MIRI, 25 April — Opis Kereja Raya (JKR) Sarawak majak ngenegapka komitmen ngenegapka pemansang infrastruktur nengeri tu nengah pengawa nganjung Pelin Inisiatif Ngulihka Jalai Kayu Batang enggau Program Transformasyen Jematan Menua Pesisir ngagai Premier Sarawak Yang Amat Berhormat Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg.

Pelin tu dibantaika Direktor Kereja Sarawak, YBhg Datu Adj. Prof. Ts. Gs. Br. PMr. Dr.Cassidy anak Morris nyadi kelai pengawa Opis Kereja Raya Sarawak ti seruran bebendar nentuka pemansang infrastruktur dipejalaika enggau lebih teratur, efisyen sereta meruan.

Inisiatif ngulihka jalai kayu batang tu ngembuan tuju deka nentuka rentayan jalai diatur enggau lebih sistematik, likun sereta efisyen ungkup pemaik rayat.

Naka ke diatu, sepenyampau 5,977.038 kilometer jalai kayu batang di serata Sarawak udah mujur direjister dalam Sistem Penerang Rikod Jalai Malaysia (MARRIS), ke alai 2,363.591 kilometer ari nya ngaul Bagi Menua Miri.

Berebak enggau nya, pengawa bejalaika Program Transformasyen Jematan Menua Pesisir (RBTP) di Bagi Menua Miri mega udah dikemeratka iya nya ngaul 26 buah jematan.

Program tu dipejalaika dikena ngangkatka tikas pengelikun, pengelantang akses enggau penyambung rentayan perengka pengangkut, kelebih agi ungkup komuniti menua pesisir.

Kesemua inisiatif tu seriris enggau agenda pemansang Sarawak ti ngemeratka pengelantang pendiau rayat enggau pemansang infrastruktur ti inklusif sereta meruan, lalu enggau nya nyukung penumbuh ekonomi nengeri tu selampur. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — JKR Sarawak

JULAU, 25 April – Pekit tarit tali disadang nyadi sebengkah ari pengerami ke pemadu narit ati dalam Karnival Lumba enggau Main Rakyat Renggat Parlimen P.209 Julau.

Pekit tu deke deka diatur bulan Mei ti deka datai, enggau penyereta ti ngaul komuniti rumah panjai ari pelilih Julau enggau Pakan.

Nitihka penerang ari Kaban Parlimen Julau, Datuk Larry Sng Wei Shien, program lumba enggau main rayat meri awak ngagai tim JKKK rumah panjai nguji pengeregas tubuh enggau semengat tim sida nengah kategori bechampur ti ngempung penyereta lelaki enggau indu dalam siti tim.

“Renggat pemungkal pekit tu diperambu deka diatur kena 16 Mei berengkah ari pukul 7.00 pagi ba dua bengkah endur ke bebida iya nya Padang MDMJ Julau ungkup penyereta ari pelilih Julau enggau Kompleks Lumba enggau Main Pakan ungkup penyereta ari pelilih Pakan.

“Sepenyampau 16 tim ke pemadu nyulut ari renggat pemungkal deka nyingkang ngagai pekit ke penudi ti diperambu deka diatur kena 23 Mei ba Padang MDMJ Julau berengkah pukul 8.00 pagi,” ku Larry.

Iya mega madahka, setiap tim semina mayar chengkeram penyereta sepenyampau RM150 lalu meseti bisi 10 iku pesereta, nyengkaum semilan iku pemain ‘utama’ enggau siku simpan, lalu enam iku lelaki enggau tiga iku indu ba sebuah tim.

“Piak pengatur mega netapka penyampau pemerat tim enda tau ngelui ari 680 kilogram, kelimpah ari nya semua penyereta patut nengah proses timbang sebedau pekit berengkah,” ku iya nerang.

Ari sukut atur, pekit tu deka dipejalaika ngena format “tarit panjai” enggau maksimum tiga iti tarit, lalu tim ke menang dua iti tarit deka dianggap pemenang.

Bala penyereta mega enda dikemendar ngena kasut maya pekit, seraya tiap main deka diakim tiga iku pengadil.

Mensia mayuh ke bisi ati deka nyereta pekit tu tau betanya ngagai Angela ba lumur 014-688 7828 ungkup sitak Julau tauka Kevin Jampang ba lumur 013-832 6927 bagi sitak Pakan ngambika nemu penerang silik sereta ngerejista diri.

