MIRI, 26 April – Pemansang Baram deka nyadi pengepun ngagai ubah ekonomi, lalu ari nya ulih ngurangka bepanggai ba industri kayu ramu.

Premier Sarawak, Datuk Patinggi Tan Sri Abang Johari Tun Openg madah, pemansang ti jampat nyadi di Baram nyengkaum Kuala Baram deka ngubah rampa menua nya nengah chara injiniring enggau perambu timpuh panjai.

“Ekonomi dunya diatu ngalih ngagai sektor ti meruan agi baka dagang karbon, lalu kitai bejalaika chara tu enggau lalau ari Bank Dunya sereta nitihka protokol entarabansa,” ku iya.

Ari sukut betanam betupi, iya mega meda potensial ke besai ngagai Baram ba pengawa betanamka kupi bepelasarka pansik pemungkal pematut tanah ba kandang menua nya.

“Kitai deka mansik guna teknologi pemadu baru ungkup pemansang kebun kopi enggau produk betanam betupi ke bukai di Baram,” ku iya.

Iya madah munyi nya lebuh bejaku ba Program Sarawakku Sayang (SKS) Bagi Menua Miri 2026 ba Stadium Miri, kemari.

Ngenang silik agi, iya nerangka pemansang palan penyangkai kapal tasik dalam ke ulih nerima kapal besai nyengkaum kapal temuai mega deka meransang sektor dagang temuai ba sitak nya.

“Inisiatif tu setipak enggau Strategi Pemansang Pasca COVID-19 2030 (PCDS 2030) ti mungkur industri dagang temuai, servis enggau pengeraja asal baka kampung enggau ngelumbung.

“Industri ngelumbung nyengkaum gis enggau minyak terus nyadi fokus, lalu diatu kitai benung ngemansangka sitak Adong ti udah dikelala ngembuan pengeraja asal gis ti bisi potensial,” ku iya nerang.

Ku iya nambah, tu deka nentuka sitak Baram enda agi mengkang nyadi kandang menua dalam lebuh iya diperambu deka mansutka diri nyadi hub industri enggau komersial baru ti bisi potensial ngengkahka Miri setikas enggau mengeri moden baka Shanghai.

Nitih ku iya, penanggul suntuk tanah di Kuala Baram deka diputarka nengah chara ‘hydraulic flow’ ti nempa tanah baru sebedau dikemansang nyadi palan industri enggau komersial moden.

“Kitai meda pemansang ba kandang menua Baram, tang suntuk tanah di Kuala Baram.Nya alai nengah proses ‘hydraulic flow’, uras deka dibai ngagai kandang menua nya dikena nempa tanah baru.

“Lebuh sitak tu ditumbuhka ila, iya deka dikemansang nyadi sitak industri enggau komersil enggau nya ngubah rampa menua Kuala Baram.Iya deka nyadi palan ti narit ati, sebuah mengeri mit enggau begunan premium lalu enti mujur, Miri ulih nyadi baka Shanghai di China,” ku iya.

Ku iya nambah, Sarawak mega bisi ati deka ngenegapka kaul dalam industri gis nyengkaum aspek ngagih, ti dipejalaika nengeri tu empu.

Taja pan napi pemar ku iya, perintah nengeri deka terus ngelaban hak bepelasarka penetap undang-undang ke udah bisi enggau langkar PCDS 2030. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 25 April — Sepenyampau 216 iku penyereta mujur nembuka kelas main asal ti diatur Gerempung Main Asal Dayak Sarawak (PEMADAS) ba pengerami makai lemai meri terima kasih ti diatur ba Christian Ecumenical Worship Centre (CEW) Jalai Stampin, malam tadi.

Presiden PEMADAS, Ali Singka ke mega Ketuai Dayak Bukit Kelingkang (DBK) Pampang Melikin madah, pemujur nya siti singkang ke besai reti ba pengawa ngenegap sereta ngetanka pesaka asal komuniti Dayak nengah chara pelajar enggau latih ke bestruktur.

