SEBAUH, 27 Mei — Menteri Industri Pemakai, Komoditi enggau Pemansang Wilayah Sarawak ke mega Kaban Kunsil Nengeri (ADUN) Kemena, Dato Sri Dr. Stephen Rundi Utom sehari tu ngulu Pengerami Nyerahka Chapi beserimbai enggau Hari Raya Aidiladha 1447H ti diatur ba Masjid Kampung Melayu Hilir, Sebauh.

Kenu ku iya, pengerami nya mandangka semengat pengibuh, pengelurus ati enggau penyerakup ti seruran nyadi tiang pengelantang komuniti di Sarawak.

“Sehari tu aku chukup gaga ati ngulu Pengerami Nyuaka Chapi beserimbai enggau Hari Raya Aidiladha 1447H di Masjid Kampung Melayu Hilir, Sebauh.

“Pengerami baka tu mandangka semengat pengibuh, pengelurus ati enggau penyerakup ti nyadi teras komuniti kitai di Sarawak,” ku iya.

Iya mega meri pengaga ati ngagai peluang begulai enggau komuniti Islam di kandang menua Kemena dalam ngintu pengerami Hari Raya Aidiladha ti besai reti.

“Aku amat beterima kasihka peluang begulai enggau komuniti Islam di Kemena ba hari ti manah tu,” ku iya nambah.

Berebak enggau nya, iya mega meri Selamat Hari Raya Aidiladha ngagai semua raban Islam di Sarawak, kelebih agi rayat Kemena, seraya ngarapka pengerami nya mai penyenang, pemaik enggau berekat ngagai semua.

“Arapka hari ti besai reti tu mai pengelantang, pemaik enggau berekat ngagai kita enggau diri sebilik,” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUCHING, 27 Mei — Aktivis hak asasi mensia Sarawak, Peter John Jaban ngansak Perintah Besai enggau kompeni penerebai bilun bejalaika atur enggau lengkas dikena mutarka isu tambang bilun ti majak niki sebedau pengerami Gawai Dayak enggau Kaamatan.

Nitih ku iya, peranak Sabah enggau Sarawak ke gawa enggau belajar di Semenanjung sekali agi tepejal napi rega tikit penerebai bilun ke dikumbai enda patut ungkup sida pulai ke menua ngintu pengerami begulai enggau diri sebilik.

Ku iya, berita ba media rama mandangka tikit sejalai entara Kuala Lumpur ke Sarawak enggau Sabah manggai entara RM1,000 ngagai RM1,500, lalu enggau nya ngenusahka nembiak, pekereja enggau ruang bilik bepenatai pemisi tengan.

“Gawai Dayak enggau Kaamatan ukai semina pengerami budaya aja, tang kelai penyerakup enggau pengelantang komuniti pupu bansa di Malaysia.

“Akses ngagai perengka pengangkut ke ulih dibeli maya musin pengerami patut nyadi pemerat menua,” ku iya nengah penerang media sehari tu.

Ku iya, peminta penerebai bilun ke majak nambah maya musin pengerami ukai isu baru lalu kompeni penerebai bilun enggau perintah patut udah bisi mekanisme ke lebih efektif dikena nyaga enggaika tambang niki.

Nambahka nya, rayat Sabah enggau Sarawak udah lama nanggung ungkus pengidup enggau ungkus pengangkut ke tinggi agi ketegal faktor geografi, nya alai akses penerebai domestik ke adil sereta ulih dibeli ukai utai ke “mewah” tang nyadi pekara ke diguna.

Berindik enggau nya, iya ngansak Opis Menteri Perengka Pengangkut ti betuaika Anthony Loke begulai enggau kompeni penerebai bilun baka AirAsia enggau Malaysia Airlines ngambi singkang enggau lengkas dikena mutarka isu ti nyadi belama nya.

Entara langgur penemu ke dibantaika iya nya bejalaika mekanisme ngawal tambang ke patut maya musin pengerami, penerebai bilun tambah ba jalai ke bisi peminta tinggi, subsidi khas ungkup nembiak enggau raban ke kurang penatai pemisi, sereta terang dalam netapka rega tikit maya musin pengerami.