Pengawa ngatur karnival tu dikearapka ulih ngenegapka kaul komuniti kelimpah ari nerenakka gaya pengidup ti bepengerai ba komuniti lokal. -RBI

#ruaiberitaiban#newsiban#beritaiban

Rindu | Titih | Kunsika

BINTULU, 25 April – Hari Kokurikulum Sekolah Kebangsaan Sungai Manong (HAKOSUMA) nyadi pelasar beguna dalam ngenegapka pemansang nembiak ti mungkur sukut akademik, lumba enggau main sereta personaliti.

Ngarika Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Dr.Aaron Marcel anak Rundi madahka menteri nya enda ulih datai ketegal komitmen rasmi ti enda ulih diseliah.

Taja pia, iya ngemeratka komitmen Dato Sri Dr.Stephen Rundi ti terus nyukung pengawa sekula nya ngadaka nembiak ti nyulut, kompetitif sereta sebela ari sukut akademik enggau aktiviti kokurikulum.

Dalam jaku iya, Dr. Aaron Marcel ngemeratka pemesai guna nembiak ngaul diri enggau chakah dalam lumba enggau main nyadi pelasar ngagai penyulut akademik.

Nitih ku iya, nembiak ke regas dalam lumba enggau main selalu iya ngembuan tikas fokus ke tinggi sereta pengerai runding enggau fizikal ke manah agi, lalu ari nya ulih mantu sida nguasa subjek ke mayuh pemar.

Iya mega meri besai terima kasih ngagai piak pentadbiran sekula ti udah ngatur HAKOSUMA ti dipadah nyadi inisiatif strategik dalam mantaika penau enggau potensial nembiak.

Ku iya, program baka nya ulih muka peluang ngagai nembiak nyingkang jauh agi nyengkaum ngarika nengeri tu ba Lumba Malaysia enggau ba renggat antarabansa.

Ngelansa pasal aspek ngenegapka raban nembiak, Dr. Aaron Marcel ngemeratka pemesai guna Raban Nembiak Parti Pesaka Bumiputera Bersatu (PBB) nyadi pelasar dalam ngemansangka potensial raban nembiak.

Nitih ku iya, Nembiak PBB ukai semina nyadi pengerembai program pemansang nembiak, tang mega nyadi “mata enggau pending” komuniti dalam nyadung penerang bekaul enggau guna infrastruktur kandang menua baka pengerusak jalai alun, lampu jalai ti enda befungsyen enggau pematut ngemanahka perengka guna mensia mayuh.

Sama bisi ngulu pengerami nya, Presiden PIBG Sekula Primari (SK) Sungai Manong, TR Lukeng anak Jebut, Penyelia Palan Servis, Tuai-Tuai Rumah, pentadbir sekula enggau kaban komiti PIBG — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

KUALA LUMPUR, 25 April – Ejensi Pengatur Penusah Ngenyit Menua (NADMA) sehari tu ngelancharka Sistem Pengatur Penerang Penusah Ngenyit Malaysia (MyDIMS), aplikasyen digital begulai ti nyendiaka penerang penusah ngenyit maya nyata enggau jaku tangkan tumu ngagai mensia mayuh.

Pengawa ngelancharka aplikasyen nya dipenyadika Direktor Besai NADMA, Meor Ismail Meor Akim, rambau sesi ‘walkabout’ beserimbai enggau Resilient Asia 2026 ba Palan Dagang Dunya Kuala Lumpur (WTCKL).

MyDIMS digaga nyadi pelasar penerang penusah ngenyit ti begempung enggau data ari mayuh bengkah ejensi teknikal.

Aplikasyen tu ngemendarka penguna matau status penusah ngenyit ke pemadu baru, penyampau orang ke bisi kaul enggau penyampau Palan Pengenduh Sementara (PPS) ke dibuka di serata menua.

Entara batang pengelebih MyDIMS iya nya guna ‘Push Notification’ ti deka nganjung jaku tangkan tumu enti sema penguna dalam kandang 25 kilometer ari endur penusah ngenyit nyadi.

Aplikasyen tu dikearap ulih mantu mensia mayuh nyendiaka diri sereta ngambi atur tumu sereta sistematik agi.

