KUCHING, 20 Mei – Sarawak deka nempa siti agi sejarah ke beguna lebuh Jematan Batang Lupar 1 di Sebuyau deka dibuka enggau rasmi pagila, lalu enggau nya ngemuntangka pejalai rayat, kelebih agi sebedau pengerami Hari Raya Aidiladha enggau Gawai Dayak.

Premier Sarawak, Datuk Patinggi Tan Sri Abang Abdul Rahman Zohari madah, pengawa muka jematan nya deka ngetuka pengawa bepanggai ba servis feri ke udah lama nyadi pengawa ninting hari ungkup komuniti di kandang menua nya.

Kenu ku iya, mensia mayuh enda ibuh agi bebaris panjai nepan feri pulai ke menua asal maya musin pengerami tu ila.

“Pagila, Sarawak deka nyadi saksi jelana besejarah enggau pengawa bejadika Jematan Batang Lupar 1 di Sebuyau.

“Enggau jematan tu, rayat muntang agi mulaika diri ngagai rumah panjai ungkup pengerami Hari Raya Haji enggau Gawai Dayak enggau enda ibuh nganti feri,” ku iya rambau Aum Besimpul Aum Kunsil Nengeri (DUN) Sarawak Ke-19 kena Hari Empat tu tadi.

Ku iya, jematan sepemanjai 4.8 kilometer nya jematan meraka sungai pemadu panjai di Malaysia lalu deka ngetuka operasyen feri Triso, enggau nya muka bab baru ungkup sistem rangkaian pengangkut ti jampat sereta lanchar.

Nambahka nya, pemansang infrastruktur terus nyadi batang penumbuh Sarawak nengah bemacham transformasyen ti dipejalaika dikena ngenegapka rentayan penyambung di serata nengeri.

Ku iya, pejalai ngelawa Simanggang ke dulu suba ngena awak manggai enam tauka tujuh jam, diatu jauh pandak sereta lantang agi.

“Diatu kitai ulih ngirup pagi di Simanggang lalu mulaika diri ke Kuching maya makai tengah hari,” ku iya.

Semanjai Langgur Pemansang Malaysia Lumpar Ke-12 (RMK-12), perintah Sarawak udah bejalaika siti ari transformasyen infrastruktur ke pemadu besai dalam sejarah nengeri tu nengah pengawa ngaga 21 jematan besai begulai enggau rentayan jalai ke beguna baka Program Penyambung Jalai Tebing Pantai enggau Jalai Besai Kedua.

Ari penyampau nya, 10 buah jematan udah tembu penuh sereta dibuka ngagai mensia mayuh, nganti enam servis feri ke sebedau tu dikena komuniti menua nya ninting hari.

Iya mega madahka lapan buah agi jematan dipelaba tembu ujung taun tu.

Nengah Strategi Pemansang Pengudah COVID-19 2030 (PCDS 2030), Sarawak nagit 100 peratus bungkur rentayan jalai alun dikena nentuka tetiap genturung pendiau ulih ngasaika akses ngagai peluang ekonomi, servis enggau pemansang.

“Tetiap jalai alun ke tembu, tetiap jematan dibuka enggau tetiap rentayan penyambung ke digaga nyata ngayanka komitmen perintah GPS nentuka pengelantang enggau pengelikun rayat dijaga.

“Pemujur tu ngayanka penegap politik, disiplin bejalaika pengawa enggau ngatur belanja enggau bejimat ulih disalin ngagai asil ke nyata ungkup Sarawak jemah ila,” ku iya. – Edisyen UKAS

KUCHING, 20 Mei – Perintah Gempung Parti Sarawak (GPS) majak ngenegapka agenda pemansang inklusif nengah pengawa bejalaika inisiatif “Misyen Batu Kepenudi” dikena nentuka nadai sebuah genturung pendiau di Sarawak tinggal ari ngasaika pengelantang rentayan jalai alun enggau infrastruktur pemun.

Sapit Premier Sarawak ke mega Menteri Infrastruktur enggau Pemansang Palan Penyangkai Kapal Sarawak, Datuk Amar Douglas Uggah Embas madah, inisiatif nya sebagi ari pengawa perintah ti seruran dipejalaika dikena nutup seraka penyambung, kelebih agi di menua pesisir enggau kandang menua ulu.

