KUCHING, 19 Mac — Premier Sarawak, Yang Amat Berhormat Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg nesau semua rayat nengeri tu ngambika terus ngenegapka penyerakup, integriti enggau semengat begulai dalam pengeransing nempa Sarawak lebih maju, lantang sereta kompetitif.

Dalam pesan iya beserimbai enggau Hari Raya Aidilfitri 1447H/2026M, iya nyemetak madahka Ramadan iya nya bulan pelajar ti nempa semengat komuniti ngambika lebih bedisiplin, sabar sereta siru enggau sida ti begunaka bantu.

Ku iya, sepemanjai bulan Ramadan tu, bemacham program Ihya’ Ramadan ke udah disereta iya nyengkaum pengerami bebuka puasa, sembiang berjemaah, program pengelantang pendiau enggau aum begulai enggau rayat di dalam enggau luar Sarawak udah meri peluang meretika terus aspirasyen enggau pemar ke ditapi rayat.

“Tetiap aum tu udah meri peluang ngagai aku mendingka denyut jantung rayat sereta beratika pemanah polisi enggau inisiatif ti dipejalaika Perintah Sarawak,” ku iya.

Ngelansa pasal kuing pemansang nengeri tu, iya nerangka Sarawak diatu benung ba renggat ti beguna dalam pengawa nyapai visyen pemansang manggai ba taun 2030 enggau pemerat berubah nyadi ekonomi bepenatai pemisi tinggi bepelasarka teknologi, inovasyen enggau pemanah.

Nitih ku iya, perintah nengeri ngemeratka pemansang bidang Sains, Teknologi, Kejuruteraan enggau Matematik (STEM), nyengkaum inisiatif ngemansangka industri semikonduktor nengah pemansang pengelandik menua tu.

Entara singkang ke diambi iya nya nganjung nembiak Sarawak ke nyulut ke menua luar nampung pelajar Doktor Falsafah (PhD) dalam bidang semikonduktor nyadi puku timpuh panjai ungkup nengeri tu.

Kelimpah ari nya, Sarawak mega nyerungkai bidang aeroangkasa nyengkaum pemansang teknologi satelit mit baka CubeSat dikena muka peluang ngagai rebak baru ngemeranka teknologi luar angkasa enggau aplikasyen ke bekaul.

Ari sukut pemansang modal mensia, iya ngemeratka komitmen perintah nengeri nyendiaka akses ngagai pelajar ke bekualiti nengah inisiatif pelajar tinggi enda bebayar, kelebih agi ngagai raban bepenatai pemisi baruh enggau tengan.

Berebak enggau nya, pengawa ngenegapka ekonomi gadung terus chakah dipejalaika nengah pengawa ngemansangka kuasa tau dikena baru baka hidro, solar enggau hidrogen enggau juluk deka nyadika Sarawak hab kuasa beresi serantau.

Ngelansa pasal pengelantang pendiau rayat, iya madahka bisi 924 unit rumah udah tembu di serata Sarawak ungkup timpuh 2021 ngagai 2025 ari baruh mayuh bengkah inisiatif pengawa berumah perintah.

“Perintah deka terus nentuka agenda pengawa berumah rayat mengkang nyadi pemerat dikena nentuka pengidup lantang agi, likun sereta lantang,” ku iya nerang.

Ba pemansang ke bukai, perintah mega ngemendarka agih belanja dikena ngemansangka perengka guna mensia mayuh ba Kompleks Pentadbiran Bersepadu Mulu kelimpah ari bejalaika projek ngaga jalai alun ti nyambung kandang menua ulu nyengkaum Miri, Marudi enggau Mulu dikena ngemanahka aksesibiliti sereta nyungkak pemansang sosio-ekonomi.

Iya mega nyemetak madahka penyerakup enggau pengelantang komuniti pupu bansa nyadi tiang penegap Sarawak, enggau pengerami Aidilfitri nyadi pelasar pemadu manah dikena ngerapitka kaul sereta nerenak pemanah ati.

Lebuh nyimpul jaku pesan iya, iya minta ampun enggau minta ampun ba semua pengurang sereta ngemeratka komitmen iya terus ngiring Sarawak nuju jemah ila ti lebih manah.