Kelimpah ari nya, aplikasyen tu mega meri iring navigasyen ngagai PPS nengah integrasyen kar digital, nyengkaum penerang status PPS sekalika agi beoperasyen tauka udah ditutup, kelimpah ari kapasiti ke diatu dikena ngemudahka pengawa merambu pemindah orang kena tasah.

MyDIMS mega disikap enggau sambung dail jampat ngagai Talian MERS 999 dikena ngenyampatka pengawa nimbal penusah ngenyit.

Berebak enggau nya, aplikasyen tu nyadi hab malin nengah chara nyambung penguna ngagai mayuh macham aplikasyen ejensi teknikal bukai baka myCuaca, MyPublic InfoBanjir, MyJAS EQMS, Bencana JKR, MylBJKM enggau myPasangSurut dikena ngulihka penerang teknikal ke silik agi.

Sama bisi disediaka iya nya chara guna ngiga talipaun penusah ngenyit ti ngemendarka penguna ngulihka lumur telefon Palan Penyaga Operasyen Penusah Ngenyit (PKOB) nengeri enggau pelilih menua sereta mega ejensi baka Polis Diraja Malaysia (PDRM), Opis Bomba enggau Penyah Penusah Malaysia (JBPM) enggau Raban Penyaga Orang Periman Malaysia (APM) ba setiap palan.

Pengawa ngelanchar MyDIMS dipeda nyadi siti singkang ke besai reti ari NADMA dalam ngenegapka penyendia mensia mayuh nengah pengawa digitalisasyen sistem ngatur penerang penusah ngenyit ke jampat agi, betul agi sereta beserakup.

Mensia mayuh ulih batak turun aplikasyen MyDIMS nengah Google Play Store enggau Apple App Store. – RBI

#ruaiberitaiban#newsiban#beritaiban

Rindu | Titih | Kunsika

MIRI, 25 April – Komitmen ti seruran dikena ngenegapka pemansang sektor betanam betupi nengeri dipandangka nengah pengawa bejalaika inisiatif inovatif enggau ngaku pemeri pengereja pengawa, nengah program penemuai rasmi enggau pengerami meri terima kasih ti diatur di Bagi Menua Miri kemari.

Muak ke pagi, Dominic Anak Chunggat, Direktor Betanam Betupi Sarawak bisi nemuai ngagai Plot Uji Padi Varieti Perennial ti diempu Borneoland Paddy Sdn. Kompeni Bhd di Kuala Baram.

Penemuai nya betuju beratika baru pejalai pengawa bejalaika projek nanam padi bansa perennial, iya nya chara baru dikena nambahka produktiviti padi enggau meruan.

Inisiatif nya dipeda bisi potensial meri pangka ngagai pengawa nambahka tikas pemisi padi Sarawak, setipak enggau agenda perintah nengeri dalam ngenegapka pengelikun pemakai sereta ngemansangka sektor agro-pemakai ti lebih tegap.

Ngalih hari, iya ngulu Pengerami Nyuaka Pingat Perkhidmatan Setia Bagi Menua Miri ti dipenyadika Premier Sarawak, Datuk Patinggi Tan Sri Abang Abdul Rahman Johari Abang Openg.

Pengerami tu nyadi kelai meri terima kasih ngagai orang gawa perintah ti udah mandangka komitmen tinggi, dedikasyen enggau penyulut dalam servis.

Entara penerima Pingat Perkhidmatan Setia Bagi Menua Miri iya nya Stephen Anak Ulau enggau Niting @ Cherang Anak Hillary Tawan (Penulung Pemesai Betanam Betupi), Subeng Bin Jabis (Pemantu Awam), Nurrainie Binti Abdullah enggau Sangit Anak Palei (Pemantu Pemansang Komuniti), kelimpah Rogayah Binti Spawi (Pembantu Tadbir (P/O).

Rambau penemuai nya, iya mega ngelimpangka awak ngabas palan servis Opis Betanam Betupi Sarawak sereta beratika tikas penyikap Komiti Banquet Opis nya ungkup Program Sarawakku Sayang Miri.

Penatai iya mandangka komitmen tegap Opis Betanam Betupi Sarawak dalam ngenegapka pemansang sektor betanam betupi nengeri tu, kelimpah ari ngaku pemerat pengawa pengereja pengawa nyadi tulang belakang pemujur organisasyen.

