BAU, 6 Jun — Siku nembiak timpang pendiau (OKU) ari Kampung Jagoi Duyoh ditu udah diripotka lenyau kenyau ari Hari Satu tu tadi, lalu mensia mayuh dipinta datai ke mua mantu nyadung sebarang penerang dikena nyidi penunga iya.

Nembiak nya benama Kasli Anak Senon, 17, ke bisi penimpang runding, kepenudi iya dipeda pansut ari rumah sida sebilik di Kampung Jagoi Duyoh kena 1 Jun urung pukul 2 lemai mai beg sandik.

Nitihka penerang ke Indu Opis Polis Pelilih (IPD) Bau, Kasli enda ulih ditelefon pengudah pansut ari rumah lalu bedau pulai nyentuk ke sehari tu, lalu enggau nya meri pengirau ati ngagai sida sebilik.

Berindik ari pengelenyau nya, polis udah mansutka notis orang lenyau lalu minta kerejasama mensia mayuh mantu nyidi nembiak nya.

Laban Kasli tu siku individu OKU, barang sapa ke betemu enggau iya tauka bisi penerang pasal endur enggau pemindah iya dipinta lengkas madah ngagai piak bekuasa dikena nentuka pengelikun enggau pengelantang iya dijaga.

Sebarang penerang tau dikenataika ngagai Pemesai Pemansik, Insp. Vimal Nathan nengah lumur 016-5456454 tauka sebarang balai polis ke besemak.

Mensia mayuh mega diperansang bekunsika pemadah tu dikena ngerembaika pengawa ngiga sereta mantu ngiga Kasli enggau sida sebilik enggau naka pengelengkas. – RBI

#ruaiberitaiban#newsiban#beritaiban

Rindu | Titih | Kunsika

BETONG, 5 Jun — Pengawa ngaga Jalai Besai Kedua Sarawak (STRR) Ulu Paku–Ulu Kota Link Road ke benung dipejalai diatu disadang deka meri empas ke besai ngagai pemansang sosioekonomi enggau rentayan penyambung jalai peranak di kandang menua ulu, kelebih agi di Pakan enggau kandang ngelingi Betong, Julau.

Nengah penerang Facebook, Pauline Bret madahka projek nya entara perengkaguna infrastruktur ti lama udah dianti komuniti menua nya lalu deka ngubah landskap penyambung jalai di menua pesisir.

Iya bekunsika peneleba diri ti ngayanka ubah ke besai asil ari pemansang infrastruktur ba kandang menua nya.

Kenu ku iya, kelia, pejalai ngabas rumah panjai niang indai iya di Sungai Ipoh, Pakan begunaka pejalai kaki sepemanjai hari ketegal nadai jalai alun ti nyambung kandang menua nya.

“Suba, enti deka nemuai ngagai rumah panjai niang indai di Sungai Ipoh, Pakan patut bejalai kaki sepemanjai hari sebedau bisi jalai alun.

“Udah bisi jalai, agi mih bejalai bejam-jam sebedau nuan bisi perengka pengangkut kediri empu.

Diatu, urung 15 minit aja pejalai nengah jalai kampung,” ku iya.

Ku iya, lebuh projek jalai alun baru nya tembu ila, timpuh pejalai ngelawa kandang endur nya dipelabaka dipandakka ngagai semina urung lima minit aja.

Nitih ku Pauline, projek nya ukai semina meri pemaik ngagai peranak menua tu aja, tang mega deka nyadi jalai alternatif ti beguna nyambung selatan Sarawak enggau kandang menua tengah enggau utara nengeri tu.

“Enti jalai tu udah tembu, pejalai ari selatan Sarawak ke Betong pia mega ke Pakan, Julau, Sarikei, Sibu ke utara Sarawak ulih ngena jalai pandak nengah Simpang Ulu Paku,” ku iya.

Iya nerangka projek nya nyadi berekat pemansang ti dianti komuniti menua pesisir pengelama bepuluh taun lalu dipechaya ulih ngangkatka pengelantang rayat sereta ngenyampatka penumbuh ekonomi kandang menua.

