MUKAH, 13 Jun – Kaban Kunsil Nengeri (ADUN) Tellian, Royston Valentine, nyemetak madahka perintah deka terus meri perati ngagai guna pemansang infrastruktur menua pesisir dikena nentuka pengelikun, pengelantang enggau kualiti pengidup rayat seruran dijaga.
Nitihku iya, pengawa ngaga selapat tebing sungai ke beungkus RM500,000 nya nyadi puku ti beguna dikena nyaga peranak ari keruga tanah tusur ti tau ngeruga pengelikun palan pengentap pendiau enggau reta tengkira.
“Perintah seruran komited nentuka tetiap projek ti dipejalaika meri penguntung terus ngagai rayat.Projek selapat tebing sungai tu ukai semina nyaga palan pengentap pendiau ari tusur, tang mega nyamin pengelantang peranak dalam timpuh ke panjai,” ku iya.
Iya madah munyi nya lebuh ngulu Pengerami Ngiling Bidai ba Rumah Panjai Tuai Rumah Balin, Nanga Baoh, sereta bejadika Projek Selapat Tebing Sungai ke udah tembu penuh.
Royston mega nyemetak madahka pemansang menua pesisir enda tau enda dipejalaika belama sereta sebela ngambika komuniti di menua pesisir enda tinggal ari perengka guna enggau infrastruktur ti bekualiti.
Ku iya, projek baka tu mandangka pengeran perintah mendingka peminta rayat sereta meri chara mutar ke ulih nyungkak tikas pengidup komuniti lokal.
Berebak enggau nya, iya meri terima kasih ngagai semua piak nyengkaum ejensi ti bejalaika pengawa, ketuai komuniti enggau peranak ti udah meri kerejasama sepemanjai projek nya dipejalaika.
Ku iya, pemujur nembuka projek nya ngayanka kerejasama rat entara perintah enggau komuniti ulih ngasilka pemansang ti meri empas ke besai ngagai pengelantang pendiau rayat enggau penyulut menua pesisir. -RBI
#ruaiberitaiban#newsiban#beritaiban
Rindu | Titih | Kunsika
