PAKAN, 14 Jun – Bagi Menua Sarikei enggau Pakan ngembuan potensial nyadi hab besai pemansut pemakai Sarawak enti sektor betanam betupi terus ditegapka nengah pengawa ngena teknologi moden, inovasyen sereta bejalaika polisi pemansang strategik.

Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua), Tan Sri William Mawan Ikom madah, sektor betanam betupi entara pemansut besai penumbuh ekonomi nengeri ari baruh Strategi Pemansang Pengudah COVID-19 2030 (PCDS 2030) ti ngemeratka pemansang ti meruan sereta inklusif.

Nitih ku iya, transformasyen sektor betanam betupi begunaka pengawa dipejalai nengah aplikasyen teknologi enggau inovasyen dikena nentuka pengelikun pemakai, nambahka penatai pemisi komuniti betanam betupi lalu udah nya nyadika Sarawak pengeksport beresi pemakai manggai ba taun 2030.

“Dikena ngamatka aspirasyen tu, kerejasama rat entara ejensi perintah, sektor peribit enggau komuniti betanam betupi beguna amat.

“Kitai enda ulih agi bepanggai sepenuh iya ngagai chara tradisional, tang nganti nya patut berani ngalihka teknologi betanam betupi pintar, ngemeranka Amalan Betanam Betupi ti Manah (GAP), ngenegapka sistem makit enggau ngangkatka pemanah pemakai,” ku iya.

Iya madah munyi nya lebuh bejaku ba Program Nangguhka Pakan Agrofest 2026, sehari tu tadi.

Ngelansa potensial Bagi Menua Sarikei, iya madahka kandang menua ti mungkur Pelilih Menua Sarikei, Meradong, Julau enggau Pakan ngembuan pengelebih kediri empu ngambika terus mansang nyadi palan pemansut agro-pemakai besai nengeri tu.

Nitihku iya, pengawa bejalaika bemacham inisiatif transformatif beguna amat dikena nentuka sektor betanam betupi di kandang menua nya nyadi lebih progresif, kompetitif sereta meruan dalam timpuh ke panjai.

Ungkup Pelilih Pakan kelebih agi, ku Mawan, sitak nya endang tebilang enggau pengawa ngeluarka bemacham produk betanam betupi nyengkaum sayur, buah enggau produk hiliran ti bisi nilai tambah baka kasam ensabi, ragi enggau produk bepelasarka lada.

“Potensial besai ke dikembuan pelilih menua tu patut ditegapka agi. Perintah Sarawak seruran komited mantu orang betanam betupi nengah pengawa nyendiaka input betanam betupi, latih enggau kus, baikka in-situ tauka ex-situ, kelimpah ari pengawa ngaga enggau ngangkatmanah jalai kebun dikena nambahka produktiviti betanam betupi,” ku iya.

Iya andal amat nengah sukung perintah ti terus diberi sereta komitmen tinggi raban orang betanam betupi, sektor tu di Bagi Menua Sarikei deka terus ngerembai enggau jampat sereta ulih meri pangka ke besai ngagai agenda pengelikun pemakai Sarawak manggai ba taun 2030.

“Enti semua piak bejalaika tanggungpengawa diri empu, aku pechaya Bagi Menua Sarikei ukai semina ulih nangkup guna pemakai nengeri tu, tang mega bisi potensial nyadi siti ari palan pemansut pemakai ke pemadu kompetitif di Sarawak,” ku iya.

