SRI AMAN, 18 April — Dua buah rumah udah angus lengis ba penusah angus di Lumur 65, Kampung Hulu Lemanak, tumu pagi tadi, tang nadai sebarang bakal diripotka nyadi.

Nitihka penerang ari Opis Bomba enggau Penyah Penusah Malaysia (JBPM) Sarawak, kangau ngenyit diterima urung pukul 3.18 pagi sebedau tim ari Balai Bomba enggau Penyah Penusah Sri Aman dianjung ngelawa palan nya enggau Tender Penyah Penusah Bomba (FRT) enggau unit Servis Penyah Penusah Perubat Ngenyit (EMRS).

Komander Operasyen, PBK I (TBK I) Edwin Jonani, ngeripotka lebuh datai ba endur nya, penusah angus nya ngaul dua buah rumah setengah tetap enggau ukai tetap ti benung angus.

Raban bomba udah nya bejalaika operasyen madamka api ngena chara defensif ngena dua batang ai pemanjai 200 kaki ti disikap ngena dua muncung ‘hos serang’, kelimpah ari dua batang ai gulung hos bantu ari pam injin enggau pun penatai hidran bomba dikena nagang api ari ngerekai ngagai palan pengentap pendiau ke semak.

Api mujur dirara sebedau dipadamka abis. Operasyen nya diteruska enggau pengawa ‘overhaul’ dikena nentuka nadai teda api ke ulih ngidupka baru api.

Pengudah gaya nya dientaska likun, operasyen nya tembu enggau penuh lalu tim nya pulai ngagai stesyen nya.

Penusah nya ngerusak sebuah rumah setengah tetap dua ringkat ke diempu Ahmadi bin Ahmad, ke diuan tiga iku lelaki, enggau sebuah rumah ukai tetap ke diempu Masiah binti Abu Kawi, ke diuan semilan iku orang ke nguan rumah nya.

Beberapa buah rumah ke besemak taja pia diselamatka enggau semina pengerusak mit ke dipelabaka urung satu peratus siku.

Penusah angus nya mega ngaul pengerusak tiga buah mutosikal enggau dua buah injin sangkut, lalu sebuah kerita sedan Nissan napi pengerusak urung 20 peratus.

Operasyen nya mega dibantu Polis DiRaja Malaysia (PDRM), kunteriktor SESCO enggau Bomba Volunteer kampung nya.

Kebuah penusah angus nyadi agi benung dipansik, seraya raban operasyen betapi enggau pemar tekanan ai baruh ari paip bomba sepemanjai operasyen nya dipejalaika. — RBI

DEBAK, 18 April — Perintah Sarawak ngungkupka belanja sepenyampau RM180 juta dikena ngangkatmanah sistem bekal elekterik di Bagi Menua Betong ngagai bekal tiga renggat berengkah taun baru, dalam pengawa nangkup peminta kuasa ti majak nambah, kelebih agi ba kandang menua pesisir.

Premier Sarawak, Tan Sri Abang Johari Tun Openg madah, projek nya diperambu seriris enggau ubah gaya bekenaka kuasa karan ba peranak menua tu, setipak enggau pemanah tikas pengidup sereta utai ke diguna ruang bilik ninting hari ke diatu bepanggai ba mayuh agi perengka elekterik ke bekapasiti tinggi.

Nitih ku iya, bekal ‘single phase’ ke sebedau tu chukup ungkup guna asas baka seterika enggau peti ais, diatu enda ulih nangkup guna mensia mayuh ke diatu.

“Enti suba, bekal ‘single phase’ chukup, tang diatu gaya pengidup moden begunaka kapasiti elekterik ke besai agi laban ruang bilik majak bepanggai ba bemacham perengka elekterik,” ku iya.

Iya madah munyi nya ba jaku iya ba Aum Ketuai Begulai Enggau Rayat Ungkup DUN N35 Saribas ke diatur di Debak, kemari.

Ku iya nambah, pengawa bejalaika projek nukar sistem tiga renggat nya dikearapka ulih ngangkatka penegap enggau pengandal bekal kuasa karan di Bagi Menua Betong, lalu enggau nya ulih ngurangka pengachau baka voltan ti enda tetap ti ngeruga guna ninting hari peranak.