Nitihku iya, bepelasarka rikod ari Opis Kereja Raya (JKR) Sarawak, penyampau rentayan jalai di nengeri tu diatu manggai 40,255 kilometer, mungkur 38,634 kilometer jalai nengeri enggau 1,621 kilometer jalai perintah besai ari baruh program ngintu perintah.

“Sepenyampau 5,977 kilometer jalai ‘last mile’ udah dikelala ngambika diambi lalu dipasuk ari baruh skim nyeruri jalai MARRIS.

“Atur tu deka ngemanahka agi sukut pengelikun, pengelantang enggau aksesibiliti komuniti menua pesisir,” ku iya lebuh ngenataika jaku penutup iya ba Aum Kunsil Nengeri (DUN) Sarawak Ke-19 di Kuching, sehari tu tadi.

Ku iya, tebal agi jalai ke bisi kaul nya mungkur jalai kayu batang ke suba sereta mega jalai kayu batang ke aktif enggau enda aktif ke semina jalai tama ngagai komuniti menua pesisir, tang sebedau tu bedau dijaga perintah enggau rasmi.

Ku iya nambah, pengawa bejalaika “Misyen Batu Kepenudi” ukai semina ngaga jalai alun aja, tang nyambung rayat ngagai peluang ekonomi, pelajar, pengerai enggau servis asas ke bukai.

Ba pemansang ke bekaul, iya madahka bisi 267 projek pemansang nengeri ke beungkus RM31.3 bilion udah dilempaika ngagai Opis Kereja Raya Sarawak ari baruh Langgur Pemansang Malaysia Lumpar Ke-13.

Ari penyampau nya, 74 projek udah tembu, 124 projek benung digaga, lalu ke bukai agi ba renggat tinda enggau pra-kontrak.

Perintah ku iya, deka terus ngenegapka pemansang infrastruktur dikena nentuka semua rayat Sarawak ngasaika penguntung ari pemansang nengah chara ti sebela sereta komprehensif. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Sarawak majak nyapai penyulut besai dalam pemansang infrastruktur lebuh 10 projek jematan besai mujur tembu nyadi sebagi ari agenda ngenegapka agi penyambung sereta nyungkak penumbuh ekonomi nengeri tu.

Sapit Premier Sarawak, Datuk Amar Douglas Uggah Embas madah, pengawa ngaga jematan besai nya kelai komitmen perintah nengeri ngerembaika akses ngagai pemansang enggau ngangkatka tikas pengidup rayat.

Nitih ku iya, projek nya mandangka visyen ketuai Premier Sarawak dalam ngemodenka sistem perengka pengangkut enggau ngenegapka integrasyen serantau di serata nengeri.

“Jematan tu ukai semina struktur fizikal aja, tang kelai penyulut Sarawak enggau komitmen perintah nentuka rayat terus besambung,” ku iya rambau nutup jaku iya ba Aum Kunsil Nengeri Sarawak Ke-19, sehari tu tadi.

Iya mega madahka ari baruh Program Transformasyen Jematan Menua Pesisir (RBTP), bisi 122 buah jematan benung sereta deka dipejalaika, kelebih agi ba kandang endur ke kala nyadi jalai kayu batang.

Ari penyampau nya, empat buah jematan udah tembu digaga, 52 buah benung digaga, 11 buah benung ba renggat tinda lalu 55 buah agi ba renggat pra-kontrak.

Berebak enggau nya, iya madahka projek Jalai Penyambung Sarawak-Sabah (SSLR) Renggat 1 diatu udah nyapai penyulut fizikal 70.05 peratus lalu disadang tembu dalam taun 2027.

SSLR Renggat 2 udah berengkah enggau penyulut fizikal 10.55 peratus naka April 2026 lalu diperambu tembu manggai ba taun 2029.

Pekara ti narit ati, Renggat 2 deka meda pengawa ngaga jalai baruh tanah keterubah di Sarawak, urung 2.24 kilometer pemanjai, ti digaga dikena ngurangka pengawa ngeruntuhka bukit sereta ngintu rampa menua.

