SARIKEI, 13 Jun — Program Aram Besawit 2026 ti ngemeratka pengawa ngenegapka pekebun mit di Sarawak udah mujur dipejalaika enggau penyereta urung 300 iku pekebun mit ngatika diri ari kandang Sarikei, Meradong enggau Jalai KJD.
Pengerami Nutup Program tu dipenyadika YB Dato’ Sri Huang Tiong Sii, Sapit Menteri Kebun Bedandang Besai enggau Komoditi, ba Dewan Suarah, Sarikei.
Program ke diatur Gerempung Penanam Sawit Dayak Sarawak (DOPPA) ngemeratka pengawa ngangkatka penemu enggau pengelandik pekebun mit dalam chara betanam betupi ti meruan, teknik meri baja ti efektif, sereta nitihka penetap lisin MPOB.
Kelimpah ari nya, pesereta mega diberi kelala ngagai atur antarabansa baka European Union Deforestation Regulation (EUDR) ti deka ngeruga eksport minyak sawit menua tu jemah ila.
Dalam pengawa ngenegapka industri minyak sawit menua tu, pekebun mit mega diperansang beambi ulih ari inisiatif Kluster Minyak Sawit Lestari (SPOC) ari MPOB ngulihka setipikit Minyak Sawit Lestari Malaysia (MSPO) enggau enda bebayar.
Opis Menteri Kebun Bedandang Besai enggau Komoditi (KPK) deka terus ngenegapka kerejasama strategik enggau mayuh bengkah piak dikena nentuka industri minyak sawit menua tu terus meruan, kompetitif, sereta terus meri pulai ekonomi ke adil ngagai pekebun mit enggau rayat selampur.
Sama bisi datai YBhg. Dato’ Yusran Shah Mohd Yusof, Sekretari Besai Opis Menteri Kebun Bedandang Besai enggau Komoditi (KPK), enggau YBhg. Datuk Dr.Ahmad Parveez Ghulam Kadir, Ketuai Direktor Lembaga Minyak Sawit Malaysia (MPOB). — RBI
#Beritalban | Ruai Berita Iban
Rinduka | Titihka | Kunsika