“Reti nya nadai agi bekal kuasa karan ti bekelip-kelip,” ku iya nerang.

Berebak enggau nya, iya nyemetak madahka singkang tu dikena ngangkatmanah infrastruktur bekal kuasa karan beguna dikena nentuka kandang menua pesisir enda tinggal ari arus pemansang, kelimpah ari nyukung guna ruang bilik moden enggau aktiviti ekonomi kandang menua ti majak begunaka bekal kuasa ti lebih entap sereta bekapasiti tinggi.

Inisiatif tu mega mandangka komitmen perintah nengeri ti majak ngenegapka perengka guna asas di serata Sarawak ngambika rayat ulih ngasaika perengka guna ti setanding enggau kandang menua bukai. — RBI

DEBAK, 18 April — Rayat ba kandang menua Betong dipinta terus meri sukung ke tegap ngagai ketuai Premier Sarawak, YAB Datuk Patinggi Tan Sri Dr. Abang Haji Abdul Rahman Zohari bin Tun Datuk Abang Haji Openg, sereta nentuka kandang menua nya mengkang nyadi kubu tegap Gabungan Parti Sarawak (GPS) dikena nentuka penerus agenda pemansang nengeri tu.

Sapit Premier Sarawak, Datuk Amar Douglas Uggah Embas madah, sukung terus ngagai iring Premier Sarawak nya beguna amat berindik ari bemacham polisi enggau inisiatif perintah nengeri udah meri penguntung terus ngagai rayat.

Entara inisiatif ti dipejalaika iya nya Bantu Barang Diguna Pemun Sarawak (SKAS), diskaun 25 peratus ba bil elekterik enggau diskaun 50 peratus ungkup pedagang mit.

“YAB Premier nemu nambahka penatai pemisi nengeri sereta mulaika iya ngagai rayat nengah bemacham polisi enggau program inklusif.”

“Nya alai, aku ngelalau rayat ngambika terus begempung sereta nyukung iring iya lalu nentuka Betong mengkang nyadi kubu tegap GPS,” ku iya lebuh bejaku ba Aum Ketuai DUN Saribas ditu, Hari Lima tu tadi.

Iya ke mega Kaban Kunsil Nengeri (ADUN) Bukit Saban madah, pengawa bejalaika projek pemansang ari baruh Ejensi Pemansang Bagi Menua Betong (BDDA) nyata ngayanka komitmen perintah GPS ngenegapka pemansang menua pesisir.

Nitihku iya, sepenyampau RM1.5 bilion udah diagih nengah BDDA ti mungkur 473 projek, ke alai 130 ari nya udah tembu naka ke diatu, lalu enggau nya mandangka penyulut ke nyata ba sitak nya.

Entara projek ke meri empas tinggi ke diatu sereta deka dipejalaika nyengkaum pemansang Padang Bilun Bebuling ke berega RM280 juta, pengawa ngelancharka kampus CENTEX Betong ke deka nyendiaka kus pilot enggau drone, sereta pemansang Agropark Bebuling ke ngaul empat buah kompeni tebilang ba pemesai 70 ekar rumah gadung.

Ku iya, pemansang nya bisi penau nempa Betong nyadi hab baru ungkup latih teknikal, industri betanam betupi moden enggau logistik langit di kandang menua ulu, kelimpah ari muka mayuh agi peluang gawa ngagai peranak menua nya.

Berebak enggau nya, Uggah mega nyemetak madahka pemansang replika Kuta Rentap meri empas positif ngagai sektor dagang temuai sereta nyungkak aktiviti ekonomi komuniti lokal nengah penambah penyampau temuai.

Iya mega nerangka Premier Sarawak siku ketuai ti inklusif ti meretika guna rayat baikka nya di mengeri enggau menua pesisir, kelimpah bejalaika tanggungpengawa besai dalam ngenyampatka pemansang infrastruktur nengeri tu.