Iya mega madahka diri enggau sida sebilik enda ngatur pengerami rumah tebuka Aidilfitri taun tu nyadika tanda basa ngagai pemidang niang bini iya, Datuk Amar Hajjah Juma’ani.

“Selamat Hari Raya Aidilfitri, Maaf Zahir dan Batin. Ngarapka Syawal tu mai pengelantang, ngenegapka penyerakup enggau berekat ngagai semua rayat Sarawak,” ku iya. — RBI

DALAT, 19 Mac — Sepital Dalat udah madahka ubah ba jam operasyen beserimbai enggau Hari Besai Tambah Hari Raya Aidilfitri 2026 ti dipadahka Menteri Besai Malaysia ungkup 20 enggau 23 Mac tu.

Nitihka penerang ari piak pengatur sepital, servis ba Unit Pesakit Luar deka ditutup dalam timpuh nya lalu deka berengkah beoperasyen baka selama kena 24 Mac 2026 (Hari Dua).

Pengawa ngatur baru temu janji pesakit deka dipejalaika berenggat dikena nentuka servis lanchar.

Taja pia, Unit Penusah Ngenyit enggau Trauma deka terus beoperasyen baka selama pengelama 24 jam dikena mutarka kes penusah ngenyit.

Kelimpah ari nya, Unit Hemodialisis mega deka beoperasyen baka selama nitihka atur ti udah ditetapka enggau nadai sebarang ubah.

Berindik ari pekara nya, mensia mayuh dilalau merambu pekara pengerai diri maya timpuh hari besai tu.

Piak sepital mega minta ampun ba sebarang penusah ti nyadi sereta meri selamat Selamat Hari Raya Aidilfitri 1447 Hijrah ngagai semua. — RBI

MERADONG, 19 Mac – Ketuai Polis Pelilih Menua Meradong, DSP Tansli Mering madahka dua iku lelaki peranak menua nya udah ditan Raban Petugas IPD Meradong dalam operasyen “Ops Tapis” ti dipejalaika ba kandang pelilih Bintangor, pagi tadi.

Nitihku iya, pengawa ngetan nya digaga urung pukul 11.50 pagi ti mungkur dua iku saspek beumur 33 enggau 24 taun, ti dipelaba bisi kaul enggau aktiviti salah guna dadah sebedau dibai ngagai IPD Meradong ngambika atur silik agi dipejalaika.

“Asil peresa ai kemi ke dipejalaika ba Opis Unit Tasat Jenayah Narkotik (BSJND) Pelilih Meradong tetemuka kedua-dua saspek positif Amphetamine enggau Methamphetamine,” ku iya.

Ku iya nambah, pengawa meresa baru rikod ke udah tetemuka kededua saspek nadai ngembuan sebarang rikod jenayah tauka penyalah bekaul enggau dadah sebedau tu.

Kes tu dipansik ari baruh Seksyen 15(1)(a) Akta Dadah Berbahaya 1952 ti nyendiaka ukum mata duit enda ngelui RM5,000 tauka jil nyentuk dua taun enti dikenuku salah.

Berebak enggau nya, raban polis nyemetak madahka komitmen sida deka terus ngelaban aktiviti dadah di pelilih Meradong lalu enda belembut enggau sebarang piak ti bekaul.

Mensia mayuh ke bisi penerang bekaul enggau aktiviti dadah dipinta datai ke mua lalu meri penerang ngagai polis, nyengkaum betanya ngagai Balai Polis Bintangor nengah lumur 084-693222. – RBI

MIRI, 19 Mac — Aum keterubah Komiti Mit Bejadi enggau Nutup pengawa ngatur Bazaar Gawai Dayak enggau Ethnocultural Festival beserimbai enggau Pengerami Gawai Dayak Renggat Sarawak 2026 udah diatur sehari tu enggau mujur, ti bechairmanka Anthony Aboi.

Aum ke diatur pukul 11.00 pagi nya ngemeratka pengawa ngemaruka bajet pengatur dua bengkah pengerami besai nya, kelimpah ari meresa sereta nyerenih perambu program tentatif nyengkaum ngisi aktiviti sepemanjai timpuh pengerami.