Ku iya, chara nya setipak enggau aspirasyen pemansang ti meruan ari baruh Strategi Pemansang Pengudah COVID-19 2030 (PCDS 2030). -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Perintah Besai udah setuju enggau rasmi nyerahka Palan Penyangkai Kapal Bintulu ngagai Perintah Sarawak nengah ungkus belanja RM1.8 bilion, lalu enggau nya muka siti batang baru dalam pemansang sektor palan penyangkai kapal nengeri tu.

Sapit Premier Sarawak Datuk Amar Douglas Uggah Embas madah, proses nyerahka tanggungpengawa nya dipelaba tembu penuh ujung bulan Jun taun tu.

Ku iya, pengawa nya deka ngenegapka pengulih Sarawak merambu sereta ngatur pemansang palan penyangkai kapal enggau lebih strategik sereta komprehensif.

“Ba suku ketiga taun tu, semua opis bekuasa palan penyangkai kapal nengeri deka dipegulaika ari baruh opis bekuasa ti dikelala enggau nama ‘Sarawak Ports Authority’.

“Iya betuju ngatur polisi, atur enggau pemansang palan penyangkai kapal setipak enggau pengawa bejalaika Pelin Besai Palan Penyangkai Kapal Sarawak,” ku iya dalam jaku nutup Aum Dewan Undangan Negeri Sarawak Ke-19.

Nitih ku iya, semua palan penyangkai kapal nengeri ngerikod penumbuh ti meransang ba suku keterubah taun 2026 enggau penambah ba pengawa ngurus kargo 10 peratus dibandingka enggau timpuh ke sama taun nyin tadi.

Sarawak mega diatu benung chakah bejalaika mayuh bengkah projek ngemodenka palan penyangkai kapal nyengkaum kereja ngerawang ba Nanga Batang Baram di Miri ngambika kapal besai ulih sangkai ba Palan Penyangkai Kapal Miri ujung taun 2026.

Kelimpah ari nya, kapasiti palan endur entepan entukar ba Terminal Senari mega udah ditambah ngambika ulih nampung tambah 1,000 buah entukar, lalu ngujungka penyampau semua manggai 3,500 unit manggai ba taun 2026.

Ku iya, pengawa ngemesaika jelatung enggau nambahka kapasiti terminal kontena mega udah dipejalaika dikena napi penumbuh dagang enggau pengawa ngatur kargo jemah ila.

Pengawa nya dipechaya ulih ngenegapka penuduk Sarawak nyadi hab besai logistik enggau dagang di rantau tu. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Sarawak majak ngenegapka agenda pemansang ti meruan lebuh bemacham projek infrastruktur gadung dipejalaika setipak enggau aspirasyen Strategi Pemansang Pengudah COVID-19 2030 (PCDS 2030).

Sapit Premier Sarawak, Datuk Amar Douglas Uggah Embas madah, Opis Kereja Raya (JKR) Sarawak diatu benung meri kelala polisi Rampa Menua, Sosial enggau Tadbir Urus (ESG) ba pengawa bejalaika projek infrastruktur besai di nengeri tu.

Nitihku iya, entara batang inisiatif iya nya ngena teknologi “beg ai” ba projek Jalai Ekspres Sebuyau-Lingga enggau ngaga jalai besai ke tinggi sepemanjai 11 kilometer entara Batang Samarahan enggau Jematan Batang Sadong.

Ku iya, Sarawak mega bejalaika pengawa ngaga struktur jalai besai ti tinggi di Sibu enggau jalai baruh tanah keterubah nengeri tu sepemanjai 2.24 kilometer ari baruh projek SSLR Fasa 2.

“Chara tu mandangka komitmen perintah nentuka pemansang infrastruktur dipejalaika enggau meruan sereta enda ngeruga rampa menua,” ku iya.

Iya mega madah, chara ngaga jalai baruh tanah ari baruh SSLR nerima kelala ari World Wide Fund for Nature Malaysia (WWF-Malaysia) laban mujur nyemelaka pemansang enggau pengawa ngintu rampa menua.

