MERADONG, 19 April – Siku lelaki beumur 30 taun ditan tim “Pasukan Tugas” IPD Meradong dalam operasyen khas “Ops Tapis” ngelingi kandang menua Bintangor, tumu ngalih hari tadi.

Ketuai Polis Pelilih Meradong DSP Tansli Mering, nengah penerang berita madahka pengawa ngetan nya digaga urung pukul 1.00 lemai pengudah saspek dipelaba bisi kaul enggau aktiviti salah guna dadah sebedau dibai ngagai Indu Opis Polis Pelilih (IPD) Meradong ngambika atur ke silik agi dipejalaika.

“Asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif Amphetamine enggau Methamphetamine.

“Pengawa meresa rikod saspek ke udah tetemuka iya nadai ngembuan sebarang rikod jenayah tauka penyalah bekaul enggau dadah sebedau tu,” ku iya.

Kes nya diatu benung dipansik ari baruh Seksyen 15(1)(a) Akta Dadah Berbahaya 1952. Enti dikenuku salah, saspek ulih diukum enda ngelui ari RM5,000 tauka dijil nyentuk dua taun.

Berebak enggau nya, polis ngemeratka komitmen sida terus ngelaban pengawa salah guna dadah di pelilih menua nya lalu enda deka belembut ba sebarang pengawa ke bekaul.

Mensia mayuh mega dilalau ngenataika penerang bekaul enggau aktiviti dadah ngagai piak bekuasa, nyengkaum betelefon ngagai Balai Polis Bintangor nengah lumur 084-693222. -RBI

KUCHING, 19 April – Pengulih enggau penuduk Sarawak diatu ulih dipeda nengah pengangkun ari mayuh bengkah piak, nyengkaum bala ketuai menua enggau komuniti antarabansa.

Premier Sarawak Datuk Patinggi Tan Sri Abang Johari Tun Openg madah, naka ke diatu, orang beratika Sarawak ba beberapa pekara.

“Mayuh orang beratika kitai chukup mansang nyentukka mayuh ketuai menua udah ngelala kami.

“Piak luar mega ngelala kami, lalu nya kelai kami ngereja pengawa ke betul,” ku iya nerang.

Nambahka nya, pemerat ti terus ari pengari menua luar mega mandangka pengandal ngagai kuing Sarawak ari baruh pegai pentadbiran Gempung Parti Sarawak (GPS).

“Bala duta ari mayuh bengkah menua datai nyauka ninting minggu tauka ninting bulan.

“Minggu nyin tadi, aku nerima pengari ari Bangladesh enggau Itali, enggau pengari Itali bisi ati deka mansik kerejasama dalam sektor aeroangkasa,” ku iya.

Bekaul pekara bukai, iya madahka pemanah pengawa GPS ke nyadi perintah ngatur nengeri tu patut diperesa rayat, ukai ari ketuai iya empu.

Ku iya, chara GPS ti seruran bejalaika pengawa nyerenih diri ukai reti gempung nya patut meri puin ngagai prestasi sida empu.

“Aku enda menilai diri empu. Awakka rayat menilai,” ku iya lebuh dikerandau pengudah bejadika Konvensyen GPS 2026 di Palan Aum Borneo Kuching (BCCK) sehari tu tadi.

Berebak enggau nya, pemujur GPS mega narit ati ngagai penatai pemeranak puku ari menua luar nyadika indikator pengarap ngagai penau nengeri tu.

“Ambika chunto, kompeni teknologi global Western Digital ngerembaika puku sida di Samajaya, nyengkaum transisyen teknologi ‘substrat’ ari silikon ngagai kaca.

“Sida ngelala pengereja pengawa enggau nembiak kitai ke bekualiti, nya kebuah sida beranakka puku nyentuk US$2 bilion ungkup pengawa ngerembaika di Samajaya,” ku iya.

Kelimpah ari nya, iya madahka kompeni semikonduktor X-FAB mega majak ngenegapka operasyen di Sarawak, lalu enggau nya ngayanka industri semikonduktor nengeri tu ba tikas ke tinggi.