Sama bisi datai Dato Sri Dr.Stephen Rundi Utom, Menteri Industri Pemakai, Komoditi enggau Pemansang Kandang Menua Sarawak, Puan Chong Mui Sia, Pemesai Betanam Betupi Bagi Menua Miri enggau pengereja pengawa Opis Betanam Betupi Bagi Menua Miri. -RBI

#ruaiberitaiban#newsiban#beritaiban

Rindu | Titih | Kunsika

Photo — Jabatan Pertanian Sarawak

MIRI, 24 April — Perintah Sarawak tetap komited ngenegapka pemansang infrastruktur menua pesisir nengah pengawa bejalaika projek Jalai Miri–Baram, ti disadang tembu penuh ba taun 2029.

Premier Sarawak, Datuk Patinggi Tan Sri (Dr) Abang Abdul Rahman Zohari madah, projek ti meri empas tinggi nya entara pengawa strategik perintah dikena muka akses ke lebih komprehensif ngagai kandang menua Baram nyentuk ke Ulu Baram, lalu enggau nya ulih meransang pemansang sosio-ekonomi di kandang menua ulu.

Nitih ku iya, perintah nengeri udah ngungkupka belanja ngelui RM2 bilion, nyauka manggai RM3 bilion, dikena nentuka pengelanchar bejalaika projek nya.

“Taja pan projek tu nadai meri pulai ekonomi terus, tang penguntung iya chukup besai ari sukut pengelantang pendiau rayat enggau potensial pemansang baru di kandang menua ulu,” ku iya lebuh bejaku ba Pengerami Makai Lemai Komuniti Bagi Menua Miri di Hotel Pullman Waterfront kemari.

Berebak enggau nya, iya mega madahka perintah Sarawak deka ngambi alih jalai tebang kayu ke udah bisi ke guna iya sebedau tu semina dikena sekeda piak aja.

Pengawa nya diambi berindik ari timbal ari komuniti Orang Ulu ti napi penanggul akses nyengkaum begunaka pemendar sereta mayar sekeda kompeni ngena jalai nya.

“Perintah udah ngaga pemutus ngambi jalai tu lalu diangkatmanah ari sukut kualiti enggau pengelikun, lalu ari nya rayat ulih nengah nya enggau pechuma nadai bebayar tol,” ku iya nerang.

Taja pia, iya ngaku aspek nyeruri jalai alun begunaka komitmen agih belanja ti enda ngetu ari perintah nengeri dikena nentuka perengka guna nya seruran manah sereta likun dikena.

“InshaAllah, seagi diberi mandat, perintah deka terus bebendar nentuka pemansang tu dipejalai enggau ngasi ungkup pemaik rayat,” ku iya.

Projek Jalai Miri–Baram dikearap nyadi pemangkin ngagai transformasyen komprehensif kandang menua Baram, lalu ari nya ulih ngangkatka tikas pengidup komuniti menua pesisir nengah akses ke manah agi ngagai perengka guna pemun, pelajar, servis pengerai enggau peluang ekonomi. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Sarawakku

BETONG, 25 April Sepenyampau 30 tim nyereta Regata Betong 2026 ngaul penyereta kategori ‘saringan’ enggau final nyengkaum tim KMKK, ejensi enggau tim indu, lalu enggau nya mandangka timbal ti meransang ari mayuh bengkah renggat mensia mayuh.

Ku Sapit Menteri Nembiak, Lumba enggau Pemansang Pedagang, Datuk Gerald Rentap Jabu, penyereta tu ukai semina muka ruang ngagai komuniti lokal bepekit enggau bepengerai, tang mega nyadi pelasar ngansah penau dalam main asal ai ke majak bulih perati di Sarawak.

“Pengawa ngatur Regatta Betong 2026 ti pulai baru pengudah 16 taun nyadi pengerami besejarah di Sungai Layar.

“Pengerami tu mega negika pesaka asal lumba ai pemadu tuai di nengeri tu ti berengkah ari taun 1873, diberi kelala Rajah Brooke nyadi pelasar dikena ngerapitka kaul komuniti maya nya,” ku iya ke mega Kaban Kunsil Nengeri (ADUN) Layar.