“Sarawak Second Trunk Road (STRR) entara projek infrastruktur strategik ti dipejalaika perintah Sarawak dikena ngenegapka rentayan jalai alun nengeri tu, ngemanahka penyambung entara menua pesisir enggau mengeri, sereta ngerapitka seraka pemansang di serata Sarawak” ku iya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Piala Dunya FIFA 2026 bisi potensial nyadi renggat kepenudi ungkup sekeda pemain bintang ke udah ngemegahka palan main bol dunya dalam timpuh dua dekad ke udah.

Batang fokus tentu deka diberi ngagai legenda Argentina Lionel Messi enggau ikon Portugis Cristiano Ronaldo, ke disadang deka ngayanka diri ba pekit main bol ke pemadu berprestij di dunya ke dianggap bala peminat “The Last Dance”.

Kelimpah ari dua iku nama besai nya, sekeda pemain tebilang bukai mega dipelabaka deka ngujungka pejalai sida ba renggat Piala Dunya pengudah edisyen 2026.

Entara sida nya penyerang Brazil, Neymar dos Santos, ke napi pemar besai ketegal bisi bakal ba patung kiba kenyau ari taun 2023.

Taja pan sebedau tu bisi pengangkun ati pasal peluang iya pulai ngagai renggat entarabansa, tang iya mujur bulih pengarap ari Ketuai Jurulatih Brazil, Carlo Ancelotti ngambika pulai ngenegapka skuad Selecao.

Kaban tim iya Casemiro mega disadang deka nyadi Piala Dunya 2026 ke penudi iya enggau pekit nya.

Sama bisi dalam rintai nama nya pemain tengah Colombia James Rodriguez, ke menang Anugerah Puskas FIFA 2014 ketegal gol sensasi iya ba Piala Dunya 2014.

Iya dipelaba deka ngujungka karier antarabansa iya pengudah pekit nya.

Sekeda pemain bukai ke bepeneleba ke nyangka deka ngayanka diri kepenudi bemain ba Piala Dunya nyengkaum Luka Modric (Croatia), Guillermo Ochoa (Mexico), Son Heung-min (Korea Selatan), Kevin De Bruyne (Belgium), Edin Dzeko (Bosnia enggau Herzegovina), Manuel Graman Xha Jordan (G (Switzerland) enggau.

Penatai rintai pemain legenda tu dikearapka ulih nambahka pengerichah ngagai Piala Dunya 2026, lalu enggau nya meri peluang kepenudi ngagai bala peminat meda sida beakksi ba panggau pemadu besai dalam main bol dunya sebedau rebak baru ngambi alih legasi nya. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

SPAOH, 5 Jun — Pengerami Rumah Tebuka Gawai Dayak 2026 Kaban Kunsil Nengeri (ADUN) N.37 Bukit Saban diatur Sapit Premier Sarawak, Datuk Amar Douglas Uggah Embas enggau bini iya, Datin Amar Dato Doreen Mayang, udah mujur ngempuruka beribu iku temuai ari mayuh bengkah kandang menua, lalu enggau nya ulih ngenegapka penyerakup enggau semengat begulai komuniti ba kandang menua nya.

Pengerami ke diatur ba Balai Mensia Mayuh Spaoh nya nyadi pelasar beguna amat dalam ngerapitka kaul entara ketuai enggau rayat, kelimpah ngayanka pengelantang komuniti pupu bansa ti seruran nyadi pelasar penegap enggau penyulut Sarawak.

Sepemanjai pengerami nya, bala temuai dinah mayuh macham pemakai asal enggau moden beserimbai enggau pengerami Gawai Dayak.

Pengerami nya mega dirichah enggau pengawa pemerindang, sesi begulai enggau bala ketuai sereta chabut tikit benasit ti nerima sambut ti chukup meransang ari bala temuai.