“Rayat Sabah enggau Sarawak ukai temuai, kami semina deka pulai ke menua sereta begulai enggau diri sebilik,” ku iya. – RBI

#ruaiberitaiban#newsiban#beritaiban

Rindu | Titih | Kunsika

BINTANGOR, 27 Mei — Pengawa jampat siku peranak rumah panjai ke mega gawa nyadi bomba begulai enggau dua iku bakih iya mujur nagang api ari nyerarai ba api dapur kayu di Rh. Jawi, Selidap tumu pagi tu tadi.

Ketuai Balai Bomba enggau Penyelamat (BBP) Bintangor, PPgB Mahmudin Narudin madah, piak iya nerima kangau ngenyit bekaul enggau penusah nya urung pukul 1.24 pagi sebedau luching penusah ngenyit ditebah enam minit udah nya.

Nitihku iya, seraban bomba ari BBP Bintangor betuaika PBK II (TBBK I) Herman Anak Basa udah dianjung ngesah ngagai palan penusah nyadi.

“Lebuh datai ba palan nya urung pukul 2.35 pagi, penusah angus ditemu ba kandang dapur ti ngaul dapur kayu ba bilik lumur 18 enggi siku peranak rumah panjai nya.

“Nasit amat bisi siku peranak menua nya ke mega kaban Opis Bomba Volunteer iya nya PBB Philip Ak Chuat bejalaika pengawa madamka api enggau lengkas begulai enggau dua iku agi peranak menua nya, Entaba Ak Edward enggau Nicholas Ak Linggan, dikena nagang api ari nyerarai sebedau penatai raban bomba,” ku iya nengah penerang berita sehari tu tadi.

Ku iya, ngena dua igi perengka pengerara api ke bisi ba rumah panjai nya mujur nagang sereta madamka abis api ba renggat keterubah.

Ku iya nambah, raban bomba ke datai udah nya semina bejalaika pengawa meresa enggau silik dikena nentuka nadai agi pun penatai api lalu kandang endur penusah nyadi likun enggau penuh.

Ba penusah nya, dipelabaka pengerusak urung 10 peratus lalu nadai bakal tauka bebadi nyawa diripotka nyadi.

Operasyen nya udah dijaga pukul 3 pagi sebedau tembu enggau penuh pukul 3.13 pagi. Kebuah penusah angus nyadi agi benung dipansik.-RBI

#ruaiberitaiban#newsiban#beritaiban

Rindu | Titih | Kunsika

PAKAN, 27 Mei — Batang prinsip siku pengari rayat iya nya nentuka tetiap bantu enggau projek perintah ulih dikenataika terus ngagai rayat ungkup pemaik komuniti, kelebih agi di menua pesisir.

Pekara nya dikemeratka Kaban Parlimen Julau, Datuk Larry Sng Wei Shien lebuh ngulu Pengerami Mangkung Tiang Rumah Panjai enggau Malam Mantar Gawai Dayak di Rumah Augustine Empeni, Buku, semak ditu, demalam.

Kenu ku iya, program baka nya ukai semina nyadika pelasar dikena ngelawa rayat, tang mega ulih ngerapitka kaul entara ketuai enggau komuniti menua nya.

Ku iya, tanggungpengawa siku ketuai ukai semina bisi datai maya rayat betapi enggau penusah, tang mega ngerami pemujur enggau penyenang komuniti.

“Nyadi pengari rayat, tanggungpengawa aku iya nya mantu rayat enggau naka pemanah. Bantu enggau projek perintah meseti dikenataika enggau lurus sereta sama bela ngambika semua renggat mensia ulih ngasaika penguntung ari pemansang,” ku iya.

Ku iya nambah, tetiap projek ti dipejalaika meseti setipak enggau peneka sereta peminta rayat dikena nentuka pemansang komuniti ulih ditan belama.

Ku iya nambah, rayat ukai semina ningaka pasal polisi perintah aja, tang mega ngasaika asil pemansang ke dibai dikena nyungkak tikas pengidup komuniti.

Beserimbai enggau pengerami Hari Gawai ti deka datai, iya mega ngingatka bala komuniti ngemeranka pengawa ngelimat belanja lebuh nyendiaka diri ngintu pengerami nya.

Berebak enggau nya, iya mega ngelalau rayat ngambika terus ngemeranka pemanah kaul, bebasaka pangan diri sereta diau bebaik nentuka penyerakup enggau pengelantang pupu bansa di nengeri tu terus tegap.

