi.

Demonstrasyen ngena perengka pengerara api mega meri awak ngagai penyereta meretika teknik ngena ti betul dikena nagang api mit sebedau nyadi balat agi.

Program nya dipejalaika Tim Bravo BBP Kidurong betuaika Team Supervisor, PBK I Fabian Andy Jesi begulai enggau kaban bukai nyengkaum PB Mohd Syahrul bin Rudin enggau beberapa iku kaban operasyen BBP Kidurong.

Sama bisi datai ngemujurka program nya Pemesai Kanan PBT II Rary Anak Binjie.

Pengawa ngatur program tu ukai semina nambahka tikas penyedar bala penyereta nuju penusah angus, tang mega ngenegapka agi pengawa nyikap diri sereta jampat bejalaika pengawa lebuh napi gaya penusah ngenyit.

Inisiatif ti benung dipejalai JBPM tu setipak enggau komitmen piak iya ti deka nanam chara pengelikun ari penusah angus ba komuniti nengah chara “Prestasi Tinggi, Cepat dan Mesra”. -RBI

MUKAH, 15 Mei — Polis Pelilih Mukah mujur ngetan dua iku lelaki peranak menua luar ti dipelabaka bisi kaul enggau kes enchuri kereban ngaga rumah di Kampung Tellian Tengah, Mukah, nengah operasyen bebida kena 14 Mei tu tadi.

Ketuai Polis Pelilih Mukah, DSP Muhamad Rizal Alias ​​madahka, pengawa ngetan nya digaga tim kaban Bagi Pansik Jenayah IPD Mukah bepelasarka penerang enggau pemansik bekaul enggau kes enchuri ti ngaul perengka ngaga jematan.

Nitihka penerang iya, ripot pengelenyau perengka nya digaga kena 3 Mei 2026 ulih siku menijar kompeni menua tu ke beumur 40 taun pengudah tetemuka sekeda perengka kereja lenyau lalu nyangka dua iku pengereja pengawa iya enchuri perengka nya.

“Penyampau pengerugi ketegal penusah nya dipelabaka urung RM5,000,” ku iya nengah penerang media.

Pengawa datai ngenyit keterubah dipejalaika urung pukul 12 tengahari ba sebuah langkau kayu di Kampung Sesok, Mukah lalu saspek keterubah beumur 34 taun udah mujur ditan.

Sejam udah nya, polis bejalaika pengawa ngenyit kedua kali ba sebuah rumah kunsi di Jalai Desa Tanjung, Mukah lalu mujur ngetan saspek kedua beumur 33 taun.

Nitihka penerang DSP Muhamad Rizal, kedua-dua saspek ngereja pengawa enggau agresif sereta nguji ngelarika diri lebuh sedarka penatai polis.

“Pansik silik tetemuka saspek kedua udah mandangka palan endur nyimpan barang ke dichuri nya,” ku iya.

Entara perengka ke ditemu iya nya sebuah unit bor, dua unit gerain enggau sebuah unit tinsa. Polis mega ngerampas telefon binching enggi saspek dikena mantu tasat.

Kedua-dua saspek begulai enggau barang ke dirampas udah dibai ngagai IPD Mukah ngambika atur silik agi dipejalaika.

Peresa tisih ai kemi tetemuka kedua-dua saspek positif amphetamine enggau methamphetamine.

Kes tu dipansik ari baruh Seksyen 379 Kanun Keseksaan enggau Seksyen 15(1)(a) Akta Dadah Berbahaya 1952.

Kedua-dua saspek diatu diriman pengelama tiga hari nyentuk 18 Mei 2026 dikena mantu pansik silik agi. -RBI

KUALA LUMPUR, 15 Mei — Kaban Parlimen Asia bekaul enggau Penduduk enggau Pemansang Global (AFPPD Global) udah nerima enggau rasmi status Kaban Pengatur ari Tabung Penduduk Pertubuhan Bangsa-Bangsa Bersatu, lalu enggau nya ngenegapka pengawa gerempung nya dalam ngetanka isu penyampau tubuh enggau pemansang di pelilih menua Asia enggau Pasifik.

Presiden AFPPD Malaysia, Dato Sri Alexander Nanta Linggi madah, pengangkun nya diberi nengah sempekat ke disain kena 12 Mei ari baruh Program Global enggau Wilayah UNFPA 2026–2029.