Taja pia, iya nyemetak madahka semua pemujur nya anang nyadika dalih ngemegahka diri, tang lebih agi muka ruang ngagai rayat meda sereta beratika kediri nama utai ke udah dipejalaika ngelama tu. -RBI

KUCHING, 19 April — Lebih 5,000 iku pengari ari serata Sarawak begempuru ba Konvensyen Kedua Gabungan Parti Sarawak (GPS) ke diatur ba Palan Konvensyen Borneo Kuching sehari tu, mandangka penyerakup ke tegap sereta penegap gempung nya napi pemar ke ditapi nengeri tu jemah ila.

Sapit Premier Sarawak, Datuk Amar Douglas Uggah Embas madah, konvensyen nya ukai semina nyadi pelasar baum aja, tang mega nyadi pelasar ke beguna dikena ngenegapka komitmen ketuai parti enggau renggat baruh dalam negika hak Sarawak sereta ngelanggur kuing pemansang ke lebih strategik.

Ku iya nerang, pengawa ngatur konvensyen kedua tu iya nya pemutus Kaunsil Ketuai Tertinggi GPS ti nyadi siti singkang dikena ngenegapka penyerakup parti, kelimpah ngenataika pesan ti nyemetak iya nya GPS meruan tegap, beserakup sereta entap.

“Sehari tu kitai meda siti momen besejarah lebuh beribu iku pengari GPS ari genap sukut Sarawak begempuru, ukai semina deka begempuru aja, tang mantaika penetap ti terang sereta tegap, kitai beserakup, kitai kering, lalu kitai enda nyurutka diri taja pan sesingkang dalam ngetanka hak enggau pengidup dudi hari Sarawak,” ku iya.

Konvensyen nya ti ngembuan rambai jaku “Strategi Pemansang Pasca COVID 2030: Wawasan Nyadi Nyata”, mega nyadi pelasar besai dikena ngatur strategi pemansang nengeri nuju taun 2030, enggau pemerat nempa mensia mayuh ti maju bepelasarka data, inovasyen, inklusif rampa menua.

Nitih ku iya, Sarawak diatu ba pelasar ke tegap lebuh iya ukai agi semina merambu ungkup jemah ila, tang nganti nya realiti pemansang bepelasarka pengulih ke signifikan.

Entara nya diaku nyadi pelilih menua bepenatai pemisi tinggi ulih Bank Dunya kenyau ari taun 2023 enggau penambah penatai pemisi nengeri ari RM5.6 bilion ba taun 2017 ngagai RM14.2 bilion ba taun 2024.

Kelimpah ari nya, lebih 5,000 kilometer jalai menua pesisir udah digaga sereta diangkatmanah, lalu sektor utiliti udah ngayanka penyulut ti meransang enggau 70 peratus bekal kuasa karan dipansutka ari pun penatai kuasa tau dikena baru.

Bungkur bekal ai diatu lebih ari 85 peratus di serata nengeri lalu terus dikemanah nuju tagit 100 peratus manggai ba taun 2030.

Ari sukut pemansang modal mensia, perintah Sarawak udah meri kelala skim pelajar tinggi enda bebayar dalam bidang strategik ungkup peranak nengeri ba institusyen baka Kampus Universiti Teknologi Swinburne Sarawak, Universiti Curtin Malaysia, Universiti Teknologi Sarawak enggau Kolej Universiti i-CATS, lalu enggau nya muka peluang ke lebih luas ngagai rebak biak agi.

Sarawak mega udah ngenegapka penuduk ekonomi nengah pengawa beranakka puku strategik enggau penumbuh Bank Pemansang Sarawak (DBOS) dikena melanja projek pemansang ke besai, kelimpah ari penumbuh Wang Turu Kekayaan Berdaulat Sarawak Jemah Ila ke beungkus RM8.6 bilion ungkup pemaik timpuh panjai rebak dudi hari.

Ba sektor kuasa, nengeri tu majak diaku nyadi ketuai kuasa gadung di rantau tu setipak enggau aspirasyen nyadi “Bateri ASEAN”, seraya pemansang infrastruktur terus dipejalai nengah pengawa ngaga 20 buah jematan mega ti beungkus RM6.5 bilion ti dipelanja penuh perintah nengeri.

