BETONG, 6 Mei — Pengawa ngaga Pakej B4 Jalai Besai Kedua ti nyambung Jematan Batang Lupar Dua ngagai Simpang Betong sepemanjai 27.84 kilometer diatu udah nyapai penyulut fizikal iya nya 76.68 peratus.
Sapit Menteri Infrastruktur enggau Pemansang Palan Penyangkai Kapal, Datuk Ir. Aidel Lariwoo madah, taja pan projek nya bisi ngasaika sekeda pengelaun tang projek nya agi ba jalai ke betul lalu disadang tembu penuh ba bulan Disember taun tu.
“Naka ke diatu, pejalai projek nya udah manggai 76.68 peratus. Taja pan bisi sekeda pengelaun tang pengawa bejalaika iya agi ulih dijaga lalu nadai isu besai dikelala ba palan endur ngaga nya,” ku iya.
Iya madah munyi nya lebuh dikerandau raban media pengudah bejalaika penemuai kereja ngagai palan projek di Jalai Lidong, sehari tu tadi.
Nitihku iya, projek ke beungkus lebih RM292 juta nya mega ditagit tembu tumu agi, setipak enggau pengawa muka Jematan Batang Lupar Dua ti disadang bulan Ogos ti deka datai.
“Enti pengawa bejalaika nya ulih dikelengkas, kami nagit projek tu tembu tumu agi urung bulan Ogos tu ila, setipak enggau penembu jematan tu.
“Berindik enggau nya, kunteriktor besai, Verde FM Sdn. Bhd udah dipinta nambahka tikas pejalai pengawa ba palan ngambika kededua projek ulih ditembuka serentak,” ku iya nerang.
Ku iya nambah, enti udah tembu ila, jalai baru nya dipelaba ulih ngemandakka penyauh pejalai ari Kuching ke Betong ngagai urung 190 kilometer, dibanding urung 250 kilometer nengah Jalai Besai Pan Borneo maya ke diatu.
Berebak enggau nya, Kaban Parlimen Betong, Dato Dr. Richard Rapu ngarapka jalai nya ulih ditengah enggau lengkas jematan nya dibuka, taja pan pengawa ngaga iya bedau tembu penuh.
“Enti enda ulih dibuka penuh, abis nadai sebagi ari jalai nya ulih ditengah.
“Ke pemadu beguna, lebuh jematan nya tembu dalam bulan Ogos tu ila, perengka pengangkut ulih mansa Betong.
“Kitai ngarapka ulih ngintu Hari Kebangsaan Malaysia ngena jalai baru tu,” ku iya.
Pengawa bejalaika Projek Jalai Besai Kedua Betong disadang meri empas ke besai ngagai pemansang sosioekonomi enggau rentayan penyambung jalai di kandang menua pesisir Sarawak.
Entara batang penguntung iya nya nyendiaka jalai pejalai ti lebih terus, lanchar sereta likun, lalu enggau nya ulih ngangkatka penyambung peranak ba semanjai kandang menua pesisir nengeri tu.
Projek tu mega ulih ngemandakka penyauh pejalai entara Sri Aman enggau Betong, seraya ngelimatka timpuh pejalai enggau ungkus logistik ngagai penguna jalai alun.
Ari sukut kualiti infrastruktur, jalai baru tu meri gaya ke manah sereta nyamai agi, lalu enggau nya ngangkatka peneleba deriba ke likun sereta efisyen agi.
Kelimpah ari nya, projek tu mega nyambung bemacham rumah panjai enggau genturung pendiau di sepemanjai Jalai Lidong, ti terus muka peluang ekonomi baru, nyungkak aktiviti ngelingi sereta nambahka penatai pemisi komuniti menua pesisir.
Sama bisi datai Kaban Kunsil Nengeri (ADUN) Engkilili, Dr. Johnical Rayong anak Ngipa, Residen Bagi Menua Betong Datu Richard anak Michael Abunawas enggau Injinir Bagi Menua Opis Kereja Raya Betong, Jason Ng Boon.
#ruaiberitaiban#newsiban#beritaiban
Rindu | Titih | Kunsika
