LUTONG, 23 April 23 — Balai Bomba enggau Penyah Penusah (BBP) Lutong nerima pemeri sepenyampau 24 kutak ai mineral 1.5 liter ari Syarikat S & I Beverages Marketing Sdn Bhd dalam pengawa nyuaka bantu ke diatur ba Bay Jentera, lemai tu tadi.

Pengawa nyuaka pemeri nya diatur Direktor Pengatur serikat nya, King Ee Seng urung pukul 4.00 ngagai 4.30 lemai lalu lalu mega digulu Ketuai BBP Lutong, PBT II Henry AK Jugah.

Pemeri nya kelai sukung ari sektor peribit ngagai pangku pengawa raban bomba ti seruran sedia bejalaika tanggungpengawa ba sebarang gaya kelebih agi ba operasyen penusah ngenyit enggau nyelamat.

Inisiatif baka tu ukai semina mantu nangkup guna logistik ninting hari, tang mega ngayanka semengat kerejasama rat entara komuniti enggau ejensi penyelamat dalam nentuka pengelantang begulai. -RBI

LIMBANG, 23 April – Siku orang tuai ke diripotka lenyau pengudah nurun ngiga ikan di Sungai Pinang, Bukit Sagan ditemu raban penyelamat selamat dalam operasyen ngiga enggau nyelamat (SAR) sehari tu tadi.

Tudah beumur 77 taun, diripotka lenyau pengudah beserara enggau bini iya urung pukul 4.30 lemai kena 22 April ba kandang endur nya, sebedau enda mujur pulai ke rumah nyentuk hari siti.

Palan Operasyen nerima ripot penusah nya ari IPD Limbang urung pukul 8.25 pagi sebedau seraban bomba ari Balai Bomba enggau Penyah Penusah (BBP) Limbang betuaika PBK I Awang Adani bin Damit berumban ngelawa endur nya bejalaika operasyen SAR.

Raban nya datai ba endur nya urung pukul 9.25 pagi lalu berengkah operasyen ngiga urung pukul 11.00 pagi pengudah penerang operasyen diberi.

Pengawa ngiga bepun ba jalai keterubah nyentuk ngagai penyauh satu kilometer lalu nadai tetemuka sebarang bekau iya.

Pengawa ngiga udah nya dikerembaika ngagai jalai kedua enggau penyauh nyentuk tiga kilometer, tang iya agi enda ditemu.

Operasyen disambung baru urung pukul 2.30 lemai enggau tim nya dibagi ngagai tiga raban, ngemeratka pengawa ngiga ba kandang endur besemak rumah panjai enggau kebun.

Pengujung iya tudah ditemu selamat urung pukul 3.40 lemai, urung empat kilometer penyauh ari rumah panjai nya.

Tudah udah nya dibai pansut ari kandang kampung ngagai palan ke likun sebedau operasyen SAR tembu abis urung pukul 5.20 lemai.

Operasyen nya mungkur empat iku kaban BBP Limbang enggau bantu 11 iku raban Polis Diraja Malaysia (PDRM), lima iku kaban APM enggau 10 iku peranak rumah panjai. -RBI

SIBU, 23 April — Pemidang Datuk Lau Cheng Kiong siti pengelenyau besai, kelebih agi ngagai sida sebilik enggau komuniti.

Nitihka ku Dato Rolland Duat Jubin, pemeri enggau jasa iya sepemanjai umur deka terus dikeingat, diberi basa sereta diukir dalam pengingat semua orang ti ngelala iya.

Rolland mega madahka, iya agi dalam gaya ati ti sinu pengudah pemidang menyadi indu iya minggu nyin kemari, tang sekali agi diuji enggau berita pengelenyau kaban iya.

“Aku nerima berita ti ngenyinuka ati tu dua hari ke udah, lalu berita tu balat ngeruga aku.

“Niang siku orang dagang ke mujur sereta Kaban Supreme Kaunsil PDP enggau Chairman PDP Pelawan,” ku iya.