Randau ke diatur nya siti singkang strategik pemungkal dikena nentuka perambu ke komprehensif sereta bejalaika program ke teratur, lanchar sereta meri empas ke tinggi, senipak enggau pemesai guna pengerami Gawai Dayak ke nyadi batang main asal nengeri tu.

Sama bisi datai Pemancha Enggah, Pengulu Nora Ree, Tr. Anthony Ladi, Kr. Martin Dinil, Dr.Mary, David Upe, Wilson Robert enggau staf ari Opis

Opis Tanah enggau Servei (JTS) Miri. — RBI

MIRI, 19 Mac — Pengawa ngatur Bazaar Gawai Dayak enggau ‘Ethnocultural Festival’ beserimbai enggau Pengerami Gawai Dayak Renggat Sarawak 2026 terus ditegapka nengah Aum Komiti Mit Ke-2 ti diatur ba Opis Residen Miri, ditu, apin lama ti udah.

Aum nya bechairmanka Datuk Dr. Penguang Manggil ke nyadi Chairman Pengatur Pengerami Gawai Dayak Renggat Sarawak 2026, enggau penatai pengari ejensi perintah, gerempung ukai dikuasa perintah (NGO), ketuai komuniti enggau kaban komiti ke bisi kaul ngatur pengerami nya.

Dalam jaku dipansutka iya, Penguang ngemeratka pemesai guna kerejasama strategik enggau koordinasyen bersepadu entara semua piak dikena nentuka pengerami nya bejalai enggau lanchar, kelimpah ulih mantaika penyelai enggau pengaya budaya komuniti Dayak ngagai temuai menua tu enggau antarabansa.

Aum nya mega bisi bejuraika sekeda batang agenda nyengkaum pengawa ngesahka minit aum sebedau tu, pekara ti nyadi sereta pengawa mantaika ripot pejalai tetiap komiti mit bekaul enggau pejalai pengawa nyendiaka program sida empu.

Kelimpah ari nya, tetiap komiti mit mega bisi ngenataika perambu enggau justifikasyen ungkup agih belanja dikena nentuka pengawa bejalaika aktiviti ulih dipejalaika enggau teratur, efisyen sereta meri empas tinggi.

Randau nya mega ngemeratka sukut koordinasyen program, nyendiaka perengka guna ungkup pedagang bazar enggau perambu aktiviti budaya ti deka nyadi pematak besai sepemanjai pengerami Gawai Dayak Sarawak 2026 di Miri.

Lebuh nyimpul randau nya, iya ngarapka semua komiti enggau raban terus ngenegapka komitmen sida sereta ngenyampatka pengawa nyendiaka diri dikena nentuka pengerami Gawai Dayak taun tu ulih dipejalaika enggau mujur, ari nya ulih meri empas positif ngagai komuniti sereta nyungkak sektor dagang temuai nengeri tu.

Sama bisi datai iya nya Datuk Majang Renggi, Chairman Komiti Mit Bazar Gawai Dayak enggau Ethnocultural Festival Miri Galong Luang, Residen Bagi Menua Miri; enggau pengari ti bekaul. — RBI

JULAU, 18 Mac – Balai Bomba enggau Penyah Penusah (BBP) Bintangor udah bejalaika Program Penyedar Mensia Mayuh ba Rumah Panjai Gundi, Kerangan Manok, dikena nambahka tikas penemu peranak ba sukut pengelikun penusah angus.

Program nya mungkur penyereta 15 iku peranak menua nya lalu dipejalaika raban bomba ti mungkur Ketuai BBP Bintangor, PPGB Mahmudin Narudin sereta dibantu PBK II Gara Ensonin enggau PBB Xierzah Aling.

Sepemanjai program nya, bala penyereta diberi penerang pandak bekaul enggau penyedar sereta nagang penusah angus ba premis genturung pendiau.

Kelimpah ari nya, sesi meri kelala enggau chara ngintu perengka pengerara api mega bisi diatur dikena nentuka perengka nya ulih dikena enggau manah maya penusah ngenyit nyadi.

Sama bisi dikunsi iya nya prosedur mutarka penusah api dapur nyumai, ke nyadi entara pun penusah angus ke suah nyadi ba rumah.

