KUALA LUMPUR, 1 Mei – Menteri Dagang Temuai, Seni enggau Main Asal (MOTAC) Dato Seri Tiong King Sing ngenataika jaku Selamat Hari Pengereja Pengawa ngagai semua rayat Malaysia, kelebih agi sida ke gawa dalam sektor dagang temuai, seni enggau main asal laban sida enda ngetu meri bantu ngagai pemansang menua.

Ku Tiong, Hari Pengereja Pengawa nyadi siti pekara ti beguna amat dikena ngaku pangku pengawa semua pengereja pengawa ti nyadi tulang belakang penyulut enggau pengelantang ekonomi menua.

“Sehari tu, kitai ukai semina ngerami pemeri pengereja pengawa menua tu aja, tang mega beterima kasih ngagai dedikasyen, pengeliat ati enggau semengat setiap individu ke nyadi pemansut besai penyulut Malaysia,” ku iya ba sebengkah penerang.

Iya mega nyemetak madahka sektor dagang temuai, seni enggau main asal bepanggai ba rentayan industri ti besai sereta besambung, nyengkaum ejensi dagang temuai, operator hotel, “pemandu” temuai, kompeni penerebai bilun enggau penyendia servis pengangkut.

Nitih ku iya, bala artis, orang dagang kraf, komuniti budaya, pengatur pengawa enggau penyaga pesaka mega bejalaika tanggungpengawa ke berat dalam ngenegapka identiti menua kelimpah nyungkak ekonomi kreatif.

“Perintah deka terus komited nentuka ekosistem industri tu seruran tan, inklusif sereta meruan ngambika genap pengawa enggau pemeri ulih diberi puji sereta muka mayuh agi peluang ngagai rayat,” ku iya.

Berebak enggau nya, iya minta semengat Hari Pengereja Pengawa terus meri inspirasyen ngagai semua piak ngenegapka kerejasama sereta nempa menua Malaysia jemah ila ti lebih progresif sereta lantang. -RBI

#ruaiberitaiban#newsiban#beritaiban

Rindu | Titih | Kunsika

LUNDU, 1 Mei – Pengawa ngintu penyu ukai semina simbolik aja, tang nyadi puku strategik timpuh panjai dikena nentuka pengelantang ekosistem tasik nengeri tu, pia ku Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh.

“Perintah Sarawak tetap komited nentuka pengelantang biodiversiti. Pengawa ngintu penyu begunaka pengawa ti begempung ti ngaul semua piak nyengkaum ejensi perintah enggau komuniti menua tu. Tu tanggungpengawa bekunsi,” ku iya nyemetak.

Iya madah munyi nya lebuh nembuka program ngelepaska 538 iku anak penyu ke tasik di Pantai Pugu, beserimbai enggau pengawa bejadi rasmi Palan Netaska Telu Penyu ke baru ba kandang menua nya.

Program tu mega nyadi kelai ti terang ngagai komitmen Perintah Sarawak ti majak nyaga pengeraja asal enggau spesis jelu tasik ti majak punas, kelebih agi ba ‘hotspot’ penyu sangkai baka Pantai Pugu.

Pantai nya diatu dipeda ngembuan potensial besai dikemansang nyadi palan ngintu tasik enggau palan ekodagang temuai bepelasarka komuniti, lalu enggau nya muka peluang ekonomi baru ngagai peranak menua nya.

Berebak enggau nya, pengawa matau enggau nyaga deka terus ditegapka kelebih agi maya musim penyu betelu, dikena nentuka kandang endur nya nadai keruga enggau pengachau ari mensia enggau jelu bukai.

Berebak enggau nya, Menijar Besai Kaunsil Pengintu Kampung Sarawak (SFC) ke mega Penguasa Jelu Siga, Abang Arabi Abang Aimran madah, pemujur program nya asil ari kerejasama strategik entara mayuh bengkah piak.

Nitih ku iya, chara ngintu bepelasarka komuniti di Pantai Pugu udah nyata efektif enggau pengawa nyiri tujuh iku ‘penyaga jelu siga’ entara peranak menua nya ngambika matau sereta ngintu palan netas.

“Model tu ukai semina ngenegapka pengawa ngintu, tang mega meri nilai tambah ngagai komuniti nengah peluang dalam sektor ekodagang temuai,” ku iya nerang.