Nitihku iya, pemidang Datuk Lau ukai semina diasaika sida sebilik semak aja, tang mega ninggalka empas ke besai ngagai komuniti ke udah nerima pemeri enggau jasa iya.

Rolland besampi ngambika sida niang sebilik terus diberi pengering enggau pengeliat ati napi maya ti tusah tu.

Sama bisi datai meri basa kepenudi iya nya Presiden PDP, Dato Sri Tiong Kiing Sing sereta bala Kaban Supreme Kaunsil PDP enggau bala kaban ke bukai. -RBI

KUCHING, 23 April — Opis Tenaga Kerja Sarawak (JTKSWK) ngenukuka siti surat ke udah viral bekaul enggau pemendar polisi pengereja pengawa ukai peranak menua nya pelesu, enda entas sereta nadai kala dikeluarka opis nya.

Dalam penerang rasmi ba laman Facebook rasmi opis nya, JTKSWK nyemetak madahka sida nadai kala mansut tauka ngemendarka surat nya baka ke dikerembaika ba media rama.

Nitihka penerang nya, mensia mayuh dilalau ngambika seruran bejejimat sereta anang mudah arapka dokumen ti bedau dientas pengamat iya, kelebih agi ti bekaul enggau pengawa ngambi pengereja pengawa ukai peranak nengeri tu.

“Sebarang pengawa ngentaska dokumen meseti digaga terus enggau Opis Tenaga Kerja ke besemak tauka nengah Indu Opis JTK Sarawak,” ku penerang nya.

JTKSWK mega ngingatka pengawa ngerembaika penerang ti enda betul ukai semina ulih ngelimpangka runding mensia mayuh, tang mega bisi potensial ngeruga integriti sistem ngatur pengereja pengawa sereta muka ruang ngagai pengawa nipu.

Berindik ari nya, mensia mayuh dilalau ngambika semina nganjung ngagai jalai rasmi opis nya ngulihka penerang ke betul sereta tulin, kelimpah ari ngeripot sebarang pengawa ke disangka ngagai piak bekaul. — RBI

KUCHING, 23 April – Mensia mayuh dikeingat ngambika lebih bejaga sereta anang mudah tekuing runding enggau penerang ke enda entas bekaul enggau peluang kereja ke bisi disediaka kompeni Petroleum Sarawak Bhd (PETROS).

Surat nya ti ngumbai diri ngaul pengawa ngambi pengereja pengawa ari menua luar nya udah ngujungka pengirau ati enggau mayuh jurai ari mensia mayuh, sepengudah gambar skrin enggau tuduh ti bekaul nyadi viral ba mayuh bengkah pelasar media rama.

Nengah penerang berita, PETROS nyemetak madahka dokumen ti dikerandau nya enda entas lalu nadai kala dikeluarka kompeni minyak enggau gis enggi perintah Sarawak.

Nitihka penerang kompeni nya, semua peminta kereja tauka latih industri semina dipejalaika enggau rasmi nengah portal kereja online iya.

PETROS mega ngemeratka komitmen ngemansangka bakat menua tu empu sereta nempa raban pengereja pengawa bepengelandik tinggi dikena nyukung penumbuh ekonomi Sarawak.

Mensia mayuh ke bisi tetemuka sebarang tawaran kereja tauka dokumen dipelabaka pelesu dilalau enda ibuhka pekara nya lalu semina nganjung ngagai saluran rasmi PETROS ngambika bulih penerang ke betul.

Semua peminta ungkup peluang gawa tauka latih industri ba PETROS diatur nengah portal rasmi Careers syarikat di https://careers.petroleumsarawak.com/.- RBI

SIBU, 23 April — Siku baya ke ngembuan pemesai urung 17 kaki pemanjai mujur ditangkap ba kandang Penyangkai Feri Paradom, Sibu berindik ari pengawa jampat raban operasyen ti betuaika Jeffrey Siew.

Nitihka penerang ba laman Facebook Eric Lee nengah pelasar Komuniti Bintulu, penatai jelu reptilia besai nya sebedau tu meri pengirau ati ngagai peranak enggau penguna kandang menua nya ti suah bekenaka jeti nya ungkup aktiviti ninting hari.