Nitihku iya, program tu ukai semina meri kelala ngagai rebak baru bekaul seni enggau main asal, tang mega bisi potensial ngadaka pengajar baru dikena nentuka penerus pesaka tu.

“Ari penyampau tu, kitai ngarapka mayuh agi pengajar baru deka pegari, ti landik nyadika penerus main asal ngambika enda punas nitihka jeman,” ku iya rambau jaku iya ba pengerami nya.

Pengerami nya bela digulu Sapit Menteri Dagang Temuai, Industri Kreatif enggau Seni Pemerindang Sarawak Datuk Snowdan Lawan, ke mega Kaban Kunsil Nengeri (ADUN) Balai Ringin sereta mega nyadi penyanding penemu PEMADAS.

Ali Singka mega meri besai terima kasih ngagai Datuk Snowdan Lawan ketegal sukung ti seruran diberi iya, nyengkaum pemeri agih belanja ti ngemuntangka bemacham program budaya dipejalaika enggau lebih sistematik sereta ngasi.

Ku iya, entara inisiatif ke udah dipejalaika nyengkaum numbuhka palan operasyen di Samarindah ti beguna nyadi palan pematih enggau aktiviti bekaul enggau muzik asal Dayak.

Berebak enggau nya, iya madahka sepemanjai taun 2025, PEMADAS, DBK Pampang Melikin udah bejalaika program ba sekeda palan besai iya nya Samarindah, Bayor, Balai Ringin, Kampung Kerangan enggau Sengkalan.

Iya mega ngenataika pengaga ati sereta meri puji ngagai Ketuai Komuniti, Tuai Rumah enggau semua piak ti udah meri sukung ti tegap ba pemujur bemacham program ti diatur PEMADAS.

Berebak enggau nya, iya madahka PEMADAS merambu deka ngerembaika agi pengawa ngatur program main asal nyengkaum ngatur karnival di Balai Ringin jemah ila, nyadika pengeran ngenegapka kaul komuniti dalam aktiviti seni enggau pesaka asal.

Pengawa tu mega nyadika pelasar ngerapitka kaul entara komuniti sereta ngenegapka agi penyerakup komuniti Dayak ba renggat baruh. -RBI

#ruaiberitaiban#newsiban#beritaibam

Rindu | Titih | Kunsika

KUCHING, 25 April — Pengeransing ngetan sereta ngenegapka main asal Dayak majak diteruska laban penyelai pesaka asal di Sarawak ke mungkur 34 bansa nyadi pelasar beguna dalam ngemayuhka identiti budaya nengeri tu.

Sapit Menteri Dagang Temuai, Industri Kreatif enggau Seni Persembahan Sarawak, Datuk Snowdan Lawan ke mega Kaban Kunsil Nengeri ( ADUN) Balai Ringin nyemetak madahka tetiap agih belanja ke disalur meseti dikena enggau optimum dalam nentuka empas ke manah ngagai komuniti, kelebih agi ba raban nembiak rebak baru.

Nitih ku iya, program ke diatur Gerempung Main Asal Dayak Sarawak (PEMADAS) ukai semina nyadi pelasar ngetanka budaya, tang mega nyadi pelasar ngagai bala nembiak ngambika terus ngulihka penemu sereta ngenegapka potensial sida.

“Budaya nyadi identiti kitai. Nyadi komuniti Dayak kelebih agi komuniti Iban, kitai patut temegah ati enggau pesaka asal ke dikembuan kitai sereta bebendar terus ngetan sereta ngangkatka iya ngagai tikas ke tinggi agi,” ku iya lebuh bejadi Pengerami Makai Lemai Kelas Ngajat PEMADAS demalam.

Berindik enggau nya, iya madahka agih belanja penyampau RM20,000 diungkupka ngagai gerempung nya dikena nyukung pengawa bejalaika mayuh macham program enggau aktiviti budaya.