Iya mansutka jaku tu lebuh bejadika Pengerami Regatta Betong Edisyen 2026 di Panggau Besai Regatta, Waterfront Betong kemari.

Rentap madahka, ari pengerami tu mega, pengidup komuniti lokal sekali agi richah enggau bemacham aktiviti ke diatur sepemanjai timpuh program, lalu enggau nya nyadika Regatta Betong sebengkah pengawa ke beprestij, ke ukai semina ngemeratka pekit aja, tang mega ngemeratka penyerakup enggau pemansang pelilih menua.

Berebak enggau nya, pengawa ngatur program tu mega meri mayuh penguntung ngagai orang dagang menua tu lebuh bemacham bansal bejual enggau palan dagang disediaka ngambika sida ulih ngelakuka produk sida empu.

“Pengawa tu terus muka peluang ekonomi ngagai orang dagang mit enggau tengan pemesai, kelimpah ari nyungkak agi aktiviti dagang di kandang menua Betong sepemanjai timpuh organisasyen,” ku iya.

Pengawa tu mega disukung nengah mayuh macham inisiatif baka pengawa bejual MADANI, pengawa pemandang ejensi perintah enggau peribit sereta aktiviti sukung bukai ti mantu ngerembaika jaringan ekonomi setempat.

Berebak enggau nya, Rentap bela ngemeratka sukut pemeresi lalu minta raban pengatur enggau ketuai kandang menua nesau bala komuniti bekerejasama nyaga pemeresi Sungai Layar enggau kandang Tebing Sungai Betong.

Singkang tu beguna dikena nyeliahka pengamah enggau pengelekai penyakit, kelimpah ari nentuka kandang endur nya seruran beresi, likun sereta kondusif ungkup temuai enggau peranak menua nya.

Nengah gempung elemen penyedar lumba enggau main, ekonomi enggau sivik, Regatta Betong 2026 dipeda terus nyadi pelasar beguna dalam ngangkatka pemansang komuniti enggau identiti pesaka sungai di Sarawak.

Sama bisi datai iya nya Kaban Parlimen Betong Dato Dr Richard Rapu, ADUN Engkelili Dr Johnical Rayong Ngipa, Residen Bagi Menua Betong Datu Richard Michael Abunawas, Pemesai Pelilih Menua Betong ke mega Chairman Komiti Pengatur Laga Kueh sereta pengari Sekretari Tetap Opis Menteri Dagang Temuai, Industri Kreatif enggau Seni Pemerindang Nazari Bujang. – RBI

Gambar kredit BetongXcess

#ruaiberitaiban#newsiban#beritaiban

Rindu | Titih | Kunsika

MIRI, 25 April – Projek Palan Penyangkai Kapal Miri ke diatu udah manggai urung 70 peratus tembu disadang nyadi siti ari pemansut besai transformasyen ekonomi Sarawak, lalu enggau nya ngenegapka penuduk Miri nyadi hab baru dagang, logistik enggau dagang temuai di utara nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengawa ngemansangka palan penyangkai kapal ke udah diperambu kenyau ari empat taun ke udah chakah dipejalaika ngena chara bepelasarka penemu sains enggau perambu strategik.

“Diatu, palan penyangkai kapal tu udah tembu urung 70 peratus. Kami ngena penemu sains ngemansangka palan penyangkai kapal tu,” ku iya.

Nitih ku iya, enti udah tembu penuh ila, Palan Penyangkai Kapal Miri ukai semina deka ngenegapka rentayan logistik enggau pejalai dagang nengeri tu, tang mega bisi potensial matak penatai kapal pesiar antarabansa, lalu enggau nya nyungkak sektor dagang temuai menua tu.

“Enggau penembu palan penyangkai kapal tu, kitai mega deka ulih ngelakuka Miri ari sukut dagang temuai.

“Kapal pesiar baka sida ari Singapura ulih nengah jalai tu lalu tu deka ngangkatka Miri nyadi palan dagang temuai,” ku iya nerang.

Palan Penyangkai Kapal Miri dipeda nyadi sebengkah ari batang projek strategik Sarawak ti dipelaba deka meri empas ke besai ngagai penumbuh ekonomi pelilih menua utara nengeri tu dalam timpuh ke panjai.

