SPAOH, 7 Mei — Opis Parit enggau Entali Ai (JPS) Bagi Menua Betong begulai enggau pengari Opis Pelilih Mit Spaoh enggau Palan Servis DUN N.37 Bukit Saban bejalaika penemuai mansik palan ungkup pengawa bejalaika Projek Transformasyen Menua Pesisir (RTP) 2026, ba Kampung Spaoh baru-baru tu tadi.
Penemuai nya mungkur dua projek ke udah dikemendarka ari baruh RTP 2026 iya nya kereja ngemanahka jalai enggau parit di Kampung Lot Penggan Spaoh enggau ngaga baru sistem parit di Kampung Hulu Spaoh.
Nitihka penerang nengah ‘Facebook’ DUN Bukit Saban, penemuai nya diatur dikena beratika gaya palan projek diatu kelimpah ari nerangka enggau silik skop kereja dikena nentuka pengawa bejalaika projek nya bejalai enggau lanchar sereta nangkup guna komuniti menua nya.
“Penemuai tu diatur dikena beratika gaya palan nya enggau silik skop kereja ngambika pengawa bejalaika projek ulih dipejalaika enggau lanchar sereta nangkup guna komuniti menua nya,” ku penerang nya.
Penerang nya nambah, pengawa bejalaika projek RTP tu dikearap ulih ngemanahka perengka guna pemun sereta ngenegapka sistem parit ba kandang rumah panjai ungkup pengelantang peranak menua nya.
Pengawa bejalaika projek RTP 2026 mandangka komitmen perintah ti terus ngenegapka pemansang infrastruktur menua pesisir enggau ngangkatka pengelantang pendiau rayat, kelebih agi ba kandang DUN Bukit Saban. — RBI