Berebak enggau nya, iya mega madahka gerempung tau nganjung peminta agih belanja tambah ngagai opis menteri ke bekaul, nitihka kapasiti enggau guna kelas ke dipejalaika.

Berebak enggau nya, iya nesau semua piak ngambika enda masau peluang ke bisi, tang terus bekerejasama dalam nyukung pengawa ngenegapka komuniti sereta ngemansangka potensial diri.

“Anang muai peluang ke bisi.Kitai patut terus nyukung pengawa kitai empu ke pemaik dudi hari,” ku iya.

Sama bisi datai, Pemungkal Gerempung Dayak Bukit Kelingkang (DBK) Victor Ason, Ketuai PEMADAS Ali Singka, Ketuai Akademi Gerempung Dayak Iban Sarawak (ASADIA) Mabong Unggang sereta temuai dipebasa bukai. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

JULAU, 25 April – Mensia mayuh dipinta bejaga sereta pintar beratika penerang ti diulih ari media rama dikena nyeliahka diri ari teparuk enggau berita pelesu ti tau ngasuh saru penemu.

Sekretari Politik ngagai Premier Sarawak, Brian Fong nyemetak madahka penau mida entara penerang ke enda betul tauka salah beguna amat ba jeman digital kemaya hari tu.

Berindik enggau nya, mensia mayuh dipinta ngulihka penerang ari penatai ke tulin sereta ngaga bida bepelasarka fakta sebedau pechaya tauka ngerembaika sebarang berita.

“Pengawa naburka baru isu lama ti kebendar iya ti udah diputarka suah ngasuh rayat saru runding, lalu enggau nya nempa peragam negatif ngagai gaya ke diatu.

“Mayuh pekara lama ke udah diputarka enggau manah, dibai baru ba media rama, ngujungka komuniti nyau saru penemu,” ku iya.

Iya madah munyi nya lebuh bejaku ngarika Kaban Kunsil Nengeri (ADUN) Meluan, Dato Rolland Duat Jubin ba Pengerami Makai Serumpu beserimbai enggau penumbuh Gerempung Pemansang Komuniti Julau (JDCA) ke – 9 ke diatur dikena ngenegapka semaya, pengarap enggau penyerakup entara komuniti.

Berebak enggau nya, iya mega ngemeratka pangku pengawa JDCA nyadi pematak pemansang kandang menua ti nyaup lalu nyaga pengelantang rayat sereta ngangkatka kualiti pengidup komuniti.

Kelai nyukung pengawa ngemansangka genturung pendiau, iya mega madahka agih belanja penyampau RM5,000 ari ADUN Meluan ngagai JDCA dikena bejalaika bemacham program ti meri pemaik ngagai komuniti lokal.

Semua bantu belanja dikenataika ADUN Meluan enggau ADUN Kakus iya nya RM20,000 ungkup JDCA.

Sama bisi datai iya nya Politik Sekretari Premier Sarawak Susan Clement ke mega ngarika ADUN Kakus, Bryiann Lugum Chairman JDCA, Ijau Mudai Penyanding Penemu JDCA, Insp Eddy ngarika KPD Julau, raban gerempung baka Gerempung Raban Pakan enggau kebukai. -RBI

#ruaiberitaiban#newsiban#beritaiban

Rindu | Titih | Kunsika

JULAU, 25 April – Agih belanja sepenyampau RM15,000 diberi ngagai Gerempung Pemansang Komuniti Julau (JDCA) dikena meransang sida bejalaika aktiviti ungkup komuniti.

Sekretari Politik ngagai Premier Sarawak, Susan Clement madahka, agih belanja nya dikenataika Presiden Parti Rayat Sarawak (PRS) Dato Sri John Sikie kelai ngaku pengawa ke udah dipejalaika gerempung nya.

“Agih belanja nya beguna amat dikena mantu ungkus pengatur, kelebih agi ba pengawa ngepunka program komuniti ti begunaka mayuh belanja.

