PAKAN, 7 Mei – Bekal ai beresi ba kandang menua Pakan bedau datai ba tikas ti ngemuaska ati, taja pan bekal kuasa karan ba kandang menua nya udah nyapai bungkur nyauka seratus peratus.
Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) Tan Sri William Mawan Ikom madah sistem bekal ai ke diatu agi bedau ulih nangkup guna ninting hari peranak menua nya ba selampur.
Kaban Kunsil Nengeri (ADUN) Pakan nya nerang, peranak menua nya sebedau tu bepanggai ba sistem ai graviti enggau ai paip ke udah diperubat, tang enda ulih bepanggai penuh ba chara nya.
“Suba kitai bepanggai ba sistem ai graviti enggau ai paip ke udah diperubat, tang kitai enda ulih bepanggai penuh laban pun penatai ai udah dikeruga pemansang,” ku iya.
Iya madah munyi nya ngagai media pengudah ngulu Pengerami Ngelancharka Program Projek Transformasyen Menua Pesisir (RTP) di Rumah Jonathan Mingan kena Hari Tiga tu tadi.
Tan Sri William Mawan nambah, aktiviti bekebun mega ngeruga kualiti enggau pengeraja asal ai, lalu ngujungka ai nya enda likun agi dikena.
Berebak enggau nya, iya bekunsi madahka opis menteri ke bekaul udah ngelangkar pelin pengawa timpuh pandak enggau timpuh panjai dikena mutarka isu bekal ai di menua pesisir.
Dalam jaku iya mega, Tan Sri Mawan madahka atur ngambi alih pengawa ngatur bekal ai ulih Perintah Sarawak ari Perintah Besai dikearap ulih ngenyampatka pengawa bejalaika projek bekal ai menua pesisir, kelebih agi ba kandang menua Pakan.
Chara ke lebih manah nya udah besedia deka nambahka pemanah pengawa bejalaika projek ke bekaul ungkup pemaik rayat.
Berindik enggau nya, iya mantaika pengarap ngambika pengawa bejalaika projek bekal ai ulih dikelengkas dikena nentuka peranak di Pakan bisi akses ngagai bekal ai beresi ti lebih entap sereta terus . – RBI