Sama bisi datai iya nya Datuk Larry Soon @ Larry Sng Wei Shien, Chairman Industri Kayu Ramu Malaysia ke mega Kaban Parlimen Julau, Sekretari Tetap Opis Menteri Industri Pemakai, Komoditi enggau Pemansang Kandang Menua, Datu Sirai anak Daha, Direktor Opis Betanam Betupi Sarawak Dominic anak Chunggat, Pemesai Pelilih Menua Pakan, Mohd Irwan bin Abdullah @ William Manggoi, Pemesai Opis Betanam Betupi Bagi Menua Sarikei, Jessyca anak Andrew Mujah, pengari ejensi perintah sereta selampur peranak Pakan. – RBI

#ruaiberitaiban#newsiban#beritaiban

Rindu | Titih | Kunsika

BETONG, 14 Jun — Opis Kereja Raya Sarawak terus ngenegapka pengawa matau pengawa bejalaika projek infrastruktur di nengeri tu lebuh Direktor iya, Datu Adj. Prof. Ts. Gs. Br. PMr. QPr. Dr.Cassidy anak Morris udah bejalaika penemuai kereja ngagai palan Projek Jematan Sungai Paku, sehari tu.

Penemuai nya ngembuan tuju deka beratika baru pejalai pengawa bejalaika projek sereta nentuka pengawa ba palan nya bejalai nitihka timpuh ke udah ditetapka.

Sama bisi datai Sekretari Mendam Opis Menteri Infrastruktur enggau Pemansang Palan Penyangkai Kapal Sarawak, Datu Chiew Chee Yau.

Rambau penemuai nya, raban nya diberi penerang projek ari Injinir PWD Bagi Menua Betong, Jason Ng Boon Tuan, ti madahka status pemadu baru pejalai projek enggau pejalai pengawa ba palan nya.

Nitihka penerang nya, Projek Jematan Sungai Paku ti mungkur pengawa ngaga jematan besi pemanjai 107 meter diatu udah nyapai penyulut fizikal 88.52 peratus lalu benung ba renggat kepenudi tembu.

Projek tu dikearap ulih ngemanahka agi penyambung kandang menua nya sereta ngemuntangka pemindah peranak, kelimpah nyukung pemansang sosio-ekonomi di kandang menua Betong enggau kandang endur ngelingi nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — JKR Sarawak

SIBU, 14 Jun — Kaban Kunsil Nengeri ( ADUN) Tamin, Ir. Christopher Gira Sambang ngulu Program Ngabang Gawai Dayak 2026 ke diatur ba Rumah Panjai Chairman Opis Kaunsil Pelilih Menua Pesisir Sibu (MDLBS/SRDC), Kaunselor Sempurai Petrus Ngelai di Rh. Bunsie Anak Tiboh, Salim Belalang, Sibu, beserimbai enggau pengerami ngintu Hari Gawai Dayak.

Program tu sebengkah ari inisiatif dikena ngelawa komuniti ba renggat menua kelimpah ngerapitka kaul entara bala ketuai enggau komuniti lokal.

Rumah panjai ke bepalan urung 10 minit penyauh ari Sibu Jaya diani 17 ruang bilik lalu mega mandangka pemansang rumah panjai moden setipak enggau penyulut menua pesisir sereta semengat penyerakup komuniti.

Rambau penemuai nya, Ir. Christopher ngemeratka pemesai guna ngetanka rumah panjai nyadi pesaka asal komuniti Dayak, kelimpah ari meri perati ngagai isu Hak Tanah Adat Bansa Asal (NCR) ke nyadi aset beguna ngagai komuniti menua pesisir.

Ku iya, tanah NCR ukai semina ngembuan rega sejarah enggau pesaka asal, tang mega ngembuan potensial nyadi penyungkak pemansang ekonomi enti diperambu sereta diatur enggau sistematik sereta bejimat.

“Tanah adat endang reta ke chukup berega ngagai komuniti. Iya patut dijaga sereta dikena enggau pintar ngambika meri penguntung ngagai rebak diatu enggau jemah ila.

“Aku pechaya, tebal agi tanah ba kandang menua tu diempu komuniti ngelingi.”

“Enggau pemansang ti jampat nyadi kelebih agi ba kandang menua Sibu Jaya, tanah di Salim Belalang ngembuan potensial nyadi aset ti berega tinggi ari sukut rega dagang.