“Lalu aku ngarika Presiden PRS ngenataika bantu belanja tu,” ku Susan lebuh bejaku ngarika John Sikei ba Pengerami Makai Serumpu Ulang Taun Ke-9 JDCA ba Dewan Komuniti Julau.

Nitihku iya, belanja nya bisi dikena nyukung aktiviti enggau bemacham program komuniti ti deka datai, ngambika gerempung terus aktif sereta regas.

Program nya nyadi bukti ke terang mandangka komitmen enggau komitmen perintah ngagai bala ketuai kandang menua dalam ngemeratka pemansang komuniti nengah bantu belanja ke engkeman sereta ngasi.

Berebak enggau nya, iya mantaika jaku tesau ngambika semua piak terus nyukung semua kaban dalam komponen parti Gempung Parti Sarawak (GPS) dikena ngenegapka penyerakup sereta neruska pemansang di Julau.

Sama bisi datai iya nya Politik Sekretari Premier Sarawak Brian Fong ke mega ngarika ADUN Meluan, Bryiann Lugum Chairman JDCA, Ijau Mudai Penyanding Penemu JDCA, Insp Eddy ngarika KPD Julau, raban gerempung baka Gerempung Raban Pakan enggau kebukai. -RBI

#ruaiberitaiban#newsiban#beritaiban

Rindu | Titih | Kunsika

BETONG, 25 April — Aum Besai Ninting Taun SABERKAS Pampang Bukit Saban ungkup sesi 2026–2029 udah mujur diatur ba Palan Servis P204 Parlimen Betong enggau teratur sereta komited bala raban.

SABERKAS Pampang Bukit Saban terus ngenegapka pangku pengawa nyadi pelasar pemansang nembiak nengah perambu strategik ti lebih progresif sereta kompetitif, setipak enggau aspirasyen ngenegapka rebak baru ba renggat baruh.

Aum nya berengkah enggau jaku pengelalu ari Chairman sebedau ditangkan enggau pengawa ngentaska minit aum sebedau tu.

Agenda diteruska enggau pengawa mantaika ripot Sekretari enggau Tukang Wang ti deka dientaska bala raban aum.

Udah nya, aum nya meda pengawa ngererak Kaban Komiti ungkup sesi 2023–2026 sereta mega proses milih sereta nyiri Kaban Komiti baru ungkup sesi 2026–2029.

Sama bisi dipejalaika iya nya pengawa milih pengari ngagai Aum Besai renggat nengeri, sebedau aum tembu enggau sesi bejuraika pekara bukai sereta ditangguh enggau rasmi.

Kaban Parlimen Betong, Dato Dr Richard Rapu nyemetak madahka pemesai guna neruska pengawa nyadi ketuai raban nembiak ti kompeten dalam nentuka agenda pemansang komuniti terus ditegapka.

“SABERKAS bejalaika tanggungpengawa ti beguna dalam ngadaka rebak nembiak ti bisi disiplin, progresif sereta sedia ngiring jemah ila.

“Tetiap perambu ti diputuska enda tau enda disalin ngagai pengawa ti meri penguntung terus ngagai komuniti lokal.” ku iya.

Aum nya dikearapka ulih ngenegapka agi pengawa gerempung sereta nentuka genap pelin ti ditumbuhka ulih dipejalaika enggau manah ungkup pengelantang komuniti di kandang menua Bukit Saban enggau ngelingi nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 24 April — Pengerami Bejadika Regatta Betong 2026 udah dipenyadika Sapit Menteri Pemansang Nembiak Lumba enggau Main Sarawak YB Datuk Gerald Rentap Jabu ke mega Kaban Kunsil Nengeri (ADUN) Layar, ngarika Menteri Nembiak, Lumba enggau Main sereta Pemansang Orang Dagang, Dato Sri Abdul Karim Rahman Hamzah.

Program ninting taun tu terus nyadi siti ari ‘focal event’ di Bagi Menua Betong ti ukai semina ngelakuka lumba enggau main asal baka lumba perau, tang mega ngenegapka penyerakup komuniti nengah bemacham aktiviti budaya, lumba enggau main rayat sereta pengawa dagang.

