PAKAN, 7 Mei – Sepenyampau RM500,000 udah diungkupka nengah Program Transformasyen Menua Pesisir (RTP) dikena bejalaika projek infrastruktur pemun di kandang menua Rumah Jonathan Mingan, Beruru, lalu enggau nya ulih ngenegapka pemansang menua pesisir di kandang menua Pakan.
Kaban Kunsil Nengeri (ADUN) Pakan, Tan Sri William Mawan Ikom madah, chara RTP ngemendarka projek ke amat diguna rayat dipejalaika enggau lengkas agi, ngena chara betukuh sereta meri empas ke tinggi.
Iya madah munyi nya ngagai media pengudah ngulu Pengerami Bejadika Projek RTP di Rumah Jonathan Mingan tu tadi.
Nitihku iya, entara projek ke udah tembu iya nya ngaga sebuah gerija enggau sebuah jematan ke beungkus RM200,000, pia mega projek ngaga jalai semin ke beungkus RM100,000.
Ku iya nambah, pengawa bejalaika projek infrastruktur baka jalai genturung pendiau, jematan enggau perengka guna komuniti beguna amat dalam ngangkatka pengelantang pendiau rayat sereta ngenegapka rentayan komunikasyen menua pesisir.
Ku iya, RTP mega nyendiaka ruang ngagai pengari rayat nentuka pemerat pemansang bepelasarka guna ke bendar rayat ba kandang menua diri empu.
Berebak enggau nya, iya nyemetak madahka pengawa ngemansangka infrastruktur berenggat ulih meri pemaik ungkup timpuh ke panjai ngagai komuniti menua pesisir kelimpah ari nentuka perengka guna pemun ulih diasai enggau lebih lantang sereta komprehensif.
Pengawa bejalaika RTP terus mandangka komitmen perintah Sarawak dalam ngenyampatka agenda pemansang menua pesisir nengah pengawa nyendiaka infrastruktur ti sistematik, inklusif sereta meri empas tinggi ngagai rayat.-EDISYEN UKAS