Transformasyen tu mega udah meda ubah ke besai dalam sistem komunikasyen laban bepanggai ba servis feri majak kurang, lalu enggau nya nambahka efisyen mobiliti mensia mayuh enggau nadai beban tol.

Iya nyemetak madahka semua pemujur ke dijapai ukai asil ari kebetulan, tang lebih agi bepun ari perambu ke silik, polisi ke terang sereta ketuai ke bisi visi ari baruh pegai Menteri Besai Sarawak, Abang Tan Sri Abdul Rahman Johari Openg.

“Semua pemujur tu asil ari pengawa ti enda ngetu sereta komitmen ti tegap ari semua ketuai enggau rayat Sarawak dalam nentuka nengeri tu terus maju, inklusif sereta meruan,” ku iya.

Konvensyen GPS Kedua tu nyadi manifestasi penegap enggau penyerakup gempung dalam ngenegapka pelasar politik sereta ngesahka baru komitmen terus meransang pemansang Sarawak nuju nyapai visyen 2030. — RBI

KUCHING, 19 April — Sarawak ba jalai ke betul nyapai status nengeri maju bepenatai pemisi tinggi manggai ba taun 2030, asil ari pengawa bejalaika strategi pemansang ti meruan sereta inklusif.

Nitihku Sapit Premier Sarawak, Datuk Amar Douglas Uggah Embas, bemacham pemujur udah dirikod nyengkaum penambah penatai pemisi nengeri ngagai RM14.2 bilion ba taun 2024 enggau diaku nyadi pelilih menua bepenatai pemisi tinggi kenyau ari taun 2023.

Ku iya, pemansang infrastruktur menua pesisir, nambahka bungkur bekal ai enggau elekterik sereta bejalaika pelajar tinggi enda bebayar entara inisiatif kunsi ti meri penguntung terus ngagai rayat.

“Chara data ti bebatang, inovasyen enggau pengelantang nyadi pelasar strategi pemansang Sarawak ari baruh Pelin PCDS 2030,” ku iya nerang ba pengerami Konvensyen taun 2026 ba Borneo Convention Centre Kuching (BCCK) sehari tu.

Iya nambah, Sarawak diatu benung mansang nyadi ketuai kuasa gadung serantau enggau 70 peratus bekal kuasa karan dipansutka ari pun penatai ti ulih dikena baru. — RBI

KUCHING, 19 April – Semua parti dalam komponen Gempung Parti Sarawak (GPS) begunaka sukung pangan diri sereta ngetanka penuduk sida empu dikena nentuka penegap politik nengeri tu terus dijaga sebedau Pengawa Bepilih Nengeri ti deka datai.

Lenyau siti penuduk ba Dewan Undangan Nengeri (DUN) ulih ngelemika penegap lalu enggau nya ngeruga pengulih perintah nengeri berunding enggau Perintah Besai.

Nya alai, Parti Rakyat Sarawak (PRS) nyemetak madahka GPS nguasa penuh ba DUN nyadi kunchi besai ngenegapka penuduk nengeri tu dalam minta hak ari baruh Sempekat Malaysia 1963 (MA63).

“Pengawa nguasa penuh GPS ba DUN enggau penegap perintah nengeri nyadika batang pekara ti nentuka Sarawak terus nerima perati enggau basa ari Perintah Besai.

“Alah taja pan siti penuduk deka ngelemika penuduk kitai. Kitai enda ulih ngelakka pekara tu nyadi,” ku Presiden PRS Dato Sri John Sikie Tayai.

Iya madah munyi nya lebuh bejaku ba Konvensyen GPS 2026 ba Palan Konvensyen Borneo Kuching (BCCK), ditu sehari tu tadi.

Berebak enggau nya, John Sikie nyemetak madahka PRS ke nyadi komponen GPS mega berasai irau laban pengawa bepilih majak semak, tang andal kerejasama rat dalam gempung nya ulih nentuka pemenang ti komprehensif.