“Iya ukai semina mujur nambahka penatai pemisi nengeri tu, tang mega komited ba pemansang infrastruktur. Nya kebuah iya suah dikumbai ‘Raja Jematan Malaysia’,” ku iya.

Kelimpah ari nya, Uggah mega bisi mantaika sekeda pekara ke diguna rayat ba sitak nya, nyengkaum ngemanahka sistem bekal elekterik, ngerembaika bungkur telekomunikasyen enggau pemansang rumah ke ulih dibeli di Jalai Lidong.

Ku iya, pekara ke diguna tu beguna amat diberi perati dikena nentuka rayat ba kandang menua DUN Saribas terus ngasaika perengka guna pemun ti setipak enggau kandang menua bukai, setipak enggau agenda pemansang perintah nengeri.

Sama bisi datai Sapit Menteri Nembiak, Lumba enggau Pemansang Orang Dagang Sarawak I Datuk Gerald Rentap Jabu, Sapit Menteri ba Opis Premier Sarawak Datuk Dr Abdul Rahman Junaidi enggau Kaban Parlimen Betong Dato Dr. Richard Rapu. — RBI

SARIKEI, 18 April – Sepital Sarikei majak nempa sejarah kediri empu lebuh ngintu genap 20 taun ditumbuh, mandangka komitmen ti seruran ngenegapka sistem pengerai mensia mayuh sereta ngangkatka pengelantang pendiau komuniti lokal.

Pengerami besejarah nya dipenyadika Dato’ Sri Huang Tiong Sii, Sapit Menteri Kebun Bedandang Besai enggau Komoditi, ke mega Kaban Parlimen P.208 Sarikei enggau Kaban Kunsil Nengeri (ADUN) sitak N.45 Repok.

Dalam jaku dipansutka iya, Huang meri besai terima kasih laban diberi awak ngulu pengerami nya kelai atur neruska pengawa ngenegapka sektor pengerai.

Iya mega ngenataika pengaga ati iya ngagai semua staf Sepital Sarikei ti nyadi tulang belakang dalam nentuka pengawa ngenataika servis pengerai ti bekualiti, enggau integriti sereta bepelasarka nilai mensia.

Kenu ku iya, ba landskap pemansang menua kemaya hari tu, sektor pengerai ukai agi semina nyadi penyendia servis aja, tang nyadi tiang batang dalam nempa pengelantang rayat enggau pengelantang ekonomi.

“Penyampau tubuh ti bepengerai nyadi pelasar produktiviti, penegap rama enggau penyulut nengeri,” ku iya.

Ku iya nambah, seriris enggau aspirasyen Malaysia MADANI, pemerat ba nilai pemanah ati, pengelantang enggau ‘keadilan’ rama minta akses ngagai servis pengerai ti bekualiti diasaika semua renggat mensia mayuh enda ngira penatai.

Dalam konteks nya, Sepital Sarikei dipeda udah mujur bejalaika tanggungpengawa nyadi sebuah institusyen strategik ti ukai semina meri perubat, tang mega nyadi kedap pemansang komuniti lokal.

“Dalam timpuh dua dekad, sepital tu udah ngasaika mayuh macham transformasyen nyengkaum ngemanahka perengka guna fizikal, ngenegapka pengelandik sereta ngemanahka sistem meri servis.

“Aku meri besai terima kasih ngagai pengereja pengawa pengerai ti udah mandangka dedikasyen ti besai, kelebih agi lebuh menua napi pemar maya pandemik, enggau nya ngayanka kita nyadi ketuai nengah servis ungkup pengelikun rayat,” ku iya.

Berebak enggau nya, iya ngaku iring Perintah Sarawak ari baruh pegai Premier Sarawak, Datuk Patinggi Tan Sri (Dr.) Abang Haji Abdul Rahman Zohari bin Tun Datuk Abang Haji Openg ti seruran bebendar ngenegapka sektor pengerai nengeri tu.

“Chara progresif perintah ba pengawa ngenegapka infrastruktur pengerai, ngerembaika akses servis sereta ngerapitka seraka pemansang entara kandang mengeri enggau menua pesisir dianggap siti singkang ke besai nuju pemansang inklusif,” ku iya.