“Perambu ti manah deka mantu ngangkatka tikas pengidup komuniti sereta muka mayuh agi peluang pemansang ekonomi,” ku iya.

Iya mega nesau bala komuniti terus ngetanka semengat beserakup, kerejasama enggau ngemeranka pengawa gotong-royong ti nyadi pelasar penegap komuniti rumah panjai ngelama tu.

Kenu ku iya, pengerami Gawai ukai semina ngerami asil ngetau enggau pesaka asal komuniti Dayak, tang mega nyadi pelasar ngerapitka kaul kaban belayan enggau penyerakup entara rayat pupu bansa di Sarawak.

Lebuh nyimpul penemuai nya, iya meri besai terima kasih ngagai tuan rumah enggau semua peranak menua nya ketegal sambut ti chukup manah ti disediaka sida.

“Arapka semengat Segulai Sejalai terus nyadi pelasar penyerakup enggau penyulut komuniti, setipak enggau juluk deka ngemansangka Sarawak ti maju, lantang sereta inklusif,” ku iya.

Sama bisi datai ADUN Baleh Nicholas Kudi Jantai (ADUN), Sekretari SRDC, Ng Siang Wei, Injinir Kereja Raya Bagi Menua Sibu Ir. Ts. Gs. Br. Chieng Siong Ming, ex-Sekretari Politik Thomas Romeo Christopher Tegong, Nembiak PBB Bawang Assan, bala kaunselor enggau Kaunselor Sempurai Petrus Ngelai nyadi tuai rumah begulai enggau peranak Rumah Panjai Bunsie Anak Tiboh, Salim. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 14 Jun — Betong nyadi palan endur ngatur Pengerami Rasmi Hari Pengada Yang di-Pertuan Agong Ke-17 renggat Sarawak nengah Pengerami Ngirup Teh ti diatur dalam gaya chukup pengerami ba Dewan Lumba enggau Main Tan Sri Datuk Amar Stephen Kalong Ningkan, ditu.

Pengerami nya dipenyadi Ketuai Pemegai Menua (TYT) Yang di-Pertua Negeri Sarawak, Tun Pehin Sri Dr.Wan Junaidi Tuanku Jaafar begulai enggau bini iya, Toh Puan Datuk Patinggi Fauziah Mohd Sanusi, lalu bela digulu Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Sapit Premier Sarawak, Datuk Amar Douglas Uggah Embas begulai enggau bini iya, Datin Amar Dato Doreen Mayang sereta mega raban ketuai nengeri enggau bala temuai dipebasaka ti dikangau ke bukai.

Pengawa tu ngempuruka bala ketuai nengeri enggau komuniti ari mayuh bengkah serak pengidup, lalu enggau nya mantaika penaluk rayat ti meruan ngagai Yang Di-Pertuan Agong, kelimpah ari ngenegapka semangat penyerakup, pengelantang enggau begulai entara rayat Sarawak.

Entara batang pengerami nya nyengkaum pengawa melah simbolik melah pulut kuning enggau pengawa nyuaka pemeri ngagai penerima bantu berejista Opis Pengintu Pengelantang Raban Bansa (JKM) Sarawak Bagi Menua Betong.

Pengerami Ngirup Teh nyadi pengerami pengerami renggat Sarawak taun tu di Bagi Menua Betong, sebedau ditangkan enggau Konsert Rayat ti dipandangka artis ari Sarawak enggau Semenanjung Malaysia.

Ngelansa pasal pengerami nya, Sapit Premier Sarawak Datuk Amar Douglas Uggah Embas madahka pengerami nya nyadi pelasar ke beguna dalam ngenegapka penyerakup rayat sereta mantaika penaluk ngagai institusyen diraja.

“Pengerami baka tu ukai semina ngingatka hari pengada rasmi Yang di-Pertuan Agong, tang mega nyadika pelasar dikena nyerakupka rayat pupu bansa di Sarawak,” ku iya — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LONG BEMANG, 14 Jun – Sepenyampau 608 iku peranak ti ngaul 103 buah rumah dituntung penusah ampuh bah ti nuntung Kampung Long Bemang kenyau ari 12 Jun tu tadi.