Nengah awak nya, Datuk Amar Douglas Uggah ngenataika pengaga ati enggau terima kasih ngagai selampur komuniti Bukit Saban ketegal sukung, kerejasama enggau komitmen ti enda ngetu dalam pengawa ngetanka pengelantang enggau semengat beserakup ti udah lama nyadi batang penegap kandang menua nya.

Ku iya, semengat “Segulai Sejalai” ke dipegai rayat Sarawak meseti terus ditegapka dikena nentuka kaul entara bansa seruran dijaga, ari nya nempa rampa ti kondusif ngagai pemansang enggau penyulut nengeri tu.

Kenu ku iya, pengerami Rumah Terbuka Gawai Dayak ukai semina pengerami pengerami aja, tang nyadi platform pemadu manah dikena ngenegapka pemereti ati, ngenegapka kaul rama sereta nerenakka ulah bebasaka pangan diri entara komuniti pupu bansa enggau jalai pengarap.

“Pengelantang enggau penyerakup ke diasai kitai sehari tu nyadi aset ke pemadu berega ngagai Sarawak.

“Nya alai, semengat begulai tu meseti terus ditan sereta diturunka ngagai rebak dudi dikena nentuka jemah ila lebih nyulut ungkup nengeri tu,” ku iya.

Penatai beribu iku temuai ngulu pengawa tu sekali agi ngayanka nilai penyerakup, bebatak asur enggau semengat diri sebilik terus tegap ba rayat Sarawak, seriris enggau juluk ati perintah deka ngemansangka nengeri ti mansang, lantang sereta inklusif.

Pengerami nya mega mandangka komitmen perintah ti terus nentuka pengelantang komuniti pupu bansa terus dijaga nyadi tiang penegap politik, penyulut ekonomi enggau pengelantang rayat.

Pengerami nya tembu enggau penuh pengerichah sereta pemanah ati, lalu enggau nya ngayanka penyelai pengerami Gawai Dayak nyadi kelai penyerakup, begulai enggau identiti komuniti ti mayuh macham di Sarawak.

Sama bisi datai ngerichahka agi pengerami nya Sapit Menteri Nembiak Lumba enggau Pemansang Orang Dagang, Datuk Gerald Rentap Jabu enggau bini iya, Datin Rosemary Wong; Kaban Parlimen Betong, Dato Dr Richard Rapu; ex-Kaban Parlimen Betong, Datuk Robert Lawson Chuat; Direktor Opis Kereja Raya (JKR) Sarawak, Datu Dr Cassidy Morris; Residen Bagi Menua Betong, Datu Richard Michael Abunawas; ketuai opis perintah, ketuai komuniti enggau ketuai bansa, pengari gerempung ukai dikuasa perintah (NGO), ketuai renggat baruh enggau temuai ke dikangau ari serata Bagi Menua Bukit Saban enggau Betong. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BATANG SADONG, 5 Jun — Sepenyampau RM393,000 ari Wang Turu Parlimen Batang Sadong udah diungkupka ngagai 131 Komiti Pemansang enggau Pengelikun Genturung Pendiau (JKKK) di serata kandang menua Parlimen Batang Sadong ungkup taun 2026 ngambika ulih nambahka penegap pemansang enggau pengering komuniti dalam ba renggat baruh.

Pengerami Nyuaka Belanja ungkup JKKK Parlimen Batang Sadong 2026 ke diatur sehari tu ngemataka pengawa nyuaka bantu sepenyampau RM375,000 ngagai 125 buah JKKK ti ngaul tiga sitak Dewan Undangan Nengeri (DUN) ari baruh Parlimen Batang Sadong.

Ari penyampau nya, bisi 59 buah JKKK di sitak DUN Gedong nerima agih belanja nya lalu ditangkan 52 buah JKKK di DUN Simunjan enggau 14 buah JKKK di DUN Sadong Jaya.

Kelimpah ari nya, enam buah JKKK mega nerima agih belanja penyampau RM18,000 ti disalur tumu beserimbai enggau pengerami Taun Baru Cina bulan Februari tu tadi.