Ngelansa pekara ti deka datai, iya andal amat Sepital Sarikei deka terus bejalaika tanggungpengawa nyadi pengepun ngagai transformasyen sektor pengerai nengah digitalisasyen servis, nambahka pengelandik sereta ngenegapka sistem ti lebih tan.

“Ke pemadu beguna, setiap pengawa mesti bepelasarka ba rayat laban pemujur ke bendar sesebengkah polisi iya nya lebuh penguntung iya diasaika ba renggat baruh,” ku iya nyemetak.

Iya nyimpul jaku iya enggau meri pengaga ati ngagai Sepital Sarikei ke udah mujur nyapai pengelama 20 taun sereta ngarapka institusyen nya terus nyulut nyadi ke temegah ati rayat.

Sama bisi datai iya nya Datu Michael Ronnie Langgong, Residen Bagi Menua Sarikei, Dr.Mohamad Ng Siah Huat, Direktor Sepital Sarikei, Dr Khairul Rizzuan Bin Roslan, Ketuai Penulung Direktor Kanan, Opis Pengerai Nengeri (JKN) Sarawak ngarika Direktor Pengerai Sarawak, Chairman Kaunsil Temuai Sepital Sarikei, Kung Teck Li, ketuai opis perintah, ketuai komuniti enggau ketuai raban bansa, kapitan, raban pengatur sepital, kaban media enggau temuai kebukai. -RBI

SARIKEI, 18 April — Sepital Sarikei majak ngenegapka pangku pengawa nyadi sebuah institusyen pengerai besai di tengah Sarawak pengudah nempuh bemacham transformasyen dalam timpuh 20 taun penumbuh iya.

Direktor Sepital Sarikei, Dr Mohamat Ng Siah Huat madah, dalam timpuh dua dekad, sepital nya udah mansang ari fasiliti ke mit ngagai palan berubat ke dikearapka komuniti menua nya.

Nitihku iya, Sepital Sarikei diatu nyendiaka 12 servis pakar nyengkaum Perubat Am, Beputung Am, Ortopedik, Emejensi enggau Trauma, Bius, Pediatrik, Obstetrik enggau Ginekologi, Radiologi, Psikiatri enggau Pengerai Runding, Ophthalmology enggau Maxillofasial Ophthalmology enggau Maxillofasial.

“Pemujur tu ukai diempu individu aja, tang asil ari pengawa begulai semua staf sepital, ari lutur enggau indu misi nyentukka staf sukung,” ku iya beserimbai enggau pengerami ngintu genap 20 taun Sepital Sarikei.

Iya mega meri besai terima kasih ngagai semua raban ti udah nyaup ngenegapka agi servis pengerai ba sepital nya.

“Pengerami genap taun tu ukai semina simbolik aja, tang ngayanka dedikasyen ti enda ngetu nyelamatka nyawa enggau ngangkatka kualiti pengidup komuniti.

“Kitai deka terus nyingkang ke mua nengah chara ngenegapka servis digital enggau chara berubat khas dikena nangkup guna pengerai jemah ila ti majak mayuh pemar,” ku iya.

Ngena rambai jaku “Dua Dekad Servis: Komitmen Kami, Pengerai Komuniti”, pengerami nya mega bisi nyuaka setipikit khas meri terima kasih ngagai staf ke udah gawa kenyau ari sepital nya berengkah beoperasyen.

Berebak enggau nya, program pengerami nya mega diisi enggau Hari Mensia Mayuh ti betuju meri kelala servis sepital nya ngagai mensia mayuh.

Bemacham aktiviti bisi diatur nyengkaum pengawa pemandang sejarah sepital, pengawa pemandang servis, kelimpah ari pengawa muka bansal unit enggau opis ti bisi nyendiaka pengawa meresa pengerai, meresa mata, meresa ngeli enggau kimpin meri darah.