Kelimpah ari sektor jalai alun, agenda gadung mega dikerembaika ngagai sektor palan penyangkai kapal lebuh bemacham perengka kuasa karan enggau sistem lampu LED ti ngelimatka kuasa berengkah dikena ba palan penyangkai kapal nengeri tu.

Ku iya, Kaunsil Palan Penyangkai Kapal Miri mega udah bejalaika perengka guna “kuasa pantai” dikena ngurangka pemansut karbon lebuh kapal sangkai.

Ku iya, pengawa nya mandangka penegap Sarawak deka nyadi ketuai dalam pemansang ti meruan sereta teknologi gadung di rantau tu.-RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Perintah Sarawak majak ngenegapka sistem mutarka penusah ngenyit nengeri tu nengah bemacham inisiatif bantu, nyikap diri enggau mulaika diri dikena nentuka pengelikun rayat seruran dijaga.

Sapit Premier Sarawak, Datuk Amar Douglas Uggah Embas madah, sepenyampau 5,471 iku ketuai ruang bilik ti dituntung penusah Monsun Timur Laut 2025/2026 nerima Geran Penyiru Ati sepenyampau RM1,000 siku, lalu penyampau semua nya RM5.47 juta.

Nitihku iya, sepenyampau 71 palan pengenduh sementara (PPS) dibuka sepemanjai timpuh penusah ngenyit nyadi dikena nyendiaka palan pengenduh enggau bantu ke diguna pemun ngagai orang ke tasah.

Ku iya, perintah mega benung ngemansangka Palan Mindah Tetap Penusah Ngenyit (PPKB) dikena ngangkatka penyikar pengawa ngatur pemindah penusah ngenyit jemah ila.

“Dua bengkah projek PPKB udah dikemendarka NADMA iya nya ba SK Beradek, Kuching enggau Long Busang, Kapit,” ku iya.

Berebak enggau nya, iya madahka bisi 629 projek Timbal Balas Penusah Ngenyit ti beungkus RM696 juta udah dikemendarka kenyau ari taun 2023 dikena ngemanahka lalu nyeruri pengerusak infrastruktur ketegal penusah ngenyit.

Ari penyampau nya, 366 projek udah tembu lalu projek ke bukai agi ba mayuh bengkah renggat dipejalaika.

Iya mega madahka bisi 207 ruang bilik rumah angus udah nerima Bantuan Ehsan Kebakaran Rumah (BEKR) ti ngaul agih belanja sepenyampau RM13 juta kenyau ari bulan November 2025.

Ngenang baru musin Monsun Barat Daya 2026, iya madahka Sarawak dipelabaka deka ngasaika gaya hari ti kemarau agi sereta kurang ujan nyentuk bulan September.

Berindik enggau nya, iya ngelalau mensia mayuh nyeliahka pengawa betunuka chara tebuka sereta ngena ai enggau bejimat dikena ngurangka risiko sebun enggau suntuk ai. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Perintah Gempung Parti Sarawak (GPS) tetap bebendar meransang pemansang nengeri tu enggau progresif dikena nempa Sarawak nyadi pelilih menua ti maju, meruan sereta bepenatai pemisi tinggi.

Sapit Premier Sarawak Datuk Amar Douglas Uggah Embas madah, bemacham pemujur ke dijapai sehari tu asil ari penegap politik, ketuai ke bisi visyen sereta polisi pemansang ke nyemetak dipejalaika perintah GPS.

Nitih ku iya, Sarawak diatu nyingkang ke mua enggau andal enggau penambah penatai pemisi nengeri, pemansang ekonomi gadung enggau digital, kelimpah ari bejalaika bemacham projek pemansang besai.

“Tu ukai retorik politik, tang asil ke ulih dipeda sereta diasaika rayat.

“Hak Sarawak terus ditan, pemansang dikelengkas enggau pelajar tinggi enda bebayar diberi kelala ungkup pengidup anak Sarawak jemah ila,” ku iya lebuh ngenataika jaku nutup ba Aum Kunsil Nengeri Sarawak Ke-19.

Ku iya, seraya parti bukai kiruh bepolitik sereta bemain ba sentimen negatif, GPS terus gawa mai puku, peluang gawa enggau pemansang ngagai rayat.