Kaban Parlimen Batang Sadong, Rodiyah Sapiee madah, pengawa ngungkupka belanja nya sebagi ari pengawa ti seruran dipejalai dikena ngenegapka fungsyen JKKK nyadi sebuah institusyen ti beguna dalam pemansang komuniti enggau pengawa ngenataika penerang perintah ba renggat genturung pendiau.

Nitih ku iya, ketuai genturung pendiau enggau kaban JKKK bejalaika tanggungpengawa strategik nyadi penyambung entara rayat enggau perintah sereta pengari rayat dalam nentuka guna enggau aspirasyen komuniti setempat ulih dikenataika sereta diputarka enggau efektif.

“Dikearapka belanja ke diungkupka nya ulih dikena enggau naka pemanah bejalaika mayuh macham program enggau aktiviti ti meri pemaik ngagai peranak sereta meri pangka ngagai pemansang enggau pengelantang komuniti,” ku iya.

Iya mega ngemeratka komitmen ti seruran dikena nyukung sereta meri kuasa ngagai JKKK ngambika terus bejalaika pengawa enggau efektif dalam mantu pemansang sosio-ekonomi sereta ngenegapka penyerakup komuniti di sitak Parlimen Batang Sadong.

Pengerami nya mandangka komitmen perintah enggau pengari rayat ti seruran dipejalai dalam nentuka pemansang komuniti di menua pesisir terus diberi perati nengah sukung enggau bantu ti ditagit ngagai institusyen ketuai komuniti. — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

Sumber, photo — Rodiyah Sapiee

MERADONG, 5 Jun — Siku lelaki peranak menua tu beumur 19 taun ditan tim Pasukan Petugas Indu Opis Polis Pelilih (IPD) Meradong dalam Ops Tapis ti dipejalaika ba kandang menua Bintangor, lemai tu tadi.

Ketuai Polis Pelilih Meradong, DSP Tansli Mering madah, saspek ditan urung pukul 3.20 lemai ketegal dipelabaka bisi kaul enggau aktiviti salah guna dadah sebedau dibai ngagai IPD Meradong ngambika atur ke silik agi dipejalaika.

Nitihku iya, asil peresa ai kemi ti dipejalaika ba Opis Bagian Tasat Jenayah Narkotik (BSJND) Pelilih Meradong tetemuka saspek positif dadah baka Amphetamine enggau Methamphetamine.

“Pengawa meresa baru rikod ke udah mega tetemuka saspek nadai ngembuan sebarang rikod jenayah tauka penyalah bekaul enggau dadah sebedau tu,” ku iya nengah sebengkah penerang sehari tu.

Ku iya, kes nya benung dipansik ari baruh Seksyen 15(1)(a) Akta Dadah Berbahaya 1952, ti nyendiaka ukum mata duit enda ngelui ari RM5,000 tauka jil nyentuk dua taun enti dikenuku salah.

Berebak enggau nya, piak polis nyemetak madahka sida beratika isu salah guna dadah ba genturung pendiau enggau berat sereta enda belembut ba sebarang pengawa ke bekaul enggau penyalah nya.

Berindik enggau nya, mensia mayuh ke bisi penerang bekaul enggau aktiviti dadah di pelilih Meradong dipinta datai ke mua lalu meri penerang ngagai polis ngambika ulih mantu pengawa ngemuntanka pengawa salah guna dadah.

Penerang tau dikenataika terus ngagai Balai Polis Bintangor nengah lumur 084-693222.

“Kerejasama komuniti beguna amat dalam nentuka pelilih Meradong bibas ari keruga dadah,” ku iya nyemetak. – RBI

#ruaiberitaiban#newsiban#beritaiban

Rindu | Titih | Kunsika

SPAOH, 5 Jun — Pengerami Rumah Tebuka Gawai Dayak 2026 ke diatur Kaban Kunsil Nengeri (ADUN) N37 Bukit Saban, Datuk Amar Douglas Uggah Embas enggau bini iya, Datin Amar Dato Doreen Mayang diatur enggau richah ba Balai Mensia Mayuh Spaoh, sehari tu tadi.