Bala temuai mega bepeluang ngambi bagi ba main interaktif, kelimpah ari ngumpul stiker ari 12 reruai ke dipilih dikena nebus perais nyempulang nyadi pematak tambah ngagai mensia mayuh. -RBI

KUCHING, 18 April — Perintah Nengeri Sarawak terus ngenegapka pengawa napi pengelekai igi penyakit Rabies nengah chara ti lebih komprehensif ti mungkur inovasyen chara ngubat, neritka atur pengerai jelu sereta ngaul komuniti lokal enggau chakah.

Menteri Industri Pemakai, Komoditi enggau Pemansang Kandang Menua Sarawak, Dato Sri Dr. Stephen Rundi Utom, nyemetak madahka keruga igi penyakit rabies agi ba tikas ti serius bepelasarka statistik kemaya hari ti mandangka tikas pemati tinggi entara kes kena rampit di nengeri tu.

Nitihka rikod rasmi, kenyau igi penyakit nya keterubah iya ditemu dalam taun 2017, Sarawak udah ngerikodka 93 kes kena rampit mensia, lalu 86 ari nya nabanka nyawa.

Semina tujuh kes aja diripotka selamat, lalu enggau nya ngayanka tikas penusah virus ti begunaka pengawa ti terus sereta begempung.

Ku iya nerang, entara batang pemar dalam pengawa nagang pengerekai rabies iya nya pemar bejalaika vaksinasyen konvensional ngagai ukui lelang ti agresif, ti begunaka chara ti lebih inovatif sereta strategi nagang ti lebih ngasi.

Berebak enggau nya, aspek berubat enggau lengkas mega dikemeratka, laban mensia mayuh dikingatka rabies nyerang sistem saraf pusat lalu timpuh berubat pengudah diketup nyadi faktor kritikal ti nentuka peluang idup.

Endur ke digigit ba tubuh mega meri empas ngagai timpuh penyakit nya kena rampit.

Berindik enggau nya, perintah nengeri minta semua pengempu ukui lebih agi betanggungjawap nengah nentuka ukui sida direjista, diberi lisin sereta dituchuk vaksin enggau tetap.

Orang ke ngempu ukui mega enda dilepaska ari tanggungpengawa tu dikena ngurangka risiko pengamah silang.

Perintah Sarawak mega komited ngungkupka belanja ke besai agi ba taun 2025 dikena ngerembaika program imunisasyen jelu di serata nengeri, kelebih agi ba kandang garis entara menua baka Serian enggau Lubok Antu, dikena ngenegapka pengawa nagang pemindah jelu ke bisi risiko sereta nagang pengelekai epidemik enggau ngasi agi. — RBI

KUCHING, 18 April — Lobi Menara Pelita sehari tu diisi enggau pengerami ti richah enggau penatai bala staf Opis Betanam Betupi Sarawak beserimbai enggau pengawa ngatur Pengerami Nerima Pengabang Aidilfitri 2026 ti diatur enggau pemanah ati sereta begulai.

Pengerami nya dipenyadika Direktor Betanam Betupi Sarawak, Dominic anak Chunggat, begulai enggau raban pengatur tinggi opis nya nyengkaum Sapit Direktor Pemansang, Mr.Gilbert anak Igi enggau Sapit Direktor Operasyen, Puan Radziah binti Jack.

Sama bisi datai Ketuai Penulung Direktor enggau staf ti ngena pekayan asal, lalu enggau nya ngayanka penyelai budaya dalam pengerami nya.

Sepenyampau 16 langkau ari mayuh bengkah pampang enggau unit ngambi bagi enggau mantaika ias ti kreatif bepelasarka tema “Pulai ke Kampung”.

Ias ke bisi dipandangka nyengkaum elemen nostalgia pesisir baka replika rumah asal, ketupat anyam enggau penerang ias klasik, ti ​​ngayanka kreativiti enggau semengat kereja beraban entara staf jabatan nya.

Pekara ti narit ati, pengawa nyendiaka pemakai enggau ngias langkau dipejalaika asil ari pemeri enggau komitmen pengereja pengawa ari tetiap pampang, lalu enggau nya ngayanka semengat begulai ti nyadi batang ngatur pengawa nya.

Ngatur pengawa tu ukai semina nyadi pelasar ngerapitka kaul pangan diri, tang mega ngenegapka penyerakup enggau semengat kereja beraban entara staf opis nuju ngangkatka penyulut sektor betanam betupi di Sarawak.

