MIRI, 1 Mei — Perintah Sarawak chakah agi bejalaika pengawa neritka atur nagang betunu tebuka kelebih agi ba kandang tanah kerapa dikena nagang risiko penusah angus besai sereta nyeliahka gaya sebun asap majak balat.
Sapit Premier Sarawak, Datuk Amar Douglas Uggah Embas nyemetak madahka pengawa betunuka chara tebuka ti dikereja mensia mayuh ukai semina ngeruga kualiti angin, tang mega bisi potensial ngepunka penusah angus ti mar dijaga, kelebih agi maya musin kemarau.
“Semua piak meseti bejalaika tanggungpengawa nentuka pengelikun rayat enggau pemanah rampa menua dijaga,” ku iya lebuh ngulu penerang Komiti Mutarka Penusah Ngenyit Bagi Menua (JPBB) Miri, ditu, baru-baru tu.
Iya ke mega Chairman Komiti Mutarka Penusah Ngenyit Nengeri madah, semua aset, injin enggau kereban operasyen meseti dalam gaya ke manah sereta sedia digerakka sebarang maya dikena napi sebarang penusah ke tau nyadi.
Nitih ku iya, JPBB Miri mega dilalau ngangkatka pengawa nyikap diri nyengkaum ngenegapka pengawa matau ‘hot spot’ enggau chakah agi neritka atur nagang betunu tebuka di serata bagi menua.
Berebak enggau nya, Lembaga Pengeraja Asal enggau Rampa Menua (NREB) madahka bisi 23 ‘hotspot’ udah ditemu naka ke diatu di Bagi Menua Miri, enggau tujuh kes diatu benung dipansik.
Nitihka penerang ari NREB, pengawa matau enda ngetu udah dipejalaika, kelebih agi ba kandang endur paya kerapa Kuala Baram kenyau ari pun bulan Mac, nyengkaum ngentaska ‘hotspot’ ba kandang endur kebun komersial enggau kebun sawit.
“Asil ari pengawa matau nya, tujuh iti keretas pansik benung disediaka, kelimpah ari jaku tangkan diberi ngagai pekebun mit enggau mensia mayuh ke ditemu bisi risiko betunu chara tebuka,” ku penerang nya, baka ke dipansutka Utusan Sarawak.
NREB nambah, pengawa meri penyedar ngagai mensia mayuh mega udah diangkatka nengah pengawa nyadung poster, ‘risalah’ enggau kimpin pelajar bekaul enggau tagang betunu chara tebuka.
Berebak enggau nya, ejensi nya mega udah ngaktifka bilik operasyen sebun, chakah agi bejalaika pengawa matau ba palan, ngetuka permit betunu ke dikuasa sereta ngeluarka notis tagang betunu tebuka ngagai pemaju projek.
Mensia mayuh mega dilalau ngambi atur bejejaga maya hari angat nengah chara nentuka pengambi ai ke chukup, ngurangka aktiviti di luar sereta ngena sengkabung idung enggau mulut, kelebih agi ngagai raban berisiko tinggi.
Nitihka NREB, barang sapa individu ke ditemu ngereja pengawa nunu chara tebuka ti ngasuh angin kamah tau diukum ari baruh Seksyen 30(1)(a) enggau Seksyen 30(2) Ordinan Pengeraja Asal enggau Rampa Menua (NREO), enggau ukum mata duit nyentuk RM100,000 tauka jil maksimum lima taun tauka kedua-dua nya sekali.
Penerang nya bela digulu Menteri Perengka Pengangkut Sarawak, Lee Kim Shin; Residen Bagi Menua Miri Galong Luang, sereta mega pengari ari mayuh bengkah ejensi nyengkaum PDRM, JBPM, Opis Rampa Menua, Opis Meteorologi enggau Angkatan Pertahanan Awam Malaysia.
Penemuai kereja nya mega ngembuan tuju deka beratika tikas penyikap ejensi bekaul dalam napi risiko penusah ngenyit maya musin kemarau tu, lalu enggau nya nentuka pengawa mutarka penusah ngenyit di Bagi Menua Miri mengkang efisyen sereta efektif. — RBI
#Beritalban | Ruai Berita Iban
Rinduka | Titihka | Kunsika
Sumber — Utusan Sarawak
Photo — UKAS