Nitihku Kaban Parlimen Betong, Dato Dr Richard Rapu, iya ngulu pengerami nya ti ngempuruka bemacham renggat mensia dalam pengerami ti penuh enggau pemanah ati sereta semengat diri sebilik beserimbai enggau pengerami Gawai Dayak.

Ku iya, penatai mensia mayuh ari bemacham penatai ngayanka semengat beserakup, sepenemu enggau pengelantang ti nyadi tiang penegap rayat Sarawak.

“Pengawa ti nyadi dalam pengerami richah ngempuruka mayuh bengkah renggat mensia mayuh, enggau nya mandangka semengat beserakup, sepenemu enggau pengaya budaya ti nyadi temegah ati rayat Sarawak,” ku iya nengah sebengkah penerang.

Kenu ku iya, pengerami ke bansa tu ukai semina nyadika pelasar dikena ngintu pengerami Gawai Dayak, tang mega nyadika pelasar dikena ngerapitka kaul pangan entara ketuai enggau rayat sereta nerenakka semengat begulai dalam komuniti.

Dato Dr Richard mega meri besai terima kasih ngagai Datuk Amar Douglas Uggah Embas enggau sida sebilik laban udah ngelaluka sereta nerima pengabang ti diberi ngagai bala temuai ke bisi datai.

Iya ngarapka pengerami Gawai Dayak taun tu terus nyadi pelasar ti ngenegapka penyerakup, ngetanka pengelantang komuniti pupu bansa sereta mai pengelantang ngagai semua rayat.

“Ngarapka pengerami Gawai taun tu ulih ngerapitka kaul pangan diri sereta mai pengelantang ngagai selampur komuniti,” ku iya.

Pengerami Gawai Dayak ti diintu ninting taun terus nyadi kelai penyerakup enggau pesaka budaya komuniti Dayak, kelimpah ari ngerapitka kaul entara komuniti di serata Sarawak.

Gayu Guru, Gerai Nyamai, Lantang Senang Nguan Menua — RBI

#RuaiBeritaiban#Newslban

#Beritalban | Ruai Berita Iban

Rinduka | Titihka | Kunsika

BETONG, 5 Jun — Program Ngabang Gawai Dayak 2026 ti betuaika Sapit Premier Sarawak, Datuk Amar Douglas Uggah Embas diteruska enggau pengawa nemuai ngagai sekeda rumah panjai di kandang menua Ulu Layar enggau Spaoh, lalu enggau nya ngerapitka kaul rat entara bala ketuai enggau komuniti menua pesisir.

Rumah panjai Tuai Rumah Kelimbang Jaman di Penyulok, Ulu Layar nyadi palan ngetu nangkanka ba program nya.

Penemuai nya meri awak ngagai Datuk Amar Douglas Uggah begulai enggau peranak menua nya sereta ngenataika pesan penyerakup enggau begulai beserimbai enggau pengerami Hari Gawai Dayak 2026.

Iya lalu nampung penemuai iya ngagai rumah panjai Serudit A, Paku, Spaoh.

Penatai iya begulai enggau raban iya disambut enggau manah peranak menua nya ke mega ngambi awak begulai enggau bala ketuai komuniti sereta perintah.

Sambut ke diberi nya ngayanka semengat penyerakup, pengelantang enggau kerejasama ke tegap entara komuniti, setipak nyadi pelasar pemansang enggau penyulut Sarawak.

Nyadi palan kepenudi ba siri ngabang tu, Datuk Amar Douglas Uggah enggau raban iya nemuai ngagai rumah panjai Tuai Rumah Lawrence Luda di Luban Ulu, Spaoh.

Penemuai nya nembuka siri program ngabang pengelama tiga hari ti nyadi ba sekeda kandang menua di Bagi Menua Betong.

Program Gawai Dayak Ngabang nyadi sebengkah main asal ti terus ditan nyadi medium dikena ngerapitka kaul entara ketuai enggau rayat, kelimpah ari ngenegapka semengat sepenemu, penyerakup enggau pengelantang entara komuniti pupu bansa enggau asal penatai di Sarawak.