Raban pengatur mega meri besai terima kasih ngagai semua komiti enggau pengereja pengawa ti udah meri komitmen tinggi dalam nentuka pengawa tu bejalai enggau lanchar sereta mujur. — RBI

MATU, 18 April — Operasyen ngerara api babas ba Jalai dari Matu nuju ke Jambatan Igan mujur dijaga sehari tu enggau nadai bebadi nyawa.

Nitihka penerang ari Angkatan Pertahanan Awam Malaysia (APM) Pelilih Matu, operasyen ke udah masuk hari kelapan nya berengkah tumu pukul 8.24 pagi enggau pengawa nyendiaka diri ari raban sebedau diteruska nyentuk tembu penuh urung pukul 6.50 lemai.

Operasyen nya dipejalaika enggau chara besepadu begulai enggau Opis Bomba enggau Penyah Penusah Malaysia (JBPM) sereta mega polis enggau ejensi pengelikun ke bukai ke bela ngaul diri dalam pengawa ngerara api.

Kelimpah madamka api besai, raban APM mega mantu JBPM madamka bara api ke agi tinggal dikena nyeliahka risiko angus baru.

Pengawa matau pengelikun ngelingi kandang endur penusah nyadi mega terus dipejalai nyentukka gaya nya ulih dijaga enggau penuh.

Operasyen madamka api diripotka udah tembu urung pukul 6.00 lemai enggau gaya ke udah ulih dijaga enggau penuh.

Semua piak ngesahka nadai bakal tauka bebadi nyawa diripotka nyadi ba penusah nya.

APM nandu baru komitmen sida deka terus ngenegapka pengawa nyikap diri dalam napi sebarang penusah ngenyit kelebih agi penusah angus tebuka ti bisi risiko dalam gaya hari angat enggau kemarau. — RBI

KAPIT, 18 April — Pengawa nemuai ngagai palan projek sosioekonomi ari baruh Ejensi Pemansang Ulu Rajang (URDA) diatur kena Hari Empat dikena beratika pejalai pengawa bejalaika sereta ngenegapka pemanah inisiatif pemansang menua pesisir ba kandang menua nya.

Penemuai nya betuaika Ketuai Pemesai Eksekutif Kaunsil Pemansang Koridor Wilayah (RECODA), Datuk Haji Ismawi bin Haji Ismuni, ti disereta Kaban Kunsil Nengeri (ADUN) Katibas, YB Lidam Assan, Direktor Wilayah URDA, Encik Sagu Unting, sereta pengari RECODA, URDA enggau TERAJU.

Nitihku Kaban Kunsil Nengeri (ADUN) Pelagus, YB Wilson Nyabung Ijang, penemuai nya ngembuan tuju deka matau pejalai projek sosio-ekonomi ke benung dipejalaika, kelimpah ari ngelala pemar ke bendar ditapi orang dagang menua tu.

“Entara pemar ke dikelala iya nya penanggul ari sukut puku, perengka, latih enggau perengkaguna infrastruktur ke patut diberi perati ke patut,” ku iya nengah siti penerang.

Ku iya, penemuai nya mega ngemeratka pengawa nentuka tetiap inisiatif pemansang ti diperambu ulih dipejalaika enggau manah sereta meri penguntung terus ngagai komuniti.

“Mayuh agi pengawa ngemanahka sereta sukung tambah ti ditagit sereta meri empas tinggi patut diperambu dikena nentuka projek tu ulih ngerembai enggau meruan,” ku iya nerang.

Rambau penemuai nya, raban nya beratika sekeda projek besai nyengkaum pengawa nupi itit betelu (Lulut’s Ducks) ti nyerakupka utai tanam pisang enggau azolla, projek nupi madu kelulut di Tatai Mas Raweng enggau Palan Berubat Tradisional Kapit.

Ku iya nambah, asil pansik nya tetemuka Kapit bisi potensial besai dalam pemansang ekonomi kandang menua, kelebih agi dalam sektor agro enggau pengawa dagang menua pesisir.