Nitihku iya, status nya ngemuntangka AFPPD Global bejalaika pelin kereja ti dipelanja UNFPA dikena ngenegapka kerejasama entara kaban parlimen dalam mutarka bemacham isu bekaul enggau penyampau tubuh enggau pemansang.

Iya mega ngenataika pengaga ati ngagai Howard Lee Chuan How ke mangku pengawa nyadi Sekretari Besai AFPPD Global enggau Sapit Presiden AFPPD Malaysia laban udah nyadi ketuai dalam nentuka pemujur ke beguna tu mujur dikeamatka.

Ku iya, pemujur nya mega besai reti ngagai Malaysia nyadi tuai rumah Sekretariat Global AFPPD, lalu enggau nya ngengkahka menua tu ba penuduk ke tegap agi nyadi palan pelilih menua ungkup pengawa ngaul kaban parlimen ba isu daya pengetan demografi, pengerai reproduktif, penyemaka lelaki enggau indu, meri kuasa ngagai raban nembiak enggau pemansang ke meruan.

Ku iya nambah, pemansang nya ngayanka pangku pengawa Malaysia ti majak nambah nyadi bakih ti dikearapka dalam kerejasama antarabansa ti ngaul kaban parlimen enggau ejensi ti bekaul enggau Pertubuhan Bangsa-Bangsa Bersatu.

AFPPD Malaysia ku iya, ngarapka ulih terus nyukung AFPPD Global ba pengawa ngalihka pengangkun nya ngagai pengawa bejalaika program ti meri pemaik ngagai rayat di pelilih menua Asia enggau Pasifik. – RBI

KUCHING, 14 Mei — Sapit Premier Sarawak, Datuk Amar Douglas Uggah Embas nerima penemuai basa ari seraban Ketuai Komuniti enggau Ketuai Kaum (KMKK) ari DUN N.77 Telang Usan beserimbai enggau penemuai sida ngagai Sesi Dewan Undangan Negeri (DUN) Sarawak 2026, ditu kemari.

Raban nya mungkur 15 KMKK ari kandang menua Lemeting enggau Tinjar betuaika Penghulu Dennis Madang.

Penemuai basa nya nyadika pelasar endur berandauka bemacham pekara bekaul enggau pemansang menua pesisir, kelebih agi pengawa ngenegapka pemansang sosio-ekonomi komuniti di kandang menua Telang Usan.

Entara pekara ti dikerandau iya nya guna infrastruktur pemun, pengawa bejalaika projek pemansang genturung pendiau enggau inisiatif ekonomi genturung pendiau ti ulih nyungkak tikas pengidup peranak menua nya.

Aum nya mega mandangka komitmen perintah Sarawak ti terus nentuka pemansang menua pesisir terus ditegapka nengah chara partisipatif enggau bala ketuai renggat baruh sereta komuniti setempat.

Sama bisi ngulu sesi penemuai nya Sapit Menteri Pemansang Nembiak, Lumba enggau Orang Dagang Sarawak, Datuk Gerald Rentap Jabu. — RBI

SARIKEI, 15 Mei — Raban Penyaga Orang Periman Malaysia (APM) Pelilih Sarikei deka ngatur program meri darah kena 16 Mei 2026 (pagila) ba Palan Kawalan Operasyen Pelilih Sarikei berengkah ari pukul 9 pagi nyentuk tembu.

Program tu diatur dikena meransang mensia mayuh datai ke mua meri darah lalu enggau nya mantu nambahka bekal darah ngambika bisi dikena pesakit ti begunaka bantu ba sepital.

Nitihka infografik ke dikunsi, seiti pemeri darah bisi potensial nyelamatka nyentuk tiga nyawa kelimpah ari meri bemacham pemaik pengerai ngagai orang ke meri darah nya.

Entara pemanah meri darah nyengkaum mantu ngangkatka pengerai tungkul ati, betunuka kalori, beperesa pengerai enggau enda bebayar sereta meransang pengawa ngasilka sel darah baru.