Inisiatif tu setipak enggau aspirasyen Pelin Pemansang Pengudah COVID-19 2030 (PCDS 2030) ti ngemeratka pemansang ti meruan sereta ngatur pengeraja asal enggau meruan nyadi pugu penyulut nengeri tu.

Enggau pemujur tu, Pantai Pugu majak nyadi chunto ke mujur ba model ngintu begulai, lalu enggau nya ngayanka penegap ati Sarawak dalam ngetanka pesaka asal ungkup rebak dudi hari.

Sama bela bisi datai ba pengawa tu iya nya Morshidi Fredrick, Sekretari Tetap Opis Menteri Dagang Temuai, Industri Kreatif enggau Seni Pemerindang Sarawak (MTCP), Sekretari Politik Abang Abdul Aziz Bin Abang Draup ngarika Azizul Annuar Bin Pehin Sri Adenan Satem, ADUN⁠ N.3 Tanjong Datu, TPr. Wan Sufian Bin Wan Mustapha, Sapit Sekretari l Tetap Opis Menteri Pengeraja Asal enggau Pemansang Mengeri (MUDeNR), Zulkarnain Bin Ismail, Pegawai Pelilih Menua Lundu, raban SFC enggau peranak menua nya. – RBI

#ruaiberitaiban#newsiban#beritaiban

Rindu | Titih | Kunsika

BETONG, 1 Mei — Kaban Parlimen Lubok Antu YB Roy Angau Anak Dato’ Gingkoi ngulu Aum Pengatur Bil.1 ungkup Pengerami Nasih Tanah Sekolah Kebangsaan (SK) Nanga Enteban, Betong ti diatur ba Opis Kereja Raya Betong (JKR), ditu lemai kemari.

Penatai iya pengudah bejadika Pengerami Merarau di Sekula Sekondari (SMK) Lubok Antu kena pagi, lalu enggau nya mandangka komitmen ti meruan dalam pengawa ngenegapka pemansang perengka guna pelajar, kelebih agi di menua pesisir.

Aum nya bechairmanka Ir. Ts. Muhammad Kashral bin Kamalmirza, Penulung Injinir Bagi Kereja Raya Betong, enggau kaul mayuh bengkah ejensi ke bekaul dikena nentuka koordinasyen ke komprehensif dalam perambu enggau bejalaika pengerami nasih tanah projek nya.

Nitihka penerang nya, aum tu ngembuan tuju deka nerangka enggau silik sukut perambu kelimpah ari nentuka tetiap tusun pejalai projek ulih dipejalaika enggau teratur, sistematik sereta nitihka tusun ke udah ditetapka.

Randau nya mega ngemeratka pemesai guna kerejasama enggau koordinasyen bersepadu entara semua piak ti bekaul dikena nentuka pengawa bejalaika projek lanchar, lalu enggau nya nentuka penguntung ti optimum ulih diasaika komuniti setempat.

Berindik enggau nya, jaku terima kasih diberi ngagai Opis Kereja Raya enggau semua ejensi ti bekaul ketegal komitmen enggau kerejasama ngemujurka perambu projek nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

LAWAS, 1 Mei — Polis udah ngetan siku lelaki beumur 28 taun ke dipelabaka apai siku anak mit lelaki beumur lima bulan dikena mantu pansik kes ke menyati nembiak mit ba pelilih menua nya.

Ketuai Polis Pelilih Lawas, DSP Liong Tindan madah, pemutus peresa keterubah tetemuka saspek positif Amphetamine enggau Methamphetamine.

Nitihku iya, kes nya ditemu pengudah anak mit nya dibai indai iya ngagai Sepital Lawas urung pukul 10.45 malam Hari Minggu nyin tadi laban deka berubat ketegal rengga enggau batuk.

“Taja pia, peresa ke silik agi ari pemesai perubat tetemuka bisi bekau demaram ba tubuh tudah,” ku iya nengah siti penerang.

Berindik ari penemu nya, sepital ngaga ripot polis ngambika pansik ulih dipejalaika.

Berindik ari ripot ke diterima, polis udah nya ngetan saspek ba rumah iya.

Nitih ku DSP Liong, kes tu dipansik ari baruh Seksyen 31(1)(a) Akta Kanak-Kanak 2001 enggau Seksyen 15(1)(a) Akta Dadah Berbahaya 1952.

“Nyema diukum ketegal penyalah ari baruh Seksyen 31(1)(a), individu ti ngibun anak mit ti tau ngasuh menyati ba fizikal tauka runding tau ngemedis tau diukum maksimum RM20,000 tauka dijil nyentuk 10 taun tauka kededua nya,” ku iya nerang.