Dikearapka program baka tu ulih nambahka penyikap komuniti dalam napi sebarang penusah angus sereta ngurangka risiko lenyau reta tengkira enggau nyawa. – RBI

JULAU, 19 Mac – Projek ari baruh inisiatif Sejati MADANI dipeda nyadi siti singkang ke besai reti dalam ngenegapka ekonomi genturung pendiau rumah panjai, kelebih agi di kandang menua ulu enggau menua pesisir.

Chairman Kaunsil Industri Kayu Ramu Malaysia (MTIB) ke mega Kaban Parlimen Julau, Datuk Larry Sng Wei Shien nyemetak madah, pemujur sesebengkah projek bepanggai ba kerejasama semua piak, ukai semina sekeda individu aja.

Nitih ku iya, tetiap pengawa bejalaika projek meseti dipejalaika enggau chara terang sereta tebuka ngagai semua peranak rumah panjai dikena nyeliahka saru penemu ti tau ngeruga penyerakup komuniti.

“Enti piak ti ngatur projek nya enda lurus, nya tau ngenataika penyarut sereta mechahka peranak rumah panjai,” ku iya lebuh ngulu program begulai enggau rayat di Rumah Kanip Letong, Sungai Puak Entabai.

Iya mega nyemetak madahka semua penerang bekaul enggau projek nya nyengkaum ungkus, bansa pengawa bebelika barang enggau penguntung ke diulih meseti dirikod sereta dikunsi enggau semua peranak ngambika sida meretika tuju enggau kuing projek nya.

Ku iya nambah, enti enda nerangka pekara tu tau mai pengerugi, kelebih agi lebuh iya bekaul enggau agih belanja ke besai ke tau manggai lebih ari RM100,000.

Berindik enggau nya, iya nesau tetiap penerima projek nentuka penerang nya dibantaika enggau terang sereta teratur dikena nentuka pemujur enggau penguntung timpuh panjai ngagai komuniti.

Ba program nya mega, iya bisi nyuaka agih belanja projek ke sepenyampau RM42,000 ngagai sekeda gerempung komuniti.

Antara penerima iya nya nyengkaum Komiti Pemansang enggau Pengelikun Genturung Pendiau (JKKK) Rumah Kanip Ak Guang, JKKK Rumah Gundi Ak Matan, JKKK Rumah Ragai Ak Salang, Biro Indu Rumah Kanip enggau Gerija Belilie Rumah Musit Ak Belilie. – RBI

KUCHING, 19 Mac — Pengawa betanam betupi ba kandang menua Engkilili terus ngayanka potensial besai dalam ngenegapka pemansang ekonomi komuniti menua pesisir.

Tu nyengkaum ngenegapka pengawa nya kelebih agi ari sukut ngenegapka pemansang utai tanam pemakai, akuakultur enggau ngaul pengemeran industri ti bisi potensial.

Pekara tu dikerandauka lebuh Kaban Kunsil Nengeri (ADUN) Engkilili, Dr.Johnichal Rayong Anak Ngipa, sehari tu udah ngatur penemuai basa ngagai Direktor Betanam Betupi Sarawak Dominic Anak Chunggat, ba Indu Opis Opis Betanam Betupi Sarawak, Kuching.

Nitihka penerang ari Opis Betanam Betupi Sarawak, penemuai nya mega betuju berandauka potensial pemansang sektor betanam betupi sereta ngelakuka aktiviti nya di menua Engkelili.

Penerang nya nyemetak madahka pengawa tu beguna amat dalam nambahka produktiviti orang betanam betupi nengah chara ngena teknologi baru enggau chara betanam betupi ke pemadu manah.

Tu mega kelimpah ari ngenegapka rentayan pemansang sektor betanam betupi ke meruan agi sereta kompetitif ba kandang menua nya.