Berindik enggau nya, mensia mayuh kelebih agi peranak ngelingi Sarikei diperansang datai ngemujurka kimpin kelai sukung ngagai pengawa kemanusiaan enggau penyedar pengerai komuniti. -RBI

KUCHING, 15 Mei — Aktivis Sarawak ke mega pemungkal Saya Anak Sarawak (SAS), Peter John Jaban, nyambut manah penerang ti dibantaika Hamzah Ibrahim ba aum Dewan Undangan Negeri bekaul enggau pematut mulaika kuasa ngagai Sarawak, kelebih agi dalam sektor pelajar, pengerai enggau pemansang.

Nitih ku iya, isu tu ke udah kelalu lama dikemeranka Perintah Besai ngujungka mayuh utai ke diguna rayat Sarawak kelebih agi di menua pesisir enggau menua ulu enda mujur diputarka enggau efektif.

Ku iya, sistem nya suah enda mujur mutarka bida infrastruktur, suntuk pengajar enggau raban perubat, pemansang ke enda seimbang sereta guna pelajar enggau pengerai di Sarawak.

Peter nyemetak madahka iya udah lama ngemeranka pengawa ‘desentralisasyen’ sistem pengerai Sarawak dikena nentuka komuniti menua pesisir bisi akses ngagai chara berubat ti lebih efisyen sereta efektif.

“Pengatur kandang menua ngemendarka chara mutarka penanggul ke lebih spesifik, praktikal ke lebih setipak enggau gaya ke bendar di Sarawak enti dibandingka enggau chara dikemeranka ari Persekutuan,” ku iya.

Ari sukut pelajar, iya pechaya reformasyen ti bisi reti enda ulih dipejalaika nengah sistem “one-size-fits-all” ti enda ngira realiti nengeri-nengeri Borneo.

Iya majak ngansak Perintah Besai mulaika kuasa ke besai agi dalam polisi pelajar ngagai Sarawak enggau Sabah setipak enggau semengat sereta penetap ari baruh Sempekat Malaysia 1963 (MA63).

Peter mega ngemeratka pengawa mulaika penuh hak Sarawak, nyengkaum nguasa enggau besai agi pengeraja asal minyak enggau gis, autonomi fiskal enggau perambu pemansang nengeri.

Nitih ku iya, Sarawak patut diberi kuasa ke lebih luas ngatur sistem pelajar kediri empu ngambika polisi ke ditumbuhka lebih manah ngayanka sejarah, budaya, pengelain jaku enggau pemerat ekonomi nengeri tu.

Iya mega ngarapka mayuh agi agih belanja deka disalurka dikena ngemansangka kolej teknikal enggau institusyen pematih pengelandik di serata Sarawak, ukai betumpu ba kandang menua Kuching ngagai Lundu aja.

Ku iya, mayuh agi institusyen teknikal patut ditumbuhka berengkah ari Kuching nyentuk ke Lawas nyengkaum di Bagi Menua Limbang ngambika mayuh agi nembiak ke lepas sekula deka bisi peluang latih pengelandik sereta nambahka penau sida gawa.

“Sarawak begunaka sistem pelajar enggau latih pengelandik ti tegap sereta komprehensif agi, ukai semina bepanggai ba agih belanja ninting taun ti nadai perambu struktural timpuh panjai,” ku iya.

Iya mega ngemeratka pemesai guna latih dalam servis enggau pemansang profesional pengajar ti seruran dipejalaika dikena ngangkatka kualiti pelajar menua.

Berebak enggau nya, Peter nyemetak madahka peminta satu per tiga penuduk parlimen ungkup Sabah enggau Sarawak ukai pekara ti tau ngasuh penyarut nyadi, tang nyadi isu konstitusyen enggau sejarah ti bekaul rat enggau penumbuh Malaysia.

Ku iya, Sarawak enggau Sabah nyadi kaban pemungkal Persekutuan Malaysia lalu ukai semina nengeri biasa dalam struktur pentadbiran Malaya.

“Pengari ke adil beguna amat dikena nentuka sada nyawa nengeri Borneo terus ditan dalam proses ngaga pemutus ba renggat nasional,” ku iya.

Iya mega minta semua ketuai, gerempung rama enggau pengaga polisi terus ngatur randau ke nyengala bekaul enggau pengawa mulaika hak Sarawak ari baruh MA63, nyengkaum aspek ‘desentralisasyen’, autonomi fiskal, ngatur sumber, pelajar, pengerai enggau pengari parlimen ke lurus.