Nitihka ripot ari Gerempung Bomba Volunteer Long Bemang, tikas ai naka pukul 3.25 lemai sehari tu dirikodka tikas peninggi 3.0 kaki enggau gaya ke diatu mandangka gaya ke manah.

Ampuh bah ke berengkah nyadi urung pukul 3.45 lemai kena 12 Jun tu tadi dipelabaka bepun ari ujan ke enda ngetu pia mega endur rumah peranak besemak enggau sungai.

Taja pan mayuh peranak ke kena empas tang nadai pengawa mindah ngagai Palan Pengenduh Sementara (PPS) dipejalaika naka ke diatu.

Gaya hari ba kandang endur nya diripotka mambam lalu peranak ke kena bungkur penusah bah dilalau ngambika seruran bejaga-jaga sereta matau pemansang ke nyadi diatu dikena nyeliahka sebarang penusah ke enda dikedekaka nyadi.

Piak ti bekaul deka terus matau gaya bah ari setiap maya dikena nentuka pengelikun peranak seruran dijamin. – RBI

#ruaiberitaiban#newsiban#beritaiban

Rindu | Titih | Kunsika

MARUDI, 14 Jun — Komitmen ti seruran dipejalai ngagai pemansang menua pesisir majak ditegapka lebuh YB Datuk Dr. Penguang Manggil datai ngerichahka agi Pengerami Ngiling Tikai Gawai 2026 di Rumah Panjai Entari, Bakong, sereta nembuka pengawa bejadika projek bekal ai beresi di Sg. Buri, Bakong.

Pengerami Ngiling Tikai Gawai diatur dalam gaya ti richah sereta penuh enggau adat enggau main asal, enggau penatai peranak menua nya ke sama bela ngintu pengerami nya kelai pengawa nutup rasmi pengerami Gawai Dayak taun tu.

Program tu mega mandangka semengat penyerakup, pengelantang enggau identiti budaya komuniti rumah panjai ti udah ditan ari rebak ngagai rebak.

Ba pengerami ke sama, YB Datuk Dr. Penguang Manggil bisi mega bejadika Projek bekal ai beresi Sg. Buri ti nyadi siti ari inisiatif perintah dikena ngenegapka perengka guna pemun ungkup rayat menua pesisir.

Projek tu dikearapka ulih meri penguntung terus ngagai peranak menua nya nengah akses ngagai bekal ai beresi ti lebih entap, likun sereta bekualiti.

Pengudah program rasmi nya, iya mega bisi ngelimpangka diri ngaga penemuai enda lama ngagai Rumah Panjai Tuai Rumah Mujap ungkup sesi betemu enggau peranak menua nya.

Maya penemuai nya, iya bepeluang besilih penemu sereta ninga enggau mata diri empu isu enggau utai ke diguna komuniti besemak, taja pan jadual program iya kiruh amat sehari nya.

Rambau penemuai nya, Penghulu Nora Ree mega bisi ngenataika jaku ngemeratka sekeda pekara beguna bekaul enggau pangku pengawa nyadi ketuai komuniti rumah panjai.

Entara nya iya nya tanggungpengawa Tuai Rumah ngatur pengawa atur Komiti Pemansang enggau Pengelikun Genturung Pendiau (JKKK) dikena nentuka pengelantang ngelingi seruran dijaga, nyengkaum nyadi pemutar penyarut bepelasarka adat enggau main asal Iban sereta nyadi jematan entara peranak enggau perintah.

Iya mega ngemeratka pemesai guna ngetanka adat enggau main asal Iban ngambika terus dipebasa sereta seruran relevan enggau pemansang kemaya hari, kelimpah ari nentuka bala ketuai komuniti terus ngemeratka pengelantang enggau pengelikun peranak ba rumah panjai diri empu.