“Kitai dalam PRS seruran meda pemar ke deka datai, tang kitai pechaya bala bakih kitai dalam GPS deka terus bediri begulai ngetanka tetiap penuduk,” ku iya.

Nerang silik, iya madahka penegap politik GPS udah ngasuh Sarawak nyapai penyulut ti jampat, nyengkaum ari sukut pemansang ekonomi, infrastruktur enggau nambahka penatai pemisi nengeri.

Ku iya, ari baruh iring Premier Sarawak, Datuk Patinggi Tan Sri Abang Johari Tun Openg, perintah nengeri udah mujur nambahka penatai pemisi nengeri lebih RM14 bilion kenyau ari taun 2024, asil ari pemujur nuntut hak chukai dalam industri minyak enggau gis.

Kelimpah ari nya, pengawa bejalaika Strategi Pemansang Pengudah COVID-19 2030 (PCDS 2030) mega nyadi pemansut besai transformasyen Sarawak nuju pelilih menua bepenatai pemisi tinggi manggai ba taun 2030.

“Semua pemujur tu enda ulih nyadi nyata enti nadai penegap politik enggau ketuai ti tegap.

“Nya alai, kitai patut terus beserakup sereta nentuka GPS terus mujur ungkup kuing Sarawak jemah ila,” ku iya nyemetak. -RBI

KUCHING, 19 April — Gabungan Parti Sarawak (GPS) mengkang nyadi tiang penegap politik enggau penyerakup di nengeri tu, enggau nya nyamin pengidup ti inklusif sereta meruan ungkup Sarawak jemah ila.

Nitih ku Sapit Premier Sarawak Datuk Amar Douglas Uggah Embas, pemujur GPS ukai semina ba pemansang ekonomi aja, tang mega ngetanka pengelantang komuniti pupu bansa enggau jalai pengarap.

Ku iya, entara inisiatif ke berat iya nya numbuhka Unit Pekara Jalai Pengarap Bukai (UNIFOR) ti bejalaika tanggungpengawa ngatur sereta nyukung pemansang jalai pengarap kelimpah ari Islam di Sarawak.

“Inisiatif tu mandangka komitmen perintah nengeri nentuka nadai siti komuniti dikelaungka, setipak enggau prinsip inklusiviti enggau penyerakup ti nyadi teras GPS,” ku iya.

Ku iya nambah, GPS nyadi sebuah parti menua tu ngembuan pengelebih meretika guna rayat ba semua renggat sereta mengkang tegap ngetanka hak Sarawak ari baruh Sempekat Malaysia 1963 (MA63).

“Penyerakup ti tegap tu nyadi pelasar ngagai penegap enggau penyulut nengeri tu ti majak nyadi,” ku iya lebuh bejaku ba Konvensyen GPS taun 2026 ti diatur ba Borneo Convention Centre Kuching (BCCK) sehari tu tadi.

KUCHING, 19 April — Premier Sarawak Tan Sri Abang Abdul Rahman Johari Openg ngiring Sarawak terus nyadi pemansut besai transformasyen Sarawak nuju ekonomi gadung, digital enggau kompetitif ba renggat dunya.

Sapit Premier, Datuk Amar Douglas Uggah Embas madahka ari baruh iring Premier Sarawak udah bejalaika singkang ti berani ngemansangka sektor kuasa tau dikena baru nyengkaum hidro, hidrogen enggau solar.

Kelimpah ari nya, pengawa ngenegapka industri minyak enggau gis nengah Petroleum Sarawak Berhad (PETROS) sereta mega pengawa numbuhka institusyen wang strategik baka Bank Pemansang Sarawak (DBOS) mega udah ngenegapka ekonomi nengeri tu.

Iya mega nyemetak madahka pengawa nyadi ketuai ti inklusif ti dikemeranka nentuka semua bansa enggau jalai pengarap ngasaika penguntung pemansang enggau sama rata.