“Kitai enda ulih merambu ba atas keretas aja. Nama ke beguna agi iya nya nentuka tetiap projek tu ulih ngerembai, mansutka penatai pemisi lalu nangkan nya ngangkatka tikas pengidup rayat di menua pesisir,” ku iya.

Muak ke malam, raban nya mega bisi ngulu pengerami makai lemai begulai enggau Datuk Haji Ismawi sereta raban nya nyadi sebagi ari program nemuai rasmi. — RBI

Dalam dunya muzik Iban, nama Rickie Andrewson chukup tebangkar. Di belakang nama panggau nya, bisi cherita pejalai siku artis ti berengkah ari menua pesisir Sarawak, ditempa enggau gaya muzik asal lalu pengujung iya nempa legasyen iya empu dalam industri pemerindang.

Ngempu nama asal, Alan Rickie Anak Ngalai, iya milih nama “Rickie Andrewson” nyadika identiti panggau iya, diiri enggau inspirasyen ari nama apai iya, Pengulu Andrewson Ngalai, siku penanyi ke chukup tebilang maya jeman iya.

Ditu meh semua utai berengkah nyengkaum benih ti tumbuh dalam belagu kenyau ari mit.

Dibesaika ba rumah panjai di Sekuau, Batu 28 Jalai Oya, Sibu, Rickie idup enggau pengerindu dalam seni pemerindang.

“Dikelingi bala bakih artis enggau pemuzik ti suah nemuai enggau apai aku, aku besai ba gaya ti seruran disempulang enggau muzik.

“Ke berat agi, sada nyawa apai aku empu nyadi “pengajar keterubah” ti nempa semengat ngagai aku nyadi penanyi,” ku Rickie lebuh dirandau Ruai Berita Iban.

Utai ti narit ati, Rickie nadai kala nerima latih dalam pengawa belagu. Taja pia, penau asal iya nyata bendar dipeda lebuh diuji ba studio rekoding sida iya, ANP Music Production.

“Utai ti berengkah nyadi semina nguji aja tang betukar nyadi pun karier seni aku lebuh apai aku pechayaka sada nyawa aku ulih jauh ba industri tu,” tampung Ricke ke ngembuan patah nyawa ke chukup lunak.

Pengarap nya nyata amat. Dalam taun 2001, Rickie mansutka album keterubah iya ke diberi nama Anak Umbung, nerima sambut ti manah lebuh album nya ngerikod lebih 80,000 unit dijual, pemujur ti chukup besai ba jeman nya.

Ari nya, singkang iya nyadi artis profesional nyau majak tegap sereta majak dikelala mensia mayuh.

Sepemanjai lebih dua dekad dalam industri tu, Rickie udah dikelala nyadi orang ti silik sereta bedisiplin tinggi.

Iya ukai semina ngetanka kualiti vokal iya, tang mega amat milih lagu.

Ba iya, sebengkah lagu ukai semina merindang aja, tang meseti ulih negu semengat sereta meruan dalam pengingat peninga.

“Naka ke diatu, aku udah ngasilka lebih 20 iti album solo, enda nyengkaum album duet enggau lagu pengerami, ngaga penyampau lebih kurang 30 iti album,” ku Rickie nusui pejalai pemerindang iya.

Lebih temegah ati agi, Rickie nadai kala nengah pelasar pekit belagu, tang mujur bediri sebaka enggau nama-nama besai dalam industri tu berindik ari penau diri.

Iya mega nerima aku sepengudah pengangkun iya nyempulang pejalai seni iya, nyengkaum anugerah Vokal Pemadu Manah, Penyanyi Pemadu Tebilang enggau Penyanyi Pemadu Dikerindu ari Cats Radio enggau RTM urung taun 2009 ngagai 2016.

“Lagu baka Anak Umbung, Siti Penanggul Antara Tua, Enda Ulih Telai Belalai, Nyabak Sebulan, Petara Nentu Ke Pengerindu Tua, Enda Sanggup Lemas Di Pantai, Atas Nama Pengerindu, lalu mayuh agi kebukai ke nyadi insparasyen nembiak enggau ‘influencer’.