Ba jaku iya mega, iya meri tabi puji sereta meri besai terima kasih ngagai YB Datuk Dr Penguang Manggil ti udah bebendar ngamatka mimpi peranak Sg. Buri ngasaika bekal ai beresi ti udah ti lama udah dianti.

Iya mega nesau semua peranak Sg. Buri ngambika terus beserakup sereta bekerejasama dalam nyukung pengawa pemansang ti dibai ngagai sitak nya ungkup pengelantang begulai jemah ila.

Tuai Rumah Mujap dalam jaku dipansutka iya mega ngenataika pengaga ati enggau basa ngagai YB Datuk Dr. Penguang ti sanggup ngetu ba rumah panjai iya, madahka penemuai nya nyadika bukti pengibuh pengari rayat ngagai komuniti renggat baruh.

Penemuai tu mandangka pengawa perintah ti enda ngetu dalam ngenegapka pemansang menua pesisir, seraya nentuka pengelantang pendiau rayat terus diberi perati nengah pengawa bejalaika projek infrastruktur asas ti meri empas terus ngagai komuniti setempat

SIMUNJAN, 14 Jun — Axella Iva Sonny dipadu nyadi champion Pekit Kumang beserimbai enggau Program Niti Daun Gawai Dayak Pelilih Simunjan 2026 Edisyen Ke-2 ti diatur ba Dewan Mesra Simunjan, kemari.

Pemenang nya ngemendarka iya mai pulai perais mata duit RM1,000 enggau trofi pengudah mandangka pemanah pekayan asal enggau pengangkun ke tinggi ngagai pesaka asal Dayak, lalu enggau nya teulihka ati panel juri.

Penuduk lumur dua diempu Alvianna Adele Agnes ti mai pulai perais mata duit RM800 enggau trofi, lalu penuduk lumur tiga diempu Putri Najma Abdul Hakim mai perais RM700 enggau trofi.

Pekit ke digulu 10 iku penyereta nya nyadi siti ari program ke pemadu dikerinduka nya, ke ngembuan juluk deka negika budaya enggau adat asal komuniti Dayak, kelebih agi ba raban nembiak rebak baru.

Ba kategori ke bukai, kontinjen Kampung Sungai Buluh mansutka diri nyadi champian bejalai bebala mayuh Kontinjen Niti Daun Pemadu Manah pengudah mandangka kreativiti, semengat beraban enggau elemen budaya ke nyulut sepemanjai pengawa bebaris nya.

Pemenang nya meri hak ngagai kontinjen nerima perais mata duit RM1,500, lalu lumur dua dimenang kontinjen Kampung Senangeh enggau mata duit RM1,000, lalu ditangkan Kampung Melanjok Asal ba penuduk lumur tiga enggau RM800.

Sepenyampau 31 kontinjen ari mayuh bengkah genturung pendiau di pelilih Simunjan nyereta pengawa bebaris ti berengkah ari Padang Sentral nuju ngagai Dewan Mesra Simunjan, lalu enggau nya ngerichahka pengerami Gawai Dayak enggau mayuh macham pengawa mandangka budaya sereta identiti komuniti diri empu.

Pengerami bejadika program nya ditembuka enggau gimik mangkung tawak, sorak “Ooohaa” enggau pengawa meletupka belon kelai semengat beserakup enggau pengagit pengerami Gawai Dayak di pelilih menua nya.