“Ungkup penyalah ari baruh Seksyen 15(1)(a), pesalah nya tau diukum mata duit nyentuk RM5,000 tauka dijil maksimum dua taun tauka kededua nya sekali.

“Kelimpah ari nya, saspek mega tau ditinggang perintah matau pengelama dua taun ari baruh Seksyen 38B Akta Dadah Berbahaya 1952,” ku iya. -RBI

#ruaiberitaiban#newsiban#beritaiban

Rindu | Titih | Kunsika

SIBU, 1 Mei — Perintah udah ngemendarka agih belanja sepenyampau RM10 juta ari baruh Bajet 2026 ungkup kereja ngintu kuarters bomba di serata menua, ti mungkur 1,545 unit nyengkaum 169 unit di Sarawak.

Direktor Opis Bomba enggau Penyah Penusah Malaysia (JBPM) Sarawak, PKPjB Jamri Masran madah, pengawa ngemanahka perengka guna endur diau raban nya beguna amat laban pengelantang ruang bilik meri empas terus ngagai motivasyen enggau prestasi raban lebuh bejalaika pengawa.

Berebak enggau nya, JBPM mega udah ngungkupka belanja sepenyampau RM10 juta nengah Wang Turu Pengintu Pengelantang Opis Bomba (KWKB) ungkup pengelantang pendiau, lumba enggau main, rekreasyen enggau ngintu balai bomba.

Ba pemansang ke bekaul, iya mega nerangka Sarawak entara nengeri ke nerima penyampau Perengka Pengangkut Operasyen Lempung (LOV) ke pemadu mayuh, iya nya 25 unit, senipak enggau guna operasyen ke nyelai ti ngaul kandang menua dalam, jalai sungai enggau genturung pendiau ke jauh.

“Ungkup selampur, JBPM Sarawak deka nerima 25 unit LOV, sebagi ari pengawa ngagihka 160 buah perengka pengangkut baru di serata menua, lalu enggau nya ulih nambahka penyikap operasyen enggau penyikar tim di nengeri tu,” ku iya.

Iya madah munyi nya lebuh bejaku ba Aum Ninting Bulan JBPM Sarawak Zon 4 April 2026 di Sibu, kemari.

Nitihku iya, penambah aset tu beguna amat dikena ngenegapka penau timbal tim, kelebih agi lebuh napi penusah ngenyit ba kandang endur ti mayuh pemar sereta jauh ari pusat mengeri.

“Gaya geografi Sarawak bebida ari nengeri bukai.Bisi sitak ti begunaka pejalai ti jauh, meraka sungai enggau nengah jalai ti mayuh pemar.Nya alai, penyikap logistik enggau mobiliti pengereja pengawa meseti seruran ditegapka,” ku iya.

Ku iya nambah, penambah aset tu dikearap ulih ngenyampatka pengawa timbal operasyen bomba enggau nyelamat, kelebih agi ba kandang endur ti mar dilawa.

Kelimpah ari nya, JBPM mega ngemeratka pengawa ngempung penuh tim khas di serata menua ti dipelaba tembu taun baru, ti mungkur Tim Khas Kimia Berbahaya (HAZMAT), Tim Penyelamat di Ai (PPDA), Unit Sukung Servis Penusah Ngenyit (EMRS), Unit Khas Bemotosikal (KRIM) enggau Unit Penyidi K9.

Ku Jamri, pengawa nya beguna dikena nentuka setiap tim ngembuan penegap kaban ti optimum sereta ulih bejalaika pengawa enggau lebih fokus nitihka guna operasyen ti majak kompleks.

Ngelansa pasal pengerami Jubli Emas penumbuh JBPM, iya madahka genap 50 taun nya kelai penegap institusyen nya ti majak ngerembai setipak enggau pemar kemaya hari.

“Lima dekad tu ukai semina sejarah aja, tang nyadi pengarap ngagai kami terus ngenegapka legasi sereta meransang transformasyen servis bomba nengah aspirasyen Kita Bomba,” ku iya.

Iya mega meri besai terima kasih ngagai raban bomba Sarawak ketegal komitmen tinggi bejalaika tanggungpengawa sida, kelimpah ari ngaku sukung media ngenataika penerang pengelikun penusah angus ngagai komuniti.-RBI

#ruaiberitaiban#newsiban#beritaiban

Rindu | Titih | Kunsika

BAU, 1 Mei – Sepenyampau 2,128 peranak ba sitak Tasik Biru bulih pemaik ari Program Fasiliti Betanam Betupi (AFF) kenyau ditumbuh ba taun 2019 nyentuk 2026.