Ba pengerembai bukai, iya mega nyangkal dawa ti viral ba media rama ti madahka Sarawak minta ngambi 1,000 iku peranak Bangladesh gawa enggau PETROS, seraya bebendar madahka pekara nya enda kala dikerandau tauka dipinta sebarang piak ti bekaul.

Ku iya nerang, aum sebedau tu enggau Pesuruhjaya Bangladesh semina betuju ngenegapka kaul dua piak, lalu nadai ngaul pengawa ngambi pengereja pengawa baka ke benung dikerembaika.

Berebak enggau nya, lebuh meri komen bekaul enggau pemansang nengeri tu dalam timpuh ke panjai, iya nyemetak madahka pemesai guna ngatur pengeraja asal enggau bejimat sereta bepelasarka rega tambah dikena nentuka pengelantang terus dipejalai.

Kenu ku iya, pengaya pengeraja asal aja enda nyamin penyulut sesebuah menua enti enda diatur enggau manah.

“Pengeraja asal ti kaya enda nyamin pengidup sesebengkah menua jemah ila, kitai patut ngatur pengeraja asal enggau manah sereta nambahka nilai. Kitai ngemansangka ekonomi enggau rayat kitai empu,” ku iya. – RBI

#ruaiberitaiban#newsiban#beritaiban

Rindu | Titih | Kunsika

KUCHING, 24 April – Bantah sekeda piak ngagai pengawa ngatur Pengerami Hari Pengereja Pengawa Antarabansa enggau Festival Muzik Ai Rain Rave ti diperambu deka diatur berengkah 30 April ngagai 2 Mei 2026 nya kelalu, enda betul sereta betukuh.

Nitihka Menteri Dagang Temuai, Seni enggau Budaya Dato Sri Tiong King Sing, jaku tuduh ke baka nya enda patut nyadika pelasar ngasuh mensia mayuh saru runding tauka ngasuh penyarut rama ke enda patut nyadi.

“Ke bendar iya, pengawa tu sebengkah projek dagang temuai mengeri ti diperambu enggau silik ti dipejalaika ari baruh pengawa matau ti terit, ukai baka ti diperagamka “enda dijaga” tauka “enda teratur”.

“Sebarang penemu ari individu tauka parti politik enda patut dikemesai nyentukka nyadi penyarut rama, nama agi enti diputarka nyadi isu bansa enggau pengarap,” ku Tiong.

Kaban Parlimen Bintulu ke mega Kaban Kunsil Nengeri (ADUN) Dudong nya mansutka penemu ba Facebook rasmi iya.

Tampung Tiong, Malaysia ke nyadi sebuah menua bebilang bansa minta randau mensia mayuh ti rasional sereta bebasa, ukai dipejalai ketegal runding ti ngemesaika bida nyentukka tau ngasuh penyarut nyadi.

“Enti setiap pekara dipolitikka lalu dikaitka enggau sensitiviti bansa enggau pengarap, baka ni menua tu ulih fokus ngagai penumbuh enggau penyulut ekonomi?

“Patut dikemeratka, batang tuju pengawa tu iya nya dikena ngelakuka penyelai budaya Malaysia ti mayuh macham, nyengkaum mayuh macham pemakai, seni asal enggau asil pengelandik jari. Tuju tu terang sereta enda patut dikelikuhka sebarang piak,” ku iya nyemetak.

Iya mega madahka raban pengatur mega nadai kala meransang sebarang ulah ti ngelaban nilai mensia mayuh.

Semua aktiviti dipejalaika nitihka undang-undang enggau bepelasarka pengawa rama. Tuduh ti nadai pelasar semina deka nempa runding ti negatif lalu narit sebengkah pekara ti jelan iya ngagai polemik politik ti enda beguna.

Iya mega madahka enda patut ngemesaika isu baka seraka sosial nyentukka ngelimpangka fokus ari tuju ke bendar.

“Dalam pengidup besehari-sehari, palan mensia mayuh baka perengka pengangkut, supermakit enggau palan bebelika barang endang amat ngaul kerejasama ti rat entara individu.

“Enti jaku tu dikena, patut semua ruang mensia mayuh ditanya? Pekara ke amat iya nya pemisi palan mensia mayuh endang ungkup guna rayat asal bisi atur enggau atur ke patut.

