MIRI, 7 Mei — Kolej Vokasional Miri majak ngenegapka pangku pengawa nyadi institusyen pelajar teknikal enggau vokasional meri empas tinggi lebuh dipilih nyadi palan penemuai kereja rasmi Menteri Pelajar, Fadhlina Sidek kena Hari Empat.
Nitihka penerang nengah ‘Facebook’ Opis Pelajar Nengeri Sarawak, penemuai nya ngembuan tuju deka mansik baru pengawa bejalaika latih enggau pelajar teknikal enggau vokasional (TVET) nuju ngenegapka pemansang modal mensia menua.
Maya penemuai nya, YB Menteri Pelajar mansik baru pengawa bejalaika ‘Projek Link’ enggau Shell Berhad ti nyadi chunto kerejasama strategik entara institusyen pelajar .
enggau industri.
Kerejasama nya dipeda ulih ngenegapka ekosistem TVET menua nengah latih ke nyata bekaul industri, ngangkatka pengelandik teknologi kemaya hari, sereta ngadaka graduet ke lebih kompetitif sereta nangkup guna makit kereja.
Penerang nya mega nerangka pengawa nya setipak enggau aspirasyen pemansang menua nengah Pelin Rangka Pelajar Malaysia 2026–2035 ti ngemeratka pemansang bakat jemah ila, nguasa pengelandik digital, ngenegapka TVET, sereta rentayan kerejasama strategik enggau industri dikena napi guna ekonomi enggau Revolusyen Industri 4.0
Kelimpah ari nya, YB Fadhlina mega bisi ngatur sesi nemuai begulai enggau bala nembiak Kolej Vokasional Miri ninga penemu, aspirasyen enggau peneleba sida sekumbang nampung pelajar vokasional.
Sesi nya nyadi pelasar interaksyen ke rat agi entara ketuai pelajar tinggi menua enggau nembiak dalam pengawa ngenegapka agenda pelajar inklusif enggau fokus ngagai nembiak.
Ba pemansang ke sama, iya mega madahka agih belanja sepenyampau RM150,000 ungkup guna ngintu kolej dikena nentuka kondusif agi, likun, sereta setipak enggau guna pelajar TVET ke diatu.
Penemuai kereja rasmi nya mandangka komitmen ti seruran dipejalai Opis Menteri Pelajar Malaysia begulai enggau Opis Pelajar Nengeri Sarawak ba pengawa ngenegapka pelajar teknikal enggau vokasional nyadi pemansut besai pemansang modal mensia ti bekualiti setipak enggau aspirasyen Malaysia MADANI.
Sama bisi nyempulang penemuai nya, Sapit Direktor Besai Pelajar Malaysia (Sektor Operasyen Sekula), Encik Zainal bin Abas, Direktor Bagi Pelajar enggau Latih Teknikal Vokasional, Ts. Zulkernai bin Fauzi, Direktor Pelajar Sarawak, Mr. Omar bin Mahli, sereta mega sekeda pemesai kanan ari Opis Menteri Pelajar Malaysia, Opis Pelajar Nengeri Sarawak enggau Opis Pelajar Pelilih Menua Miri. — RBI