Sapit Menteri Pengangkut Sarawak (Sungai enggau Tasik) ti mega Kaban Kunsil Nengeri (ADUN) Tasik Biru, Datuk Henry Harry Jinep madahka, bantu ari Perintah Sarawak sepenyampau RM4 juta nya ngaul utai tanam, nupi ikan sungai enggau nupi jelu.

“Aku ngarap bantu tu ulih ngurang tating belanja bala pekebun berindik ari rega sum enggau rachun ti majak niki ketegal rega minyak enggau gas dunya niki,” ku iya.

Iya bejaku munyi nya lebuh diberi basa bejadi pengawa nyua bantu AFF, ditu, ensanus.

Ba program nya, sepenyampau 48 penyereta AFF ari sitak Tasik Biru nerima bantu sum enggau rachun ba pelaman Opis Betanam Betupi Pelilih Bau.

Bantu sekali beri nya dikena nambah produktiviti lada enggau sawit kelimpah mantu penyereta nambah asil kebun sida. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 1 Mei – Pengerami Meri Gelar Jasa Negeri Sarawak 2025 udah mandangka 149 individu nerima mayuh macham gelar, bintang enggau midul dikena ngaku jasa enggau pemeri sida ngagai nengeri tu.

Pengerami nya udah dipenyadika Tuai Pemegai Menua (TYT) Negeri Sarawak, Tun Pehin Sri Dr Wan Junaidi Tuanku Jaafar di Dewan Besai, Astana Sarawak, kemari.

Dalam jaku dipansutka iya, Tun Junaidi ngenataika pengaga ati ngagai semua penerima ketegal dedikasyen, integriti enggau komitmen tinggi sida ti udah meri pangka terus ngagai penyulut Sarawak.

“Aku ngarapka pengangkun tu deka nyadi pematak dikena terus meri servis ke pemadu manah ngagai rayat, seraya ngetanka nilai mulia sereta nyadi teladan dalam raban bansa,” ku iya nengah siti penerang ba Facebook rasmi iya.

Dulu agi ari nya, Tun Wan Junaidi enggau Toh Puan Datuk Patinggi Fauziah Mohd Sanusi besetuju deka bejadika pengerami nya ti berengkah ari pukul 11.00 pagi.

Pengerami nya dipunka pengudah Ngerejista Darjah ke mega Sekretari Sulit Kanan ngagai TYT, Datuk Seri Syed Hamzah Syed Paie, ungkup minta pemendar bejailaika pengerami enggau rasmi.

Ungkup kategori Darjah Yang Amat Mulia Bintang Sarawak, Pegawai Bintang Sarawak (P.B.S), anugerah tu diberi ngagai penerima tunggal, Dr Hadi Ab Jalil.

Pengudahnya 13 iku individu menerima Darjah Utama Yang Amat Mulia Bintang Kenyalang Sarawak, Pegawai Bintang Kenyalang (P.B.K), antara penerima iya nya Abdul Gani Mohamad, Ahmad Abdul Razak, Dr Awang Nib Zuhairi Awang Ahmad, Adriana Chumang Nyambong enggau Agnes Sabang.

Kelimpah ari nya, Pingat Pentadbiran Awam, Pingat Perkhidmatan Bakti (P.P.B.) diberi ngagai 18 penerima nyengkaum DSP Haroadi Wasli, DSP Mohamad Nizam Bujang, Jelapin Entalai, Johari Chek Omar, Dr Ida Izumi Abdollah, Hajijah Mainol enggau Sara Beden.

Ungkup kategori Darjah Yang Amat Mulia Bintang Sarawak, Ahli Bintang Sarawak (A.B.S), sepenyampau 10 iku individu menerima anugerah diterima Abang Kifrawi Abang Rukaili, Edmund Ngumbang Gudom, Justin Sim Mong Yang, Veriland Godon Gagat, Kong Leh Yien dan Wong Ting Chuo.

Pia mega, sepenyampau 25 iku penerima diberi Darjah Yang Amat Mulia Bintang Kenyalang Sarawak, Ahli Bintang Kenyalang (A.B.K), lalu penerima iya nya Aidiee Rembeli, Ling Sien Chuong, Ngadan Gundah, Hallener Mengga enggau Minda Lecha.