Sama bisi datai Kaban Parlimen P.201 Batang Sadong, YB Puan Rodiyah Sapiee; Kaban Kunsil Nengeri (ADUN) Simunjan, Awla Dris; Pemesai Pelilih Simunjan, Sanuyah Mohamad; enggau Pengari Residen Bagi Menua Samarahan, Janfytria Abu Bakar. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SRI AMAN, 14 Jun — Opis Pengerara Api enggau Penyah Penusah Malaysia (JBPM) Balai Bomba enggau Penyah Penusah Sri Aman udah mujur nyaga sereta bejalaika operasyen nyelamat ba penusah bebadi ba jalai alun ti ngaul sebuah entukar Proton Saga ke tepawah tama ngagai parit di kandang SK No. 2 Engkelili, Jalai Pan Borneo

Palan Operasyen nerima kangau ngenyit urung pukul 6.49 pagi sebedau jentera operasyen dipindah ari stesyen lalu datai ba endur nya urung pukul 7.10 pagi.

Lebuh datai ba endur nya, Komander Operasyen bejalaika pengawa beratika keterubah (size up) sebedau pengawa nyelamat berengkah.

Eksiden nya ngaul dua iku mansa iya nya siku lelaki enggau siku indu ke besai tuai.

Lebuh penatai raban bomba, mansa lelaki udah mujur pansut ari entukar, lalu mansa indu agi dalam entukar lalu begunaka bantu dipansutka.

Tim Unit EMRS meri perubat keterubah ba endur nya enggau ngelekatka kolar serviks (C-collar) ngagai mansa sebedau proses mansutka mansa dipejalaika tim penyelamat ngena stretcher nengah pintu deriba entukar nya.

Pengudah mujur dipansutka, kededua mansa diserah ngagai tim Opis Menteri Pengerai Malaysia (KKM) ngambika atur silik agi dipejalaika sebedau dianjung ke Sepital Sri Aman ngena ambulans KKM ngambika diperubat.

Mansa beumur 64 taun (lelaki) bakal ba kaki enggau tubuh, lalu siku agi, beumur 42 taun (indu) ke mega bakal ba kaki enggau tubuh.

Operasyen ti betuaika Komander Operasyen, PBK I (TBK I) Edwin anak Jonani ti ngaul jentera FRT enggau EMRS udah mujur dikuasa sereta tembu abis urung pukul 7.37 pagi.

Operasyen ke nangkanka nya diputuska pengudah gaya nya disahka likun sereta ulih dijaga.

JBPM Sri Aman meri besai terima kasih ngagai semua ejensi ti bisi kaul enggau kerejasama sida sepemanjai operasyen nya dipejalaika. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 14 Jun — Pengawa milih Bagi Menua Betong nyadi tuai rumah Pengerami Ngintu Hari Pengada Yang di-Pertuan Agong Ke-17 renggat Sarawak ba taun 2026 dipadahka nyadi pengaga ati ke besai ngagai rayat di sitak nya.

Sapit Premier Sarawak, Datuk Amar Douglas Uggah Embas madah, pengawa milih nya mandangka perintah ngaku pangku pengawa enggau pemeri komuniti lokal dalam nerenakka penyerakup enggau pengelantang rama di Sarawak.

Iya mantaika pekara nya lebuh ngelaluka penatai Ketusi Pemegai Menua (TYT) Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar enggau bini iya, Toh Puan Datuk Patinggi Fauziah Mohd Sanusi di Betong, beserimbai enggau pengerami rasmi renggat nengeri nya, kemari.

Lebuh datai dia, Yang di-Pertua Negeri Sarawak enggau bini iya ngulu Pengerami ‘Jamuan Tengah Hari Keluarga Besar Sa’adah Betong–Spaoh’ ba Restoran 3 Serambi.

Pengerami nya ngempuruka lebih 150 iku kaban ari ruang bilik Sa’adah ti ditambah ari Bagi Menua Betong enggau Pelilih Mit Spaoh, lalu enggau nya nyadi pelasar ngerapitka kaul diri sebilik sereta ngerapitka kaul pangan entara rebak.

Nitih ku Datuk Amar Douglas Uggah Embas, pengerami nya ukai semina mantaika penaluk ngagai Yang di-Pertuan Agong, tang mega nyadika pelasar dikena ngenegapka semengat beserakup, pemanah ati enggau begulai entara rayat Sarawak.