Bemacham pengawa ti narit ati udah sereta benung nyadi sepemanjai pengawa ngatur Regatta Betong 2026, nyengkaum Pekit Lumba Perau, Pentas Rakyat, Battle of The Band, Regatta Betong Idol, Puteri Cilik Warisan, Aerobicthon Challenge, Nyumai, kraft jari, ngaga bungai, nginti, sukan rayat enggau mini ekspo dagang sereta gerai bejual.

Pengawa tu udah berengkah kenyau ari 15 April lalu deka tembu kena 26 April 2026, lalu enggau nya nyendiaka ruang ngagai komuniti lokal enggau temuai luar begempuru ngerichahka agi pengerami ba Tebing Ai Betong.

Mensia mayuh dilalau datai begulai enggau diri sebilik ngasaika bemacham aktiviti ti disediaka dalam gaya ti lantang, beperindang enggau rekreasyen, kelimpah ari ngerapitka kaul bakih enggau semengat penyerakup komuniti.

Berebak enggau nya, Kaban Parlimen Betong, Dato Dr Richard Rapu ngenataika pengaga ati iya ngagai semua piak ti udah ngemujurka pengawa ngatur program tu.

“Terima kasih enggau terima kasih ke pemadu tinggi ngagai semua piak ke bisi kaul terus tauka enda terus ngemujurka Regatta Betong 2026.

Tabi puji ngagai semua pemenang. Ngagai sida ke bedau mujur, teruska pengawa lalu anang putus pengarap, pemujur tentu deka nitih,” ku iya.

Regatta Betong terus nyadi pelasar ke beguna dalam nerenakka semengat lumba enggau main, ngetanka pesaka budaya sereta nyungkak ekonomi menua tu nengah pengawa ngaul komuniti enggau komprehensif — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Dr Richard Rapu

JULAU, 25 April – Isu suntuk nembiak ba sekula menua pesisir majak ngirauka ati laban penyampau nembiak ba sekula menua pesisir majak ngayanka penurun ke nyata, lalu enggau nya meri empas terus ngagai pelajar enggau pemansang palan nya.

Kaban Parlimen Julau ke mega Chairman Kaunsil Industri Kayu Ramu Malaysia (MTIB), Datuk Larry Sng Wei Shien madah, beambika chunto Sekula Primari Nanga Maong ke diatu semina bisi 19 iku nembiak enti dibanding enggau 24 iku taun siti nyin kemari, mandangka trend penurun ke majak nyadi.

Nitihku iya, gaya tu bepun ari pemindah peranak menua pesisir ngagai kandang mengeri gawa ngujungka apai indai milih nganjung anak sida besekula di mengeri.

“Gaya tu ukai semina nyadi ba SK Nanga Maong aja, tang nyauka ngaul tebal agi sekula menua pesisir ke bukai,” ku iya lebuh bejaku ba Pengerami Merarau ke diatur PIBG sekula nya.

Ku iya nambah, ubah ba struktur ruang bilik kemaya hari ti suah agi kurang anak ari ke udah mega nyadika kebuah penyampau pemayuh tubuh nembiak nurun besekula.

“Enti sebuah ruang bilik suba bisi anak nyentuk lapan iku, diatu tebal agi semina bisi siku dua aja,” ku iya nerang.

Iya nyemetak madahka pengurang nembiak deka meri mayuh macham pemar nyengkaum pemar ngulihka agih belanja enggau bantu, lalu enggau nya ngeruga pengawa ngangkatka perengka guna enggau kualiti pelajar di sekula menua pesisir.

Berindik enggau nya, iya ngelalau sekula enggau komuniti ngiga chara baru dikena ngulihka belanja, nyengkaum ngatur program di kandang mengeri dikena matak mayuh agi sukung ari gerempung ukai dikuasa perintah (NGO), ejensi perintah, sektor peribit enggau orang ngatika diri.