“Tu nyadika bukti Sarawak ukai semina ngaga ekonomi aja, tang ngaga pengidup jemah ila ti adil ungkup semua,” ku iya lebuh bejaku ba Konvensyen Gabungan Parti Sarawak (GPS) taun 2026 ti diatur ba Borneo Convention Centre Kuching (BCCK) sehari tu tadi. — RBI

KUCHING, 19 April -Isu bekal ai beresi ti agi nyadi batang sebana rayat ba beberapa kandang menua antara pekara ti patut diperati enggau berat dalam pengawa ngenegapka pengandal rayat ngagai perintah, ku Presiden Parti Demokratik Progresif (PDP), Dato Sri Tiong King Sing.

Ku iya, bekal ai nyadi pekara ke diguna ke enda ulih dikeruga sereta patut diputarka enggau jampat nengah perambu timpuh pandak, tengan enggau timpuh panjai.

“Bisi sitak menua ke agi betapi enggau pemar ngulihka bekal ai beresi ungkup guna ninting hari, tu nyengkaum gaya maya musin pengerami ti ngeruga pekara pemun rayat.

“Rayat ukai semina beratika nengah penerang aja aja, tang asil ke amat diatur deka diasaika ba renggat baruh,” ku iya.

Iya madah munyi nya lebuh bejaku ba Konvensyen Gempung Parti Sarawak (GPS) di Palan Konvensyen Borneo Kuching (BCCK), sehari tu tadi.

Kelimpah ari nya, Tiong mega ngaitka isu ai enggau pemar infrastruktur ke bukai baka sistem parit enggau ampuh bah ti suah nyadi belama, lalu enggau nya minta pengawa ti lebih jampat ari perintah.

Berindik enggau nya, iya ngansak ngambika aspek meri servis terus dikemanah ngambika setiap perambu perintah ulih disalin ngagai penguntung ke nyata ungkup rayat.

“Nyadi perintah ke ngembuan tanggungpengawa, kitai patut nentuka pekara ke diguna rayat kelebih agi bekal ai beresi seruran dijamin ke pengelantang pendiau sida,” ku iya nyemetak.

Bekaul isu nyiri Ketuai Komuniti enggau Ketuai Raban Bansa (KMKK) Tiong nyemetak madahka bisi timbal ari renggat baruh bekaul enggau proses nyiri KMKK ke dikumbai enda setipak enggau pengawa ke udah dipesetuju dalam GPS.

Nitih ku iya, gaya nya kelebih agi ba kandang endur sitak PDP, ngasuh orang betanya lebuh pemutus majoriti enda nerima perati.

“Pekara tu nyangka dipeda mit, tang ke bendar iya meri empas ke besai ngagai pengarap rayat ngagai sistem pentadbiran kitai.

“Pekara ke dibantai ukai dikena ngasuh penyarut nyadi, tang lebih agi dikena ngetanka pelasar kerejasama sereta nentuka proses ke dipesetuju begulai dipejalaika enggau konsisten,” ku iya. -RBI

KUCHING, 19 April – Sarawak udah nengah fasa transformasyen ke chukup beguna kenyau ari berapa taun ke udah, tu nyengkaum ubah politik ba taun 2018, tang mengkang tegap di baruh iring Gempung Parti Sarawak (GPS) enggau Premier Sarawak Datuk Patinggi Tan Sri Abang Johari Tun Openg.

“Kitai enda agi tinggal baka ke dulu suba. Kitai diatu ba jalai pemansang ke tegap agi,” ku Sapit Premier Sarawak, Datuk Amar Profesor Dr Sim Kui Hian lebuh bejaku ba Konvensyen GPS 2026 di Pusat Konvensyen Borneo Kuching (BCCK), sehari tu tadi.

Terang iya, Sarawak enda agi tinggal baka ke dulu suba, tang diatu udah nengah jalai pemansang ti lebih tegap asil ari penegap politik enggau penerus polisi di baruh GPS.

Dr Sim ke mega Presiden Parti Sa’ati Rayat Sarawak (SUPP) madah, ubah besai tu asil ari pengawa perintah nengeri ti konsisten sereta fokus dalam nentuka Sarawak terus nyingkang ke mua enggau chara ti betukuh.