Ba pengerami nya, sekeda Komiti Pemansang enggau Pengelikun Genturung Pendiau (JKKK) enggau Biro Indu nerima agih belanja sepenyampau RM63,145.

Antara penerima iya nya JKKK Rh Augustine Empeni, JKKK Rh Jeli Nangkai, JKKK Rh Dinggai Ak Uyew, JKKK Rh Seliang, JKKK Rh Mandau, JKKK Rh Jilan, JKKK Rh Ajik, JKKK Rh Jubang, Biro Indu Rh Melana, Tinting Kuini, Biro Indu Rh Augustine Empeni enggau Biro Indu Rh Jack Suji (ex Rh Libau).- RBI

#ruaiberitaiban#newsiban#beritaiban

Rindu | Titih | Kunsika

KUCHING, 27 Mei — Raban Penyaga Orang Periman Malaysia (APM) Pelilih Kuching bejalaika pengawa enggau lengkas mantu siku nembiak lelaki beumur 13 taun ke dipelabaka lemas ba kandang endur pegung nyemerai ba sebengkah palan ngelantangka ati di menua tu kemari.

APM Kuching nengah penerang berita madahka diri nerima ripot penusah ngenyit sebedau raban penyelamat dianjung ngagai palan penusah nyadi ngambika ulih bejalaika operasyen bantu keterubah.

“Lebuh datai ba endur nya, raban ke bejalaika pengawa terus meri bantu CPR ngagai tudah sebedau dibai ngagai bilik perubat seraya nganti penatai ambulan ngambika diperubat enggau silik agi,” ku penerang nya.

Nitihka penerang ari APM, pengawa tekala nya ari raban ke bejalaika pengawa mujur nentuka bantu keterubah diberi ngagai tudah enggau naka pengelengkas.

Entara raban ti ngaul diri dalam operasyen nya iya nya Sjn (PA) Mohd Kashmal Kamalmirza, Pbt (PA) Nurhafsham Jah, Pbt (PA) Mohd Zul Akmal Herman enggau Pbt (PA) Azman ChuChu.

Berebak enggau nya, APM Kuching ngelalau mensia mayuh ngambika seruran matau pengelikun nembiak mit sereta nitihka atur pengelikun lebuh bejalaika aktiviti ba kandang endur ai enggau pegung nyemerai.

Mensia mayuh ti betapi enggau sebarang penusah ngenyit tau ngenataika penerang ngagai APM Kuching nengah lumur 082-252940 tauka 082-252941 kelimpah ari talipaun penusah ngenyit 999. – RBI

#ruaiberitaiban#newsiban#beritaiban

Rindu | Titih. | Kunsika

Miri, 26 Mei — Kort Majistret Miri sehari tu ngukum siku lelaki peranak menua nya beumur 49 taun jil empat bulan pengudah orang ke dituduh ngaku salah ngelanggar atur jenayah nengah chara tama ngagai pelaman rumah ke nadai diuan orang di Miri ba Taman Wah Shin.

Kes nya diripotka nyadi kena 21 Mei 2026, urung pukul 11.00 malam lebuh siku orang ke berimbai pendiau enggau orang ke ngempu rumah nya beratika orang ke dituduh nya ngereja pengawa ti dipelabaka ‘nyelai’ sereta belalai ba pelaman rumah.

Orang ke ngaga sebana nya udah nya ngaga kangau enggau polis sebedau tim polis ke berumban ngelawa palan penusah nyadi mujur nangkap orang ke dituduh ngambi pansik ulih dipejalaika enggau silik agi.

Sebedau tu, Majistret Puan Sandy Yvett Freddy udah ngemendarka orang ke dituduh diriman pengelama empat hari dikena mantu pansik sebedau dawa nya dibantaika ba kort sehari tu.

Ketuai Polis Pelilih Miri ngelalau mensia mayuh ngambika seruran berati sereta bejaga-jaga pasal sukut pengelikun rumah enggau genturung pendiau sida, kelebih agi sebedau musin pengerami ti deka datai.

Mensia mayuh mega dilalau jampat ngeripot sebarang penerang bekaul enggau aktiviti jenayah ngagai Indu Opis Polis Pelilih (IPD) Miri tauka balai polis ke besemak.