Nengah chara renggat baruh tu, perintah ulih ninga penemu enggau aspirasyen rayat enggau mata diri empu, seraya nentuka kaul entara ketuai enggau komuniti terus mengkang rat ungkup penyulut enggau pengelantang begulai.

Sama bisi nyempulang bini iya Datin Amar Dato Doreen Mayang, Kaban Parlimen Betong, Dato Dr Richard Rapu, Sekretari Politik ngagai YAB Premier Sarawak Puan Roseline Mapong Sabai — RBI

NGEMAH, 5 Jun – Kaban Kunsil Nengeri (ADUN) sitak Ngemah, Anyi Jana nyemetak madahka pelajar nyadi puku ke pemadu manah ungkup pengidup nembiak rebak baru lalu deka terus diberi perati nengah mayuh bengkah inisiatif bantu pelajar ba sitak iya.

Iya madah munyi nya lebuh bejadika Pengawa Nyuaka Insentif Pelajar ngagai nembiak nyulut Sijil Pelajaran Malaysia (SPM) 2025 ba Opis Palan Servis Parti Rakyat Sarawak (PRS) N.49 Ngemah sehari tu tadi.

Ba pengerami nya, sepenyampau 69 iku nembiak ke bulih pemutus peresa nyulut ba peresa SPM 2025 nerima insentif pelajar sepenyampau RM20,700 kelai meri terima kasih ngagai pengepuh enggau penyulut sida.

Dalam jaku dipansutka iya mega, Anyi Jana meri pengaga ati ngagai semua penerima seraya ngarapka pemujur ke dijapai nya nyadi pematak terus nempa penyulut ba tikas pelajar ke tinggi agi.

Ku iya nerang, genap iku nembiak ke bulih pemutus peresa 3A ke atas nerima insentif RM300 siku.

Kelimpah ari nya, nembiak ke nampung pelajar ngagai renggat diploma deka nerima bantu pelajar RM500 siku, lalu sida ke nampung pelajar ngagai renggat ijazah sarjana muda layak nerima bantu RM1,000 seiku.

“Kena meh peluang ke bisi dikena nyura pengidup kita jemah ila. Enti kita bisi perambu deka nampung pelajar ngagai tikas ke tinggi agi, pilih meh bidang ke amat dikerinduka kita sereta ngembuan peminta ke manah ba makit kereja,” ku iya.

Iya mega bisi bekunsika peneleba diri maya belajar sereta gawa nyadi pengajar sebedau diberi pengandal nyadi pengari rayat.

Kenu ku iya, pemujur ke dijapai sehari tu asil ari pengawa bebendar, disiplin enggau pengeran dalam negika juluk diri.

Ku iya, ngarapka peneleba nya ulih meri inspirasyen ngagai nembiak rebak baru ngambika terus bebendar ngulihka pemujur dalam akademik enggau kereja jemah ila.

Sama bisi datai bini ADUN Ngemah, Puan Gelim Utan, Pemesai Unit Penyambung Mensia Mayuh Sarawak (UKAS) Bagi Menua Sibu, Jelani Ajang, Chairman Tetap Parti Rakyat Sarawak (PRS), Jetli Jelian Pemancha Charlie enggau Pemancha Iban Kanowit, Pengulu Pree Minggat, Pengulu Tiong Ming Kiong, Pengulu Kong Chak Pee sereta mega bala penerima insentif begulai enggau diri sebilik sida empu.

Program tu mandangka komitmen Anyi Jana ti seruran ngenegapka pelajar sereta meri kelala ngagai nembiak ti mai pemaik ngagai nama ruang bilik enggau sitak DUN Ngemah nengah pemujur akademik sida ti chukup ngemegahka ati. – RBI

BELAGA, 5 Jun 2026 – Komuniti Kenyah Badeng dipinta terus beserakup, ngetanka pengelantang sereta meri sukung ke tegap ngagai agenda pemansang Perintah Sarawak ungkup pengelantang rayat enggau jemah ila rebak dudi hari.