Dalam penerang ti dikunsi, operasyen bersepadu ti dipejalaika mujur ngawal gaya enggau lengkas dikena nentuka pengelikun mensia mayuh ba kandang menua nya.

Pengawa jampat tim ke bisi kaul mega nerima puji ketegal pemerani enggau pengeransing sida napi keruga jelu siga nya.

Berindik enggau nya, mensia mayuh dilalau ngambika seruran bejejaga lebuh ba kandang sungai enggau jeti, kelimpah nyeliahka diri ari aktiviti besemak enggau kandang endur berisiko nyema bisi kelai bisi baya.

Piak bekuasa mega ngemeratka pemesai guna mensia mayuh ngambika lengkas ngeripot sebarang utai ke bisi dipeda jelu siga ngambika atur ke bukai ulih dipejalaika ungkup pengelikun begulai. — RBI

BETONG, 23 April — Pengawa nyendiaka diri ngatur Regatta Betong 2026 terus ditegapka enggau pengawa bejalaika tradisyen Miring ke udah nyadi ba Astaka Utama Regatta, Waterfront Betong, pagi tadi.

Pengerami nya dipenyadi Ketuai Komuniti enggau Ketuai Raban Bansa ti dipadu nyadi kelai minta berekat, pengelikun enggau pengelanchar sepemanjai pengawa ngatur pengawa ninting taun nya.

Pengawa tu ngayanka penyelai pesaka budaya komuniti lokal ti terus dijaga ba tetiap gerempung rasmi di nengeri tu.

Berebak enggau nya, sesi latih penuh ungkup program panggau mega bisi dipejalaika dikena nentuka tetiap pengawa diatur, betukuh sereta nyapai standard pengatur ke tinggi.

Singkang tu ngayanka komitmen bersepadu semua piak dalam nentuka Regatta Betong tampak nyadi sebengkah pengawa ti bekualiti sereta meri empas tinggi.

Nitih ku Kaban Parlimen Betong Dato Dr. Richard Rapu, pengawa nyediaka diri ti silik dipejalaika mandangka pengeran semua piak dalam ngemujurka Regatta Betong nyadi pengerami ninting taun ti ukai semina richah, tang mega penuh enggau nilai main asal enggau budaya menua tu.

Iya mega nesau mensia mayuh datai ngerichahka agi pengerami nya begulai enggau diri sebilik sereta orang ti dikesayau.

“Datai begulai enggau diri sebilik sereta orang ti dikesayau ngerichahka agi pengerami.

“Ambi peluang beperindang enggau diri sebilik seraya bebelika barang ba bansal ti disediaka,” ku iya.

Ku iya nambah, Regatta Betong ukai semina nyadi palan pemerindang aja, tang mega nyadi pelasar ti beguna dalam nerenakka penyerakup komuniti dalam suasana ti penuh enggau pemanah ati sereta pengaga ati.

Berindik enggau nya, mensia mayuh diperansang ngambi peluang ngasaika pengagit Regatta Betong ti disadang deka nyadi enggau bemacham aktiviti ti ngerinduka ati. — RBI

KUCHING, 23 April — Stadium Perpaduan deka ditutup sementara berengkah Mei 2026 nyentuk April 2027 dikena meri awak ngagai kereja nyeruri enggau ngangkatmanah ti deka dipejalaika dikena nyendiaka diri napi Lumba enggau Main SEA 2027.

Nitihka penerang rasmi ari Sarawak Sports Corporation, pengawa nutup nya mungkur semua fasiliti stadium dikena nentuka kereja ngintu ulih dipejalaika enggau lanchar sereta likun.

Pemangku Ketuai Pemesai Eksekutif Sarawak Sports Corporation, Khairul Nizam bin Morshidi madah, pengawa nya sebagi ari pengawa ngemanahka perengka guna lumba enggau main nengeri tu ngagai tikas ke manah agi setipak enggau pengawa ngatur lumba enggau main serantau ke beprestij nya.

“Stadium Perpaduan deka ditutup ari bulan Mei 2026 ngagai April 2027 ketegal pengawa ngemanah enggau ngangkatmanah dikena nyendiaka diri napi Lumba enggau Main SEA 2027,” ku iya nengah siti penerang.

Iya mega madah, mensia mayuh ke bisi sebarang tanya tau dikenatai ngagai “Unit Business Development” ba lumur 082-442264 maya jam opis.

Berebak enggau nya, iya ngarapka mensia mayuh ulih meri kerejasama penuh sepemanjai timpuh nutup dikena nentuka semua kereja ngangkatmanah ulih ditembuka nitihka timpuh ke udah ditetapka. — RBI

BINTULU, 23 April — Sepital Bintulu ngemeratka selampur kandang sepital nyadi zon enda tau nginsap lalu pengawa neritka atur nya majak ditegapka ari sesiti maya ngagai sesiti maya.

Nengah penerang ba laman Facebook rasmi, sepital nya madahka tagang nya dipejalaika nitihka Akta Kawalan Produk Merokok ungkup Pengerai Mensia Mayuh 2024 (Akta 852), enggau pengawa matau sereta neritka atur dipejalaika ari sesiti maya ngagai sesiti maya ulih Opis Pengerai Bagi Menua (PKB) Bintulu ba semua kandang endur ke digazet.

Nitihka penerang, barang sapa individu ke ditemu nginsap ba kandang endur ke ditagang ulih dikompaun tekala nya, enggau ukum maksimum nyentuk RM5,000 enti dikenuku salah.

“Kemari, beberapa iku individu ke benung nginsap ba kandang sepital nya dikompaun PKB laban ngelanggar atur ke udah ditetapka,” ku penerang nya.

Berindik enggau nya, piak sepital minta kerejasama ari semua penguna enggau temuai ngambika seruran nitihka tagang nya dikena nentuka rampa fasiliti pengerai seruran likun, beresi sereta nadai asap insap.

Orang ti deka badu nginsap mega diperansang ngiga servis sukung nengah program ti disediaka Opis Menteri Pengerai Malaysia, nyengkaum nengah laman web rasmi JomQuit tauka ngelawa klinik pengerai enggau sepital besemak.

“Sama-sama kitai nentuka fasiliti pengerai nadai asap insap enggau produk nginsap,” ku penerang nya nerang. — RBI

PAKAN, 23 April – Tajapan ukai pelilih menua ke besai, tang Pakan ngembuan potensial ke besai mansang enti semua bengkah piak beserakup sereta sepenemu.

Kaban Kunsil Nengeri (ADUN) Pakan, Tan Sri William Mawan Ikom madah, pemujur mega meseti disempulang enggau pengeransing sereta sukung ari komuniti menua tu empu.

“Kitai ukai semina ngelanggur, tang kitai meseti ngaga pemansang seriris enggau juluk kitai ungkup pengidup rayat jemah ila.

“Reti iya, pekara pugu ukai semina ngelanggur tang ngambika inisiatif pemansang amat dipejalaika ungkup pengelantang rayat,” ku iya madah.

Mawan ke mega Penyanding Penemu ba Opis Premier Sarawak ( Industri Pemakai, Komoditi enggau Pemansang Menua), mansutka jaku tu pengudah bejadika Program Ngenegapka Ketuai Komuniti enggau Ketuai Raban Bansa (KMKK) Pelilih Menua Pakan kemari.

“Juluk kitai deka nyadika Pakan nyadi pelilih menua chunto terus ditegapka ngagai pengawa ngatur pemansang ti lebih meruan agi,” ku iya.

Mawan mega madahka, penyerakup enggau kaul ari komuniti nyadi pekara besai ke chukup beguna ambika semua langgur pemansang ari perintah ulih mujur digaga di Pakan.

Ku iya, rayat meseti meretika sida iya bukai semina nerima, tang mega bela bejalaika tangkup pengawa seriris enggau langgur pemansang ke udah ditempa perintah.

“Enti komuniti kitai enda nemu tauka enda beratika polisi perintah, kitai enda ulih ngau ngambi bagi ba selampur iya,” ku Mawan. – RBI