BRISTOL, 6 Mei – Program Doktor Falsafah (PhD) pengelama empat taun di Universiti Bristol, United Kingdom sebagi ari pelin strategik ari baruh Langgur Jalai Semikonduktor Sarawak 2030 dikena nentuka nengeri tu ngembuan pengereja pengawa ti bepengelandik ti ulih besemekih ba renggat global.
Premier Sarawak, Datuk Patinggi Tan Sri Abang Johari Tun Openg madahka program ke dipejalaika begulai enggau Yayasan Sarawak enggau SMD Semikonduktor deka ngadaka orang ke landik dalam bidang teknologi semikonduktor.
Ku iya mega, Perintah Sarawak terus beranakka puku ba pemansang modal mensia renggat tinggi nengah inisiatif dipelanja penuh ungkup pelajar PhD di Universiti Bristol, United Kingdom.
“Pengawa beranakka puku dalam modal mensia beguna amat.Kitai ngaku pemujur timpuh panjai bepanggai ba pengulih kitai ngemansangka penau, nempa pengelandik sereta ngetanka penau nya,” ku iya lebuh bejaku ba sesi ngaul strategi semikonduktor enggau Universiti Bristol ditu.
Nitih ku Abang Johari, kerejasama entarabansa baka tu meri awak ngagai Sarawak jampat agi belajar sereta ngenegapka penuduk dalam ekosistem teknologi global.
Sesi ngaul diri enggau strategik nya mega digulu pengemeran industri besai ke bepalan ba UK baka Rolls Royce, GKN Aerospace enggau Nexperia, ti mandangka pengerindu ke chukup dalam ekosistem inovasyen Sarawak. -RBI