Opis Betanam Betupi Sarawak minta kerejasama entara pengari rayat enggau opis nya terus ditegapka dikena nentuka pemansang betanam betupi kandang menua meri pemaik maksimum ngagai komuniti orang bumai sereta nyukung penumbuh ekonomi nengeri selampur. – RBI

BETONG 19 Mac — Sepenyampau enam iku individu nyengkaum siku indu didawa ba Kort Litar Pelilih Saratok ketegal didawa ari baruh ‘Seksyen 6(1)(b) Akta Penagih Dadah (Rawatan & Pemulihan) 1983 dan Seksyen 6(2)(b) Akta Penagih dan Penyalah Guna Dadah dan Bahan (Rawatan & Pemulihan) 1983’.

Majistret Puan Intan Nurul Farena bt. Zainal Abidin merintahka semua sida ke dituduh bejalaika program ‘Rawatan Pemulihan Dalam Komuniti’ (RPDK) pengelama dua taun ari baruh kemata Ejensi Anti Dadah Kebangsaan (AADK) Pelilih Menua Betong.

Pechara ungkup kes tu diatur sehari kemari ba kort nya.

Pengawa tu setipak enggau pengawa AADK ti seruran dipejalaika dikena nagang pengawa salah guna dadah nengah chara rehabilitasyen enggau integrasyen baru komuniti. — RBI

KUCHING, 19 Mac — Pengawa marit rebak biak enggau nyagu pesaka budaya Dayak terus ditegap nengah aum strategik Gerempung Budaya Dayak Sarawak (SDCA) begulai enggau Sapit Premier Sarawak, Datuk Amar Douglas Uggah Embas di Wisma Bapa Malaysia.

Datuk Amar Douglas Uggah madah, aum nya meri perati ngagai pengawa nyeraris kuing tuju enggau negap inisiatif SDCA ngambi berurun, strategik sereta meri empas besai kelebih agi ngemansang penau nembiak.

“SDCA meseti terus ngerandang ruang ngagai rebak biak ngambi ngerembai penau ba bidang seni, budaya enggau industri kreatif seraya nentuka pesaka budaya meruan relevan sereta ulih diangkat ngagai renggat antarabansa,” ku iya ba aum pemberita, Hari Tiga.

Aum nya ngemerat pemesai guna nembiak ngambi bagi nyadi pelasar nyagu adat asal seraya ngansah pengelandik nyadi tuai ba bala nembiak dikena nali pesaka budaya Dayak.

Pia mega, SDCA bejurai pelin pemansang penau timpuh panjai nyengkaum nyendia jalai kereja ba industri kreatif baka melakun, mandang pisin, tukang kanta profesional enggau duta chap dagang ngagai penyereta pekit sereta pengempu gelar.

Randau nya nyengkaum pengulih kerejasama strategik begulai enggau bakih industri dikena ngerembai peluang melanja, promosyen sereta nambah rega komersial program SDCA.

Nambah ke nya, langgur ti ditaga diatur ba Kuching ba Julai 2026 mega dialus ke agi ngaul champion bagi menua ba kategori Kumang, Bidayuh enggau Orang Ulu.

Aum nya mega digulu bala tuai SDCA nyengkaum Penyanding Penemu Neilson Ilan Mersat, Presiden Bridgette Astra Donald, Sekretari Rofina Linga sereta kaban komiti ti ngari ke portfolio publisiti, logistik, pemandang enggau pekara makit.

Nangkan nya, Presiden SDCA, Bridgette Astra Donald madah ke SDCA ukai semina nyagu budaya tang mega nempa rebak dudi ti bisi pengandal enggau chukup landik.

“Nengah isi program ti ditusun sereta kerejasama strategik, kitai ulih nyendia pelasar engkeman ngagai nembiak ngambi mujur ba industri kreatif seraya negap komuniti enggau nyagu pesaka budaya Sarawak ngagai renggat global,” terang iya.

Sepanjai taun 2026, SDCA ngelanggur sekeda program besai nyengkaum Woksyop Negap enggau Nyeraris Atur Akim Kumang enggau Keling kena 18 April di Serapi Hotel, dientudi Pekit Kumang enggau Keling di Bintulu kena 8 Mei sereta Pekit Kumang Keling begulai enggau Sarawak Dayak National Union di Balai Suarah Sri Aman kena 23 Mei, sebedau Pekit Kumang Keling kena 3 Julai serimbai Samarahan Food and Cultural Festival enggau kerejasama Majlis Perbandaran Kota Samarahan.

Sumber, photo — UKAS