KUCHING, 6 Jun – Aktivis hak asasi mensia Sarawak, Peter John Jaban ngansak perintah ngenyampatka pengawa bejalaika operasyen AirBorneo nengah chara ngemeratka guna rayat Sabah enggau Sarawak ke diatu betapi enggau ungkus pejalai bilun ke majak niki berindik ari peminta penerebai bilun ke majak nambah di rantau Borneo.
Ku iya, pengawa numbuhka AirBorneo ulih Premier Sarawak, Datuk Patinggi Tan Sri Abang Johari Tun Openg enggau Perintah Sarawak nyadi siti singkang strategik ti patut dipuji laban nya ukai semina projek penerebai bilun komersial aja, tang lebih agi ngayanka pengawa ngenegapka autonomi ekonomi enggau pengawa beranakka puku timpuh panjai ungkup Sarawak.
Nitih ku iya, laban perambu kompeni penerebai bilun nya majak semak enggau pengawa operasyen, batang pengawa iya meseti meruan terang, iya nya ngemeratka rayat Sabah enggau Sarawak.
“Peminta servis penerebai bilun di Borneo diatu majak nambah ba tikas ke enda kala dipeda sebedau tu.
“Gaya tu dipejalai ketegal pemansang ekonomi Sarawak ke jampat ngaul sektor kuasa, industri berat ba hab strategik baka Bintulu, pemansang ekonomi digital enggau penatai puku dagang menua luar ke berega tinggi,” ku iya.
Ku iya nerang, pemansang ekonomi ti majak ngerembai udah nambahka pejalai raban profesyenal, pemeranak puku, pakar teknikal enggau ruang bilik pulai mansang dalam enggau luar pelilih menua tu.
Taja pia, iya nyemetak madahka rayat Malaysia Timur diatu nanggung empas negatif ari pemujur tu laban tambang bilun majak niki ketegal faktor makit ti ngemeratka penguntung ari utai ti diguna rayat.
“Ungkup rayat Sabah enggau Sarawak ti bepanggai ba perengka pengangkut langit, penerebai bilun ukai utai ti patut tang utai ti diguna nyadi pekara pemun, sama beguna enggau jalai alun, jematan enggau infrastruktur digital,” ku iya.
Berindik enggau nya, Peter ngansak pengawa bejalaika AirBorneo dikelengkas bepelasarka polisi “Borneo First” ti ngeletakka pemerat rayat menua tu nyadi pekara ti pemadu dikemeratka.
Nitihku iya, taja pan pelin timpuh panjai deka muka jalai antarabansa baka nyambung Kuching enggau Nusantara di Indonesia tauka destinasyen bukai di Kalimantan ngembuan potensial ekonomi ke besai, tang AirBorneo enda ulih ngelalaika tuju asal penumbuh iya.
“Pemerat meseti diberi ngagai akses penerebai domestik ti lebih sebaka sereta mudah ungkup rayat Sarawak enggau Sabah sebedau ngerembaika operasyen ngagai menua luar,” ku iya nyemetak.
Iya mega nyemetak madahka rayat patut ngasaika tambang bilun ti entap sereta ulih dibeli sepemanjai taun, kelebih agi maya musin pengerami, pengawa budaya enggau pekara ti beguna ba ruang bilik.
Ku iya, nadai siku rayat patut ditagang pulai ke menua asal semina ketegal rega tikit niki langit, lalu ngujungka ngeruga penyerakup ruang bilik enggau integrasyen nasional.
“Peminta penerebai bilun ti majak nambah diatu nyata ngayanka makit tu amat begunaka kompeni penerebai bilun menua tu ti amat meretika guna rayat Borneo.
“AirBorneo meseti jampat ngisi penyelai tu lalu nentuka penyulut ekonomi Sarawak disalin ngagai mobiliti ke manah agi, tambang ke adil agi sereta kaul ruang bilik ke tegap agi ungkup semua rayat Sabah enggau Sarawak,” ku iya. -RBI
#ruaiberitaiban#newsiban#beritaiban
Rindu | Titih | Kunsika
