KUCHING, 6 Jun — Pengawa bejalaika pelajar tinggi enda bebayar ungkup peranak Sarawak ukai sebagi ari manifesto pengawa bepilih perintah Sarawak, tang asil ari penegap ekonomi enggau penuduk fiskal Sarawak ti majak tegap.
Premier Sarawak Datuk Patinggi Tan Sri (Dr) Abang Haji Abdul Rahman Zohari bin Tun Datuk Abang Haji Openg madah, pemutus meri kelala polisi nya digaga pengudah perintah Sarawak mujur ngenegapka pelasar ekonomi enggau nambahka penatai pemisi nengeri ngambika penguntung nya ulih dipulaika terus ngagai rayat.
Nitih ku iya, pemansang modal mensia nyadi puku ti pemadu beguna dikena nentuka Sarawak ngembuan pengereja pengawa ti bepengelandik tinggi dikena nangkup guna ekonomi jemah ila.
“Aku nadai semaya. Dalam manifesto pengawa bepilih kami sebedau tu nadai nyebut pasal pelajar tinggi enda bebayar.
“Tang lebuh kitai ulih ngenegapka ekonomi sereta gaya belanja kitai tegap, aku deka meri pulai baru ngagai rayat terus ngagai universiti enggau pelajar enda bebayar ungkup peranak Sarawak,” ku iya.
Iya madah munyi nya lebuh bejadika Sarawak Career and Training Fair (SCaT Fair) 2026 di Hikmah Exchange Event Centre (HEEC) ditu sehari tu tadi.
Ku Abang Johari, polisi nya diberi kelala dikena nentuka semua rayat Sarawak bisi peluang ke sama nampung pelajar tinggi enda ngira penatai ruang bilik tauka status ekonomi.
Ku iya, pemerat perintah iya nya ngemansangka penau menua tu ti ulih meransang transformasyen ekonomi nengeri tu dalam bidang teknologi, kuasa tau dikena baru, pemintar tiru (AI), aeroangkasa enggau industri berega tinggi.
“Enda ngira nama asal penatai sida, Dayak, Cina, Melayu, Melanau, Bidayuh, Orang Ulu tauka Penan.
“Seagi sida ulih masuk universiti, kitai dekaka sida nampung pelajar laban kitai begunaka penau dikena ngemansangka Sarawak,” ku iya.
Berindik enggau nya, iya nyemetak madahka pelajar tinggi enda bebayar ukai semina inisiatif pengelantang pendiau aja, tang strategi timpuh panjai perintah dikena ngadaka modal mensia ke bekualiti sereta nambahka daya besemekih nengeri tu.
Kebendar ku iya, pengawa nya mandangka komitmen perintah nengeri nentuka pengaya ti diulih nengah pemansang ekonomi ulih dikunsi enggau rayat.
“Lebuh ekonomi kitai mansang lalu penuduk wang nengeri majak tegap, dia penguntung nya meseti diasaika rayat.”
“Nya kebuah kitai beranakka puku ba pekara pelajar laban penau enggau pemandai nyadi aset ke pemadu beguna ungkup pengidup Sarawak jemah ila,” ku iya.
Polisi pelajar tinggi enda bebayar ti berengkah taun tu nyadika Sarawak nengeri keterubah di Malaysia nyendiaka agih belanja ti komprehensif ungkup pelajar tinggi ba palan pelajar tinggi enggi nengeri dikena ngadaka rebak ti bepengelandik tinggi dikena nangkup guna ekonomi jemah ila. — RBI
#Beritalban | Ruai Berita Iban
Rinduka | Titihka | Kunsika
Sumber, photo — SarawakKu