“Pengidup Sarawak jemah ila enda tau enda ditempa nengah polisi ke semak agi enggau realiti rayat sereta bebasaka semaya ke udah digaga maya numbuhka Malaysia,” ku iya. – RBI

SARATOK, 14 Mei — Sekretari Besai Parti Pesaka Bumiputera Bersatu (PBB) Dato Sri Alexander Nanta Linggi netapka pemidang niang Datuk Douglas Sullang Ganda nyadi pengelenyau besai ngagai nengeri Sarawak, kelebih agi komuniti Dayak ti bulih penguntung ke besai ari jasa enggau pemeri iya sepemanjai pengidup iya.

Kenu ku Nanta, iya ulih datai ngagai Saratok malam tu meri basa kepenudi ngagai niang begulai enggau sida sebilik sereta komuniti menua nya.

“Niang entara tokoh komuniti Dayak ti ninggalka pangka ke besai nengah servis, iring enggau pemeri iya ngagai pemansang Sarawak.

“Mayuh pemeri udah diberi, kelebih agi dalam bidang servis mensia mayuh, pengawa dagang enggau pemansang komuniti, ti mandangka komitmen enggau penyayau niang ngagai komuniti enggau nengeri Sarawak,” ku iya nengah penerang sehari tu.

Ku iya, niang mega bejalaika tanggungpengawa ti beguna dalam ngetanka penyulut komuniti Dayak sereta ngenegapka penyereta komuniti dalam pemansang nengeri tu.

Nyadi Pemungkal enggau Ex-Sapit Presiden Balai Dagang enggau Industri Dayak, kelimpah ari kala mangku pengawa nyadi Kaban Dewan Negara ke suba, niang digambarka siku tokoh ti mayuh mantu pemansang komuniti enggau nengeri tu.

Nanta mega meri pengaga ati ngagai semua jasa, pemeri enggau pengibuh niang ti deka terus dikenang sereta nyadi sebagi ari legasi ti beguna dalam pemansang Sarawak.

“Semua jasa, pemeri enggau pengingat deka terus diberi basa sereta nyadi sebagi ari legasi ti meruan dalam pengingat kitai.

“Meri penyinu ati ngagai semua kaban belayan niang,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 14 Mei — Kaban Kunsil Nengeri ( ADUN) Tamin, Ir. Christopher Gira Sambang nyemetak madahka pemerat ngenyampatka pengawa bejalaika pemansang infrastruktur, enggau pemansang ekonomi menua pesisir dikena ngangkatka pengelantang pendiau rayat ba kandang menua Tamin enggau Selangau.

Iya mansutka pekara nya lebuh bejuraika Mosyen Terima Kasih ke jaku Ketuai Pemegai Menua (TYT) Yang di-Pertua Negeri Sarawak ba Aum Kunsil Nengeri (DUN) Sarawak sehari tu.

Dalam jurai iya, iya nyemetak madahka pemansang infrastruktur kelebih agi jalai alun nyadi penyungkak besai penumbuh ekonomi, nambahka mobiliti rayat enggau pengawa meri servis ti lebih efektif di menua pesisir.

Entara projek besai ti dikemeratka ari baruh Atur Pemansang Malaysia Lumpar Ke-13 (RMK-13) iya nya perambu ngaga Jalai Baru ari Rh Enjah nuju Rh Meroda, Ulu Bunau, Selangau beungkus RM23 juta enggau Jalai Baru ari Jalai Akses Ng Sekuau ngagai SK Ng Pakoh/Rantau Lumbang, Ulu Oya beungkus RM24 juta.

Iya mega bisi ngenang pasal pengawa bejalaika projek ari baruh Ejensi Pemansang Wilayah Rajang Tengah (MiRRDA) nyengkaum ngaga Jalai Baru ari Nanga Pakoh nuju Ulu Bunau Bekikik, Selangau beungkus RM164 juta enggau projek ngangkatmanah sereta ngaga jalai baru ari Rh Sabeli ke Rh Emong, Ng Woh, Ulu Mukah sepenyampau RM175 juta.