Ungkup Midul Pentadbiran Awam, Midul Perkhidmatan Terpuji (P.P.T), sepenyampau 38 iku individu menerima anugerah nya nyengkaum Sarjan Mejar Awang Khusdy Awang Daim, Abang Aien Abang Bolhi, Amizan Tahet, Hakbaryzma Drahman, Roland Ayak Upal sereta Pegawai Waran II Nyudang Penghulu.

Kelimpah ari nya, anugerah Darjah Utama Yang Amat Mulia Bintang Sarawak, Bentara Bintang Sarawak (B.B.S) mega diberi ngagai 44 penerima, antara penerima iya nya Anam Unchat, Bira Juli, Donny Dhwie, Fairul Saie enggau Sahari Man.

Pengerami nya bela digulu Sekretari Perintah Nengeri Sarawak, Datuk Amar Mohamad Abu Bakar Marzuki, Sapit Menteri ba Opis Menteri Besai Sarawak (Integriti enggau Ombudsman), Datuk Dr Juanda Jaya, Sapit Menteri Nembiak, Lumba enggau Pemansang Orang Dagang (Nembiak enggau Lumba), Dato Gerald Rentap Jabu; enggau Mufti Sarawak, Khalidi Ibrahim.

#ruaiberitaiban#newsiban#beritaiban

Rindu | Titih | Kunsika

KUCHING, 1 Mei – Menteri Kereja Raya, Dato Sri Alexander Nanta Linggi ngenataika jaku puji ngagai semua pengereja pengawa beserimbai enggau pengerami ngintu Hari Pengereja Pengawa ke diintu kena 1 Mei ninting taun.

Nitihku iya, pemeri pengereja pengawa ari mayuh bengkah sektor, sekalika di mengeri tauka menua pesisir, nyadi batang pemun dalam nentuka menua terus maju sereta kompetitif.

“Setiap peluh ti pansut, enda ngira bidang baka pengawa ngaga, pelajar, pengerai, pengelikun enggau ke bukai, bejalaika tanggungpengawa ti beguna amat dalam nempa pengidup menua jemah ila,” ku iya nengah sebengkah penerang.

Iya mega meri besai terima kasih ngagai pengereja pengawa Opis Menteri Kereja Raya (KKR) enggau ejensi iya ti ngaul diri terus dalam pemansang infrastruktur menua.

Ku iya nambah, setiap jalai alun ke digaga, jematan nyambung genturung pendiau sereta projek ke mujur ditembu asil ari dedikasyen, komitmen enggau pengeransing semua pengereja pengawa.

Berindik enggau nya, iya minta semengat begulai terus ditegapka, kelimpah ari nambahka produktiviti ngambika ulih ngangkatka maruah pengereja pengawa menua tu ngagai tikas ke tinggi agi.

“Terima kasih ke semua jasa enggau pengawa kita. Selamat Hari Pengereja Pengawa ngagai semua rayat Malaysia,” ku iya. -RBI

#ruaiberitaiban#newsiban#beritaiban

Rindu | Titih | Kunsika

KUALA LUMPUR, 1 MEI – Opis Kereja Raya (JKR) Sarawak majak ngenegapka pengelandik teknikal sida ba pengawa ngatur tinting bukit nengah pengawa nyereta International Conference on Slope 2026 (ICOS 2026) ti diatur ba Royale Chulan Kuala Lumpur kena 29 hingga 30 April lalu

Aum antarabansa nya ngempuruka pakar injinir geoteknikal, pemansik enggau pemekuh industri ari dalam enggau luar menua berandauka isu kemaya hari enggau inovasyen pemadu baru bekaul enggau pengawa ngatur tinting.

Sepemanjai program nya, mayuh macham pengawa mantaika teknikal enggau sesi bekunsi penemu diatur, mungkur aspek penegap tinting, ngurangka risiko tanah tusur, teknologi matau tinting enggau chara ngaga tukuh ti meruan sereta tan.

Penyereta JKR Sarawak mandangka komitmen opis nya terus ngangkatka penemu enggau penau teknikal, kelebih agi ungkup pengawa bejalaika projek infrastruktur ba kandang endur bebukit enggau berisiko tinggi di nengeri tu.

