SAMARAHAN, 13 Jun – Komitmen nyaga rampa menua majak ditegapka lebuh Kelab Sokanjaya JKR Samarahan ngatur Program Ngumpul Uras di Jematan Batang Lupar No. 1 enggau saup rabang pengereja pengawa Opis Kereja Raya (JKR) Samarahan enggau raban kunteriktor.
Program ti begulaika aktiviti maya lepa enggau pengawa meresi tu ngembuan tuju deka meri penyedar ngagai pemesai guna nyaga pemeresi rampa menua, seraya mega nerenakka semengat volunteer ngagai bala penyereta.
Nengah aktiviti ngumpul uras ngelingi kandang jematan, penyereta mega diperansang ngemeranka gaya pengidup ti bepengerai sereta regas.
Inisiatif nya ukai semina mantu nempa rampa menua ti beresi, likun sereta lantang agi, tang mega ngenegapka kerejasama strategik entara staf JKR enggau kunteriktor dalam pengawa ngintu perengka guna mensia mayuh ti nyadi temegah ati rayat Sarawak.
Program tu mega ngayanka komitmen ti seruran dipejalai JKR Bagi Menua Samarahan enggau Kelab Sokanjaya JKR Samarahan dalam nyukung agenda ngetanka rampa menua sereta nentuka pemeresi enggau pemanah infrastruktur mensia mayuh seruran ba tikas pemadu manah ungkup pengelantang komuniti.
Dikearapka pengawa ngatur aktiviti ke baka tu ulih nyadika chunto ngagai komuniti menua tu ngambika terus ngemeranka budaya nyaga pemeresi, nyaga rampa menua sereta beterima kasih ngagai perengka guna mensia mayuh ke bisi disediaka. – RBI
#ruaiberitaiban#newsiban#beritaiban
Rindu | Titih | Kunsika