Kelimpah ari nya, iya meri pengaga ati ngagai perintah laban udah bejalaika sekeda projek perengkaguna mensia mayuh di Selangau nyengkaum Kompleks Lumba enggau Main Mini Selangau, kuarters baru perintah nengeri, pengawa ngaga SMK baru Selangau enggau Opis Pelajar Pelilih Selangau ke baru.

Nengah pengawa bejalaika projek Perintah Besai, iya madahka sekeda projek beguna mega benung dipejalaika nyengkaum pengawa ngaga baru enggau ngangkatmanah SMK Ulu Balingian, Klinik Pengerai Tepus enggau Klinik Pengerai Sekuau.

Berebak enggau nya, iya mega mantaika isu bekal ai ke agi nyadi pemar ba sekeda kandang menua di Tamin enggau Selangau.

Iya minta penerang ari perintah bekaul enggau status pejalai Projek Bekal Ai Selangau sereta mega projek bekal ai di Stapang enggau Sekuau ke agi dianti rayat.

Nitih ku iya, beberapa kandang endur nyengkaum Pasai Siong, Sebintek, Batu 36 Tamin, sepemanjai Jalai Pan Borneo ari Selangau ke Balingian sereta mega kandang menua Dijih agi betapi enggau penanggul suntuk bekal enggau tekanan ai ke baruh.

“Bekal ai ke beresi sereta entap nyadi pekara ke diguna rayat lalu ukai utai ke mewah,” ku iya.

Ari sukut telekomunikasyen, iya muji pengawa perintah nengeri enggau perintah besai dalam ngerembaika bungkur internet di kandang menua Tamin, tang ngarapka kompeni telekomunikasyen terus ngangkatka penegap rentayan, kelebih agi di menua pesisir, setipak enggau aspirasyen ekonomi digital Sarawak.

Iya mega ngansak ngambika pengawa nyukat tanah Hak Adat Bansa Asal (NCR) ari baruh Seksyen 6 enggau Seksyen 18 ba kandang menua Tamin dikejampatka dikena nentuka pengelikun pengempu tanah komuniti menua pesisir.

Berebak enggau nya, Gira meri langgur penemu ngambika tanah NCR ke udah disukat dikemansang enggau sistematik agi nengah sektor ekonomi produktif baka buluh, sawit, kopi, industri bepelasarka agro enggau komoditi berega tinggi ke engkeman ungkup menua pesisir.

Ngenang sukut pengawa berumah, iya mega merambu bejalaika projek berumah murah di Pelilih Selangau dikena nangkup peminta ti majak nambah ba ruang bilik biak, pengereja pengawa perintah enggau raban nembiak.

“Pemansang rumah ke ulih dibeli ukai semina ulih nyungkak kualiti pengidup rayat, tang mega ulih nyukung penumbuh ekonomi kandang menua sereta nyadika Selangau nyadi palan penumbuh baru di tengah Sarawak” ku Gira.

Iya mega merambu numbuhka kandang endur industri mit enggau jelan pemesai (SMI) di Bandar Selangau dikena matak puku dalam industri bepelasarka agro, proses pemakai, kayu hiliran, logistik, dagang digital enggau dagang mit enggau jelan pemesai menua pesisir.

Kelimpah ari nya, Gira nyambut manah pengawa milih Selangau nyadi siti ari kandang menua pemansang industri nupi babi di Sarawak lalu ngarapka pengawa bejalaika nya ulih meri pemaik ekonomi ngagai komuniti setempat enggau pengawa ngatur rampa menua enggau biosekuriti ti manah.

Dalam pejurai ke sama, iya mega minta penerang bekaul enggau status pengawa ngaga garis entara sitak baru di Sarawak ti udah dikemendarka Dewan ba taun 2025 tang bedau ngayanka penyulut ke nyata.

Nitihku iya, kandang menua baka Tamin, Kakus enggau Parlimen Selangau ngembuan kandang endur geografi ti besai sereta mayuh pemar, nya alai pengawa ngadaka penuduk baru beguna amat dikena ngenegapka pengawa meri servis enggau pengari rayat, kelebih agi di menua pesisir. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 14 Mei — Penemuai basa ari raban Ketuai Komuniti enggau Ketuai Raban Bansa (KMKK) Pelilih Mit Bario ngagai Menteri Industri Pemakai, Komoditi enggau Pemansang Kandang Menua Sarawak Dato Sri Dr. Rundi anak Utom ungkup berandauka peminta sektor betanam betupi ba tanah tinggi Bario, ku Kaban Kunsil Negeri (ADUN) Mulu, Datuk Gerawat Gala.