Penemu enggau peneleba ke diulih dikearapka ulih dikena enggau penuh dalam pengawa bejalaika projek, lalu enggau nya meri pangka ngagai pemansang infrastruktur ke lebih likun, efisyen sereta meruan di Sarawak. -RBI

#ruaiberitaiban#newsiban#beritaiban

Rindu | Titih | Kunsika

MIRI, 1 Mei — Perintah Sarawak chakah agi bejalaika pengawa neritka atur nagang betunu tebuka kelebih agi ba kandang tanah kerapa dikena nagang risiko penusah angus besai sereta nyeliahka gaya sebun asap majak balat.

Sapit Premier Sarawak, Datuk Amar Douglas Uggah Embas nyemetak madahka pengawa betunuka chara tebuka ti dikereja mensia mayuh ukai semina ngeruga kualiti angin, tang mega bisi potensial ngepunka penusah angus ti mar dijaga, kelebih agi maya musin kemarau.

“Semua piak meseti bejalaika tanggungpengawa nentuka pengelikun rayat enggau pemanah rampa menua dijaga,” ku iya lebuh ngulu penerang Komiti Mutarka Penusah Ngenyit Bagi Menua (JPBB) Miri, ditu, baru-baru tu.

Iya ke mega Chairman Komiti Mutarka Penusah Ngenyit Nengeri madah, semua aset, injin enggau kereban operasyen meseti dalam gaya ke manah sereta sedia digerakka sebarang maya dikena napi sebarang penusah ke tau nyadi.

Nitih ku iya, JPBB Miri mega dilalau ngangkatka pengawa nyikap diri nyengkaum ngenegapka pengawa matau ‘hot spot’ enggau chakah agi neritka atur nagang betunu tebuka di serata bagi menua.

Berebak enggau nya, Lembaga Pengeraja Asal enggau Rampa Menua (NREB) madahka bisi 23 ‘hotspot’ udah ditemu naka ke diatu di Bagi Menua Miri, enggau tujuh kes diatu benung dipansik.

Nitihka penerang ari NREB, pengawa matau enda ngetu udah dipejalaika, kelebih agi ba kandang endur paya kerapa Kuala Baram kenyau ari pun bulan Mac, nyengkaum ngentaska ‘hotspot’ ba kandang endur kebun komersial enggau kebun sawit.

“Asil ari pengawa matau nya, tujuh iti keretas pansik benung disediaka, kelimpah ari jaku tangkan diberi ngagai pekebun mit enggau mensia mayuh ke ditemu bisi risiko betunu chara tebuka,” ku penerang nya, baka ke dipansutka Utusan Sarawak.

NREB nambah, pengawa meri penyedar ngagai mensia mayuh mega udah diangkatka nengah pengawa nyadung poster, ‘risalah’ enggau kimpin pelajar bekaul enggau tagang betunu chara tebuka.

Berebak enggau nya, ejensi nya mega udah ngaktifka bilik operasyen sebun, chakah agi bejalaika pengawa matau ba palan, ngetuka permit betunu ke dikuasa sereta ngeluarka notis tagang betunu tebuka ngagai pemaju projek.

Mensia mayuh mega dilalau ngambi atur bejejaga maya hari angat nengah chara nentuka pengambi ai ke chukup, ngurangka aktiviti di luar sereta ngena sengkabung idung enggau mulut, kelebih agi ngagai raban berisiko tinggi.

Nitihka NREB, barang sapa individu ke ditemu ngereja pengawa nunu chara tebuka ti ngasuh angin kamah tau diukum ari baruh Seksyen 30(1)(a) enggau Seksyen 30(2) Ordinan Pengeraja Asal enggau Rampa Menua (NREO), enggau ukum mata duit nyentuk RM100,000 tauka jil maksimum lima taun tauka kedua-dua nya sekali.

Penerang nya bela digulu Menteri Perengka Pengangkut Sarawak, Lee Kim Shin; Residen Bagi Menua Miri Galong Luang, sereta mega pengari ari mayuh bengkah ejensi nyengkaum PDRM, JBPM, Opis Rampa Menua, Opis Meteorologi enggau Angkatan Pertahanan Awam Malaysia.

Penemuai kereja nya mega ngembuan tuju deka beratika tikas penyikap ejensi bekaul dalam napi risiko penusah ngenyit maya musin kemarau tu, lalu enggau nya nentuka pengawa mutarka penusah ngenyit di Bagi Menua Miri mengkang efisyen sereta efektif. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber — Utusan Sarawak

Photo — UKAS