Ku iya, penegap politik nyadi pelasar ke beguna ngagai pemujur Sarawak dalam matak pemeranak puku sereta ngenegapka pengandal pemeranak puku di nengeri tu.

Iya mega minta rayat Sarawak terus ngetanka penyerakup sereta nulak politik begedi enggau propaganda ti tau ngeruga penegap nengeri tu.

“GPS ada ari pengawa rayat Sarawak empu sereta meretika kedap rayat ari mengeri nyentuk ke menua pesisir,” ku iya.

Iya nyemetak madahka penegap Sarawak deka terus nyadi pematak ngagai penyulut Malaysia ba selampur, kelimpah nentuka rayat terus ngasaika pengelantang enggau pengelikun. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Perintah Sarawak terus ngenegapka agenda pemansang inklusif enggau penyerakup komuniti pupu jalai pengarap nengah Unit Pengarap Bukai (UNIFOR) enggau penyampau agih belanja sepenyampau RM120 juta ungkup taun ke diatu.

Sapit Premier Sarawak, Datuk Amar Douglas Uggah Embas madah, ari penyampau nya, RM90 juta diungkupka dikena ngaga sereta ngemansangka rumah sembiang ukai Islam, lalu RM30 juta agi diagihka ngagai sekula misyen di serata nengeri nengah Wang Turu Pemansang Khas (SDAF).

Ku iya, agih belanja tu mandangka komitmen perintah nengeri ti terus nentuka semua komuniti bulih penguntung ari pemansang enggau adil enda ngira jalai pengarap.

Nitihku iya, ba taun 2025 aja, UNIFOR udah mujur nguna agih belanja penuh RM110 juta ti meri penguntung ngagai 380 buah rumah sembiang sereta ngaul 155 projek sekula misyen ba 126 palan pelajar.

“Pengawa bejalaika tu ngayanka pengulih UNIFOR dalam ngenegapka pengelantang rama enggau nyukung pemansang komuniti bepelasarka guna ke bendar ba renggat baruh,” ku iya rambau nutup jaku Aum Kunsil Nengeri (DUN) Sarawak Ke-19 di Kuching, sehari tu tadi.

Iya mega nyemetak madahka perintah Sarawak deka terus nentuka agenda inklusif tu ditegapka setipak enggau aspirasyen nengeri ba pemansang ti entap, harmoni sereta progresif.

Ba pemansang ke bekaul, iya madahka pengawa ngaga begunan baru UNIFOR ke beungkus RM75 juta ti dilanchar kena 26 April 2026 ulih Premier Sarawak nyadi kelai komitmen perintah ngenegapka institusyen sukung jalai pengarap ukai Islam di nengeri tu.

Begunan nya dikearapka ulih nambahka pemanah pengawa nganjung bantu enggau koordinasyen projek pemansang ungkup rumah sembiang enggau sekula misyen di serata Sarawak.

Ku iya, chara inklusif tu nyadi pelasar ti beguna dalam nentuka pengelantang komuniti dijaga seraya ngenegapka penyerakup rayat Sarawak. -RBI

#ruaiberitaiban#newsiban#beritaiban

Rindu | Titih | Kunsika

KUCHING, 20 Mei – Perintah Sarawak nengah Opis Menteri Infrastruktur enggau Pemansang Palan Penyangkai Kapal (MIPD) meri jamin deka terus mansik sereta bejalaika bemacham perambu pemansang enggau isu ti dibantaika Kaban Lunsil Nengeri (ADUN) ti ngaul guna infrastruktur di serata nengeri.

Sapit Premier Sarawak ke mega Menteri Infrastruktur enggau Pemansang Palan Penyangkai Kapal Sarawak, Datuk Amar Douglas Uggah Embas madahka, perintah komited nentuka tetiap peminta bekaul enggau jalai alun, jematan, jematan mit, jalai genturung pendiau, api jalai enggau perengka guna pemun bukai diberi perati ke patut nitihka pemerat ke diatu.

Ku iya, entara projek ke benung sereta deka dipejalaika nyengkaum pengawa ngaga enggau ngemanahka jalai alun ba sekeda kandang endur baka Ngemah, Engkilili, Tamin, Machan, Beting Maro enggau Bukit Begunan ke diatu benung ba mayuh bengkah renggat dipejalaika, sekalika ba renggat langkar, tinda tauka ngaga.

