KUCHING, 7 Mei — Sarawak majak matak pemeranak puku antarabansa lebuh Premier Sarawak, Datuk Patinggi Tan Sri (Dr.) Abang Haji Abdul Rahman Zohari Tun Datuk Abang Openg sehari tu nerima penemuai basa ari Duta Besai Jerman ke Malaysia, H.E. Silke Riecken-Daerr, ba opis iya ba Kompleks Satria Pertiwi, ditu.
Penemuai nya ngembuan tuju deka ngenegapka kaul dua piak entara menua Jerman enggau Sarawak sereta mansik potensial kerejasama dalam mayuh bengkah bidang strategik nyengkaum kuasa tau dikena baru, pemintar tiru (AI), semikonduktor enggau pemansang infrastruktur.
Deligit Jerman ke mungkur urung 20 iku pengari kompeni mega bisi bejalaika penemuai kereja ngagai Sarawak dikena meretika enggau silik agi ekosistem ekonomi nengeri tu sereta ngelala peluang beranakka puku enggau kerejasama enggau kompeni menua tu.
Sebagi ari penemuai nya, deligit nya mega bisi ngabas kompeni ke bekaul enggau semikonduktor iya nya XFAB enggau SMD Semikonduktor, nyadi sebagi ari pengawa mansik potensial kerejasama dalam sektor teknologi enggau industri.
Jerman diatu ngembuan pengawa beranakka puku ti tegap di Semenanjung Malaysia, lalu penemuai tu dipeda nyadi peluang dikena ngerembaika agi kerejasama enggau kaul dagang di Sarawak.
Kerejasama tu dikearap ulih muka peluang ke besai agi ari sukut bekunsi teknologi, beranakka puku ke bekualiti tinggi sereta pemansang industri ke meruan di nengeri tu.
Sama bisi datai Menteri Pelajar, Inovasyen enggau Pemansang Bakat Sarawak II, Dato Sri Roland Sagah Wee Inn; Sekretari Pekara Wang Nengeri, Dato Sri Dr Wan Lizozman Wan Omar; enggau Direktor Eksekutif Balai Dagang enggau Industri Malaysia-Jerman (MGCC), Hannes Richard Otto Farlock. — RBI
