PAKAN, 13 Jun – Kaban Parlimen Julau, Datuk Larry Sng Wei Shien minta bala apai indai meransang bala anak sida beambi ulih ari perengka bemalam ba buding sekula ti disediaka perintah dikena nentuka sida bulih palan belajar ti lebih kondusif sereta peluang pelajar ke manah agi.
Bejaku ba Pengerami Ngintu Gawai Sekula Primari (SK) Ulu Pedanum, iya madahka perengka guna sekula enggau buding ke bisi diatu jauh manah agi ari ke udah, lalu ari nya meri pengandal ngagai apai indai ngemendarka anak sida diau ba sekula nya taja pan rumah sida besemak.
Nitih ku iya, program baka Pengerami Gawai ukai semina ngerapitka kaul entara staf sekula enggau komuniti menua nya, tang mega nambahka penyedar apai indai senentang pemesai guna beambi ulih ari perengka guna pelajar ke bisi disediaka perintah.
Datuk Larry mega nerangka perintah ngungkupka elawin pemakai enggau ai irup sepenyampau RM28 sehari ungkup tetiap iku nembiak ke diau ba buding tauka bemalam.
Penyampau nya ulih manggai urung RM4,800 setaun ungkup siku nembiak, lalu enggau nya mandangka komitmen perintah mantu ngelempungka tating ruang bilik menua pesisir.
Iya nyemetak madahka enti enda beambi ulih ari perengka guna enggau agih belanja ke disediaka deka ngasuh peluang ke berega nya dilepaska, lalu belanja ke enda dikena nyangka patut dipulaika baru.
“Bala anak mit ke diau ba buding tu ukai semina ngasaika perengka guna belajar ke manah agi, tang mega ulih ngemansangka disiplin diri, ngatika diri enggau semengat kerejasama sereta beserakup nengah pengidup begulai enggau bala bakih,” ku iya.
Ba pengerami nya mega, Datuk Larry bisi nyuaka geran sepenyampau RM18,000 ngagai SK Ulu Pedanum dikena nyukung pengawa bejalaika bemacham aktiviti enggau pemansang sekula.
Kelimpah ari nya, bantu geran mega disalurka ngagai sekeda Komiti Pemansang enggau Pengelikun Genturung Pendiau (JKKK) enggau gerempung komuniti di kandang menua Ulu Pedanum nyengkaum JKKK Rumah James Asang, JKKK Rumah Panjing Pedanum, JKKK Rumah Kapat, JKKK Rumah Gumba Pedanum, JKKK Rumah Gumba Pedanum, JKKK Rumah Likik Ulu Pedanum enggau kebukai.
Sepenyampau agih penuh belanja disuaka maya pengerami malam nya RM118,200 ti ngayanka komitmen Datuk Larry Sng ti terus ngenegapka pemansang pelajar, pengelantang komuniti enggau ngangkatka tikas pengidup peranak menua pesisir ba kandang menua Ulu Pedanum. – RBI
#ruaiberitaiban#newsiban#beritaiban
Rindu | Titih | Kunsika