“Kami amat berasai temegah ati nerima penatai Tun Pehin Sri enggau Toh Puan ke Betong.

“Pengerami tu ukai semina mantaika penaluk ngagai Yang di-Pertuan Agong, tang mega ngenegapka semengat beserakup enggau begulai ti nyadi penegap rayat Sarawak,” ku iya.

Ku iya nambah, pengawa ke diatur di Betong mega nambahka reti ngagai pengawa ngerapitka kaul entara ketuai enggau komuniti menua nya.

Muak ke lemai, Yang di-Pertua Negeri Sarawak diperambu deka ngulu Pengerami Beterima Kasih beserimbai enggau pengerami nya di Masjid Jamek Betong.

Ba hari siti, iya deka bejadika Pengerami Ngirup Teh ba Dewan Lumba enggau Main Tan Sri Datuk Amar Stephen Kalong Ningkan, ti disadang nyadi pengerami besai ba pengerami renggat Sarawak taun tu.

Pengerami dua hari berunggu nya ngempuruka bala ketuai enggau komuniti ari mayuh bengkah serak pengidup, mandangka semengat beserakup, beterima kasih sereta begulai ti terus nyadi teras pengelantang enggau penyulut Sarawak. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SONG, 14 Jun — Pengerami Makai Lemai Kawasan Rukun Tetangga (KRT) beserimbai enggau Pengerami Ngiling Tikai Bagi Menua Kapit 2026 diatur enggau richah nyadi pelasar ngenegapka penyerakup komuniti sereta ngetanka pesaka main asal menua tu.

Kaban Kunsil Nengeri (ADUN) Katibas, Lidam Assan nyemetak madahka pengawa Ngiling Tikai ukai semina pengawa nutup pengerami Gawai aja, tang nyadi manifestasyen pengangkun ngagai pesaka asal ti nyadi kelai nyerakup mayuh macham serak mensia mayuh, ditu kemari.

Nitih ku iya, pengawa ngemeratka adat enggau main asal patut ditegapka agi dikena nentuka reti begulai, bebatak asur enggau meruan terus ngerembai entara komuniti, kelebih agi ngambika ulih dipeturun ngagai rebak dudi hari.

“Ngiling Bidai nyadi manifestasyen pengangkun ngagai pesaka asal sereta kelai penyerakup ti nyerakupka komuniti.

“Nengah pengawa ngemeratka adat enggau main asal, kitai ulih terus nerenakka semengat begulai, bebatak asur sereta bebaik ungkup pengelantang rebak dudi,” ku iya.

Iya mega minta komuniti beratika baru pengawa ngintu Gawai nengah chara ngetanka reti positif sereta ninggalka elemen ti nadai mai penguntung, seraya terus ngetanka adat asal baka ngajat, nimang, miring enggau mayuh macham pesaka budaya Iban ti majak dikemeranka.

“Reti negatif enggau positif dalam ngintu Gawai meseti diambi kira. Pekara ke enda manah meseti dibuai, seraya pengawa ke manah meseti dijadika chunto ngagai rebak baru ngambika sida meretika reti ke bendar ngintu Gawai dalam komuniti Iban,” ku iya nambah.

Berebak enggau nya, YB Lidam ngenataika pengaga ati iya ngagai Opis Penyerakup Kapit ke nyadi pengatur pengawa laban udah milih Song nyadi palan endur ngatur program Ngiling Tikai Bagi Menua Kapit taun tu, ti mujur ngerapitka kaul enggau asai begulai entara komuniti setempat.

Pengerami nya bela digulu Datuk Alvin Runggah Jimbun, Sekretari Politik ngagai Menteri Kereja Raya Malaysia Dato Sri Alexander Nanta Linggi, En. Harry Bruce Edwin, Pemesai Pelilih Song, enggau Puan Lau Siew Yen, Pemesai Penyerakup Pelilih Kapit, begulai enggau ketuai opis sereta KMKK Bagi Menua Song. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika