SIBU, 6 Jun – Menteri Dagang Temuai, Seni enggau Main Asal, Dato Sri Tiong King Sing ngarapka semengat penyerakup ti tegap entara komuniti rumah panjai terus ditan, seraya ngelalau mayuh agi raban nembiak enggau orang indu datai ke mua ngambika chakah bejalaika tanggungpengawa ngemansangka genturung pendiau.
Kenu ku iya, penyulut sesebuah raban bansa ukai semina bepanggai ba pemansang fizikal aja, tang kebendar iya begunaka kaul semua renggat raban bansa, kelebih agi raban nembiak rebak baru ti deka nyadi aris nyadi ketuai jemah ila.
“Raban nembiak patut terus ngaul diri dalam aktiviti komuniti enggau pemansang kandang menua. Sida nyadi aset ti beguna ti deka nentuka kuing enggau jemah ila komuniti rumah panjai,” ku iya.
Iya madah munyi nya pengudah nembuka renggat penemuai beserimbai enggau pengerami Hari Gawai taun tu nengah pengawa ngabas lima buah rumah panjai kepenudi iya nya Rh Tonnie Ak Ili, Rh David Ngendang Ak Emui, Rh Ujang Ak Gubal, Rh Chendang Ak Ambau enggau Rh Andrew Ak Patrick Gundai.
Enggau nya penemuai tu nembuka pejalai tiga hari iya ngagai 12 buah rumah panjai ngintu pengerami Hari Gawai begulai sereta ngelawa komuniti ba renggat baruh.
Rambau penemuai nya, iya mega ngambi awak ningaka kediri penemu, guna enggau pemar ke ditapi peranak menua nya, nyengkaum infrastruktur jalai alun, bekal ai, perengka guna telekomunikasyen enggau pemansang genturung pendiau.
Kenu ku iya, timbal ke diterima nya beguna amat dikena nentuka guna rayat ulih diberi perati ke patut sereta ngambika pemansang ulih dipejalaika enggau ngasi agi nitihka gaya ke bendar ba renggat baruh.
Berebak enggau nya, Tiong nerangka semengat begulai ti dipandangka komuniti rumah panjai nyadi pekara ti amat dikemegah sereta patut diteladan.
Ku iya, penyerakup enggau penegap nyadi pelasar besai ngagai penyulut sesebuah komuniti laban gaya ke lantang ngemendarka pemansang dipejalaika enggau lanchar agi, ekonomi ngerembai lalu pengelantang pendiau rayat majak dikemanah.
“Lebuh mensia diau begulai sereta bekerejasama enggau pangan diri, bemacham pemar ulih diputarka enggau muntang agi. Semengat tu patut ditegapka dikena nentuka komuniti rumah panjai terus maju sereta besemekih,” ku iya.
Kelimpah ngulu pengerami ngintu Gawai, iya mega bisi nyereta pengerami Numbangka Ranyai sereta meda bemacham pengawa mandangka budaya ti mandangka pengaya pesaka asal komuniti Dayak.
Kenu ku iya, Ranyai ukai semina kelai pengerami Hari Gawai aja, tang mega kelai rega beterima kasih, bekunsi enggau penyerakup ti udah nyadi tulang belakang pengidup komuniti rumah panjai kenyau ari setiap rebak.
Beduduk enggau nya, iya ngarapka pesaka main asal ke nyadi identiti komuniti Dayak ulih terus dijaga sereta ditampung ngagai rebak dudi ngambika meruan relevan dalam arus pemansang moden.
Iya mega ngenataika pengaga ati ngagai semua peranak rumah panjai ti nerima penatai iya sepemanjai siri penemuai nya lalu nerangka pengawa nerima pengabang ti diberi nya nyadika bukti kaul rat entara bala ketuai enggau rayat. – RBI
#ruaiberitaiban#newsiban#beritaiban
Rindu | Titih | Kunsika