“Ari sukut muzik, aku rindu agi ngagai genre dangdut, gogo enggau slow rock, rentak ti semak enggau pemgerindu peninga.

“Tebal agi lagu aku ditengkebang komposer tebilang nyengkaum apai aku empu, Andrewson Ngalai, sida niang Jeffery Nyaloi, niang Jackson Dana, niang Ganing Assan, Ricky Jay enggau Johnny Aman.

“Aku enda kala ngaga lagu kediri empu, aku semina ulih belagu aja.

“Bisi ga siti dua lagu ke digaga aku empu ( enda ingat ke tajuk ) dalam album Atas Nama Pengerindu.,” tusui iya enggau lenak.

Beratika pemansang industri muzik Iban kemaya hari tu, Rickie ngaku mayuh ubah positif udah nyadi.

Ku iya, kualiti produksyen majak nambah, penau baru majak mansang, lalu mayuh artis diatu ulih ngasilka lagu kediri empu.

“Pengawa berubah ngagai pelasar digital mega muka mayuh agi ruang ngagai muzik Iban mansang ba renggat global.

“Semina diatu udah nadai bejualka vcd agi, diatu udah penuh enggau cara digital, lalu kediatu mega, lagu-lagu kitai Iban udah jauh mansang lalu bisi sekeda udah sebela enggau taraf lagu antarabangsa,” kenang iya senentang industri jeman diatu.

Tampung iya, mayuh penengkebang lagu diatu ngembuan lagu serta leka lagu ti lebih engkeman agi.

“Mayuh mega raban artis ke baru diatu ulih ngaga lagu sereta lirik kediri empu, ti siti ari penambah tikas dalam indusri muzik kitai Iban.

“Naka kediatu Puji Tuhan, atas berekat serta sukung bala peminat, ti nadai kala berubah, agi mengkang baka suba balat rindu nyentuk ke diatu, kelebih agi bala peminat ti serebak enggau era aku.

“Peminat aku endang seruran mengkang nitih ke pengerembai singkang aku dalam industri muzik, kelebih agi bala peminat di menua pesisir,” ku iya.

Bekaul kenang ti seruran dikeingat, Rickie madahka mayuh lalu siti kenang ke pemadu berega iya peneleba ti enda ulih dibuai iya nya lebuh maya iya belagu ba panggau ti paling berprestij, merindang ba mua bala Ketuai Pemesai seluruh Asia, maya pengawa ASEAN SUMMIT 2015.

Bekaul berita pemadu baru, kediatu Rickie agi merambu ke lagu-lagi baru, penguda lama enda mansut ke lagu baru dalam lapan taun ke udah.

“Nyadi kediatu aku bisi deka mansutka beberapa buah lagu single terbaru ari aku, lalu ngarap ke bala peminat sabar nganti dalam kandang ti semak tu ila,” ku ngarapka peminat nganti lagu ari iya.

Rickie mega ngembuan pengarap ke besai dalam industri muzik kitai Iban.

Ku Rickie, iya ngarapka lagu-lagu kitai Dayak ulih besemekih enggau menua bukai ngagai peringkat ti pemadu tinggi lalu dikala orang ba selampur dunya.

“Pesan aku ngagai artis serta bakat biak, anang lenyau identiti kitai Iban, gaga lagu ti meruan, anang ngemasukka budaya muzik bukai dalam lagu kitai Iban.

“Laban kitai Iban bisi chuan lagu kitai empu. Enda senang deka bulih gelar penanyi “ evergreen”, jaga seraka ulah jaga disiplin enggau seruran ngemaruh kediri, taja kitai udah tinggi nama, laban orang ke di kaki bukit nya meh ke nyagu ke kitai sampai kitai ulih datai di tuchung bukit,” ku iya ngujungka randau enggau Ruai Berita Iban.

Taja pan semua pemujur iya, Rickie mengkang baruh ati sereta enda ngelalaika pun budaya iya.

Iya ngelalau nembiak rebak baru terus ngetanka identiti muzik Iban lalu anang kelalu teparuk enggau budaya menua luar. — RBI