Kerejasama komuniti amat diberi beguna dalam mantu raban polis nentuka pengelikun enggau atur mensia mayuh seruran dijaga. -RBI

KUCHING, 26 Mei — Sapit Premier Sarawak, Datuk Amar Douglas Uggah Embas muji penyulut enggau pemansang positif Opis Kereja Raya (JKR) Sarawak ti dikumbai iya majak tampak ba pengawa meransang pemansang infrastruktur nengeri tu.

Ku iya, komitmen enggau dedikasyen semua staf JKR Sarawak udah bejalaika tanggungpengawa ti beguna dalam nentuka pengelanchar bejalaika bemacham projek infrastruktur ungkup pengelantang rayat enggau penyulut terus Sarawak.

Nitihku iya, pengulih JKR Sarawak bejalaika projek besai sereta meri empas tinggi nyata ngayanka pengulih opis nya terus besemekih setipak enggau aspirasyen pemansang nengeri.

Iya madah munyi nya lebuh ngulu Pengerami Mantar Gawai Dayak JKR Sarawak 2026 ti diatur begulai enggau staf opis nya ditu, sehari tu tadi.

Berebak enggau nya, Direktor JKR Sarawak, Datu Dr. Cassidy anak Morris madahka staf JKR Sarawak amat temegah ati enggau pemujur pengawa bejadika Jematan Batang Lupar No.1 kena 21 Mei tu tadi.

Nitihku iya, jematan nya ke meraka sungai ke pemadu panjai di Malaysia lalu nyadi kelai pengulih JKR Sarawak ngamatka infrastruktur tikas dunya ungkup rayat setipak enggau rambai jaku “We Build World Class Infrastructure For You.”

Iya mega ngemeratka komitmen JKR Sarawak terus nengah rambai jaku “JKR Sarawak, Jalan Kita Rapi, Jaga Kemudahan Rakyat, Just Keep Rising!”

Pengerami nya mega dirichah enggau bemacham main asal enggau pemerindang nyengkaum pemerindang ari Yayasan Kebudayaan Dayak, ASADIA enggau Little Bornean Birdie ti mujur ngerichahka agi pengerami Gawai Dayak taun tu. – RBI

KUCHING, 26 Mei — Parti Pesaka Bumiputera Bersatu (PBB) Sarawak majak bejalaika singkang ngenegapka penyerakup parti pengawa nuju Konvensyen Renggat Zon PBB Sarawak diatu benung masuk renggat kepenudi.

Pengawa nyediaka diri udah dikerandau dalam aum khas ke diatur ba Indu Opis PBB Sarawak di Jalai Bako, lemai tu tadi ti bechairmanka Sapit Presiden PBB ke mega Sapit Premier Sarawak, Datuk Amar Douglas Uggah Embas.

Aum nya ngemeratka bemacham sukut ke beguna nyengkaum koordinasyen kereja, penyikap komiti bejalaika pengawa, penetap endur enggau pengelanchar ngatur konvensyen ba tetiap zon di serata Sarawak.

Sekretari Besai PBB, Dato Sri Alexander Nanta Linggi madah, aum nya mega netapka timpuh ngatur Konvensyen Renggat Zon PBB Sarawak ti deka berengkah ari bulan Julai ngagai September taun tu.

Nitihku iya, konvensyen nya diperambu diatur nitihka zon iya nya Zon Tengah kena 25 Julai, Zon Betong kena 1 Ogos, Zon Utara kena 29 Ogos enggau Zon Selatan kena 12 September 2026.

Ku iya, pengawa netapka taga tumu beguna dikena nentuka tetiap zon bisi timpuh nyendiaka diri ke chukup kelimpah ari ngelengkaska koordinasyen program ba semua renggat organisasyen parti.

“Konvensyen tu ukai semina nyadi pelasar dikena ngempuruka ketuai enggau kaban parti ari serata Sarawak, tang mega nyadi pelasar ti beguna dikena ngenegapka penyerakup, sepenemu enggau kuing pengawa parti,” ku iya nengah sebengkah penerang sehari tu.

Iya mega nyemetak madahka semengat begulai, disiplin organisasyen enggau komitmen selampur jentera parti deka terus nyadi pelasar besai dalam ngenegapka agi pengawa PBB ngulihka penegap politik, pemansang enggau pengelantang rayat Sarawak.