“Lima taun ti deka datai amat berat dalam pengawa kitai nempa Sarawak nyadi nengeri maju, ukai semina ari segi pemansang fizikal tang mega pemansang komprehensif nyengkaum pelajar, ekonomi enggau pengerai.

“Ari segi pengerai, iya madah pengawa terus disungkak nyengkaum pemansang Palan Perubat Riman Sarawak ti dikearapka nyadi antara palan berubat ti patut ditapatka di rantau tu.

Ba awak sama mega, Sepital Besai Sarawak (HUS) mega terus ditegapka agi nyadi palan klinikal enggau pemansik.

Kelimpah ari nya, Dr Sim ngemeratka pemansang infrastruktur baka jalai alun, bekal ai beresi enggau kuasa karan terus nyadi pekara dikenuluka perintah nengeri dalam nyukung penumbuh ekonomi enggau ningkatka tikas pengidup rayat.

Ku iya, cara pemansand di Sarawak dipejalaika secara inklusif, nyengkaum semua bansa enggau jalai pengarap, nyengkaum sukung ngagai sekula Cina sereta bantu ngagai rumah sembiang enggau komuniti menua pesisir.

Tambah iya, penyerakup rayat nyadi pekara ti chukup beguna ti ngenegapka penguat politik, lalu ulih narit pemeranakka puku ari luar masuk ngagai Sarawak.

Bepelasarka Pelin Pemansang Pengudah COVID-19 2030 (PCDS 2030), Sarawak nagit nyadi nengeri bepenatai pemisi tinggi ba taun 2030.

Berebak enggau nya, Dr Sim ngelalau semua rayat terus ngerapitka penyerakup sereta meri sukung ngagai polisi perintah ngambika agenda pemansang ulih diteruska enggau nadai utai ngachau.

“Pengawa Sarawak jemah ila bepanggai ba penyerakup semua kitai dikena nentuka nengeri tu terus maju, kuat sereta inklusif,” ku iya. -RBI

KUCHING, 19 April – Sarawak udah nengah fasa transformasyen ke chukup beguna kenyau ari berapa taun ke udah, tu nyengkaum ubah politik ba taun 2018, tang mengkang tegap di baruh iring Gempung Parti Sarawak (GPS) enggau Premier Sarawak Datuk Patinggi Tan Sri Abang Johari Tun Openg.

“Kitai enda agi tinggal baka ke dulu suba. Kitai diatu ba jalai pemansang ke tegap agi,” ku Sapit Premier Sarawak, Datuk Amar Profesor Dr Sim Kui Hian lebuh bejaku ba Konvensyen GPS 2026 di Pusat Konvensyen Borneo Kuching (BCCK), sehari tu tadi.

Terang iya, Sarawak enda agi tinggal baka ke dulu suba, tang diatu udah nengah jalai pemansang ti lebih tegap asil ari penegap politik enggau penerus polisi di baruh GPS.

Dr Sim ke mega Presiden Parti Sa’ati Rayat Sarawak (SUPP) madah, ubah besai tu asil ari pengawa perintah nengeri ti konsisten sereta fokus dalam nentuka Sarawak terus nyingkang ke mua enggau chara ti betukuh.

“Lima taun ti deka datai amat berat dalam pengawa kitai nempa Sarawak nyadi nengeri maju, ukai semina ari segi pemansang fizikal tang mega pemansang komprehensif nyengkaum pelajar, ekonomi enggau pengerai.

“Ari segi pengerai, iya madah pengawa terus disungkak nyengkaum pemansang Palan Perubat Riman Sarawak ti dikearapka nyadi antara palan berubat ti patut ditapatka di rantau tu.

Ba awak sama mega, Sepital Besai Sarawak (HUS) mega terus ditegapka agi nyadi palan klinikal enggau pemansik.

Kelimpah ari nya, Dr Sim ngemeratka pemansang infrastruktur baka jalai alun, bekal ai beresi enggau kuasa karan terus nyadi pekara dikenuluka perintah nengeri dalam nyukung penumbuh ekonomi enggau ningkatka tikas pengidup rayat.