“Kelimpah ari nya, pengawa ngambi bagi ba program tu endang volunteer. Sida ke enda setuju nya bibas enda enggau, tang enda patut nyangkal pilih orang bukai tauka ngeletakka peneka diri empu,” ku iya enggau terang.

Bekaul enggau pengawa ke didawa ngachau operasyen mengeri, semua perambu dipesetuju nengah aum enggau mayuh bengkah opis ke bekaul.

Pengawa nutup jalai alun nya semina ngaul timpuh ke ditetapka maya tengah malam, ukai nyentuk 11 hari baka ke dipadah. Notis tumu mega udah dikeluarka ngambika mensia mayuh ulih nyendiaka diri.

Palan endur ngatur pengawa tu iya nya kandang endur komersial enggau dagang temuai ti endang palan ke rami sereta mayuh orang.

“Nya alai, tuduh bekaul enggau pengawa ngachau bekaul penginggar nadai pengamat. Ngatur pengawa besai ba kandang endur ke baka nya endang patut sereta beguna dalam nyeimbai pemansang enggau atur mengeri.

“Dalam gaya ekonomi dunya ti enda tentu, pengawa meransang ekonomi domestik patut ditegapka agi.

“Pengawa ke baka tu ulih nambahka penatai enggau belanja temuai, lalu enggau nya meri penguntung ngagai dagang mit enggau jelan pemesai sereta raban B40 nengah peluang penatai pemisi.

“Enda patut minta penumbuh ekonomi, tang ba awak ke sama nulak pengawa ti nyukung nya,” ku iya.

Berindik ari pekara tu, sebarang peragam enggau runding sempit enda patut nyangkal chara guna ruang mensia mayuh tauka ngeruga pengelantang mensia mayuh.

“Pemansang menua patut bepelasarka rasionaliti, relevan enggau bebasaka pangan diri, ukai nengah chara nempa isu tauka ngemesaika bida,” tandu iya.

Tiong mega ngarapka semua piak ulih begempung, ngemeranka ulah bebatak asur sereta meri sukung ke patut dikena nentuka penumbuh ekonomi menua terus tegap sereta meruan. -RBI

#ruaiberitaiban#newsiban#beritaiban

Rindu | Titih | Kunsika

MIRI, 24 April — Pengawa ti jampat sereta efisyen raban Opis Bomba enggau Penyah Penusah Malaysia (JBPM) ari Balai Bomba enggau Penyah Penusah (BBP) Lutong mujur ngerara penusah angus ti mungkur sebuah setor ti enda dikena dalam penusah ke nyadi tengah hari tu tadi.

Palan Operasyen nerima kangau ngenyit pukul 5.09 lemai sebedau loceng ngenyit memunyi pukul 5.09.30 lemai.

Sebuah Tender Penyelamat Bomba (FRT) Scania ti bisi raban dipindah ngagai palan penusah nyadi ba Lot 8892, Lorong 5, Jalai Dato Permaisuri 2C, urung 12 kilometer ari stesyen nya.

Komander Operasyen, PBK I (TBBK II) Iskandar enggau raban iya datai ba endur nya urung pukul 5.21 lemai lalu ngentaska penusah angus nya ngaul sebuah setor ke enda dikena enggau pemesai urung 6 x 6 kaki.

Operasyen madamka api tekala nya dipejalaika ngena arus 100 kaki enggau muncung ai ti disalur ari tangki jentera. Penusah angus nya udah mujur dirara urung pukul 5.37 lemai.

Operasyen nya tembu urung pukul 5.52 lemai pengudah pengawa meresa enggau silik dipejalaika dikena nentuka nadai agi pun penatai api.

Tim nya udah nya mupuk ke stesyen nya urung pukul 5.53 lemai lalu datai enggau selamat urung pukul 6.30 lemai.

Nadai penusah bebadi nyawa diripotka nyadi ba penusah nya. Sama bisi datai ba endur nya Pemesai Bomba Kanan II, Henry Jugah.

Bantu mega bisi disediaka Polis DiRaja Malaysia (PDRM) ti ngaul tiga iku kaban dikena nentuka gaya nya ulih dijaga.

Pemujur operasyen tu mandangka tikas penyikap enggau profesionalisme tim JBPM ti tinggi dalam nentuka pengelikun mensia mayuh seruran dijaga. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — BBP Lutong