Ba atur pengawa nya mega, Larry udah nyuaka pemeri RM18,000 ngagai SK Nanga Maong.

Sebedau tu iya udah nyalurka RM40,000 ba taun 2022 enggau RM25,000 ba taun 2024 kelai terus nyukung pemansang pelajar.

Entara pekara ke diguna sekula nya diatu iya nya meli televisyen pintar sereta ngemanahka sistem paip ai dikena ngemanahka perengka guna ba sekula.

Iya ngarapka semua staf sekula terus bebendar ngenegapka kualiti pelajar enggau pengelantang pendiau nembiak taja betapi enggau pemar suntuk nembiak, ngambika ulih ngadaka modal mensia ti kompetitif jemah ila. -RBI

#ruaiberitaiban#newsiban#beritaiban

Rindu | Titih | Kunsika

SPAOH, 25 April — Aum Besai Ninting Taun Gerempung Apai Indai enggau Pengajar (PIBG) SMK Spaoh Ke-45 ungkup Taun 2026 udah diatur enggau mujur ba Dewan Sinaran, SMK Spaoh pagi tadi.

Program ninting taun tu nyadi pelasar ke beguna dalam ngerapitka kaul strategik enggau kerejasama entara sekula enggau apai indai.

Iya mega nyadika medium randau dikena ngangkatka pengawa ti terus nuju penyulut akademik, ulah enggau pemansang keseluruhan potensial nembiak.

Ba pengawa ke sama, PIBG bisi nyuaka insentif penghargaan ngagai nembiak ke bulih pemutus nyulut ba peresa Sijil Pelajaran Malaysia (SPM) enggau Sijil Tinggi Persekolahan Malaysia (STPM).

Inisiatif tu ngembuan tuju deka meri kelala enggau peransang ngagai nembiak ngambika terus ngetanka prestasi ke nyulut dalam akademik.

Dikena ngerichahka agi pengerami nya, chabut tikit benasit mega bisi diatur ti nerima sambut ti chukup meransang bala ke bisi datai, lalu enggau nya nambahka pengagit sereta ngerapitka kaul komuniti sekula.

Nitihka penerang Kaban Parlimen Betong, Dato Dr Richard Rapu, aum tu bejalaika tanggungpengawa ke beguna amat dalam ngenegapka sinergi entara sekula enggau apai indai dikena nentuka agenda pelajar ulih dipejalaika enggau ngasi agi.

“Aum tu dikearapka ulih terus nyadi pemangkin dikena bejalaika mayuh macham inisiatif pelajar ti lebih efektif, lalu ari nya ulih ngadaka rebak nembiak ke nyulut, kompetitif sereta ngembuan ulah ti manah.”

“Aum tu dikearapka ulih terus nyadi pemangkin dikena bejalaika mayuh macham inisiatif pelajar ti lebih efektif, lalu enggau nya ngasilka rebak nembiak ke nyulut, kompetitif sereta ngembuan ulah ti manah” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Dr Richard Rapu

MIRI, 25 April — Premier Sarawak, Datuk Patinggi Tan Sri (Dr) Abang Abdul Rahman Zohari sehari tu nyereta program ‘Brisk Walk’ penyauh 2.5 kilometer ke diatur ba Taman Bulatan Miri ke nyadi sebagi ari pengawa ngangkatka gaya pengidup bepengerai ba raban bansa.

Program ke berengkah tumu pukul 6.30 pagi nya ditangkanka enggau sesi senamrobik sebedau disambung enggau bejalai ngelantangka ati ngelingi kandang taman nya.

Sepemanjai program nya, iya mega ngena awak begulai enggau mensia mayuh ke bisi datai, lalu enggau nya ngayanka komitmen ketuai nengeri nyapai rayat seraya mega nerenakka chara idup bepengerai.

Sebedau beserak, iya mega begulai enggau bala ke bisi datai ngelantangka ati makai pagi ba kandang endur ‘Lake Duck’ Taman Bulatan Miri. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Sarawakku