SARIKEI, 13 Jun – Sebuah kubi napi penusah angus senentang injin ba penusah ke nyadi ba mua Masjid Permai, Jalai Permai ditu lemai tu tadi.
Palan Operasyen nerima kangau ngenyit urung pukul 4.29 lemai sebedau raban Bomba ari Balai Bomba enggau Penyah Penusah (BBP) Sarikei nganjung tim ngesah palan penusah nyadi.
Kerita bomba datai dalam timpuh urung dua minit laban endur penusah nyadi semina dua kilometer ari balai nya.
Komander Operasyen, PBK I TBBK2 Kilok Anak Lampas, ngeripotka lebuh datai ba endur nya, ditemu penusah angus nya ngaul sebuah kubi ba bagi injin enggau pengerusak dipelabaka urung 20 peratus.
Taja pia, pengawa ti jampat deriba kubi nya mujur nagang api sebedau penatai raban bomba ngena perengka pengerara api enggau ai ari parit ke besemak.
Raban bomba udah nya bejalaika pengawa meresa enggau matau enggau silik dikena nentuka nadai agi pun penatai api tauka risiko angus baru sebedau kandang endur nya dipadahka likun.
Operasyen ke berengkah pukul 4.33 lemai nya mujur tembu urung pukul 4.50 lemai, sebedau tim nya mulaika diri ngagai stesyen pukul 5.00 lemai.
Operasyen nya mungkur sebuah entukar LFRT Atego enggau sebuah unit EMRS begulai enggau enam iku raban Bomba Sarikei.
Penusah tu sekali agi mandangka pemesai guna ngembuan perengka pemadam api sereta ngambi atur tumu ti patut dalam ngurangka risiko pengerusak ti besai agi enti sema bisi penusah angus nyadi.
Nadai penusah bakal tauka bebadi nyawa diripotka nyadi ba penusah nya. – RBI
#ruaiberitaiban#newsiban#beritaiban
Rindu | Titih | Kunsika