Nitihku iya, randau nya ngemeratka pemansang enggau penegap industri betanam padi Bario ti tebilang enggau kualiti sereta penyelai, kelimpah ari ngaluska bemacham guna ti bekaul enggau pemansang sektor agro-pemakai di menua ulu.

“Bemacham pekara dikerandau nyengkaum guna infrastruktur betanam betupi, sukung ngagai orang bumai, ngelaku produk betanam betupi enggau pengawa ngenegapka ekonomi komuniti menua pesisir nengah sektor agro-pemakai,” ku iya.

dalam siti penerang sehari tu.

Ku iya nambah, raban KMKK mega bisi nemuai meri basa ngagai Sapit Premier Sarawak Datuk Amar Douglas Uggah Embas dikena ngenataika pengaga ati enggau terima kasih sida ngagai Perintah Sarawak ti udah bejalaika mayuh macham projek pemansang di kandang menua ulu.

Ku iya, projek ti dipejalaika nengah Opis Kereja Raya Sarawak enggau Ejensi Pemansang Tanah Tinggi udah meri pangka positif ngagai peranak menua nya, kelebih agi ba Pelilih Mit Bario.

Iya mega ngarapka kerejasama rat entara perintah enggau komuniti terus ditegapka dikena nentuka pemansang di kandang menua ulu ulih digerak enggau meruan sereta meri penguntung ti enda ngetu ngagai rayat. – RBI

#ruaiberitaiban#newsiban#beritaiban

Rindu | Titih | Kunsika

PETRA JAYA: Chara inklusif ti dikemeranka perintah Sarawak dalam ngerami penyelai bansa majak ditegapka nengah pengawa nyendiaka pemeri beserimbai enggau ngintu pengerami besai komuniti nengeri tu.

Premier Sarawak, Datuk Patinggi Tan Sri Abang Johari Tun Openg madah, perintah ukai semina ngemeratka bantu beserimbai enggau Hari Raya aja, tang mega ngerembaika nya ngagai pengerami Taun Baru Cina enggau Hari Gawai.

Nitih ku iya, atur nya mandangka komitmen perintah dalam nentuka tetiap raban bansa enggau komuniti di Sarawak terus diintu enggau lurus sereta sama bela.

“Selalu iya, pemeri tu diberi beserimbai enggau pengerami Hari Raya, tang taun tu kami mega ngerembaika iya ngagai komuniti ti ngintu Taun Baru Cina enggau Hari Gawai.

“Chara tu mandangka perintah ngelala tiga bengkah pengerami besai tu, kelebih agi ngagai kaban unit beuniform ti terus bejalaika tanggungpengawa maya musin pengerami,” ku iya.

Iya madah munyi nya lebuh bejaku ba Pengerami Nyerah Simbolik Hari Gawai 2026 di Dewan Undangan Nengeri (DUN) Sarawak, ditu, sehari tu.

Ku iya nambah, inisiatif tu ukai semina betuju meri terima kasih ngagai jasa enggau pengawa raban baris mua, tang mega dikena ngenegapka semengat beserakup enggau pengelantang rayat pupu bansa di Sarawak.

Berebak enggau nya, Abang Johari mega meri besai terima kasih ngagai Opis Orang Indu enggau Ruang Bilik Sarawak ti udah bebendar nyendiaka bungkus pemakai ti deka disadung ngagai raban beuniform beserimbai enggau pengerami Hari Gawai.

Sama bisi datai Sapit Premier Sarawak Datuk Amar Awang Tengah Ali Hasan, Menteri Orang Indu, Nembiak Mit enggau Pengelantang Komuniti Sarawak Dato Sri Fatimah Abdullah, Sekretari Nengeri Sarawak Datuk Amar Mohamad Abu Bakar Marzuki, Sapit Menteri Sarawak, Kaban DUN enggau Ketuai Opis Perintah.- RBI

#ruaiberitaiban#newsiban#beritaiban

Rindu | Titih | Kunsika