Tesau nya dikenataika Kaban Kunsil Nengeri (ADUN) Murum, Kennedy Chukpai Ugon, nengah jaku ke dibacha pengari iya, Amai Pemanca Tony Kulleh ba Pengerami Nutup Ramai Biu’ Pengerami Kenyah Badeng Sarawak (KEBANA) 2026 di Dewan Mayuh guna Lepo’ Badeng Apau Koyan, BRS Sungai Asap, Belaga.

Ba jaku iya, Kennedy ngenataika pengaga ati ngagai Serakup Kenyah Badeng Sarawak (KEBANA), komiti pengatur, komuniti Lepo’ Badeng Apau Koyan enggau semua piak ti udah bebendar ngemujurka pengerami nya enggau chara richah sereta teratur.

Nitih ku iya, program baka Ramai Biu’ KEBANA ukai semina nyadi pelasar dikena ngerapitka kaul entara komuniti Kenyah Badeng, tang mega bejalaika tanggungpengawa ti beguna dalam nyaga identiti, adat, main asal enggau pesaka asal aki ini ngambika terus dikerinduka nembiak rebak baru.

Iya mega nyemetak madahka penyulut mensia mayuh enda ulih bepanggai ba pengawa ngintu budaya aja, tang lebih agi meseti disempulang enggau penyulut dalam bidang pelajar, ekonomi enggau pemansang mensia.

“Pelajar nyadi kunchi besai ngubah pengidup dudi hari ruang bilik enggau komuniti.Raban nembiak patut ngerebut semua peluang ke bisi disediaka perintah nyengkaum bantu pelajar, sekulasip enggau inisiatif Skim Pelajar Tinggi Perchuma (FTES),” ku iya.

Iya mega meransang rebak baru berani nyerungkai bidang ekonomi digital, teknologi enggau pengawa dagang setipak enggau juluk Sarawak nyadi ekonomi bepelasarka data enggau inovasyen.

Berebak enggau nya, Kennedy ngenataika pengaga ati iya ngagai Perintah Sarawak ari baruh pegai Premier Sarawak, ti ​​seruran ngemeranka polisi pemansang inklusif enda ngira bansa enggau pelilih menua.

Ku iya, bemacham inisiatif pemansang ti dipejalaika nya ngayanka komitmen perintah nentuka komuniti menua pesisir mega ngasaika pengelantang pemansang nengah pengawa nyendiaka infrastruktur, perengka guna pelajar, bekal perengka guna, rentayan digital enggau peluang ekonomi ti manah agi.

Iya mega minta komuniti terus ngetanka ulah ti mulia baka bebasa, semengat bekerejasama enggau pangan diri, bebatak asur enggau pengerindu ti udah nyadi tiang penegap komuniti ngelama tu.

Berebak enggau nya, bemacham aktiviti diatur sepemanjai Ramai Biu’ KEBANA 2026 nyengkaum pengawa mandangka main asal, pekit lumba enggau main baka main bol enggau aktiviti komuniti ti nerima sambut ti chukup meransang ari komuniti Kenyah Badeng ari serata Sarawak.

Kenu ku Kennedy, penyereta ti meri peransang mandangka semengat begulai, beserakup enggau kerejasama ti tinggi entara komuniti Kenyah Badeng.

Iya ngarapka program baka tu deka terus diatur jemah ila nyadika pelasar dikena ngenegapka penyerakup komuniti, ngetanka pesaka asal sereta meri kelala penyelai budaya Kenyah Badeng ngagai rebak baru enggau komuniti luar.

Sama bisi datai iya nya Senator Abun Sui Anyit, Presiden KEBANA Hilary Samah Tet, Penghulu Katan, Chairman KEBANA Pampang Apau Koyan merambu Chairman Pengatur KEBANA Ramai Biu’ Dennis Nyurang, pengari Sarawak Energy Berhad Rom Kulleh, bala ketuai komuniti enggau komuniti Kenyah Badeng ari serata menua Sarawak. -RBI