Nitih ku iya, projek jematan di kandang menua Engkilili enggau Kalaka mega benung dalam renggat ngaga langkar lalu dipelaba deka ditinda dalam timpuh ke semak, seraya projek jematan kedua Krian di Tanjung Kalimah Pagan mega benung disediaka ungkup proses tinda.

Berebak enggau nya, iya madahka projek Jalai Besai Matang Bypass diatu benung ba renggat injinir mua, seraya perambu jalai baru ba sekeda kandang menua pesisir deka diserenih enggau silik Opis Kereja Raya Sarawak begulai enggau opis menteri nya.

“Perintah seruran mendingka penemu enggau guna ti dibantaika Yang Berhormat.Semua perambu tu deka diperesa bepelasarka pemerat, empas ngagai rayat enggau agih belanja ke diatu,” ku iya rambau nutup jaku iya ba Aum Kunsil Nengeri Sarawak Ke-19 di Kuching.

Iya mega nerangka sekeda pekara bekaul enggau servis feri ba sekeda kandang menua deka dikemanahka agi nengah penambah perengka guna baru dikena nentuka komunikasyen entara rayat lanchar, kelebih agi ba kandang endur ke agi bepanggai ba perengka pengangkut ai.

Kelimpah ari nya, pengawa ngurangka penyekut jalai alun ba kandang mengeri enggau pesisir mengeri mega diberi perati nengah pengawa ngaga rentayan jalai alun baru ti nyambung Batang Samarahan, Tanjong Bako enggau Sejingkat ti disadang tembu dalam taun 2027.

Iya nyemetak madahka semua peminta projek ti dikenataika ADUN deka diperesa enggau silik berenggat dikena nentuka pemansang infrastruktur Sarawak terus dipejalaika enggau chara ti sebela, inklusif sereta meruan.

“Perintah tetap komited deka bekerejasama rat enggau semua pengari rayat sereta ejensi bejalaika pengawa dikena nentuka tetiap isu rayat diputarka enggau efektif,” ku iya. – RBI

#ruaiberitaiban#newsiban#beritaiban

Rindu | Titih | Kunsika

Nama Sapok Biki mengkang diukir nyadi siku ari atlit ke nyulut lalu udah ngemegahka Malaysia ba panggau antarabansa, pengudah nempa pemujur ti ngemegahka ati lebuh teulihka midul emas ba pekit tinju ba Lumba Komanwel 1998.

Pemujur besejarah nya ukai semina ngangkatka imej lumba enggau main tinju menua tu, tang mega nempa lelaki ke ada di Sarawak nya nyadi kelai semengat besemekih, disiplin enggau pengeliat ati ba panggau lumba enggau main menua.

Sapok mega kala ngarika Malaysia ba Lumba Olimpik Musim Panas 1996, lalu enggau nya ngayanka penau iya bepekit ba renggat antarabansa ke pemadu tinggi.

Pengudah pejalai ke jauh dalam dunya lumba enggau main, iya terus meri servis ngagai menua nengah pengawa ngaul diri dalam Soldadu Malaysia.

Taja pan enda agi ba gelanggang tinju, Sapok terus dipebasa nyadi ikon lumba enggau main menua sereta nyadi inspirasyen ngagai rebak baru, kelebih agi kaban Raban Soldadu Malaysia (ATM) nengah disiplin enggau semengat ngelaban ti dipandangka sepemanjai karier iya.

Peneleba enggau pemujur iya dalam bidang lumba enggau soldadu dipeda nyadi chunto pemadu manah baka ni siku atlit ulih nyemelaka penyulut dalam karier enggau tanggungpengawa ngagai menua.

Legasi Sapok Biki ti kala nyadi champian tinju menua terus dikenang sereta nyadika peransang ngagai rebak baru terus ngiga pemujur ketegal jalai pengarap, bansa enggau menua asal.

Kredit Soldadu Darat Malaysia Tentera Darat Malaysia

#ruaiberitaiban#newsiban#beritaiban

Rindu | Titih | Kunsika