SONG, 13 Jun — Ngiling Tikai ukai semina nandaka pengujung pengerami Gawai aja, tang nyadi kelai pemungkal baru ngagai komuniti nyingkang ke mua enggau semengat ti chakah agi, beserakup sereta ulih idup.
Pengerami tu mega ngingatka komuniti pemesai guna pengawa ti enda ngetu, kerejasama enggau penyerakup dalam ngemansangka ruang bilik, komuniti enggau rebak dudi hari.
Ba atur pengawa nya, Sekretari Politik Datuk Alvin Runggah Jimbu ngarika Menteri Kereja Raya YB Dato Sri Alexander Nanta Linggi begulai enggau ADUN N.62 Katibas YB Tuan Lidam Assan ngulu Pengerami Makai Lemai Kawasan Rukun Tetangga (KRT) beserimbai enggau Program Tikai KRT Bagi Menua Kapit ke diatur ba Song sehari tu tadi.
Pengawa tu mujur diatur Opis Penyerakup Kapit begulai enggau Komiti KRT, ti mandangka komitmen tinggi dalam ngenegapka semengat penyerakup entara komuniti setempat.
Bisi 48 mija ba pengerami makai lemai di bagi menua Song nya nyata ngayanka sukung tegap komuniti ngagai pengawa ngenegapka pengelantang enggau penyerakup rama ba renggat baruh.
Ku Datuk Alvin madah, dipelabaka Bagi Menua Kapit diatu bisi 47 Kawasan Kejiranan (KRT), nyengkaum dua KRT baru ti dikemendarka dalam taun 2026.
“Kelimpah ari nya, bisi 18 Skim Rondaan Sukarela (SRS) ti chakah, lapan Tabika Perpaduan (TP) sereta dua Mediator Komuniti (MK) ti terus bejalaika tanggungpengawa ti beguna dalam ngenegapka pengelikun, pengelantang enggau pengelantang komuniti setempat.
“Inisiatif tu ngayanka pengawa ti enda ngetu ari semua piak dalam ngenegapka agenda penyerakup menua nengah pengawa ngaul komuniti ti chakah ba renggat baruh” ku iya.
Ba jaku ti dikenataika, semengat berimbai pendiau enggau beserakup nengah pelasar KRT terus dikemeratka nyadi pelasar ti beguna dalam nempa raban bansa ti lantang.
“KRT ukai semina bejalaika tanggungpengawa dalam sukut pengelikun, tang mega nyadi medium ti beguna dalam ngerapitka kaul, nerenakka semengat kerejasama enggau pangan diri sereta nerenakka rega basa dalam komuniti pupu bansa enggau jalai pengarap” ku iya.
Datuk Alvin mantaika pengarap ngambika semengat begulai ti dipandangka terus ditegapka agi dikena nempa komuniti ti lebih progresif, tan sereta beserakup.
“Semua piak mega dipinta terus ngemeranka semengat sepenemu dalam nyapai agenda pemansang enggau pengelantang komuniti setempat.
“Program baka tu nyata ngayanka penyerakup komuniti di Bagi Menua Kapit majak tegap sereta nyadi pelasar ke beguna ungkup pengelantang rama di Sarawak.” ku iya — RBI
#Beritalban | Ruai Berita Iban
Rinduka | Titihka | Kunsika