Ku iya, cara pemansand di Sarawak dipejalaika secara inklusif, nyengkaum semua bansa enggau jalai pengarap, nyengkaum sukung ngagai sekula Cina sereta bantu ngagai rumah sembiang enggau komuniti menua pesisir.

Tambah iya, penyerakup rayat nyadi pekara ti chukup beguna ti ngenegapka penguat politik, lalu ulih narit pemeranakka puku ari luar masuk ngagai Sarawak.

Bepelasarka Pelin Pemansang Pengudah COVID-19 2030 (PCDS 2030), Sarawak nagit nyadi nengeri bepenatai pemisi tinggi ba taun 2030.

Berebak enggau nya, Dr Sim ngelalau semua rayat terus ngerapitka penyerakup sereta meri sukung ngagai polisi perintah ngambika agenda pemansang ulih diteruska enggau nadai utai ngachau.

“Pengawa Sarawak jemah ila bepanggai ba penyerakup semua kitai dikena nentuka nengeri tu terus maju, kuat sereta inklusif,” ku iya. -RBI

KUCHING, 19 April — Gempung Parti Sarawak (GPS) ngembuan pelin pemansang timpuh panjai ke terang nengah Strategi Pemansang Pengudah COVID-19 2030 (PCDS 2030) enggau tagit ke bestruktur.

Ku Sapit Premier Sarawak Datuk Amar Douglas Uggah Embas, ke pemadu beguna ku iya nya chara nadai orang ditinggalka enda ngira bansa tauka jalai pengarap, laban ketuai kitai nyadi ketuai ungkup semua,” ku iya.

Ngelansa pasal kuing nengeri tu jemah ila, Uggah madahka pemansang Sarawak ukai semina fizikal aja, tang mega mungkur maruah enggau hak rayat.

“Kitai patut ngetanka maruah enggau hak kitai.GPS nyadi kuta ngetanka kedaulatan Sarawak seraya meransang pemansang ti komprehensif.

“Enggau sukung tegap ari rayat, Sarawak ukai semina deka terus maju, tang mega ulih nyadi model pemujur di Malaysia ti ngatika diri, kompetitif sereta beserakup,” ku iya.

Uggah madah munyi nya beserimbai enggau ba Konvensyen GPS 2026 di Palan Konvensyen Borneo Kuching, sehari tu tadi.

Tandu Uggah, semina GPS aja ke ulih nyamin kuing Sarawak jemah ila enggau nadai bepanggai ba piak luar.

Iya nyemetak madahka GPS nyadi gempung parti lokal seruran ngemeratka pemerat rayat Sarawak ba selampur, mungkur kandang mengeri nyentuk ke dalam menua.

Nitih ku iya, GPS meretika penuh pemar rayat nyengkaum isu jalai menua pesisir, bekal ai enggau kuasa karan, pelajar enggau peluang ekonomi.

“Pemutus ke digaga nya semak agi enggau realiti rayat sereta enda dikachau kuasa luar. Semina GPS aja ngembuan rikod, ketuai, visyen enggau pemerani mai Sarawak ngagai tikas ke tinggi agi,” ku iya.

Uggah mega muji pengawa Premier Sarawak, Datuk Patinggi Tan Sri Abang Johari Tun Openg ke dikumbai orang ke bekaliber tinggi sereta nadai banding di Malaysia.

Ke bendar, rayat Sabah mega udah mantaika pengingin ati sida ke Abang Johari nyadi Kepala Menteri sida, ngenang pasal pemansang ke nyadi diatu ba Sabah.

“Nya meh pengering kami laban ketuai ke berani, pintar, bisi visyen sereta lurus ngagai semua,” ku iya.

Berebak enggau nya, iya nyemetak madahka GPS deka terus ngetanka hak Sarawak ari baruh Sempekat Malaysia 1963 (MA63) ngambika ulih dipulaika penuh dalam timpuh ke semak.

Kenu ku iya, GPS mega udah mujur ngetanka pengelantang entara bansa enggau jalai pengarap, lalu enggau nya nempa Sarawak nyadi model penyerakup di Malaysia. – RBI