BATU NIAH, 28 Mei – Menteri Industri Pemakai, Komoditi enggau Pemansang Kandang Menua Sarawak Dato Sri Dr.Stephen Rundi Utom, udah mantaika pengirau ati bekaul enggau penambah penyalah salah guna dadah methamphetamine di kandang menua Batu Niah.
Berebak enggau nya, iya ngansak apai indai enggau Gerempung Apai Indai enggau Pengajar (PIBG) seruran neritka pengawa matau ulah nembiak.
Dr.Rundi mansutka pengirau ati iya ba jaku khas iya lebuh nyadi Temuai Dipebasa ba Pengerami Mantar Gawai Dayak 2026 ke diatur Serakup Ketuai Raban Bansa Ulu Suai (PKKKUS) enggau Komiti Pemayuh Penyampau Bansa Iban (JKPI) Zon Niah Kemena di Balai Mensia Mayuh Batu Niah empa lama.
“Pil methamphetamine udah balat ngerembai ba kandang menua Batu Niah. Bala pedagang meri sekeda ngagai orang enggau pechuma, udah nya mejal sida meli.
“Lebuh nadai duit, mayuh utai ke enda manah tau nyadi,” ku Dr.Rundi ke mega Kaban Kunsil Nengeri (ADUN) Kemena.
Iya ngelalau apai indai nentuka bala anak sida besekula enggau tetap sereta matau kaling rama sida dikena nyeliahka diri ari kena balut pengawa salah gian dadah.
Dr Rundi mega minta PIBG chakah agi sereta tegap nentuka penatai nembiak sekula nyadi chara nagang tumu ke pemadu efektif.
“Nembiak ke enda besekula mih ke muntang ditangkap. PIBG meseti terit agi sereta berat agi,” ku iya. -RBI
#ruaiberitaiban#newsiban#beritaiban
Rindu | Titih | Kunsika
