PUTRAJAYA, 5 Mei — Sapit Menteri Digital Datuk Wilson Ugak Kumbong nyemetak madahka raban nembiak meseti mansutka diri nyadi ketuai dalam nguna pemintar tiru (AI) enggau meruan sereta betanggungjawap ungkup pengelantang mensia mayuh.
Nitih ku iya, AI ukai agi semina nyadi teknologi jemah ila, tang udah mansang nyadi pemansut besai transformasyen ekonomi enggau rama menua ba mayuh bengkah sektor nyengkaum pelajar, pengerai enggau industri.
Iya madah munyi nya lebuh bejadika Aum Antarabansa Ke-5 pasal Nembiak 2026 (ICYOUTH) di Marina Putrajaya sehari tu ti mai rambai jaku “AI enggau Nembiak ungkup Komuniti: Ngubah Komuniti enggau Ngemajuka Pengelantang Pendiau”.
“Tanya ukai agi sekalika kitai ulih ngemansangka AI, tang sekalika kitai amat besedia ngatur sereta ngena iya enggau tanggungpengawa,” ku iya.
Dalam reti nya, iya nyemetak madahka raban nembiak enda ulih dipeda semina nyadi penguna teknologi aja, tang lebih agi begunaka diberi kuasa nyadi rebak ti deka nempa, ngiring sereta nentuka tuju ngena AI dalam mensia mayuh.
Ku iya nambah, pengawa ngaul raban nembiak enggau chakah dalam bidang teknologi ukai semina ulih ngenyampatka inovasyen, tang mega nentuka pemansang AI setipak enggau nilai mensia sereta aspirasyen menua.
Jurai ICYOUTH 2026 ngempuruka penyereta raban nembiak, akademik enggau pemain industri ari dalam enggau luar menua berandauka pangku pengawa teknologi pemintar tiru dalam nempa komuniti ti meruan agi sereta lantang, setipak enggau aspirasyen Malaysia MADANI dalam ngangkatka Malaysia menua ti nguna AI mangvai 2030- RBI