Konvensyen Renggat Zon PBB Sarawak dikearap nyadi siti ari pelasar besai parti taun tu ba pengawa ngenegapka kaul renggat baruh sereta mega ngenegapka agenda parti ba semua renggat. – RBI

MERADONG, 26 Mei — Indu Opis Polis Pelilih (IPD) Meradong terus ngenegapka kerejasama strategik enggau Sepital Sarikei nengah aum koordinasyen ke diatur ba Bilik Aum Sepital Sarikei, sehari tu.

Aum nya bechairmanka Kepala Polis Pelilih Meradong, DSP Tansli Mering begulai enggau pemesai IPD Meradong iya nya Pemesai Pemansik Opis Tasat Jenayah, Insp Arnold Lee Mayok enggau Ketuai Balai Polis Bintangor, Sjn Mujok Ak Seli.

Sepital Sarikei betuaika Direktor Sepital UB14, Sepital Sarikei, Dr. Mohamad Ng Siah Huat, lalu bela digulu Ketuai Opis Penusah Ngenyit Sepital Sarikei, Dr. Yang Xiang Yun enggau Sapit Direktor Sepital Sarikei, Dr. Rita Lau Yue Oi.

Aum ke diatur ari pukul 3.00 lemai nyentuk 4.30 lemai nya bejuraika sekeda pekara bekaul enggau mutarka kes polis ti begunaka kerejasama ari piak sepital, nyengkaum prosedur Ripot Pemati Ngenyit (SDR), ripot forensik enggau aspek koordinasyen operasyen entara kededua ejensi nya.

Kelimpah ari nya, randau nya mega bisi ngenang pengawa ngenegapka penerus kerejasama dalam bejalaika Program Meri Darah ti sebedau tu udah mujur diatur kena 23 Mei tu tadi.

Rambau aum nya, kededua piak mega bisi betukar penemu senentang atur ngemanahka agi prosedur kereja enggau koordinasyen dikena nentuka pengawa ngatur kes ulih dipejalaika enggau lebih efisyen, sistematik sereta ngasi ungkup pemaik komuniti.

DSP Tansli Mering dalam jaku dipansutka iya meri besai terima kasih ngagai Sepital Sarikei ketegal komitmen enggau kerejasama ti enda ngetu diberi ngagai IPD Meradong, kelebih agi mantu mutarka kes sereta ngemujurka program komuniti.

Iya nyemetak madahka kaul rat entara ejensi penerit adat enggau institusyen pengerai beguna amat dalam nentuka pengelantang enggau pengelikun komuniti seruran dijaga.

Ba pengujung randau nya, kededua piak besetuju deka terus ngenegapka kerejasama strategik sereta nambahka koordinasyen entara IPD Meradong enggau Sepital Sarikei dikena nentuka pengawa ngenataika servis ngagai rayat ulih dipejalaika enggau lebih efisyen sereta komprehensif. — RBI

BETONG, 26 Mei — Projek Transformasyen Menua Pesisir (RTP) 2026 mungkur pengawa ngangkatmanah jalai alun enggau sistem parit ba kandang menua Kebun Cina, Spaoh, diatu udah masuk renggat dipejalaika pengudah sesi nyerahka palan projek nya diatur kena Hari Dua nyin tadi.

Nitihka penerang nengah Facebook ari Douglas Uggah Embas, program nya dipejalaika Opis Parit enggau Entali Ai (JPS) Bagi Menua Betong nyadi ejensi bejalaika projek begulai enggau Palan Servis ADUN N.37 Bukit Saban.

Projek RTP tu nyengkaum kereja ngemanahka jalai alun sereta ngemanahka sistem parit ba kandang menua Kebun Cina dikena ngemanahka perengka guna pemun enggau pengelantang peranak menua nya.

Pengawa bejalaika pengawa nya deka dipejalaika kunteriktor ke udah dichiri nitihka spesifikasyen enggau timpuh bejalaika pengawa ke udah ditetapka.

Nitihka penerang nya, pengawa bejalaika projek tu dikearap ulih bejalai enggau lanchar sereta tembu nitihka timpuh dikena nentuka penguntung ari pemansang ulih diasaika peranak menua nya, kelebih agi ari sukut perengkaguna komunikasyen enggau sistem parit ke manah agi. — RBI