BAU, 6 Jun — Siku lelaki peranak menua tu beumur 28 taun ditangkap polis ketegal dipelabaka bisi kaul enggau pengawa salah guna dadah dalam operasyen ti dipejalaika Bagi Pansik Jenayah Narkotik (BSJN) begulai enggau Bagi Nagang Penyalah enggau Pengelikun Komuniti (BPJKKK) Pelilih Menua Bau.
Nitihka penerang ari Ketuai Polis Pelilih Bau, P/Supt Mohd Haide A. Rahman, saspek ditangkap urung pukul 2.45 lemai ba Opis Bagi Tasat Jenayah Narkotik IPD Bau.
Ku iya, pemutus peresa nisih ai kemi keterubah ti dipejalaika ba saspek tetemuka lelaki nya positif dadah.
“Saspek udah ditangkap lalu kes tu dipansik ari baruh Seksyen 15(1)(a) Akta Dadah Berbahaya 1952,” ku iya nengah penerang media sehari tu tadi.
P/Supt Mohd Haide nyemetak madahka Polis DiRaja Malaysia (PDRM) enda belemi ba sebarang bansa penyalah dadah lalu deka terus chakah agi bejalaika pengawa ngelaban pengawa ke baka nya.
Ku iya, atur ke terit deka dipejalai ngagai sebarang individu ke ditemu bisi kaul enggau salah guna dadah tauka aktiviti nitihka penetap undang-undang ke dikena.
Berindik enggau nya, mensia mayuh dipinta terus meri kerejasama ngagai polis nengah chara nyalurka sebarang penerang bekaul enggau aktiviti dadah nengah Talipun Hotline Opis Siasatan Jenayah Narkotik (JSJN) Bukit Aman ba lumur 012-208 7222 tauka Hotline JSJN IPK Sarawak ba lumur 017 5929211.
PDRM mega ngemeratka komitmen ngenegapka pengawa nagang enggau neritka atur nentuka pengawa salah guna dadah ulih ditagang dikena nentuka pengelikun enggau pengelantang komuniti. — RBI
#Beritalban | Ruai Berita Iban
Rinduka | Titihka | Kunsika
