SARIKEI, 5 Mei – Pengawa chakah Gerempung Kwong Wai Siew nyerakupka komuniti ari mayuh macham penatai terus diaku nyadi pematak penyerakup sereta penyambung ke beguna entara rayat enggau perintah ba kandang menua tu.
Sapit Menteri Kebun Bedandang Besai enggau Komoditi, Dato Sri Huang Tiong Sii madah, gerempung nya ukai semina beguna nyadi pelasar rama, tang mega bejalaika tanggungpengawa strategik dalam ngenataika aspirasyen komuniti sereta nyukung agenda pemansang perintah.
“Gerempung baka Kwong Wai Siew nyadi jematan ti nyambung rayat enggau perintah, ari nya nentuka sada nyawa komuniti didinga lalu pengelantang sida terus dijaga,” ku iya.
Iya madah munyi nya lebuh ngulu Sesi Betemu enggau Ramah Tamah Begulai enggau komuniti kandang menua nya beserimbai enggau pengerami Pesta Perau Naga ke diatur gerempung nya ba Jalai Kwong Ming/Minah, kena Hari Minggu nyin tadi.
Nitih ku iya, komitmen serakup ti seruran ngatur aktiviti komuniti enggau main asal ukai semina ngerapitka kaul entara peranak, tang mega meri pangka ngagai pengelantang enggau penegap rama di Sarikei.
Berebak enggau nya, iya mega nyemetak madahka pemansang fizikal baka pengawa ngaga Jematan Tanjung Manis–Sarikei patut disebelaka enggau ngenegapka institusyen komuniti dikena nentuka penguntung ari pemansang ulih diasaika enggau komprehensif.
“Pemansang infrastruktur meri empas ke besai ngagai ekonomi, tang penegap sesebuah komuniti iya nya ba penyerakup ke diterenak nengah pengawa chakah gerempung,” ku iya nerang.
Kelai nyukung pengawa ti majak dipejalai, iya mega bisi nyuaka pemeri RM10,000 ngagai Gerempung Kwong Wai Siew dikena ngenegapka pengawa bejalaika program komuniti.
Pengerami ti ngempuru urung 500 iku peranak menua nya mandangka kerejasama rat entara ketuai enggau komuniti ba pengawa ngenegapka penyerakup sereta meransang pemansang inklusif ba kandang menua nya. -RBI
